Bhalawi 7
7
Nhupu ya kulepa fidia
1Aghagha nde malaghalakilu kwa ndandi ja nhupu ja kulepa fidia, ambaju nde jihuhu nakanopi. 2Chinyama cha nyambiku cha kubhoha uhakau anachichinjiwaje pandu papachinjiwa hinyama ya nyambiku ya kujochakeka, na mwahi waki upalika umichiwaji ipambala yokapi ya pandu pa kubhokeha nyambiku. 3Mahuta ghaki ghokapi anaghabhohakika nyambiku, papamu na mahuta gha nkela na mahuta ghala ghaghayekalela hindu ya mkati, 4na figu yokapi ibheli papamu na mahuta ghaghayongolota ghaghabhi pambipi na chibhunu na ghala ghaghayekalela pandu panyahi gha imane, ambaghu anaghabhohakika papamu na figu heyi. 5Mpenganyambiku anaaghajochaje panani ja pandu pa kubhokeha nyambiku kubha nyambiku jejibhohakiki kwaka Bambo Chapanga kwa moto. Hajeji nde nyambiku ja kubhoha mahoku. 6Mwanalomi jokapi mu lukolu lwaka mpenganyambiku aweza kula, nambu ipalika jilelika pandu pahuhu, jeniheji nde jihuhu nakanope.
7Shelia jenjenu ja kubhoha mahoku, jilengana na jela ja nyambiku ja kubhoha mahoku: Mpenganyambiku joalongoha lihengu la ujonganeshu nde joapalika kujitola. 8Mpenyanyambiku joabhoha nyambiku ja kujochakeka kwa ndandi jaka mundu jokapi jola, anatolaje chikumba cha chinyama chechibhohakiki chela kubha chake. 9Kila nyambiku ja uhembi jejijochakiki pamoto au kutelakeka mu sufulia au mu chikalangu anajibya jaka mpenganyambiku joabhoha. 10Na kila nyambiku ja uhembi, anajibhi jihangaghinwi na mahuta au nyomu, anajibya ja bhana bhaka Haluni, najombi jighabhakikaje kwa kulengana pachilanda jabhu.
Nhupu ya kutama kwa lukwali
11Aghagha nde malaghalakilu kwa ndandi ja nhupu ja kutama kwa lukwali ambaju mundu aweza kujileta kwaka Bambo Chapanga. 12Anakubhi mundu abhoha nhupu heji ja kunchengu Chapanga, bhela, anaajibhohaje papamu na mabumunda ghangakujeghaleka amila ghaghapakiwi mahuta, mabumunda mapepandau ghaghahangaghinwi na mahuta, na mabumunda gha uhembi ghoubhi laini ghouhanganginwi na mahuta. 13Papamu na nhupu jaki heji ja kutama kwa lukwali ja kunchengu Chapanga, analeta nhupu ja mabumunda ghaghalenganakiki kwa amila. 14Anaaleta kila ntundu ghumu wa mabumunda ngati nhupu, nhupu kwaka Bambo Chapanga, ajeji nde jaka mpenganyambiku joamicha mwahi wa nyambiku ja kutama kwa lukwale mu pandu pa kubhokeha nhupu. 15Inyama ja nhupu heji ja kutama kwa lukwale kwa ndandi ja kunchengu Chapanga jilelika lichobha lelalela pajibhohakeka, ngawihighakila chindu chokapi chela mpaka lukela.
16“Nambu ngati nhupu ja lukwali heji nde ja nazili au ja kupala wamweti, anajilelakikaje lichobha lelalela pajibhohakeka na pandu pangi papahighalila jiweza kuleleka mu lichobha la kabheli lake. 17Inyama jokapi ja nyambiku jejihighalila mpaka lichobha la katatu ipalika jijochakikaje kwa moto. 18Ngati pandu pa inyama ja nyambiku ja lukwale anajikulakiki lichobha la katatu, Bambo Chapanga ngaajijetekeli. Ngajijetakalewi kwaka jombi joabhohike, kwa ndandi nde jihakau, mundu joaikulaje pandu pa nyambiku jeniheji aibya na utemulo kwa lihakau leniheli. 19Inyama jokapi jejigusiki chindu chihakau ngaikula mundu. Inyama jeniheji anajijochakika kwa moto.
