LWIKÖÖ 'BƆGƲ 1
1
-Ɩɩ yɛ Lwikö 'cɛlɩ-a 'bɔgʋ la'a
1-3Teofilɩ 'kadɔ, -ayo. -Ɩ la'a -ɩ 'plɩ-ɛ ma'a -aa gla'a, nɩkpaa -bɛ nɛ wa 'kɩ 'cɛlɩ. Nɩkpa la'a -wa yɩlɩ-a 'mɩ -li la'aa tɛnɩde, -wa zʋ 'yɛ-a -Lagɔwɛlɩɛ kwakwangwa-a, -ɩ wa -sanʋa-a 'mɩ wa 'cɛlɩ -bha. Na -nɩ 'bhë 'gamö, la 'mɩ wɛlɩ tɛnɩ-a, sa ɩ 'bhuo 'plɩplɩnɩ-a 'mö, ɩ gbʋ-ʋ pla'a -bhaa yɛ n 'jɩbhɩ-a ngli, sa ɩ 'bhuo -wʋnʋ-a 'mö, 'n n ji-e -sɩbha jɩblɩnɩ 'sɩkösɩkö. Ɩ yɛ Teofilɩ, 'mɩ n 'pa-a la'a 'bɔgʋ 'mö 'n n -jimʋ-ɔ -la 'wʋ 'pa. 4N -nɩmö-ö kpakpaswɩ'ɩ 'wʋ 'cɛlɩ, Zezwie wɛlɩ wa -pamö-a ngli sa ɩ glɩnɩ-a 'dɛdɛɛgbawɛlɩ -n 'kɩ jɩblɩnɩɛ yɛ n -cɛlɩmö-a 'wʋ.
Sa -Lagɔzuzuko kwakwanɩ-a Zakali 'dɩ 'mö
5La do'o dʋdʋnyininyɔ Elodɩ nyini la-a Zwidee dʋdʋ, -Lagɔbʋbɔnyɔ -bhlʋ -wʋ la-a -bha, 'mɔ wa la-a Zakali. -Lagɔbʋbɔngwaa -zakpa wa la-a Abiaa -lʋa, -ma wa gla'a ɔ -wʋ la -bha. Ɔ 'nglɔɔ nglɩ-ɩ -yɛ-a Elizabɛtɩ, 'n ɔ ji-a -Lagɔbʋbɔnyɔ 'kadɔ Aghlɔɔ ngëyi 'mö 'wlʋ. 6Zakali -yɛ Elizabɛtɩ 'sɔɔ namönamöbhʋ 'mö ʋ slɛnɩ la-a -bha -Lagɔɔ 'ji 'klʋ, 'n wa zʋ-ɔ -bha 'jinanɩswɩ'ɩ ʋ gbö -yɛ ʋ wɛlɩ 'bhuo 'sɔ. 7'Ku Elizabɛtɩ 'ku la -bhaa yɛ, wa'a 'gu -ka 'n wa 'sɔ -kpɔ ji-a gɔ.
8'Ylɩ -bhlʋ, 'n Zakalie -zakpaa -Lagɔbʋbɔzlɩ ji-a nyini, 'n ɔ ji-e -ma -Lagɔbudu 'kadʋɔ -kʋkwa 'mö pla ɔ 'yɛ -Lagɔlibho nʋɔ yɛ. 9-Lagɔbʋbɔngwaa do'o wa -yɛ nʋ wa 'yɛ wa libhui dlinɩ nʋ, -nɩgbɩ wa pa -bha. Zlɩ la'aa 'mö wa 'pa-a -nɩgbɩ-ɛ, Zakali -nɩgbɩ bhlinɩ-a -gömö ɔ 'yɛ -ma -Lagɔbudu 'kadʋɔ 'möbʋbɔnʋköbhë 'mö pla, ɔ 'yɛ 'wlɩ siaa 'yɛ. 10'Wlɩsiade nyini-a, nɩkpaa -zakpa glɩ -ma 'pɩ wa-a -Lagɔ -bɛlɩ 'pa 'le, 11Zakali-e -Lagɔ bʋbɔ 'le, 'n -Lagɔzuzuko -bhlʋ jio-a 'wʋ ghlanɩ. A 'nɩgbö -bha 'gbʋ wa sianɩ-a 'wlɩ 'klʋɔ linɩkpɛsɔ pɩa 'bɩ. 12Zakali yɩlɩ-a -Lagɔzuzuko la'a, dlɩ-ɩ wlɔnʋɔ-a 'mö 'n nganɔ jio-a -gömö bhlinɩ. 