Jọn 6
6
Jisọs ọnọ Owo Tọsin Ition Udia
1Ke emi ama ekebe, Jisọs ama afiak edem ekebe inyañ Kalili emi enyuñ ekotde Taiberias aka edem eken. 2Ndien akwa otu owo ema etiene Enye ke ntak emi mmọ ekekutde mme utibe idiọñọ emi Enye akanamde ke idem mme mbon udọñọ. 3Jisọs ama ọdọk enyọñ obot eketetie ye mme mbet Esie. 4Koro usọrọ uwọrọ ufin mme Ju ama ekpere. 5Ke ini emi Jisọs emenerede enyin ese, Enye ama okut akwa otu owo nte esañade ebine Enye. Enye ọwọñọde enyin onyuñ obup Filip ete, “Mmọñ ke edidep uyo inọ mme mmọ emi eta?” 6Jisọs okobup mbume emi man Enye odomo Filip ese, koro Enye ama ọdọdiọñọ ke esit Esie se Enye enyenede ndinam.
7Filip ama ọbọrọ Enye ete, “Okuk utom owo kiet ke ọfiọñ itiaita idikemeke ndidep uyo emi ekemde mme mmọ emi ndita owo kiet kiet.”
8Mbet Esie kiet emi ekerede Andru, emi edide eyen eka Saimọn Pita ama ọdọdiọñọ ete, 9“ekpri eyen eren kiet odu ke otu emi, emi enyenede ebok uyo ibokpot ition ye iyak iba. Edi nso ke ekeme ndida emi nnam?”
10Jisọs ama ọdọhọ ete, “Enam kpukpru owo etetie.” Ediwak mbiet ama odu ke ebiet emi, do ke kpukpru owo eketetie, ama esim ñkpọ nte tọsin owo ition. 11Jisọs ama emen mme ebok uyo oro, ọnọ Abasi ekọm, onyuñ edeme ọnọ mme mmọ emi eketiedetie ke mbiet eta nte mmọ ekeyeyom. Enye akanam kpa ntre ye iyak, ndien kpukpru owo ema eta nte ekeyuhọde.
12Ke ini mmọ ema eketa nte ekekemde mmọ, Jisọs ama ọdọhọ mme mbet Esie, ete, “Etañ kpukpru mme mbeñe oro ekeduọñọde, ekuyak ndomokiet atak.” 13Do mmọ ema etañ kpukpru enyuñ edọñ ọyọhọ ke akpasa duopeba se ikeduọñọde ito uyo ition ye iyak iba emi otu owo oro eketade.
14Ke ini mme owo emi ekekutde utibe ñkpọ emi Jisọs akanamde, mmọ etọñọ nditiñ ete, “Ke akpanikọ, emi edi Prọfet emi akanade edi ke ererimbot.”
15Jisọs ama ọdiọñọ ete ke mmọ emọñ edimum Imọ ke odudu enam Edidem, ke ntre Enye ama adaha ọdọk ke enyọñ obot ikpọñ.
16Ke mbubreyo oro mme mbet Esie esuhọde eka ke mben ñkpọdiọhọ mmọñ, 17ke ebiet emi mmọ ekedukde ubom enyuñ etọñọ ndibe inyañ ñka Kapanọm. Ñkuteyo ama esim mmọ ke akpa, ndien Jisọs ikeduhọ do ye mmọ. 18Ọkpọsọñ oyobio ama ofume onyuñ etimede akpa. 19Ke mmọ ema ekewat ubom ñkpọ nte itiat ita mme inañ, mmọ ema ekut nte Jisọs asañade ke enyọñ mmọñ ebine ubom, ndien ndik ama anam mmọ eti eti. 20Edi Jisọs ama ọdọhọ mmọ ete, “Ekufehe ndik, ke edi Ami!” 21Mmọ ke ekeyoyom ndimum Enye nsin ke ubom; edi kpa ke ndo ndo oro ubom ama esesim isọñ ke ebiet emi mmọ ekekade.
22Ke ndañnsiere, otu owo emi ekedude ke edem ñkpọdiọhọ mmọñ eken ema ekut ete ke ñkpasip ubom kiet kpọt ọkọsuhọ, mmọ ñko ema ediọñọ ete ke Jisọs ikodukke ubom ye mme mbet Esie, koro mmọ ema edaha ekpọñ Enye. 23Mme ubom efen ema eto Taiberias edibehe ke ebiet emi mme otu owo oro eketade uyo. 24Ke ini otu owo emi ekekutde ete ke Jisọs ikesineke ke mme ubom oro ndomokiet, mme mme mbet Esie, mmọ ema eduk mme ubom enyuñ eka Kapanọm ndiyom Jisọs.
