Malgo 8
8
Yees galis baad mafuund mawaan
(Maday 15:32-39)
1Mu madaaŋ man, gibug gya baad gyavul nsil bauvugaan lyaag mumbiim a Yees. Mu pil yibagoon ada giim gigulya ,Yees gabiil Balongog bande ibun gabalees ndaa : 2«Baad baa yabal bawugeen kyeen, pamb lo basala bilum bidaad mu gimvug ande me, ibun loo bilene ada ande giim gigulya. 3De ndaa buyibafudulu mu manzo ma baa ande nzal, bahel mu nzil; pamb lo, baad bambaan mukab la baa baduug gibaal.» 4Balongog bande bamufuduleen ndaa: «Mukab la nseg yi, Kii gihan daleend guseen mapa mumbad gubaliis bawugud?» 5Yees gabawuful ndaa: «Mapa makwe lul ama?» Bamufuduleen ndaa: «Nsambwaal.» 6Ibun galees gibug gya baad mu gubwenzen mu maan. Ibun gaseen mapa ama nsambwaal, gafudul Madoognd gulu Nzaam, gamagyeel mu bidin ibun gawe balongog mugu bagabeen abooz. Basal se bwabuun . 7Bagal lyag ande mwa ndamb yi bambiiz bakuund anda kuund; Yees gasagaman ibun galees balongog mu gubagabeen. 8Baad bali ibun bawugud. Ibun balongog badwal bideen nsambwaal lubidin byasaal. 9Baad bagal hana gidees gimafuund mawaan. Ibun Yees gabafudul. 10Mumbal imos, Yees gawiŋin mu bwaad gimvug ande balongog bande ibun gaween gu ginzuuŋ gya Dalmanuta.
Bafalize baloom giliim gimos gya kuumb
(Maday 16:1-4)
11Bafalize bawiy ibun bayandag guwuful Yees byuuf mumbad gumumeg. Bamuloom mugulees gipa gimos ndaa gaduug gul Nzaam wa gu Tal. 12Yees gawug kyeen yavul mukab lu mudim ande ibun gawagal: «Mumbad a kii baad banoon babala loom giliim gya kuumb? Yaululees nsil mukyeleeg: loo gul ande giliim gibabawa!» 13Ibun gabasis, ganiin lyaag mu bwaad ibun gaween gundamb yambaan ya zwaa .
Mugyel wu Bafalize ande wu Herode .
(Maday 16:5-12)
14Balongog babil mu guseen mapa; bagal gag ande lupa lumos mu bwaad. 15Yees gabagebes: «Lugangal miis ibun lugeeb mu mugyel wu bafalize ande wa Elod.» 16Balongog bayandag gudwegaan baa ye baa mumbad loo bagal ande mapa. 17Yees lugayabeen ibun gabawuful ndaa: «Mumbad akii labala dwegaan been ye bene mumbad loo lul ande mapa? Loo layabeen gele? Nduuŋ ya been yil gag yanga fugu? Midiim mya been mil bwiidi? 18Lul ande miis, loo labala dele? Lul ande manswii, loo labala wugu#8:18 Gufwanas ande Yel 5.21; Yesk 12.2.? Labil nsil: 19daaŋ luyagyeel mapa madaan mugulis baad mafuund madaan, bisaanz bi bidin bimapa bikwe ladol?» Bafudul ndaa : «Guum ye byeel#8:19 Dal lyaag 6.35-44..» 20«Ibun daaŋ luyagyeel mapa nsambwaal muguliis baad mafuund mawaan, bideen bibidin bi mapa bikwe ladol?» Baa ndaa: «Nsambwaal#8:20 Dal lyaag 8.1-9.». 21Ibun Yees gabalees ndaa: «Loo labala yabeen lyaga?»
Yees gazunus gifwa miis gu Betsayida .
22Daaŋ lubaduul gu Bedsayida; gunu, badwaleen Yees gifwa miis ibun bamubondol mumbad gamugam . 23Yees gagam gifwa miis mu goog ibun gamuduus a bul. Ibun gamusi made mu miis, gamusi myoog ibun gamuwuful ndaa: «Wafed deel gimi?» 24Muud mween gadal ibun gawagal ndaa: «Yabala deel baad, yabal badeel nga midi, gaanz mun gudambal.» 25Ibun Yees gasi lyaag myoog myande mu miis mya muud mween; muud mween gadal piim, gahulug ibun gayandag gudeel biim abyooz piim a piim . 26Ibun Yees gamufudul gu nzo nde, gamulees ndaa: «Loo guwiŋin ha bul.»
Pedel gayabas ndaa Yees gili Mesiya
(Maday 16:13-20; Luug 9:18-21)
27Gungoy,Yees ande balongog bande baween mu bul ma bela a bel ma Sezale la Filip#8:27 Sezare la Filipo: mbaanz yil gu to mweez wa Yoldan, bwaduuŋ Filip Elod, nono babilaga Banyas.. Mu nzil, ga bawuful ndaa: «Kii baad babala nsuun mumbad amee?» 28Balongog ba mufuduleen ndaa: «Baad bambaan babala nsuun ndaa, nze wulu Yowaan Mbodog ,bambaan lyaag ndaa: nze Eliya, ibun bambaan ndaa nze wulu mos mukab lu bansuun paan.» 29«Ibun bene, labala nsun me ngulu naa?» Pedel gamufuduleen ndaa: «Nze wilene Mesiya.» 30Ibun Yees gabanan manswi mugugo gulees ada muud.
Yees gayabas lufwa ande lufudumug lande
(Maday 16:2-28; Luug 9:22-27)
31Ibun Yees gayandag mu gubalooŋ ndaa: «Mwaan muud gafed gudeel pas yavul; se bamudun gulu bambud bagizig, bamfum ba bangaaŋ a nzaam ande balooŋ bansig bafed mudun; bafed muzwa, gaanz gungoy biluum bidaad bu gafudumug.» 32Gawagal maamb mween pwasa pwaas. Ibun Pedel gamudwaal mugingeeŋ ibun gamuŋaneen. 33Gaanz Yees gabalmag, gadal balongog bande ibun gaŋaneen Pedel ndaa: «Dogo gutwaal ame, Sadan, pamb lo mangind manze loo mal magi Nzaam gaanz magi muud.»
34Ibun Yees gabiil gibug gyabaad nzil yimos ande balongog bande ibun gabalees ndaa: «De muud wazol gulab mee, gumaloom gabidun ndebeen, gaseen kulunz lande gandab. 35Pamb lo muud wunu awooz wumazol guhulus luziiŋ lande, bugalubilis; gaanz muud wabilis luziiŋ lande mumbad ame ande Nsaaŋ ya piim bu galuhulus. 36Kii muud gaseen de wawool nsii ayooz, de wabilisi mooy ande? 37Kii giim nsil gafed leed mu gusuum lyaag mooy ande? 38Muud awooz wun mawug mee ande Ndag amee nson, mukaad la baad banoon, bagozidisaag Nzaam, ibun bayuul ande masum, Mwaan a muud se bu gamuwug nson, daaŋ lugawiy mukab ya nkeemb ya Daad ande, nzil yimos ande dupuuŋ dwa saand.»
Currently Selected:
Malgo 8: noq
Highlight
Copy
Compare
Share
Want to have your highlights saved across all your devices? Sign up or sign in
2025 The Seed Company in coordination with Association Congolaise de Traductions de la Bible