13-Lagɔzuzuko nɛ: “Zakali -n 'na-a nganɩ -nɩ, -Lagɔ yɛ -na -bɛlɩ 'wʋ nglu 'bhë. Nyɩbhɛlʋgu -na 'nglɔ Elizabɛtɩ ji-a gwalɩɛ. Ɔ -kɔɔ gwalɩ 'pɔ Za. 14Gu la'aa yɛ 'mʋna 'kada -jimö-a 'lɩbha, nɩkpaa -bɛ ɔ gwalɩgwalɩɛ ji 'yɛ-a 'mʋna 'wʋ -bhïë. 15-Wʋʋ yɛ-a, ɔ -yɛ 'ghlimanɩ -bha Nyininyɔ 'ji 'klʋ nɩkpɛ 'kadɔ ɔ ji-a glɩnɩɛ, ɔ 'na nʋ 'nɩma, ɔ 'na -yaakalɩnʋ 'nɩma, wa-a -bhla ɔ 'jinanɩyɛ, 'n Zuzu 'Wlawla 'kɔ-a -gömö ji. 16Ɔ yɛ Izlayɛlɩɛ -zakpa 'möö nɩkpaa -bɛ 'yɛ-a wa Nyininyɔ -Lagɔ yawʋ nimï ji. 17-Lagɔɔ Zuzu -yɛ 'mötɛnɔ sɔ -ɩ -wʋ la-a -Lagɔɔ 'mögbanɩnyɔ Eli -gömö, mɩ-ɩ jio-a -gömö jie, ɔ 'yɛ -lowlengwa -yɛ 'gwie 'sɔ -ghöbhanɩ, 'bhë -wa 'nɩ zʋ-ɔ -bha -Lagɔ, wa 'yɛ -ɩ nanɩ-a -Lagɔ dlɩ yawʋ nʋ. -Sɩbha ɔ ji-a nɩkpa 'mö slɛmanɩɛ, wa 'yɛ 'jinanɩswɩ'ɩ wa Nyininyɔ -Lagɔ 'wʋ pö.” 18-Lagɔzuzuko gba-a sa'a, Zakali nɛ naa: “N -yɛ na 'nglɔ 'sɔ -a yɛ la'a gɔ 'bhë-ë, samɩde n ji-a sɛ 'mö -jijinɩɛ naa, wɛlɩ -n gba-a la'a na de ji 'wʋ 'wlenɩ 'nɩ?” 19-Lagɔzuzuko nɛ naa: “-Amö wa la-a Gablie, -Lagɔ n -wʋ-a 'ji, mʋ-ʋ tia'a-a naa, n ji n 'yɛ -bha -na de wɛlɩ la'a gba n -kamö 'tɩtɩɛ -tɩtɩ la'a -sanɩ. 20Wɛlɩ la'a n gba-a -na de, -n 'nɩɩ dlɩ 'wʋ -kaa yɛ, tɛnɩ la'a -zɩnɩ'ɩ -n 'na gbʋ -dɩ, wɛlɩ 'na -kamö ngli 'wlʋ, zlɩ -ɛ -Lagɔ -dɩ-a ɛ -yɛ nyini, 'mɩ wɛlɩ la'a 'wʋ ɩ ji-a 'wlenɩɛ. Ɩ 'na 'wʋ 'wlenɩ 'bhë, -n 'yɛ-a 'lili'i gbʋ -dɩ.”
21-Ma Zakali -wʋ-a -Lagɔbudu 'kadʋ 'mö gwlɛ 'le tenyie yɛ, nɩkpaa -zakpa -wa -wʋɔ la-a -ma 'pɩ -kʋnʋ 'le ngli-i mönʋa -bha. 22Zakali 'wlʋ-a 'pɩ, ɔ'ɔ la bhɛlɩ ɔ 'yɛ -bha wa de gbʋ -dɩ. 'N wa ji-a sɛ jɩblɩnɩ naa, -li jio-o -ma -Lagɔbudu'u 'jie 'klʋ. Wɔkɔɔ 'nyize ɔ wɔkɔ -bha, ɔ'ɔ -dɩ-a 'mö gbʋ.
23Ɔ bʋbɔlibhoo 'ylɩ bhɩa-a, 'n ɔ ji-e -ma ɔ 'bhɛyɩ nimï mö. 24'Ylɩ ja 'plɩ-a, 'n Zakalie 'nglɔ Elizabɛtɩ ji-a nɩkplako yɩlɩ. Ɔ zizanɩ ɔjɩ 'napö -ngbï 'mö, 'n ɔ nʋ-ɔ -ma ɔ dlɩ zɔmö naa: 25“-Lagɔ yɛ na ngazɩklʋ yɩlɩ ʋ ka'a -bha nɩkpa 'ji 'klʋ zʋ 'klʋ 'mö -sa 'bhë.”