25Ke mmọ ema ekekut Jisọs ke edem ñkpọdiọhọ mmọñ eken, mmọ ema ebup Enye ete, “Andikpep, ini ewe ke Afo ekesim mi?” 26Jisọs ama ọbọrọ ete, “Ami ntiñ akpanikọ nnọ mbufo, mbufo eyom Mi, idighe koro mbufo ekutde mme idiọñọ ye mme utibe ñkpọ, edi, koro mbufo eketade mme ebok uyo oro enyuñ eyuhọ. 27Ekunam utom ke ntak udia emi edibiarade; edi ekam enam utom kabaña udia emi edibighide ikesim nsinsi uwem. Edi udia enye oro ke Eyen Owo edinọ mbufo, koro Abasi emi edide Ete, amayak idiọñọ edinyime Esie ọnọ Enye.”
28Do ke mmọ ekebup Enye ete, “Ñnyin idinam nso man ewut nte ñnyin imenam utom Abasi?”
29Jisọs ama ọbọrọ mmọ ete, “Emi edi utom emi Abasi oyomde enam: Enim Enye emi Enye osiode ọdọñ ke akpanikọ.” 30Do ke mmọ ekebup Enye, ete, “Mme nso idiọñọ utom odudu ke Afo uduwut man otodo ñnyin ikut inyuñ inim Fi ke akpanikọ? Nso ke Afo udunam? 31Mme Ete ete ñnyin ekedia mana ke isọñ utatan, kpa nte ñwed Abasi etiñde ete: Enye ọkọnọ mmọ uyo oto ke enyọñ eta.”
32Jisọs ama ọdọhọ mmọ ete, “Ami ntiñ akpanikọ nnọ mbufo, nte ke uyo emi Moses ọkọnọde mbufo ikedighe uyo emi otode enyọñ, edi Ete Mi edi Enyemi ọnọde mbufo idem ata uyo emi otode enyọñ. 33Koro uyo emi Abasi ọnọde edi Enyemi otode ke enyọñ ọsuhọrede edi onyuñ ọnọ ererimbot uwem.”
34Mmọ ema edọhọ ete, “Ete, ọtọñọde ke emi, ka iso ndinọ ñnyin uyo oro.”
35Do ke Jisọs akayarade ete, “Ami ndi uyo uwem oro. Enyemi edide etiene Mi, idikopke biọñ, ndien owo emi enimde Mi ke akpanikọ idikopde nsatitọñ. 36Edi kpa nte Ami ñketiñde nnọ mbufo, mbufo emekut Mi, edi kpa ye oro mbufo inimke ke akpanikọ. 37Kpukpru mme mmọ emi Ete ọnọde Mi, eyedi etiene Mi, ndien owo ekededi emi edide etiene Mi, Ami ndibinke nduọk. 38Koro Ami ñkoto ke enyọñ nsuhọrede ndi, ñkedighe ndinam uduak Mi, edi ndinam uduak Enye emi ọkọdọñde Mi. 39Ndien emi edi uduak Enyemi ọkọdọñde Mi, nte baba kiet ke otu mme mmọ emi Enye ọnọde Mi ekusop, edi yak Ami mmenerede mmọ kpukpru nsin ke uwem ke akpatre usen. 40Koro se Ete Mi oyomde edi emi: Nte yak kpukpru mme mmọ emi ekutde Eyen enyuñ enim Enye ke akpanikọ, ana enyene nsinsi uwem; ndien Ami ñyemenerede mmọ nsin ke uwem ke akpatre usen.”
41Mme Ju ema etọñọ ndikuni mbaña Enye, koro Enye ọkọdọhọde ete, “Ami ndi uyo oro emi okotode ke enyọñ ọsuhọrede edi.”
42Do ke mmọ ekedọhọ ete, “Nte emi idighe Jisọs eyen Josef, emi ñnyin idiọñọde ete ye eka esie? Enye ekeme didie idahaemi ndidọhọ ete, ‘Ami nto ke enyọñ nsuhọrede ndi’?”
43Edi Jisọs ama ọbọrọ mmọ ete, “Etre ñkuni ke otu mbufo.” 44“Baba owo ndomokiet ikemeke ndidi ntiene Mi ke mibọhọke Ete Mi emi ọkọdọñde Mi oduri enye ọnọ Mi, ndien Ami ñyemenerede enye nsin ke uwem ke akpatre usen. 45Mme Prọfet ema ewet ete: ‘Edi Abasi edikpep kpukpru owo ñkpọ.’ Owo kiet ekededi emi akpañde utọñ ọnọ Ete onyuñ ekpepde ñkpọ oto Enye eyedi ebine Mi. 46Baba owo ndomokiet akananam ikwe Ete, ke mibọhọke owo kiet emi otode ke Abasi; kpa Enye ikpọñ okut Ete.
