San Juan 1

Biꞌt Xiꞌn Dios loj guidxliuj

1Diizd guiaꞌxchej chi gad guidxliuj gacchaaw, mal yuꞌ bén na̱j xtiidx Dios. Laaman zaꞌnë Dios abiꞌ laagajcaman na̱j Dios. 2Laaman mal zaꞌnë Dios diizd guiaꞌxchej. 3Laaman been graczi ni yuꞌ. Achetczi ni yuꞌ niajc bal id laaman. 4Laaman rajp guialnaban, guiáad guialnaban guin na̱j bajl par gra bénguidxliuj. 5Bajl guin rusni bén nacay xquiarguiejn, abiꞌ ad rajct rutëë guialnacay guin loj bajl guin.

6Guyu tijb bén brii laj Waj, Dios guxhaal laaman, 7bidgaguieman diidx xcwent bén na̱j xbajl Dios, din gac chililadx gra ree bejn laaman. 8Per ad Wajt goc bajl guin, biꞌtzaman bidgaguieman diidx xcwent bajl guin. 9Din bén na̱j quijb bajl guin, laaman rusni xquiarguiejn gra bénguidxliuj, abiꞌ ma biꞌtaman loj guidxliuj.

10Laaman guzu loj guidxliuj, abiꞌ majsi laaman been guidxliuj, per ree bénguidxliuj ad bayagbeet reeman laaman. 11Biꞌtaman loj ree bén Israel, abiꞌ majsi gojcaman bén Israel, per ad bidxgaꞌt reeman laaman. 12Per, gra ree bén bidxgaꞌ laaman bililadx tëë reeman laaman, beenman laa reeman xiꞌn Dios. 13Abiꞌ na̱j reeman xiꞌn Dios, ad ziꞌc rut xiꞌn bejn loj guidxliuj por xixgab bejn o guial rën bejn chuꞌ xiꞌnman, por guial rliladx reeman ma na̱j reeman xiꞌn Dios.

14Jesús, bén na̱j xtiidx Dios, laaman goc bejn abiꞌ gubajnman loj guidxliuj con dunuj ree, abiꞌ dád guyënman bejn ree gunee tëëman ganax diidxli. Dunujn baguiaa xguialrniabeeman, guialrniabee ni caꞌman guial tijbzi laaman na̱j Xiꞌn Dios. 15Chi be Waj xtiidxaman loj ree bejn, guneeman rejs, rëbaman:

―Jesús guie na̱j bén ruzatan, chi rnin guial bén zëëd xichan mazri lasajcaman guial lon, din diizd gocli mal yuꞌman guial lon.

16Dád rënman dunuj ree, gra dxejczi racaꞌ dugra ree xguialnazaꞌcaman. 17Por Moisejs banee Dios xleyaman duloj ree, per por Jesucrist bayagbee ree xhienaag rën Dios dunuj ree xhie tëë naag na̱j xtiidxliman. 18Ad yuꞌt dxej waguiaa bejn Dios. Bén na̱j tijbzi xiꞌnman. Bén nabannë laaman balüü duloj ree xhienaag na̱j Dios.

Waj bén baroobnijs rëbaman chu na̱j Jesús

(Mt. 3:11‑12; Mr. 1:7‑8; Lc. 3:15‑17)

19Diizd Jerusalén guxhaal ree xguxtis ree bén Israel bixhioz ree con ree bén na̱j ree levitas persi bignabdiidx reeman loj Waj chu najman.

20Dxel be Waj diidxli loj reeman, rëbaman:

―Ad najtan na̱j Cristo.

21Abiꞌ gunabdiidx reeman lojman stijb rëb reeman:

―¿Chuza najl? ¿Lüjn na̱j Elías ya, bén badëë xtiidx Dios loj ree bejn?

Badxiꞌ Wajn rëbaman:

―Ad najtan.

Dxel gunabdiidx reeman stijb rëb reeman:

―O, ¿lüjn na̱j bén na̱j diidx guiꞌt ya, bén gudëë xtiidx Dios loj ree bejn?

Badxiꞌman laan rëbaman:

―Ad najtan.

22Abiꞌ rëb reeman:

―¿Chuza najl? Din rayal yugnëꞌn ruson loj ree bén guxhaal dunujn. Guna chu najl.

23Dxel rëb Waj loj reeman:

―Naj na̱j tijb bén rbidxaꞌ loj yujbidx: “Gol guxhal tijb nejz nali par bén caꞌ guialrniabee” ―ziꞌc rëb Isaías bén badëë xtiidx Dios loj ree bejn.

24Abiꞌ ree bén guxhaal ree bénfarisew din guinieenë reeman Waj, 25gunabdiidx reeman lojman, rëb reeman:

―Bal id lüjn na̱j Cristo, niꞌqui Elías, niꞌqui bén na̱j diidx guiꞌt, bén gudëë xtiidx Dios loj ree bejn, ¿chexquiza zeel ruroobnijsil bejn?

26Badxiꞌ Waj laan rëbaman:

―Naj rurobnijs con nijs, per lojdi noꞌch tijb bén ad wayünbeetidi. 27Laaman na̱j bén zëëd xichan, niꞌqui xgurëchaman ad rayalt gaxhiecan guial najman bén mazri lasajc guial lon.

