Bhalawi 5
5
Nyambiku yengi ya kubhoha mahoku
1Ngati mundu jokapi jola joapalika kubhoha ulandilu pachengu kubhokana na lijambu lokapi lela lealiweni au kulijowana, najombi anaakaniki kupwagha chindu, bhela, ghonihoghu nde uhakau, jonihoju anaimpalika utemulo.
2Au ngati mundu jokapi jola pachilanda jinu anaabhi mhakau panga kuholakela kwa kukamula chindu chokapi chela chihakau, anakubhi ntuhi wa chinyama cha muchitengu chekibhi chihakau, au chinyama cha kudimakika chekibhi chihakau, au hindu yeikwabha yeibhi ihakau, jonihoju akubha na mahoku.
3Au mundu anaakamwi chindu chokapi chela chihakau chechibhokana na mundu, chindu chokapi chela chechiweza kuntenda mundu kubha mhakau, hata ngati akubhi ngacheamanyi, chikahi paimanyaje, anaakubha na mahoku.
4Au ngati mundu anaalapiki kuhenga lijambu lokapi lela, lamboni au lihakau, ngati mobhahenge bhandu panga kuholalela, chikahi paimanyaje anakubha na mahoku.
5Bhela, chikahi mundu jokapi jola paikubha na mahoku kubhokana na lijambu lokapi lela pachilanda ja aghagha, impalika alandaje kubha kwa ntundu bholi moakahengi lihoku leniheli. 6Mundu jonihoju impalika kundetela Bambo Chapanga limbeleli limbomba au imbuhi jimbomba, kuhuma mu lipogha laki kubha nyambiku ja kubhoha lihoku laki. Najombi mpenganyambiku anaantendila ujonganesu kwa ndandi ja lihoku laki.
7Nambu anangati mundu jonihoju ngayiwezi kumboha mwanalimbeleli, aletaje ngunda ibheli, au mabhunda ghabheli gha injebha kwaka Bambo Chapanga kubha nyambiku ja kubhoha lihoku laki leahengike: Jimu pachilanda ja hijuni yeniheyi kwa ndandi ja nyambiku ja kubhoha mahoku, na jengi kwa ndandi ja nyambiku ja kujochakeka. 8Ailetaje hijuni yeniheyi kwaka mpenganyambiku, najombi mpenganyambiku anaachibhoha chijuni chimu kwa ndandi ja nyambiku ja kubhoha mahoku. Chenihechi achitunyulaje hingu jaki na kuuleka mmutu waki ujenjalaje, nambu ngaachighanga ipandi ibheli. 9Pandu pa mwahi wa chijuni chenihechi aumichaje munkeghi ja pandu pa kubhokeha nyambiku, na mwahi ghola ghouhighalila aujitala pahi ja matamilu gha pandu pa kubhokeha nyambiku. Ajeji nde nyambiku ja kubhoha mahoku. 10Bhela mpenganyambiku anaachibhoha chijuni cha kabheli chela kubha nyambiku ja kujochakeka, kulengana na malaghalakilu ghaghabhekakike. Kwa kuhenga bhenibhela mpenganyambiku anaanhengila ujonganesu mundu jonihoju kubhokana na mahoku ghaahengiki, najombi mundu hoju anaalekakiwa mahoku ghaki.
11Ngati mundu jonihoju ngacheaweza kubhoha ngonda ibheli au mabhunda ghabheli gha injebha kubha nyambiku kwa ndandi ja kubhoha mahoku, bhela, aletaje uhembi ghouyaghakiki wichu kilu jimu. Nambu ngaaujeghela mahuta wala ubani panani jaki, maghambu nde nyambiku ja kubhoha mahoku. 12Auletaje uhembi ghonihoghu kwaka mpenganyambiku, najombi autolaje uhembi ghonihoghu libhundi limu na kuujocha panani ja pandu pa kubhokeha nhupu kubha ngati kombukombu, na kuujocha panani ja pandu pa kubhokeha nyambiku ya kujochakeka, panani ja nyambiku yeabhohakeka Bambo Chapanga kwa moto. Ajeji nde nyambiku ja kubhoha mahoku. 13Bhela, mpenganyambiku anaanhengila ujonganesu mundu jonihoju kubhokana na lihoku laki, najombi mundu jonihoju anaalekakiwaje. Uhembi ghowihighalyaje anaukubha waka mpenganyambiku, ngati mokwabhelile kwa nyambiku ja uhembi.
Nhupu ya kulepa fidia kwa kuhenga mahakau
14Bambo Chapanga akumpwaghi Musa: 15Ngati mundu jokapi jola anaahengiki lihoku panga kumanya kwa kulepa kubhoha hindu ihuhu yeipalika kumbokeha Bambo Chapanga, mundu jonihoju ipalika aletaje limbeleli likambaku langa kubha na chilema kuhuma mu lipogha laki, na lelibhi na samani ja chipemu maalumu cha pandu pahuhu. Ajeji nde nyambiku ja kubhoha mahoku. 16Nakanopi ja ghanihagha, mundu jonihoju impalika kulepa mambu ghokapi ghaakalepalili kulepa kubhokana na hindu yeniheyi ihuhu, kwa kujonjukela pandu pa kahanu pa samani jenijela na kujibhoha jokapi kwaka mpenganyambiku. Bhela, mpenganyambiku anaanhengila ujonganesu kwa nyambiku ja limbeleli likambaku heli kwa ndandi ja kubhoha mahoku, najombi mundu hoju, anaalekakiwa mahoku ghake.
17Ngati mundu anaahengiki mahoku, kwa kuhenga lijambu lelikanakiwi ngalihengakeka mu jimu ya Amuli yaka Bambo Chapanga, hata ngati akubhi ngacheamanyi, mundu jonihoju akubha na mahoku, na impalika utemulo. 18Andetilaje mpanganyambiku limbeleli likambaku langa kubha na chilema kuhuma mu lipogha laki, na lelibhi na samani jejilengana na nyambiku jela ja kubhoha mahoku. Kwa indela ajeji mpenganyambiku anaatenda ujonganesu kwa ndandi jaka mundu jonihoju kubhokana na lihoku leahengike panga kuholakela, najombi anaalekakiwa mahoku ghake. 19Ajeji nde nyambiku ja kubhoha mahoku, chakaka jombi akubha abhi na mahoku palongi jaka Bambo Chapanga.
Currently Selected:
Bhalawi 5: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.