“Bhandu bhokapi bhabhajetakalewa palongi jaka Chapanga bhaweza kula inyama jeniheji. 20Nambu ngati mundu jokapi nde muhakau anakuliki inyama jokapi jela ja nyambiku ja kutama kwa lukwale jejibhohakiki kwaka Bambo Chapanga, mundu jonihoju anaatengakika kutali na bhandu bhaki. 21Mundu jokapi joagusa chindu chokapi chechibhi chihakau, au chindu chihakau chaka mundu, au chinyama chechibhi chihakau, au chindu chokapi chihakau ambacho nde uhakalilu, anakuliki inyama ja nyambiku ja lukwali jeabhohakiwi Bambo Chapanga, mundu jonihoju anaatengakika kutali na bhandu bhaki.”
22Bambo Chapanga akumpwaghi Musa, 23“Ubhapwaghila Bhaizilaeli: Ngamwikula mahuta gha ng'ombi, au gha limbeleli au gha imbuhe. 24Mahuta gha chinyama chokapi chechiwi cheni au ja chinyama chechikomakiki na chinyama cha muchitengu muweza kughabheka kwa kuhengela lihengu lengi, nambu ngamwikula ng'o. 25Mundu jokapi anakuliki mahuta gha chinyama chechibhohakiki nyambiku kwaka Bambo Chapanga kwa kujochakeka kwa moto, anaatengakika kutali na bhandu bhaki. 26Kabhete, ngamwikula mwahi wokapi ghola, ukubhi wa chijuni au wa chinyama pandu pokapi pamtama. 27Mundu jokapi anakuliki mwahi wokapi ghola, anaatengakika kutali na bhandu bhaki.”
28Bambo Chapanga akumpwaghi Musa, 29“Ubhapwaghila bhandu Bhaizilaeli anana: Mundu jokapi anabhoiki nyambiku ja kutama kwa lukwale, anaampekya Bambo Chapanga pandu pa nyambiku heji. 30Aletaje nyambiku jeniheji ja kujochakeka kwa moto kwa mabhoku ghaki mweni kwa Bambo Chapanga, analeta mahuta gha chinyama hechi papamu na chihimba, najombi anachijinua chihimba hechi palongi jaka Bambo Chapanga kubha nyambiku ja kujinuliwa. 31Mpenganyambiku anaaghayonanga mahuta ghokapi panani ja pandu pa kubhokeha nyambiku, nambu chihimba anachibya chaka Haluni na bhana bhaki bhapenganyambiku. 32Chigholu cha kumalelelu cha kunyuma cha chinyama cha nyambiku hinu ya kutama kwa lukwale anamumpekyaje mpenganyambiku. 33Chigholu hechi anachikubhaje chaka mpenganyambiku joabhili mbelakeka waka Haluni joabhoha mwahi wa nyambiku ja kutama kwa lukwali, na mahuta ghaki. 34Kuhuma mu nyambiku ja kutama kwa lukwali ya Bhaizilaeli, nepani Chapanga nyopalili chihimba chela chechajinuliwi papamu na chigholu chela cha chinyama chechabhohakiki, nanatu mohiki kwaka mpenganyambiku Haluni na bhana bhake kubha lifungu labhu la mileli kuhuma kwa Bhaizilaeli.” 35Panihapa nde pandu papabhohakiki kwa ndandi jaka Aloni na bhana bhake kuhuma mu nyambiku yehabhohakewa Bambo Chapanga kwa moto, kutumbula lichobha lebhahimikwi kubha bhapenganyambiku bhaka Bambo Chapanga. 36Lichobha lela lebhajeghaliki mahuta, Bambo Chapanga akalaghalakili kubha Bhaizilaeli bhabhapekya haleli ngati lifungu labhu la mileli kwa ibhelekeku yeihika.
37Bhela, ghanihagha nde malaghalakilu kubhokana na nyambiku ja kujochakeka, nyambiku ya uhembi, nyambiku ya kubhoha mahoku, nyambiku ya kubhoha mahakau na kubhokana na nyambiku ja kutama kwa lukwali, 38ambayu Bambo Chapanga akumpeki Musa panani ja chitombi cha Sinai mu lichobha lela paabhalaghalakile Bhaizilaeli bhaleta nyambiku yabhu kwaka Bambo Chapanga, ku lipololu la Sinai hoku.
Currently Selected:
Bhalawi 7: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.