Sa -Lagɔzuzuko kwakwanɩ-a Mali 'dɩ 'mö
26Elizabɛtɩ yɩlɩ-a nɩkplako, ɔ ka 'napö -ngbʋpʋlʋ 'n -Lagɔ ji-a ʋ zuzuko Gablie tia. Ma Galilee dʋdʋ -gömö -glɔ wa la-a Nazalɛtɩ -ma ʋ tiaa-a -sɩbha, 27-ma nglugu -bhlʋ -ɔɔ-a nyɩbhɛlʋ -ji wa la-a Malie 'bhɛyɩ. Zozɛfö, -ɔ glɩnɩ-a -benyido'oo dʋdʋnyininyɔ Davidɩɛ -kosu 'jie nɩkpɛ, ɔ bheyi la -bha. 28-Lagɔzuzuko pla-a -ma ɔ -budu'u a nɛ: “Mali, -ayo -nmö -Lagɔ 'pa-a 'nyupalɩ tenyi, -aa Nyininyɔ -nyɛmö plɩnɩ.” 29A gba-a -sɩbha dlɩ wlɔnʋ-a Mali 'mö, -ma ɔ dlɩ zɔmö ɔ nɛ naa: “Slɛ-a 'mö bhalɩbhalɩɛ -mɛ -laa -nɩ zɔmö 'nɩ?” 30-Lagɔzuzuko nɛ -bha ɔ de naa: “Mali -n 'na-a nganɩ -nɩ, -Lagɔ -kamö 'nyupalɩ 'pa 'bhë. 31Nɩkplako -n ji-a yɩlɩɛ -n 'yɛ-a nyɩbhɛlʋgu gwalɩ, -n -kɔɔ gwalɩ, Zezwi -n jio-a 'paa. 32Nɩkpɛ 'kadɔ ɔ ji-a zʋɔ, 'mɔ wa ji-a -Lagɔ -ʋ -wʋ-ɔ -ma -Lagɔtapɛ'ɛɛ 'Gu laa. Ɔ -tɩbha Davidɩɛ nyininyinie 'kadɛ 'mɛ Nyininyɔ -Lagɔ jio-a 'ye 'nyɛɛ. 33-Kitiki ɔ ji-a Izlayɛlɩɛ -zakpa nyinie, ɔ nyininyinie 'na 'bhlonʋde -ka.” 34Mali nɛ -bha -Lagɔzuzukoo de naa: “N'n la'a nyɩbhɛlʋ -ji-e, sa ɩ ji-e 'mö-a 'mö 'plɩplɩnɩɛ 'nɩ?” 35-Lagɔzuzuko nɛ naa: “Zuzu Wlawla-a -jimö-a -gömö jie, 'n -Lagɔ -ʋ -wʋ-ɔ -ma -Lagɔtapɛ'ɛɛ 'mötɛnɔ -kamö-a zɩzɛ 'mö 'panɩ. Ɩ yɛ 'wlawlawʋgu la'a -n ji-a gwalɩɛ wa 'kɔ-a -Lagɔɔ 'Gu la. 36Yie -na nyɔ Elizabɛtɩ, -ɔ wa la la-a 'kukunglɔ, -ɔ yɛ la-a gɔ 'bhë, ɔ -ga -zɩnɩ'ɩ 'napö -ngbʋpʋlʋɔ nɩkplako. 37-Wʋʋ yɛ-a, -lu -mʋ 'yɛ 'mö 'tɛ-ɛ -bha -Lagɔɔ de ʋ'ʋ -bhlɩ.” 38A gba-a sa'a Mali nɛ naa: “Nyininyɔɔ nyɩgbajʋlʋnglɔ n glɩnɩ -bha. -Ɩɩ bhï -n gba-a -la ɩ 'plɩ -sɩbha na de 'wʋ.” 'N -Lagɔzuzuko jio-o -bha tɩ.
Mali yɛ Elizabɛtɩ yɩlɩ kwla'a mö
39-Bhaa ylɩ la'aa 'mö, Mali -sɔ-a 'wʋ, ɔ-ɔ pulo 'le, -ma Zwidee dʋdʋ -gömöö gbë la'a -a glɩ-ɛ -ma -gɔgɔgbɩ nyɩdɩ, 'n ɔ ji-e -ma a 'mö mö. 40Ɔ nyini-e -ma, ɔ pla-a -ma Zakalie 'ligbë'ë 'n ɔ ji-a Elizabɛtɩ bhalɩ. 41Elizabɛtɩ 'nʋ-a Malie bhalɩbhalɩwɛlɩ 'gamö, gu -ɔɔ nɩkplako ɔ -ga la-a 'mö ɔ gbʋgbɔ -bha. 'N Zuzu 'Wlawla ji-a Elizabɛtɩ dlɩ zɔmö ye. 42'N ɔ ji-a 'mö 'kpö, ɔ nɛ -bha Malie de: “-Lagɔ -pamö-a 'nyupalɩ -ma 'ngwlɩ 'bhuo gla'a. Gu la'a -n ji-a gwalɩɛ 'nyupalɩ ɔ 'pɔ-ɔ 'yɛ -bha. 43'Manɩɛ 'bhë n ka na-a 'ji 'n na Nyininyɔɔ -da ji'i-a yɩlɩ kwla'a 'nɩ? 44Yie, n 'nʋ-ɔ -na bhalɩbhalɩwɛlɩ tɔngʋ, gu -ɔɔ nɩkplako n -su-o la'a 'mʋnaa yɛ 'mö ɔ gbʋgbɔ-a -ma na 'mlɩ. 45Mali, -nmö kɩ-a dlɩ 'wʋ naa, -ɩ -aa Nyininyɔ gba-a -na de 'wʋ ɩ ji-a 'wlenɩɛ, 'mʋna -lɩbhamö.”
