Bhalawi 26
26
Mbengalelu kwa bhabhatii
Kombukombu la Tolati 7:12-24; 28:1-14
1“Bambo Chapanga akapwaghike, ‘Ngamwalinganakela imong'umong'u ya ichapanga ya ntundu wokapi ghola, ngamwikamu imong'umong'u yabhu ya kubhacha wala nguzu, wala imong'umong'u ya maganga yeibhachakiki mu inchi jinu na kuijojabhela. Nepani nde Bambo Chapanga, Chapanga winu. 2Nkamula Sabato yangu na kupatopela pandu pangu pahuhu. Nepani nde Bambo Chapanga.’ ”
3“Ngati ananjengalili amuli yangu, na kughakamula malaghalakilu ghangu, na kuitenda, 4ananuntonyila iyula kwa chikahi chechipalika, na luhombi analupiha mahunu, na mikongu ja mumighonda anajipiha mapambiku ghaki. 5Kupumunda ilebhi anakujendalya mbaka chikahi cha kuhuna zabibu, na kuhuna zabibu anakujendalya mbaka chikahi cha kupanda imbeju. Nanamu anamkubha na chilebhi chamaheli, anamkula na kutupila, na kutama kwa lukwali mu inchi jinu.
6“Ananumpekya lukwali mu inchi, nanamu anamghonila panga kujeghaleka choghohi na chindu chokapi chela. Ananibhoha hinyama ikali ibhoka mu inchi jinu, na ngakwikubhi na ngondo nakanopi mu inchi jinu. 7Anamubhatopula maadui bhinu, na kubhakoma kwa lipanga. 8Bhandu nhwanu bha kwinu anabhabhatopula maadui mia jimu, na bhandu mia jimu bha kwinu anabhabhatopula maadui elufu komi. Nabhombi maadui bhinu anabhayonangika palongi jinu kwa lipanga. 9Ananumpengalyaji na kunjangatila mpata bhana bhamaheli, na kunjonjukela, nanatu anangamulakya lulaghilu lwangu na mwehapa. 10Chikahi cha mahunu anamkubha mwakali nkula mahunu gha mwande, na anaimpalika kughabhoha mahunu gha mwande, nahuli mpata mbekenyu ja kughabheka mahunu ghahenu. 11Nepani andama pachilanda jinu, wala nepani ngananhakalile. 12Ananyenda pachilanda jinu, na kubha Chapanga winu, nanamu anamkubha mabhandu bhangu. 13Nepani nde Bambo Chapanga, Chapanga winu, nenumbohiki ku inchi ja Misili, nahuli ngamwijendale kubha bhatumwa bha Bhamisili. Nepani ndunywili chingolingoli chemwakongakiki mwehapa pahingu hinu, na kuntenda njenda koni mimutu jinu njinwi kunani.
Utemulu kwa bhangakutii
Kombukombu la Tolati 28:15-68
14“Nambu ngati ngamwijowaneli na kughatenda malaghalakilu ghangu ghokapi, 15nanamu ngati anamkaniki amuli yangu, na roho hinu anaihakalili shelia yangu, na kulepalela kughatenda malaghalakilu ghangu ghokapi, na kuheketa lulaghilu lwangu, 16bhela nepani ananunhengila anana: Ananundetila panani jinu choghohi cha kupwitukila, itamu ya kujoghoha, kukomola na chitamu cheanachuntenda kubha akangalola na kumbokeha womi winu. Anampanda imbeju hinu panga kupata chokapi chela, ndandi adui bhinu nde bhaanabhakulaje. 17Nepani ananundolakya kwa kunyomela, nahuli ndapulika palongi ja maadui bhinu. Bhala bhamubhahakalila anabhuntawalaje, nanamu anamtilaje hata ngati njeta mundu joantopola.
18“Bhela ngati baada ja ghanihagha ghokapi ngamwinyowaneli, bhela, ananundapula mala saba nakanopi kwa ndandi ja mahoku ghinu. 19Ananhekatya kutali ing'omu hinu kwa kuitenda mbengu kunani hoku kubha ya kunonopa ngati choma, na inchi jinu panga iyula na kubha jijomu ngati madini gha shaba. 20Anamtumila makili ghinu pawaka, maghambu mighonda jinu ngajipihi mahunu ghaki, wala mikongu ja mu inchi jinu ngajipambiki mapambiku ghaki.
21“Ngati ananjendali kumbenga na kukana kunyowanela, ananyonjukya malapuliku ghinu mala saba nakanopi panani jinu, ngati mahoku ghinu moghabhelile. 22Ananeta hinyama ikali pachilanda jinu, nahuli ikula bhana bhinu, na kuiyonanga hinyama hinu ya kudimakika, na kuntenda ubhalangiku winu ukepaje, hata indela hinu anaing'anambuka na kubha ngati lipololu.
