Bhalawi 9
9
Bhapenganyambiku bhatumbu lihengu labhu
1Bhela mu lichobha la nane Musa akundohiki Haluni na bhana bhaki na ihongozi bha Izilaeli. 2Musa akumpwaghi Haluni, “Utola litoli likambaku kwa ndandi ja nyambiku ja kubhoha mahoku na limbeleli likambaku kwa ndandi ja nyambiku ja kujochakeka, hinyama yokapi ngaikubha na chilema. Bhela bhabhoha nyambiku palongi jaka Bambo Chapanga. 3Ubhapwaghila Bhaizilaeli bhatola lipongu la limu la imbuhi kwa ndandi ja nyambiku ja kubhoha mahoku, na litoli limu na mwanalimbeleli limu ghokapi gha chaka chimu na ghangakubha na chilema kwa ndandi ja nyambiku ja kujochakeka, 4na ng'ombi jimu jikambaku na limbeleli limu likambaku kwa ndandi ja nyambiku ja kutama kwa lukwale, bhakumbokiha Bambo Chapanga papamu na nyambiku ya uhembi jejihanganginwi na mahuta gha zeituni maghambu lalenu Bambo Chapanga anaabhapitalyaje.”
5Bhaizilaeli bhakaletiki hindu yokapi heyi palongi ja Lihema Lihuhu ngati Musa moakabhalaghalakile, na lipogha lokapi lakaheghalili na kujema palongi jaka Bambo Chapanga. 6Panihapa Musa akapwaghike, “Haleli nde Bambo Chapanga lealaghalakili mulitendaje, nahuli ulumbalilu waka Bambo Chapanga upata kubhonikana kwinu.”
7Musa akumpwaghi Haluni, “Ujendaje pandu pa kubhokeha nyambiku nahuli ubhoha nyambiku jaku ja kubhoha mahoku na nyambiku jaku ja kujochakeka, utendaje ujonganesu kwa ndandi jaku wamweti na kwa ndandi ja bhandu, ngati bhela Bambo Chapanga moalaghalakile.”
8Bhela, Haluni akaheghalili pandu pa kubhokeha nyambiku, akalichinjiki litoli lela leakalibhohiki libya nyambiku ja kubhoha mahoku ghaki mweni Haluni. 9Bhela bhana bhaka Haluni bhakundetili Haluni mwahi ghola, najombi akajwihiki lukonji lwaki mu mwahi hoghu na kupaka mu manyelu gha pandu pa kubhokeha nyambiku, mwahi ghoukahighalili akaujitili pahi ja pandu pa kubhokeha nyambiku. 10Bhela mahuta na figu akaijochiki yokapi panani ja pandu pa kubhokeha nyambiku, ngati Bambo Chapanga moakundaghalaki Musa. 11Nambu inyama na chingumba akaijochiki pa moto kunja ja likambi.
12Bhela Haluni akachinjiki chinyama cha nyambiku ja kujochakeka. Bhana bhaki bhakundetili mwahi, najombi akaumichiki mu ipambala yokapi ya pandu pa kubhokeha nyambiku. 13Bhela bhakundetili nyambiku ja kujochakeka, chipandi chimu chimu, na mmutu, najombi akaijochiki panani ja pandu pa kubhokeha nyambiku. 14Akagholwili matumbu na magholu, na kuijocha papamu na nyambiku jela ja kujochakeka jejibhi panani ja pandu pa kubhokeha nyambiku.
15Bhela, Haluni akajiletiki nyambiku jela jejabhili kwa ndandi ja bhandu. Akajitoliki imbuhi jela ja nyambiku ja mahoku kwa ndandi ja bhandu, akajichinjiki na kujibhoha nyambiku ja kubhoha mahoku kwa ndandi ja bhandu, ngati moakatendi kwa imbuhi jela ja kutumbula. 16Haluni akaletiki nyambiku ja kujochakeka, na kujibhoha ngati moakalaghalakiwi. 17Bhela akaletiki nhupu ja uhembi, akatoliki libhundi limu na kulijocha panani ja pandu pakubhokeha nyambiku papamu na nyambiku ja kujochakeka ja lukela.
18Akachinjiki ng'ombi likambaku na limbeleli likambaku la nyambiku ja kutama kwa lukwali kwa ndandi ja bhandu. Bhana bhaki bhakumpekihi mwahi ghola, najombi akaumichiki mu ipambala yokapi ya pandu pa kubhokeha nyambiku. 19Nambu pandu pala pa mahuta gha likambaku lela na limbeleli likambaku lela, mahuta gha nkela, mahuta ghaghayekalili matumbu, figu yaki, na ghaghayekalili pandu panyahi pa imani, 20hayeyi yokapi bhakaibhekiki panani ja ihimba, bhela Haluni akaghajojichi mahuta gha hinyama panani ja pandu pa kubhokeha nyambiku. 21Nambu Haluni akajinwi ihimba yela na lipaja la kunyuma la kumalelelu palongi jaka Bambo Chapanga kubha nyambiku ja kujinuliwa, ngati Musa moakalaghalakile.
22Bhela Haluni paakajomwi kubhoha nyambiku yokapi, nyambiku ja kubhoha mahoku, nyambiku ja kujochakeka na nyambiku ja kutama kwa lukwali, akabhajinulili bhandu mabhoku, akabhapengalili, na kuhuluka pahi. 23Bhela Musa na Haluni bhakajingili mkati ja Lihema Lihuhu. Pabhakapitiki kunja bhakabhapengalili bhandu, nawombi ulumbalilu waka Bambo Chapanga ukabhapitalili bhandu bhokapi. 24Moto ukahikiki kuhuma mu ulumbalilu waka Bambo Chapanga, ukajochiki nyambiku jela ja kujochakeka, papamu na pandu pa mahuta ghaghakabhi panani ja pandu pa kubhokeha nyambiku. Bhandu bhokapi pabhakaweni lijambu heli, bhakajamalili kwa chiheku na kuchikama ukutama mbaka pahi.
Currently Selected:
Bhalawi 9: MpBV
Highlight
Share
Compare
Copy
Want to have your highlights saved across all your devices? Sign up or sign in
The New Testament in Mpoto Language ©The Word for the World International and Mpoto Language Translation, 2020 All rights reserved.