Mali yɛ -Lagɔ bhlɩnɩ
46Elizabɛtɩ gba-a sa'a, Mali nɛ:
“Na Nyininyɔ -Lagɔɔ 'nglɩ n 'ghlimanɩ -bha.
47Na Puanyɔ -Lagɔɔ yɛ, -ma na dlɩ zɔmö 'mʋnaa 'nyize.
48-Wʋʋ yɛ-a, -amö 'nɩ-ɛ la'a na-a -lu 'ji -ka -amö ʋ jinɩ-a 'wʋ.
Tɛnɩ-a 'mö la'a -zɩnɩ'ɩ,
nɩkpa bhuo-o ji-a sɛ jɩblɩnɩɛ naa -Lagɔ pa'a-a 'nyupalɩ.
49-Wʋʋ yɛ-a, -li 'kadɩ 'mötɛnɩ -Lagɔ nʋ'ʋ-a 'ji.
Ʋ 'nglɩ 'wlawla ɩ -wʋ -bha.
50Nɩkpa la'a 'bhuo -wa ka-a ʋ nganɔ -gömö,
wa de ʋ pa-a ngazɩdlɩ 'ylʋbö -ylʋbö 'ylʋbö 'mö.
51Ʋ 'mötɛnɔ ʋ tulua-a -bha,
-wa gbɔ-a -gömö -ma wa dlɩ-a zɔmö 'n ʋ jua-a -dɩdɩnɩ.
52'Kadɩ ʋ nyinianɩ-a yɛ,
'n ʋ ji-a 'kikie 'wlu 'libhï.
53Ngazɩngwa ʋ 'nyɛ-a -lie -lie -bebe,
'bhë 'n ʋ ji-a wʋlʋwʋlʋngwa 'wʋ tɩ.
54Izlayɛlɩɛ nɩkpa -wa glɩnɩ-a ʋ 'jiwʋngwa,
'mʋa ʋ ji-a 'wʋ, ʋ dlɩ 'nɩ-ɛ -bha ʋ ngazɩdlɩɛ de 'wʋ 'mʋnɔnʋ.
55Sa ʋ gba la-a -aa -lowlengwa Ablaamö -yɛ ɔ ngëyi 'sɔɔ de,
-sɩbha ʋ 'wlenɩɩ-a 'wʋ.”
56Mali -sa-a -ma Elizabɛtɩɛ 'bhɛyɩ 'cʋɩ taa swɩ, 'bhë 'n ɔ ji-e -ma ɔ 'bhɛyɩ nimï mö.
Sa wa gwalɩgwalɩnɩ-a Za Badizɩ 'mö
57Elizabɛtɩɛ 'wlusade nyini-a, 'n ɔ ji-a nyɩbhɛlʋgu gwalɩ. 58Sa -Lagɔ yɩlɩ-a ɔ ngazɩklʋ, ɔ yawʋglɩngwa -yɛ ɔ -lowlengwa 'sɔ 'nʋɩ-a, 'n wa ji-a ji, 'n wa -nyɔɔ 'sɔ ji-a 'mʋna li. 59'Ylɩ -ngbɔtazlɩ 'mö, 'n wa ji-a 'wlu 'titanɩ wa 'yɛ 'guo zɔmö 'wʋ -dɩɛ yɛ. Ɔ 'nglɩpazlɩ la-a 'gamöö yɛ wa 'jɩbha wa 'kɔ la ɔ -tɩbha zianɩ. 60'N ɔ -da ji-a gbʋ -dɩ, ɔ nɛ: “'Bhëbhë, ɔ nglɩ-ɩ yɛ-a Za.” 61Wa nɛ: “Nglɩ -la 'nɩ -ma -na -kosu 'ji -wʋ.” 62'N wa ji-a Zakali -kɔtɩ nya ngli 'jɩbhanɩ naa, nglɩ -mɩ wa ji-a ɔ 'gu 'paa 'nɩ? 63Zakali 'jɩbha-a 'klʋcɛlɩsupɩa, 'n ɔ ji-e -bha a -gömö 'cɛlɩ naa: “'Guo nglɩ-ɩ -yɛ-a Za.” Nglɩ -ɩ ɔ 'cɛlɩ-a wa yɩlɩɩ-a, wa 'bhuo ngli-i mönʋa -bha. 64-Bha -gaganɩlɩ'ɩ, 'n Zakalie mɩɔ ji-a bulonʋ, 'n ɔ ji-a gbʋ -dɩ, ɔ-ɔ la'a -Lagɔɔ 'nglɩ 'ghlimanɩ 'le. 65Ɔ yawʋglɩngwa 'bhuo nganɔ 'lɩbhʋa-a tenyi, -ma Zwidee -gligbï yawʋ gbï la'a -ɩ glɩ-ɛ -ma -gɔgɔgbɩ nyɩdɩ, -ma ɩ 'bhuo 'mö 'mɩ dɩ la'a bhɩa-a 'ji. 66Nɩkpa la'a 'bhuo -wa 'nʋɩ-a, dlɩ zɔmö wa zʋnʋɩ-a yɛ, 'n wa 'jɩbhajɩbhanɩ-a ngli naa: “'Wuë! Gu -la nɩkpɛɛ -mɔ ɔ ji-a glɩnɩ-ɛ 'nɩ?” 'N Nyininyɔ -Lagɔɔ 'mötɛnɔ -wʋ la-a 'dɛdɛ'ɛ 'mɔ 'gu -gömö.