23“Anakubhi papamu na mambu ghanihagha ghokapi ngamwikelabhuki kabheti kwangu nepani, nambu ananjendali kupengana na nepani, 24panihapa nepani anangubha adui winu, na kundapula mala saba nakanopi, kwa ndandi ja mahoku ghinu. 25Ananundetila ngondo panani jinu, jeanajilepa kisasi kwa kuheketa lulaghilu lwangu. Chikahi pamwikubha mtilila mu michi jinu, nepani ananduma chitamu chihakau pachilanda jinu, na kuntenda ndepalyaje palongi ja maadui bhinu. 26Chilebhi chinu ananichitenda chikepaje, hata akambomba komi anabhatumila lijiku limu kuteleka mabumunda. Anabhungabhila kwa chipemu. Anamkulaji nambu ngamwitupile.
27“Kabhete ngati baada ja ghanihagha ghokapi ngamwipali kunyowanela, nambu ananjendalili kubgana nepani, 28bhela nepani anambengana na mwehapa kwa inyela jikali, na ananundapula mala saba nakanopi kwa ndandi ja mahoku ghinu. 29Panihapa anamkula inyama ya bhana bhinu bha chikambaku, na bhana bhinu bha chimbomba. 30Ananapayonanga pandu pinu panani pa kujojabhela, anamombula pandu pinu pa kubhokeha nyambiku ya kuhuwa ubani, na kujilekela mituhi jinu panani ja imong'umong'u ya ichapanga hinu, na nepani ananunhakalya mwehapa nakanopi. 31Ananijitenda michi jinu kubha mahame, na kupayonanga pandu pahuhu pinu pa kujojabhela, nanatu nganinyambakiki na kunungila kwa nyambiku hinu. 32Ananiyonangaje michi jinu na kubha ukebha, nahuli adui bhinu bhabhihika kutama monihomu bhakangachaje. 33Ananuntenda mwehapa mpechanganaje kwa bhandu bha inchi nayenge, na kuholapola lipanga langu na kunjengalela. Inchi jinu anajikubha ukebha, na michi jinu anajikubha mahame. 34Chikahi mwehapa pamwikubha mtolakiki kwa makili kujenda ku inchi ya maadui bhinu, panihapa nde inchi anajihekalya Sabato yaki, chikahi pajikubha jibhi ukebha. Bhela inchi anajipomulyaje, na kuhekalela Sabato yaki. 35Chikahi chokapi inchi pajikubha ukebha, anajipomulyaji na kuhekalela Sabato yaki, ambayu ngachejakabhi jipata chikahi mwehapa pamukabhi mtama monihomu.
36“Bhandu bhala bhabhihighalyaje pachilanda jinu, ananijitenda mitima jabhu kubha na choghohi chikolongwa mu inchi ya maadui bhabhu, hata sauti ja lihamba lelipuluta analabhatenda bhatilaje. Anabhatila na kuhabhuka ngati mundu atila lipanga, hata ngati njeta mundu joabhatopola. 37Anabhahabhukanyaje bheni kwa bheni ngati bhatila lipanga, hata ngati njeta mundu joabhajengalela. Bhela ngamwikubhi na makili gha kukomana na maadui bhinu. 38Anamuyonangikaje pachilanda ja bhandu bha inchi nayenge, na inchi ya maadui bhinu anayumilaje. 39Ngati bhakumu bhinu anabhahighalili mu inchi ya maadui bhinu, anabhayonangikaje kwa ndandi ja mahoku ghabhu, na kwa ndandi ja mahoku gha akahoko bhabhu.
40“Nambu ngati bhabhelakeka bhinu anabhang'anambwiki na kughaleka mahoku ghabhu na mahoku gha akahoku bhabhu, panani ja kungana nepani, na panani ja kumbenga kwabhu nepani, 41anabhamanyi ndandi jangu nepani kupengana nabhu, na kubhapeleka ku inchi ya maadui bhabhu, chikahi mitima jabhu jejinonwipi pajalihelihaje na kung'anambuka na kughaleka mahoku ghabhu, 42bhela, nepani anangombuka lulaghilu lwangu lonakatendiki na Ibulahimu, Isaka na Yakobo, na kujikomboka inchi jela jenakabhalaghile. 43Kwa kubha anabhajileka inchi ukebha, inchi jeniheji anajihekalya Sabato yaki chikahi pajikubha jibhi mu hali ja ukebha. Chikahi chenihechi bhombi anabhalapulikaje, maghambu bhakaikaniki shelia yangu na kuihakalila amuli yangu. 44Nambu papamu na lendenu, chikahi pabhikubha mu inchi ya maadui bhabhu, nganabhakani wala kubhahakalila kihengu cha kubhayonanga nakanopi, na kuheketa lulaghilu lwangu na bhombi. Nepani nde Bambo Chapanga, Chapanga wabhu. 45Nambu kwa ndandi jabhu ananulukombuka lulaghilu lwangu lonakahengiki na akahoko bhabhu, ambabhu nakabhabhohiki kuhuma ku inchi ja Misili, palongi ja bhandu bha inchi najengi, nahuli nepani ngubha Chapanga wabhu. Nepani nde Bambo Chapanga.”
46Yeniheyi nde amuli, shelia na malaghalakilu Bambo Chapanga ghaakahengiki pachilanda jaki na bhandu bha Izilaeli panani ja chitombi cha Sinai kwa kupetela Musa.
Currently Selected:
Bhalawi 26: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.