San Juan 2
2
Jun k'ulnem chpam tinmit Caná ukwent Galilea
1Churox ij x'an jun k'ulnem chpam tinmit Caná che o pukwent Galilea. Uchuch Jesús o chpam un k'ulnem. 2Ri Jesús rich'il nk'aj udiscípulo, xijisk'ixik rech kiyo'pnik, kikla un k'ulnem. 3Echi' xk'is u'al uva, ri uchuch Jesús xub'ij che:
—Otchich u'al uva, —xche che.
4Ri Jesús xub'ij che:
—Nan, ¿suche che xa chwe in kb'ij la? Mja na ko'pan ij che kink'ut nchak chikuch mnaq, —xche che.
5Ni uchuch Jesús xub'ij chke nk'aj che kiyitjinik kitob'an chpam un k'ulnem:
—China' runjel su kub'ij Jesús chiwe, —xche chke.
6Chla' o waqib' (6) ab'aj eb'al, jala peche kchukb'al nk'aj aj Israel che kikkojo echi' kikjos'ij kib' chjuch Dios. Chikjunjnal jun eb'al kuch'ij jmuch' (80) seno jun ciento (100) litro jron. 7Ri Jesús xub'ij chke nk'aj ajtob'nel chpam un k'ulnem:
—Chinojsaj nk'aj eb'al che jron, —xche chke.
Ni nk'aj ajtob'nel chpam un k'ulnem, xiknojsaj nk'aj eb'al, utz unojsaxik xik'an che. 8Ni Jesús xub'ij chik chke:
—Chiwesaj b'i ch'in che, chik'ma b'i ruk' najk'mal b'e che un nim'ij, —xche chke.
Jala xik'ano peche xub'ij Jesús chke. 9Najk'mal b'e che un nim'ij, xuna' un jron che u'al uva chik antajnaq, per rit'am taj jachi xikma wi. Xaq xaw nk'aj ajtob'nel chpam un k'ulnem kit'am jachi xikma wi, mal jare ke xiknojsaj nk'aj eb'al ruk' jron. Najk'mal b'e xusk'ij pnoq nala che kitjinik kik'le'ik. 10Jawa xub'ij che:
—Kunjel jumpa mnaq, jare nab'e kikya un utzlaj u'al uva. Echi' k'ut nim kitjom chik nk'aj mnaq, tik'ri kikya un u'al uva che mas taj nim rjil. Ni at jare aklom kanoq un utzlaj u'al uva rech k'isb'alre, —xche najk'mal b'e che nala.
11Jare wari', un nab'e k'utb'al xu'on Jesús, chla' chpam un tinmit Caná ukwent Galilea. Xa jala', xuk'ut chikuch mnaq che nim u'ij, ni nk'aj udiscípulo xiyikjon che.
12Tik'ri xel b'i chla', x'e chpam un tinmit Capernaúm, rich'il uchuch, rich'il nk'aj rachlal, soq rich'il nk'aj udiscípulo, xikanaj kan keb' uxib' ij chla'.
Ri Jesús xyuresaj nk'aj ajk'ay chpam nimlaj rchoch Dios
(Mt 21:12-13; Mr 11:15-17; Lc 19:45-46)
13Echi' xa ch'in chik kraj che kuriq nim'ij kech nk'aj aj Israel che Pascua kb'ix che, ri Jesús x'e jala chpam tinmit Jerusalén. 14Chla' chpam nimlaj rchoch Dios xyuriq nk'aj ajk'ay. O kiyitjin che uk'ixik chkop, o nk'aj chik kikk'ij chij, o nk'aj chik kikk'ij taq tz'kin paloma ub'i'. Soq o nk'aj chik iku'l ruk' nk'aj kmixa rech kikk'ex uwuch pwaq. 15Ni Jesús xu'on jun krute, klob' xukoj che amb'alre, tik'ri xyuresaj loq kunjel nk'aj ajk'ay ruk' nukrute, rich'il nk'aj kchij, rich'il nk'aj kichkop xyuresaj loq. Xutrij b'i nk'aj kirjil nk'aj ajk'xal taq pwaq, xupitzk'ej b'i nk'aj kmixa chikuch. 16Jesús xub'ij chke nk'aj ajk'il tukmux:
—¡Chiwesaj b'i nk'aj ik'ay chi'! ¡Xa mi'an k'iyb'al che rchoch nQaw! —xche chke.
17Ni nk'aj udiscípulo Jesús, xna'taj chke su tz'ib'tal chpam Tyox Wuj, che kub'ij:
«Ri wanma' mas kul'oj ri wchoch la nQaw.
Ri wchoch la, jare mas b'enaq nk'u'x ruk', ast retal kinya nk'asnmal pujlom», kcha'. (Sal 69:9)
18Nk'aj aj Israel xikk'ot uchi' Jesús, xikb'ij che:
—¿Su jun retal kak'ut chiquch rech kqach'ob'o chin xuya pa'ab' che kyawesaj b'i nk'aj ajk'ay chpam nimlaj rchoch Dios? —xiche che.
19Jesús xub'ij chke:
—Chiwlujsaj un nimlaj rchoch Dios ri'. In xa uxib' ij kin'an che uyakik jun b'welt chik, —xche chke.
20Nk'aj aj Israel xikb'ij:
—Kawnaq ruk' waqib' (46) jnab' xyaktaj wi ri nimlaj rchoch ri Dios ri', tik'ri kb'ij la che xa uxib' ij k'an la che uyakik. ¿Su mow? —xiche che.
21Ri nimlaj rchoch Dios che xub'ij Jesús chke jarewa ri ucuerpo Re. 22Echi' xk'astaj Jesús churox ij chikxo'l nk'aj kamnaq, tik'ri xna'taj chke nk'aj udiscípulo su ub'im kan chke. Ena xiyikjon che utzij Dios chpam Tyox Wuj, soq xiyikjon che utzij Jesús.
23Echi' xurqa nim'ij Pascua, ri Jesús o pnoq Jerusalén. Ik'i mnaq xiyikjonik, mal xikkil nmaq taq k'utb'al xu'on Jesús chikuch. 24Ni Jesús xukub'a t uk'u'x chkij nk'aj mnaq, mal rit'am su o chpam kanma' kunjel. 25Nmister taj che o jun kub'ij che, su unom rich'il su kuchomaj jun mnaq, mal ri Jesús rit'am su o chpam kanma' kunjel jumpa mnaq.
Currently Selected:
San Juan 2: qucSAS
Highlight
Share
Copy
Want to have your highlights saved across all your devices? Sign up or sign in
El Nuevo Testamento
en K'iche' de San Andrés Sajcabajá
© 2024 Asociación Educativa y Cultural Maya (AECM)
en colaboración con SIL Global