-Lagɔ gbanɩ-a Zakali 'mö lʋ -ʋ ɔ bhlɩ-a
67Zuzu 'Wlawla ye-a 'guo -tɩbha Zakalie dlɩ zɔmö 'n -Lagɔ jio-a 'mö gbanɩ. Ɔ nɛ:
68“-Aa Nyininyɔ Izlayɛlɩɛ -Lagɔɔ 'nglɩ 'ghlimanɩ.
Sa ʋ 'pa-a -aa de dlɩ 'n ʋ -jiya-a gïyikwla 'mö -saa yɛ.
69Mʋ-ʋ -nyɛya-a 'pʋpʋɛ 'kadɛ -ɛ 'bhönɩ-ɛ -ma ʋ nyɩgbajʋlʋ Davidɩɛ -kosu 'ji.
70Sa ʋ 'bhë gbanɩɩ la-a -ma -Lagɔɔ 'mögbanɩngwa 'mö -benyido'o, mɩ-ɩ 'wlenɩ-a 'wʋ.
71Mʋ-ʋ -jiya-a nɩkpa -wa -jɛbhɛlɩya-a -yɛ -wa glɩnɩ-a -aa tʋngwa 'sɔ -gömö -saa.
72Sa ʋ 'pa-a -aa -lowlengwaa de ngazɩdlɩ -sɩbha la'a.
Ʋ dlɩ yɛ -bha ʋ -nyʋa 'sɔɔ -ghöbhanɔɔ de -bhlinɩ 'bhë.
73Sa 'bhë ʋ zlugonʋ la-a -aa -tɩbha Ablaamö cɛ naa:
74Ʋ -jiya -aa tʋngwa -gömö -sa,
-a -yɛ ʋ libho nʋ 'le -wʋ -a ji-e nganɔ -gömö -ka.
75-A 'yɛ -bha ʋ 'ji 'klʋ 'wlawla -wʋ,
-aa namönamöbhʋ 'yɛ -bha ʋ 'ji 'klʋ 'mö slɛnɩ 'ylɩ bhuo -a ji-e ma'a 'pɩ 'wʋ -saa 'mö.
76-Nmö na 'guo -nɩ-ɛ,
-Lagɔ -ʋ -wʋ-ɔ -ma -Lagɔtapɛ'ɛɛ 'mögbanɩnyɔ wa -jimö-a laa.
-Nmö ji-a -aa Nyininyɔ 'yu -ganɩɛ,
-n 'yɛ ɔ 'yuogblʋ göganɩ.
77-Nmö ji-a ɔ -zakpa 'möö -lʋa 'dɩ -sanɩɛ naa,
ɔ ji wa 'jinylolie gbʋ 'ji 'tatinɩ wa 'yɛ 'pʋɔ yɛ.
78-Wʋʋ yɛ-a, -Lagɔ jɔnʋ ʋ jɔnʋ-a tenyi,
ngazɩdlɩ ʋ ka-aa yɛ,
sa zɩgbadlɩylʋvla 'nɩ-ɛ la'a glu 'wlʋ,
-sɩbha Puanyɔ -ɔ 'bhönɩ-ɛ -ma ʋ 'bhë dlɩ'ɩ -jiya-a 'gbamö 'wlʋɔ.
79Nɩkpa la'a -wa 'jinylolie 'misikpoko -wʋ-a 'ji,
-wa glɩ-ɛ -ma tlɩtlɩɛ 'mö ɔ 'kʋa -gömö ngöna.
Ɔ -kaya -gömöwlonɔɔ 'yuogblʋ de -slʋnʋ a 'kʋ 'wʋ namönɩ.”
Sa Zakali 'ghlimanɩ-a -Lagɔɔ 'nglɩ -sɩbha -la.
80'Guo -nɩ 'bhë, ɔ 'ghlimanɩ yaa, ɔ yɛmanɩ 'ji yaa, ɔ glɩ -ma yawʋdobhli 'klʋ, zlɩ -ɛɛ 'mö ɔ tuluanɩ-a ɔjɩ Izlayɛlɩɛ -zakpa 'ji 'n ɛ ji-a nyini.