28Gra niguie gojc lod la Betábara, ni na̱j stiblad roꞌ guiiw Jordán, lod baroobnijs Waj bejn ree.

Jesús na̱j Xiꞌn Dios

29Chi bareguiaal, baguiaa Waj zibig Jesús lod zaꞌman, dxel rëbaman:

―Gol baguiaa, bén guin na̱j bén bacaabee Dios din guiëtaman ziꞌc xiildoo por xtol ree bénguidxliuj. 30Laaman bazatan lojdi chi rnin: “Xichan zidnal bén mazri lasajc guial lon, din laaman mal yuꞌ diizd gocli guial lon.” 31Niꞌqui naj ad gogbeetan guial laaman na̱j bén guiꞌt, per naj zialan din gurobnijsan bejn ree con nijs din chileꞌ güünbee ree bén Israel laaman.

32Rëb tëë Waj loj reeman:

―Naj baguia biguiajt xSprijt Dios diizd xanyabaa ziꞌc tijb palom xt guijcaman. 33Majsi ad nünbeetan laaman, per bén guxhaal naj barobnijsan con nijs, laaman na lon: “Chi guguiaal guiat xSprijt Dios xt guijc tijb bejn, laaman na̱j bén runee xSprijt Dios.” 34Naj ma baguia laaman, abiꞌ ragbeechaawan guial laaman na̱j Xiꞌn Dios.

Bén binal ree Jesús yaloj

35Chi bareguiaal, zaꞌ Waj yagaj stijb, zaꞌnë tioꞌp ree xbejnman. 36Abiꞌ chi baguiaaman cadëd Jesús, dxel rëbaman loj reeman:

―Gol baguiaa, bén guinan na̱j ziꞌc xi xiildoo Dios din guiëtaman por xtol bénguidxliuj.

37Chi biguiejn reeman rëb Waj zian, dxel binal reeman Jesús. 38Chi badxiꞌ lojman, baguiaaman zinal reeman laaman, abiꞌ rëbaman loj reeman:

―¿Xhie rguiilidi?

Badxiꞌ reeman laan rëb reeman:

―Mextr, ¿ban zojbil?

39Dxel rëb Jesús loj reeman:

―Gol guda din guguiaadi.

Dxel wej reeman biquiaa reeman lod zojbaman, abiꞌ bayaꞌnnë reeman laaman dxej guin, guial ma gojl cost raca tajp wadxe.

40Tijb ree xbejn Waj bén binal Jesús, bén bacaagdiajg ni rëb Waj, laaman brii laj Andrejs, bijch Simón Bëd. 41Andrejs guin, yalojxgaj bijchaman Simón bigdiilaman, abiꞌ rëbaman lojman:

―Ma badxaaglojn bén na̱j Mesías ―rën guiëban Cristo.

42Dxel binë Andrejs Simón lod zaꞌ Jesús, chi baguiaa Jesús laaman, rëbaman:

―Lüj na̱j Simón, xiꞌn Jonás, per yan grii lajl Cefas ―rën guiëban Bëd.

Gurejdx Jesús Felip në Natanael

43Chi bareguiaal been Jesús xgab cheman niz Galilea, abiꞌ badxaagaman Felip, zianz rëbaman:

―Tanal naj.

44Ladx Felip guin na̱j guiedx Betsaida, ni gajc na̱j ladx Andrejs con Bëd. 45Dxel bigdiil Felip Natanael, abiꞌ rëbaman lojman:

―Ma badxaaglojn bén ruzaꞌt Moisejs loj xlibr xleyaman, bén ruzaꞌt ree bén badëë xtiidx Dios loj ree bejn loj ni bacaa reeman. Laaman na̱j Jesús, xiꞌn Xiëb, bén Nazaret.

46Dxel rëb Natanael lojman:

―¿Wen yuꞌ benzaꞌc Nazaret ya?

Badxiꞌ Felipan rëbaman:

―Yoꞌ din guguiaal.

47Chi baguiaa Jesús zëëd Natanael, rëbaman:

―Guie zëëd tijb bén na̱j quijb bén Israel, abiꞌ ad rusquieetaman.

48Dxel gunabdiidx Natanael lojman, rëbaman:

―¿Xoza nünbeel naj?

Badxiꞌ Jesúsan rëbaman:

―Chi gad Felip cwedx lüj, chi zaꞌl xan yag higo, dxel baguian lüj.

49Zianz rëb Natanael lojman:

―Mextr, lüj na̱j Xiꞌn Dios, lüj na̱j rey Israel.

50Badxiꞌ Jesús laan rëbaman:

―¿Rliladxil naj ya guialzi rnin baguian lüj xan yag higo? Per mazri na̱j ree ni guguiaal guial loj ni ma baguiaal.

51Rëb tëëman:

―Naj ragbeechaaw, zuguiaadi zojbyal xanyabaa, abiꞌ zuguiaadi xianjl ree Dios yayëꞌp reeman xanyabaa yaguiajt tëë reeman xt guijc Bén guxhaal Dios loj guidxliuj.

Currently Selected:

San Juan 1: zas

Highlight

Copy