Malgo 10
10
Malooŋ ma Yees mu paan yi guzwa waal
(Maday 19:1-12; Luug 16:18)
1Yees gadoog ha gihan gini, ibun gaween mu giziuŋ gya Yudeyaa, gu sim lambaan la Yoldan. Baad bavul bawiy lyaag mu guvugaan hagal nde; ibun gayandag gubalooŋ nga bwagal gigalal gyande . 2Bafalize bapusaan gul nde mumbad gumumeg, bamuwuful: «Nsig ya biis buyabal leed nswa gulu bagal mu guzwa waal ande mukaad?» 3Yees gabafuduleen: «Kii nsig Mose galuwe?» 4Baa ndaa: «Mose bugaleed nswa gul bagal mu guzwa waal, gag de wasonog mugaand wu guzweleen waal.»#10:4 Gul.24.1. 5Ibun Yees gabafuduleen ndaa: «Mose galusonogeen nsig yini mumbad midim myabeen mileen bwiid. 6Gaanz mu luyandag lu gifud, Nzaam gabayilig bagal ande mukaad#10:6 Luy 1.27; 5.2.. 7“Gyagiin, bagal gagusis gidaan ande ngwaan mumbad guvugan ande mugaaz ande, 8ibun abaa bool bagidig muud mos#10:8 Luy 2.24. Guvugaan ande mugaaz ande: mu Masonog mambaan loo mili..” Gyagiin, loo bagugal lyag bool gaanz muud mos. 9Gyagiin ada muud loo gafed gabas bin bimavugus Nzaam.» 10Daaŋ lubagal lyaag mukab la nzo, balongog bawuful lyaag Yees mumbad maamb mween. 11Nde gabafuduleen ndaa: «De bagal waboomon mugaaz ande wu magweel ibun maseen mukaad wambaan, wasal ginduum gutwaal mugaaz ande wateeg; 12gidees gimos, de mukaad wagabanaan ande mulim ande ibun magweel mulim wambaan, wasal se ginduum.»
Yees gasagman baan
(Maday 19:13-15; Luug 18:15-17)
13Baad badwaal baan bakund gul Yees mumbad gabasi myoog, gaanz balongog bande munu gubafudul. 14Daaŋ Yees gadeel mutiind wun, gawug kab ibun galees balongog bande ndaa: «Lubabomon baan bakuund bawiy gulu me! Loo gubagaaŋ nzil, pamb lo gi Mfum gya Nzaam gileen mumbad ban bileen nga baa. 15Yabal lulees, mukyeleg: muud wun wago guyamb gi Mfum gya Nzaam nga mwaan wakuund, loo gasalawiŋin mu gi Mfum gyeen.» 16Ibun, gaseen baan gu myoog myande, gabasi myoog ibun gabasagaman.
Yees ande mvwaam
(Maday 19:16-30; Luug 18:18-30)
17Daaŋ Yees gaweneeg mu nzil, muud mos gawiy tiin gulu Yees, gafogom gutwaal ande ibun ga muwuful ndaa: «Looŋ la piim, gumaloom kii yafed sal mu guseen luziiŋ la mvul ande mvul?» 18Yees gamufuduleen ndaa: «Mumbad akii wabala mbileen Looŋ la piim? Loo gulene ande muud wapiim, dogolo gag ndebeen Nzaam. 19Nze uyaba mansiig ma: “Loo guzwa; loo gusal ginduum; loo guwiib; loo guda gimbaŋ gi bukaaf; loo gufuud mugween; muzidis gidaag ande ngwaag.”» 20Muud mween gansuun ndaa: «Looŋ, bunzidisaga min amyooz doog gimbeel gyame.» 21Yees gamudal ibun gawug gyees gyavul mumbad ande, gamulees ndaa: «Wumagoon giim gimos: weene, dege biim byanze abyooz ibun bawe bansugam nziim, ibun nga waseen gimvwaam gyavul gu tal; gungoy, wiya ndaab me.» 22Daaŋ muud mween gawug ndubun, lud lahel, gaween mu kyeen pamba loo gagal ande gimwvam gyavul.
23Yees gadal balongog bande, gabalees ndaa: «Guleen pas yavul gulu bamvwam mu guwiŋin mu Gimfum gya Nzaam.» 24Balongog bayidig ngol mumbad ngwageleen ande. Gaanz Yees gabalees lyaag ndaa: « Mukyeleg baan ba mee, gulene pas#10:24 Masonog ma mban mabula songos ndaa baad ba gileedega mu gimvwaam. mu guwiŋin mu gi Mfum gya Nzaam! 25Loo guleen pas gul syamo mu gulig mu tood ya ndooŋ, gaanz guleen pas yavul nsil gulu mvaam mu guwiŋin mu gi Mfum gya Nzaam.» 26Balongog bayidig ngol nsil, ibun bayandag guwufulanaan baa ye baa ndaa: «Gaanz naa wafed hulug?» 27Yees gabadal ibun gabalees ndaa: «Gul baad loo myaleend gusalam, gaanz gulu Nzaam, amyooz myafed gusalam.» 28Pedel galees Yees ndaa: «Biisi, dasis biim abyooz mumbad gu gulab nze.» 29Yees gafudul ndaa: «Yabalalulees mukyeleg, loo gulu ande muud wunu wumasis nzo yande, bapaaŋ bande ba babagal ande bapaaŋ bande ba bakaad, ngwaan, gidaan, baan bande, dolo bilaaŋ byande, mumbad ame lyaag mumbad Nsaaŋ ya piim, 30ibun gaguwool mbal kaam yanga lig mu daaŋ lu: manzo, Bapaaŋ, ba babagal anda bapaaŋ ba bakaad, bamaam, baan, ande bilaaŋ, gimvug ande ma pas, lyaag mu daaŋ lawiy, gawool mooy wa mvul ande mvul. 31Gaanz baad bavul baleen baad ba teeg, bagidig baad bansug, ibun baad bansug bagidig baad ba teeg.»