Currently Selected:
LWIKÖÖ 'BƆGƲ 1: BNT96
Highlight
Copy
Compare
Share
Want to have your highlights saved across all your devices? Sign up or sign in
Bete New Testament © Bible Society of Côte d'Ivoire 1996
LWIKÖÖ 'BƆGƲ 1
1
-Ɩɩ yɛ Lwikö 'cɛlɩ-a 'bɔgʋ la'a
1-3Teofilɩ 'kadɔ, -ayo. -Ɩ la'a -ɩ 'plɩ-ɛ ma'a -aa gla'a, nɩkpaa -bɛ nɛ wa 'kɩ 'cɛlɩ. Nɩkpa la'a -wa yɩlɩ-a 'mɩ -li la'aa tɛnɩde, -wa zʋ 'yɛ-a -Lagɔwɛlɩɛ kwakwangwa-a, -ɩ wa -sanʋa-a 'mɩ wa 'cɛlɩ -bha. Na -nɩ 'bhë 'gamö, la 'mɩ wɛlɩ tɛnɩ-a, sa ɩ 'bhuo 'plɩplɩnɩ-a 'mö, ɩ gbʋ-ʋ pla'a -bhaa yɛ n 'jɩbhɩ-a ngli, sa ɩ 'bhuo -wʋnʋ-a 'mö, 'n n ji-e -sɩbha jɩblɩnɩ 'sɩkösɩkö. Ɩ yɛ Teofilɩ, 'mɩ n 'pa-a la'a 'bɔgʋ 'mö 'n n -jimʋ-ɔ -la 'wʋ 'pa. 4N -nɩmö-ö kpakpaswɩ'ɩ 'wʋ 'cɛlɩ, Zezwie wɛlɩ wa -pamö-a ngli sa ɩ glɩnɩ-a 'dɛdɛɛgbawɛlɩ -n 'kɩ jɩblɩnɩɛ yɛ n -cɛlɩmö-a 'wʋ.
Sa -Lagɔzuzuko kwakwanɩ-a Zakali 'dɩ 'mö
5La do'o dʋdʋnyininyɔ Elodɩ nyini la-a Zwidee dʋdʋ, -Lagɔbʋbɔnyɔ -bhlʋ -wʋ la-a -bha, 'mɔ wa la-a Zakali. -Lagɔbʋbɔngwaa -zakpa wa la-a Abiaa -lʋa, -ma wa gla'a ɔ -wʋ la -bha. Ɔ 'nglɔɔ nglɩ-ɩ -yɛ-a Elizabɛtɩ, 'n ɔ ji-a -Lagɔbʋbɔnyɔ 'kadɔ Aghlɔɔ ngëyi 'mö 'wlʋ. 6Zakali -yɛ Elizabɛtɩ 'sɔɔ namönamöbhʋ 'mö ʋ slɛnɩ la-a -bha -Lagɔɔ 'ji 'klʋ, 'n wa zʋ-ɔ -bha 'jinanɩswɩ'ɩ ʋ gbö -yɛ ʋ wɛlɩ 'bhuo 'sɔ. 7'Ku Elizabɛtɩ 'ku la -bhaa yɛ, wa'a 'gu -ka 'n wa 'sɔ -kpɔ ji-a gɔ.
8'Ylɩ -bhlʋ, 'n Zakalie -zakpaa -Lagɔbʋbɔzlɩ ji-a nyini, 'n ɔ ji-e -ma -Lagɔbudu 'kadʋɔ -kʋkwa 'mö pla ɔ 'yɛ -Lagɔlibho nʋɔ yɛ. 9-Lagɔbʋbɔngwaa do'o wa -yɛ nʋ wa 'yɛ wa libhui dlinɩ nʋ, -nɩgbɩ wa pa -bha. Zlɩ la'aa 'mö wa 'pa-a -nɩgbɩ-ɛ, Zakali -nɩgbɩ bhlinɩ-a -gömö ɔ 'yɛ -ma -Lagɔbudu 'kadʋɔ 'möbʋbɔnʋköbhë 'mö pla, ɔ 'yɛ 'wlɩ siaa 'yɛ. 10'Wlɩsiade nyini-a, nɩkpaa -zakpa glɩ -ma 'pɩ wa-a -Lagɔ -bɛlɩ 'pa 'le, 11Zakali-e -Lagɔ bʋbɔ 'le, 'n -Lagɔzuzuko -bhlʋ jio-a 'wʋ ghlanɩ. A 'nɩgbö -bha 'gbʋ wa sianɩ-a 'wlɩ 'klʋɔ linɩkpɛsɔ pɩa 'bɩ. 12Zakali yɩlɩ-a -Lagɔzuzuko la'a, dlɩ-ɩ wlɔnʋɔ-a 'mö 'n nganɔ jio-a -gömö bhlinɩ. 