MARCOS 3
3
Wneseyaken Jesus te mgyeey ne miitx nya
(Mt. 12:9-14; Lc. 6:6-11)
1Wdee Jesus lenydoo ste; nga zob te mgyeey ne miitx te nya. 2Kom noze kaleedx mén gan pe sneseyaken Ne mgyeey guin dxe ne rne men-Israel, chen tsël gan pezee ykagyii men Ne. 3Lex re Ne lo mgyeey guin ne miitx nya:
―Gusuli, gusu gwrooltee.
4Zhich guin wnabdiiz Ne lo mén ne ndxin nga, re Ne:
―¿Pagox nak ne ryal ylaa me dxe ne rne me, ne wen u ne mal?, ¿yselaa me xgyelembán te mén u yket me men?
Per noze chi wbiin men yra men. 5Orguin legue wlaa Ne wii Ne lo yra mén ne ndxin kbii Ne no legue wunles lextoo Ne por ne nadet men gon men diiz. Lex re Ne lo mgyeey guin:
―Guzegaa nya de.
Zegne wzegaa meno, wakwengoo. 6Per zegne wruu yra men ne nak farisew nga, wzelogue men yra men xpén Herodes wye men gan pezee yket men Ne.
Ndal mén wdxiin runis
7Zhich guin wa Jesus runis-Galilea yra Ne xpén Ne; kesentyent ndalyaa men-Galilea wanal Ne. 8No chene waknan mén yra ne nzoon ne rlaa Ne, ndalyaa mén wa lo Ne: men-Judea, men-Jerusalén, men-Idumea, no le men ne wruu stebkoo gyow-Jordán, no le men nes Tiro, no le men nes Sidón. 9Por neguin re Jesus lo xpén Ne ne ylaxnëz men te leen bark chen tee Ne leeno, chen gueendet yra mén guin Ne. 10Kom kesentyent ndal mén che wneseyaken Ne, yrandxee mén ne rzhuun rbig lo Ne chen ytee nya men led Ne. 11No te te chene rwii menzab Ne, rzuzhib menzab lo Ne, noze rderëz menzab, re menzab:
―¡XPee Dëdyuzh nak de!
12Per waknduxyaa Ne lo menzab chen yzëëdetre menzab gan txu nak Ne.
Wye Jesus chibtxup xpoxter Jesus
(Mt. 10:1-4; Lc. 6:12-16)
13Zhich guin wyeep Jesus te txu gyeey, wbëz Ne tebëd mén lo Ne, lex wdxiin men lo Ne. 14Lad yra men guin wye Ne chibtxup mén chen tsanal men Ne no chen yxaal Ne men tsazëët men xdiiz Dëdyuzh, lex wnesela Ne men poxter 15no wdee Ne poder lo men yra men chen koo men menzab lextoo mén. 16Laa yra chibtxup poxter guin nga nak: Simon no wnesela ke Ne men Bëd, 17nak Jacob no le Xwa bech Jacob, zhiin Zebedew nak men yrup men, wnesela Ne men Boanerges (diizree rna Zhiin Ngwzii), 18no le Ndrizh, Blib, Bartolomé, Mdëw, Tmazh, Jacob xpee Alfeo, Tadeo, Simon men ne nak cananist, 19no le Judas Iscariote ne wdekwent Ne.
Re mén ne laa Beelzebu rdee poder lo Jesus
(Mt. 12:22-32; Lc. 11:14-23; 12:10)
Zhich guin wdee Jesus te lenyuu yra Ne xpén Ne, 20lex wdop ndalyaa mén lo Ne ste, axtegue ni ryobdet gu Ne yra Ne xpén Ne. 21Chene waknan xparyent No, za men chen tsaxii men Ne, porke re men roots xtoo Ne.
22Le yra maxter ley ne wruu Jerusalén re:
―Beelzebu#3:22 Beelzebu rna Bzelo. ne rnebééy lo menzab nuu lextoo ménree, laa Beelzebu rdee poder lo men ne rboo men menzab lextoo mén.
23Lex wbëz Jesus men yra men, re Ne lo men:
―¿Pezee gak koo Bzelo laake sebzelo Bzelo lextoo mén? 24Belne rdil gobyeren laake xpén gobyeren, rdiidet gobyeren guin. 25No belne rdilelsaa te familye, laake rdiidet ke familye guin. 26Zenga ke, belne rdil Bzelo laake sebzelo Bzelo, ydiidet ke Bzelo, sinke lel luzh Bzelo.
27’Rut gundet gan tee lenxyuu te mgyeey ne ndíp chen gweey men yra ne rap mgyeey guin, belne yliibdet men mgyeey guin primer. Per belne primer yliib men men, zenga si zun men gan gweey men yra ne rap mgyeey guin.
28’Nligue yna noo lo de yra de ne zak perdon yrandxee xdol mén no yrandxee diznyaan ne rnii men. 29Per le men ne rnii diznyaan por Espíritu Sant, nunk gakdet men perdon, sinke ydeblo siguelendxee gak men sufrir.
30Re Ne zenga porke re men ne menzab nuu lextoo Ne.
Yra bech Jesus no le xnaa Jesus
(Mt. 12:46-50; Lc. 8:19-21)
31Lex wdxiin xnaa Jesus yra men bech Ne, per fwer wzu men yra men; orguin wxaal men men ne waluu diiz lo Ne. 32Lex re yra men ne zob koo Ne:
―Le xnaa de no le yra bech de zu fwer, laa de rye men.
33Wke Ne re Ne lo men:
―¿Txu nak xnaa noo? ¿Txu nak bech noo?
34Orguin wii Ne lo yra mén ne zob kbii Ne, lex re Ne:
―Ménree nak xnaa noo no nak bech noo. 35Porke yrandxee mén ne rlaa ne rlaan Dëdyuzh, mén guin nak bech noo, nak bzaan noo no nak xnaa noo.
Currently Selected:
MARCOS 3: zpi
Highlight
Share
Copy
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.