Yees gayabas mumbal ya dad lufwa ande lufudumug lande
(Maday 20:17-19; Luug 18:31-34)
32Daaŋ lubagal mu nzil mumbad gubandag gu Yeluzalem, Yees gadambalag gutwaal Balongog bande bagal mukyen, lyaag baad bambaan ba wagubalab bagal mu boom. Ibun Yees gaseen balongog bande aba guum yebool mu bel abel, ibun gayandag gubalees maamb ma gumubwileen. 33Ibun gabalees ndaa: «Luwug, dabalagween gu Yeluzalem, ibun gwagun bayegel Mwaan a Muud gumyoog mi bamfum ba bangaaŋ a Nzaam ande balooŋ ba nsig. Bamugyeleen ndol yi lufwa ibun bamugaab gumyoog mi bapan. 34Bu bamusey, ba mulogoleen made, bamubul fimb, ibun bu bamuzwa, gaanz gafudumug gungoy bilum bidad.»
Guloom gwa Zyaag ande Yowaan
(Maday 20:20-28)
35Ibun Zyaag ande Yowaan baan ba babagal ba Zebede bapusaan mumbiim a Yees ibun bamulees ndaa: «Looŋ, dumazol ndaa wudusaleen paan yidugulomo. 36Yees gabawuful kii lumazol me yilusaleen? 37Ba mufuduleen: «Duwe nzil mu gugal mukab la keemb yanze: mos gundaamb la goog lanze lu gidaad, ibun wambaan gu goog lanze lu gimaam.» 38Yees gabalees ndaa: «Loo labalayaab maamb ma labala loom. Abunu, bulagug mu gunwa goob lun lwagunwa me? Dolo bulagug mu guseen mbodog ya pas yin yaguseen mee?» 39Bafudul ndaa: «Ee, budagug.» Yees gabafuduleen ndaa: «Bulanwa gabeen goob lun luyanwa me ande mbodog yapas yiya seen. 40Gaanz paan yi gubwensen gundamb ya goog lame lu gidaad dolo gu goog lame lu gikaad, loo yafed guyiseneen lugan; bihan bin bileen mumbad baad ban bayiligeen Nzaam. 41Daaŋ balongog ban bambaan guum lubawug pan yin, bawugeen Zyaag ande Yowaan kab. 42Yees gababiil abooz ibun gabalees ndaa: «Luyaab piim ndaa baad ba bamonogogo nga bamfum badwalasaga baad ande gimfum, lyaag dulag du lugum duyalaga baad bawulu gunsin luyaal la baa. 43Gaanz migo gugal ndubun mukab labene. Mumbad de muud mos mazol gugal muud wa mfun mukab labeen, gumalomom gagal gisad gyabeen, 44ibun wunu wumazol gugal wa teeg, gumalom gagal muhig wa baad abooz. 45Pamb lo, Mwaan amuud loo gawiy ndaa baad bamusaleen, gaanz mumbad gusaleen baad, lyaag mumbad gugab mooy wande nga giim gya mfun mu guhulus baad bavul.»
Yees gazunus Baltime gifwa miis
(Maday 20:29-34; Luug 18:35-43)
46Ibun Yees ande balongog bande baduul a Yeligo, gumos ande ginvug gya baad bavul badugaag ha mbaanz mween, muud mos gifwa miis, Baltime mwaan wa Time gagal wanga bwanzan bela bel ande nzil ibun gisal gyande guloom. 47Daaŋ lugawug ndaa wunu Yees wa Nazalet wa bal lig, gayandag gubiil ngol ndaa : «Yees mwaan wa David ,ngugeen kyeen!» 48Baad bavul bamuŋaneeg ande gumulees lemene gal pwede. Gaanz baltime gaboog lyag ngol nda: «Mwaan na David, ngugeen me kyeen!» 49Yees gamad ibun gadey ndaa: «Lumubil.» Ibun babiil muud wafi miis ibun bamulees ndaa: «Syaa ngol, madaga, bu gabal gubiil.» 50Ndaaŋ lugawug ndag mween, gapiinz mulel ande, gamadag nswaal, ibun gapusaan bela bel gulu Yees. 51Yees gamulees ndaa: «Kii mazol me nsal mumbad anze?» Gifwa miis ndaa: «Looŋ, yimazol teel.» 52Ibun Yees gamulel ndaa: «Wene lugwigil lanze luguhulusu#10:52 luguhulusu dolo luguzunusu .» Mu mbal yimos, gayandag gudeel, ibun galab Yees.
Currently Selected:
Malgo 10: noq
Highlight
Copy
Compare
Share
Want to have your highlights saved across all your devices? Sign up or sign in
2025 The Seed Company in coordination with Association Congolaise de Traductions de la Bible