13-Lagɔzuzuko nɛ: “Zakali -n 'na-a nganɩ -nɩ, -Lagɔ yɛ -na -bɛlɩ 'wʋ nglu 'bhë. Nyɩbhɛlʋgu -na 'nglɔ Elizabɛtɩ ji-a gwalɩɛ. Ɔ -kɔɔ gwalɩ 'pɔ Za. 14Gu la'aa yɛ 'mʋna 'kada -jimö-a 'lɩbha, nɩkpaa -bɛ ɔ gwalɩgwalɩɛ ji 'yɛ-a 'mʋna 'wʋ -bhïë. 15-Wʋʋ yɛ-a, ɔ -yɛ 'ghlimanɩ -bha Nyininyɔ 'ji 'klʋ nɩkpɛ 'kadɔ ɔ ji-a glɩnɩɛ, ɔ 'na nʋ 'nɩma, ɔ 'na -yaakalɩnʋ 'nɩma, wa-a -bhla ɔ 'jinanɩyɛ, 'n Zuzu 'Wlawla 'kɔ-a -gömö ji. 16Ɔ yɛ Izlayɛlɩɛ -zakpa 'möö nɩkpaa -bɛ 'yɛ-a wa Nyininyɔ -Lagɔ yawʋ nimï ji. 17-Lagɔɔ Zuzu -yɛ 'mötɛnɔ sɔ -ɩ -wʋ la-a -Lagɔɔ 'mögbanɩnyɔ Eli -gömö, mɩ-ɩ jio-a -gömö jie, ɔ 'yɛ -lowlengwa -yɛ 'gwie 'sɔ -ghöbhanɩ, 'bhë -wa 'nɩ zʋ-ɔ -bha -Lagɔ, wa 'yɛ -ɩ nanɩ-a -Lagɔ dlɩ yawʋ nʋ. -Sɩbha ɔ ji-a nɩkpa 'mö slɛmanɩɛ, wa 'yɛ 'jinanɩswɩ'ɩ wa Nyininyɔ -Lagɔ 'wʋ pö.” 18-Lagɔzuzuko gba-a sa'a, Zakali nɛ naa: “N -yɛ na 'nglɔ 'sɔ -a yɛ la'a gɔ 'bhë-ë, samɩde n ji-a sɛ 'mö -jijinɩɛ naa, wɛlɩ -n gba-a la'a na de ji 'wʋ 'wlenɩ 'nɩ?” 19-Lagɔzuzuko nɛ naa: “-Amö wa la-a Gablie, -Lagɔ n -wʋ-a 'ji, mʋ-ʋ tia'a-a naa, n ji n 'yɛ -bha -na de wɛlɩ la'a gba n -kamö 'tɩtɩɛ -tɩtɩ la'a -sanɩ. 20Wɛlɩ la'a n gba-a -na de, -n 'nɩɩ dlɩ 'wʋ -kaa yɛ, tɛnɩ la'a -zɩnɩ'ɩ -n 'na gbʋ -dɩ, wɛlɩ 'na -kamö ngli 'wlʋ, zlɩ -ɛ -Lagɔ -dɩ-a ɛ -yɛ nyini, 'mɩ wɛlɩ la'a 'wʋ ɩ ji-a 'wlenɩɛ. Ɩ 'na 'wʋ 'wlenɩ 'bhë, -n 'yɛ-a 'lili'i gbʋ -dɩ.”
21-Ma Zakali -wʋ-a -Lagɔbudu 'kadʋ 'mö gwlɛ 'le tenyie yɛ, nɩkpaa -zakpa -wa -wʋɔ la-a -ma 'pɩ -kʋnʋ 'le ngli-i mönʋa -bha. 22Zakali 'wlʋ-a 'pɩ, ɔ'ɔ la bhɛlɩ ɔ 'yɛ -bha wa de gbʋ -dɩ. 'N wa ji-a sɛ jɩblɩnɩ naa, -li jio-o -ma -Lagɔbudu'u 'jie 'klʋ. Wɔkɔɔ 'nyize ɔ wɔkɔ -bha, ɔ'ɔ -dɩ-a 'mö gbʋ.
23Ɔ bʋbɔlibhoo 'ylɩ bhɩa-a, 'n ɔ ji-e -ma ɔ 'bhɛyɩ nimï mö. 24'Ylɩ ja 'plɩ-a, 'n Zakalie 'nglɔ Elizabɛtɩ ji-a nɩkplako yɩlɩ. Ɔ zizanɩ ɔjɩ 'napö -ngbï 'mö, 'n ɔ nʋ-ɔ -ma ɔ dlɩ zɔmö naa: 25“-Lagɔ yɛ na ngazɩklʋ yɩlɩ ʋ ka'a -bha nɩkpa 'ji 'klʋ zʋ 'klʋ 'mö -sa 'bhë.”