47Ami ntiñ akpanikọ nnọ mbufo nte, ke enyemi enimde ke akpanikọ enyene nsinsi uwem. 48Ami ndi uyo uwem. 49Mme ete ete mbufo ema eta mana ke isọñ utatan, edi mmọ ema ekpaña. 50Edi uyo emi otode ke enyọñ ọsuhọrede edi, edi utọ emi, nte owo ekededi atade enye idikpaha. 51Ami ndi odu uwem uyo, emi okotode ke enyọñ ọsuhọrede edi: Edieke owo ekededi atade uyo emi, enye eyedu uwem ke nsinsi. Uyo emi Ami ndinọde enye edi ikpọkidem Mi emi Ami nnọde man otodo ererimbot edu uwem.”
52Mme ikọ emi ama ada ọkpọsọñ eneni iyaresit edi ke otu mme Ju. Mmọ ema ebup ete, “Owo emi ekeme didie ndinọ ñnyin ikpọkidem Esie ita?”
53Jisọs ama ọdọhọ mmọ ete, “Ami ntiñ akpanikọ nnọ mbufo, edieke mbufo mitaha ikpọkidem Eyen Owo, inyuñ iñwọñ iyip Esie, mbufo idinyeneke uwem ke idem mbufo. 54Owo ekededi emi atade ikpọkidem Mi onyuñ ọñwọñ iyip Mi, enyene nsinsi uwem, ndien Ami ñyemenede enye ke ñkpa nsin ke uwem ke akpatre usen. 55Koro ikpọkidem Mi edide udia ke akpanikọ, ndien iyip Mi onyuñ edide ediñwọñ ñkpọ ke akpanikọ. 56Owo ekededi emi atade ikpọkidem Mi onyuñ ọñwọñde iyip Mi, odu ke Ami ndien Ami ñko ndu ke enye. 57Kpa nte Odu-uwem Ete ọkọdọñde Mi, ndien Ami ndu uwem oto ke ntak Ete, kpa ntre ñko ke enye emi atade ikpọkidem Mi, onyuñ ọñwọñde iyip Mi edidu uwem ke ntak Mi. 58Emi ndien edi uyo emi okotode enyọñ ọsuhọrede edi, enye itiehe nte uyo emi mme ete ete mbufo eketade, edi ndien, mmọ ekpaña. Owo emi editade uyo enye emi eyedu uwem ke nsinsi.” 59Jisọs eketiñ emi ke ini emi Enye akakade iso ndikpep ñkpọ ke ufọk ukpepñkpọ mme Ju ke Kapanọm.
60Ke ini mme ediwak mmọ emi eketienede Enye ekekopde mme ikọ emi mmọ ema edọhọ ete, “Ukpepñkpọ enye emi ọsọñ akaha. Anie ekeme ndikpañ utọñ nnọ utọ ikọ emi?”
61Jisọs ama ọdiọñọ ete ke mme mbet Imọ ke ekuni kabaña se imọ iketiñde, do ke Enye okobup mmọ ete, “Nte emi anam mbufo eyom ndifiak edem? 62Nso ndien ke mbufo ekpetiñ edieke mbufo ekutde Eyen Owo nte ọdọkde enyọñ afiak aka ebiet emi Enye okodude ke editọñọ? 63Se inọde owo uwem edi Spirit Abasi; odudu obukidem inyeneke ufọn ndomokiet. Mme ikọ emi Ami ntiñde ye mbufo edi spirit ye uwem. 64Kpa ye oro, mbufo inimke ke akpanikọ.” Jisọs ama ọfiọk toto ke editọñọ mme mmọ emi midinimke ke akpanikọ, ye enyemi edinyuñ itapde Enye.
65Enye ama aka iso nditiñ ete, “Emi edi ntak emi Ami ñketiñde nnọ mbufo nte, baba owo kiet ikemeke ndidi ntiene Mi ke mibọhọke Ete ọnọ enye ukeme.”
66Ọtọñọde ke ini oro ata ediwak mme mbet Esie ema efiak edem ikonyuñ itieneke Enye aba.
67Jisọs ama obup mme mbet Esie duopeba, ete, “Nte mbufo ñko emọñ ekpọñ Mi?”
68Saimọn Pita ama ọbọrọ Enye ete, “Ọbọñ mi, anie ke ñnyin idikpọñ Fi ibine? Afo enyene mme ikọ nsinsi uwem. 69Ñnyin imenim ke akpanikọ inyuñ idiọñọ ite ke Afo edi Edisana Eyen Abasi.”
70Do ke Jisọs ọkọbọrọ ete, “Nte Ami ñkemekke mbufo owo duopeba? Edi owo kiet ke otu mbufo edi eke andidiọk.” 71Enye eketiñ abaña Judas, eyen Iskariọt, emi, okposuk edi emi enye ekedide kiet ke otu mme mbet duopeba, enye ke utit ekenyene nditap Ọbọñ Jisọs.
Currently Selected:
Jọn 6: OOÑE
Highlight
Share
Copy
Want to have your highlights saved across all your devices? Sign up or sign in
Biblica® Open Efik Living New Testament™
Copyright © 1995 by Biblica, Inc.
“Biblica” is a trademark registered in the United States Patent and Trademark Office by Biblica, Inc. Used with permission.
