Mlk 8
8
Yeesu wa disha bandu elufu mia yinaa
(Mat 15.32-39)
1Mu maama masu, kiandu kikata kya bandu hakya kumaana lungi kudi Yeesu. Kumona ndabeene na kindu kya kudya, Yeesu bya taana badingisi baaye na kuba jyongodela: 2«Na monena lusa kiiki kiandu kya bandu. Kumona yaata mafuku masatu badi kukumo naami na ndabadi lungi na byakudya. 3Itu na balaa ba yeene kwaabo ibo na zala, bi lebela na kuona muzila. Kumona bamo hamukidi haabo beeva kulakula».
4Badingisi baaye haba mujyongodela ti: «Mudiino bua dya lungu tumonena kuni bidyazi byabule byaku badisha?» 5Yeesu bya bayuzya: «Mudi na mikati yinga?» Haba yaka ti: «Tudi na mikati musamboo».
6Haŋo Yeesu bya saudila bandu ba yakane haasi. Bya buula yeya mikati musombo na kuboya abee kudi Kabejya. Haŋo bya yibela na kuyiabila badingisi baye kwakuyi habanyina bandu. Badingisi baaye haba baabanyina. 7Benange byakebee na bibelelo bishee. Yeesu bya hajya ti Kabejya wafiyudile bebya bibelelo. Na kusaudila mitonge baaye bahabanye byakebee. 8Haŋo bandu booso ha baadya na kushiba na badingisi baaye haba tondola bindi byeshaala na kuyuzya taba musamboo. 9Bandu beedya bebya bidyaazi bene hangi elufu yinaa.
Kisha Yeesu bya balaa baaluke. 10Akeaŋa, bya banda mu mashua kukumo na mitonge baaye, na byaba yena mukisi kya Dalmanutha.
Bafalisayo baajya Yeesu wabatele kimo kingulungulu
(Mat 12.38-42; 16.1-4)
11Bamo Bafalisayo habaava kudi Yeesu na kusomba kutambaka naye. Bevula kumutea. Haŋo haba muajya waba teele kingulungulu kimo kya kumonesha ti butangala bwaye bwa nyomokela haulu. 12Yeesu bya mona susu mutima dyaye na kuboya: «Kwakayi bandu bamaanu masu bakikeba kimo kingulungulu? Ngibasaudila ti kwa kwinikindu, ndaba kuebwa kingulungulu neekimo»!
13Haŋo Yeesu bya basama, bya banda mu mashua, na kuyabuka mweela wakabidi wa ziba.
Haisho dya Mafalisayo na dya Helode
(Mat 16.5-12)
14Badingisi baaye beluba kubuula mikati ya luendo. Benange na mukati huumo bobo mu mutumbu. 15Yeesu bya bamanya na kuboya: «Mukwikengeyele na haisho dya Bafalisayo na dedya dya Helode».
16Haŋo mitonge baye habasikita mbaka ibo kwaibo, na kuboya ti: «Wa yakula beebya kumona ndatudi na mikati».
17Iye Yeesu bya yuka mbaka yaabo, kwa bebya bya bayuuzya: «Kwakaayi mukita mbaka ti ndamudi na mikati? Mbini ndamwe teejya bilweela wala ndamweyuka? Mbini! Matima miinu makidi manyumine? 18Mudi na meeso buune ndamukimona? Mudi na makushu ila ndamukiteejya? Ndamukiejya lungi: 19ti haŋa hambeebela yeya mikati yitano ya kushibisha bandu helufu yitano? Ndamba yinga yamwe yuza makombwa?» Haba muyaka ti: «Ndamba kumi nayibidi.» 20Bya bayujya lungi: «Haŋa hambee bela yeya mikati musambo yakushibisha bandu helufu yinaa, mweyujya ndamba yinga ya bindi bya mweetondola bya makombwa?» Haba yaka ti: «Musamboo.» 21Haŋo Yeesu bya bayujya: «Manee nabiino ndamweteejya bobo»?
Yeesu wafuula mukufu yumo ku Bethesaida
22Haŋo Yeesu na mitonge baye habe sosoka mu mukola wa Betesaida. Haŋa, bandu haba muvishila Yeesu mundu yumo yidi mukufu,#8.22 Mukufu mundu yidi bubeleke meeso na haba kwi haya na Yeesu wamulengele kuboya ti wamufuule. 23Yeesu bya kwata kiboko kya yowa mukufu na kuyena naye haaza hamukola. Kisha bya fiila mata ku meeso ma yowa mukufu na kumuibikila kiboko na kumu yuujya, «Ukimona kimo kindu?» 24Yowa mukufu byalola na kuzyongola ti: «Ngimona bandu, ila ngibamona bidi miti yiki sumuuka.» 25Yeesu bya hibika lungi biboko ku meeso mayowa mundu. Yowa mundu bya fuuka na bya somba kumona bindu byooso bilweela. 26Haŋo Yeesu bya mulaa wayene kwaye na kumuzyongodela: «Nee mumukola ndualuka lungi».
Petelo wayakula hululu ti Yeesu udi Kilisito
(Mat 16.13-20; Luk 9.18-21)
27Nyuma ya haŋa, Yeesu na badingisi baaye haba hezela mudye bua haba yena mumikola yikinyunga mukola wa Kaisalia Filipi. Habenange muzila, Yeesu bya yuuzya badingisi baye: «Bandu bakiboya ti miimi ni naani?» 28Haba muyaka ti: «Bamo bandu bakiboya ti udi Yohane Luyabikana mumeema, bangi baki boya ti udi Elia. Bangi lungi baki boya ti udi yumo wa basauzi ba Kabejya».
29Yeesu wa yuujya lungi badingisi baye: «Ko! Banyu, muki yakula mimi mbidi naani?» Petelo bya yaka: «Beebe udi Kilisito!» 30Yeesu bya balanga kushu minyee ti ndabasaudila mundu wowa mukizi waaye.
Yeesu wayakula kukidila kumota na kufukuka kwaye
(Mat 16.21-28; Luk 9.22-27)
31Haŋo, Yeesu bya somba kulangidila badingisi baye bibi: «Mimi Mwana wa Mundu ngibambana kusuba kwabule, na kubengebwa na banunu, na bamupelo bakata na balangidishi ba buta*. Na mongo ya haaŋo binguyaisha ila kisha mafuku masatu ni fukuka.» 32Yeesu webasaudila maa mooso hululu.
Haŋo Petelo bya mubuula hangondo na bya somba kumu kandila kukidila mauya maaye. 33Ila Yeesu bya funduluka na kulola kudi badingisi baaye, kisha bya hanunukila Petelo na kumu zyongodela: «Hezela, haluka nyuma yaami Shetaani! Kumona miejyo yoobe ndayidi bidi miejyo ya Kabejya. Ila ukiheejya bikiheezya bandu»!
34Haŋo Yeesu bya taana kiandu kyabandu kukumo na badingisi baaye na kubasaudila: «Itu yumo wavula kuva kwambidi, wa kwibenge iye mwinikindu, wakwi tulule musalaba waaye na wave kwambidi. 35Kumona mundu wooso kivula kufuula mwejyo waaye uuzizimishanga. Ila yowa wooso yizizimishanga mwejyo waye kukidila miimi na kukidila mauya malweela, uufulanga. 36Yi nyangujya mundu kaayi itu wavuka bindu byooso bya muune mu musenge, na kuzizimisha mwejyo waye? 37Ao ngike kindu kihaana mundu kwa kuula mwejyo waye?
38Muyuke ti bandu baleelo badi na bubi na ndabaki tabuka ka Kabejya. Kukidila bebya itu mundu wangu ndeejyela miimi buuvu na kuteejyela mauya maami busu bwaba bandu miimi Mwaana wa Mundu niba teejyela buuvu hambivanga mubutangala bwa Shami kukumo na ba Malaika baami balweela».
Currently Selected:
Mlk 8: bnx
Highlight
Copy
Compare
Share
Want to have your highlights saved across all your devices? Sign up or sign in
2025 Forum Communautairre des Traducteurs de la bible et Alphabetisation