Sa -Lagɔzuzuko kwakwanɩ-a Mali 'dɩ 'mö
26Elizabɛtɩ yɩlɩ-a nɩkplako, ɔ ka 'napö -ngbʋpʋlʋ 'n -Lagɔ ji-a ʋ zuzuko Gablie tia. Ma Galilee dʋdʋ -gömö -glɔ wa la-a Nazalɛtɩ -ma ʋ tiaa-a -sɩbha, 27-ma nglugu -bhlʋ -ɔɔ-a nyɩbhɛlʋ -ji wa la-a Malie 'bhɛyɩ. Zozɛfö, -ɔ glɩnɩ-a -benyido'oo dʋdʋnyininyɔ Davidɩɛ -kosu 'jie nɩkpɛ, ɔ bheyi la -bha. 28-Lagɔzuzuko pla-a -ma ɔ -budu'u a nɛ: “Mali, -ayo -nmö -Lagɔ 'pa-a 'nyupalɩ tenyi, -aa Nyininyɔ -nyɛmö plɩnɩ.” 29A gba-a -sɩbha dlɩ wlɔnʋ-a Mali 'mö, -ma ɔ dlɩ zɔmö ɔ nɛ naa: “Slɛ-a 'mö bhalɩbhalɩɛ -mɛ -laa -nɩ zɔmö 'nɩ?” 30-Lagɔzuzuko nɛ -bha ɔ de naa: “Mali -n 'na-a nganɩ -nɩ, -Lagɔ -kamö 'nyupalɩ 'pa 'bhë. 31Nɩkplako -n ji-a yɩlɩɛ -n 'yɛ-a nyɩbhɛlʋgu gwalɩ, -n -kɔɔ gwalɩ, Zezwi -n jio-a 'paa. 32Nɩkpɛ 'kadɔ ɔ ji-a zʋɔ, 'mɔ wa ji-a -Lagɔ -ʋ -wʋ-ɔ -ma -Lagɔtapɛ'ɛɛ 'Gu laa. Ɔ -tɩbha Davidɩɛ nyininyinie 'kadɛ 'mɛ Nyininyɔ -Lagɔ jio-a 'ye 'nyɛɛ. 33-Kitiki ɔ ji-a Izlayɛlɩɛ -zakpa nyinie, ɔ nyininyinie 'na 'bhlonʋde -ka.” 34Mali nɛ -bha -Lagɔzuzukoo de naa: “N'n la'a nyɩbhɛlʋ -ji-e, sa ɩ ji-e 'mö-a 'mö 'plɩplɩnɩɛ 'nɩ?” 35-Lagɔzuzuko nɛ naa: “Zuzu Wlawla-a -jimö-a -gömö jie, 'n -Lagɔ -ʋ -wʋ-ɔ -ma -Lagɔtapɛ'ɛɛ 'mötɛnɔ -kamö-a zɩzɛ 'mö 'panɩ. Ɩ yɛ 'wlawlawʋgu la'a -n ji-a gwalɩɛ wa 'kɔ-a -Lagɔɔ 'Gu la. 36Yie -na nyɔ Elizabɛtɩ, -ɔ wa la la-a 'kukunglɔ, -ɔ yɛ la-a gɔ 'bhë, ɔ -ga -zɩnɩ'ɩ 'napö -ngbʋpʋlʋɔ nɩkplako. 37-Wʋʋ yɛ-a, -lu -mʋ 'yɛ 'mö 'tɛ-ɛ -bha -Lagɔɔ de ʋ'ʋ -bhlɩ.” 38A gba-a sa'a Mali nɛ naa: “Nyininyɔɔ nyɩgbajʋlʋnglɔ n glɩnɩ -bha. -Ɩɩ bhï -n gba-a -la ɩ 'plɩ -sɩbha na de 'wʋ.” 'N -Lagɔzuzuko jio-o -bha tɩ.
Mali yɛ Elizabɛtɩ yɩlɩ kwla'a mö
39-Bhaa ylɩ la'aa 'mö, Mali -sɔ-a 'wʋ, ɔ-ɔ pulo 'le, -ma Zwidee dʋdʋ -gömöö gbë la'a -a glɩ-ɛ -ma -gɔgɔgbɩ nyɩdɩ, 'n ɔ ji-e -ma a 'mö mö. 40Ɔ nyini-e -ma, ɔ pla-a -ma Zakalie 'ligbë'ë 'n ɔ ji-a Elizabɛtɩ bhalɩ. 41Elizabɛtɩ 'nʋ-a Malie bhalɩbhalɩwɛlɩ 'gamö, gu -ɔɔ nɩkplako ɔ -ga la-a 'mö ɔ gbʋgbɔ -bha. 'N Zuzu 'Wlawla ji-a Elizabɛtɩ dlɩ zɔmö ye. 42'N ɔ ji-a 'mö 'kpö, ɔ nɛ -bha Malie de: “-Lagɔ -pamö-a 'nyupalɩ -ma 'ngwlɩ 'bhuo gla'a. Gu la'a -n ji-a gwalɩɛ 'nyupalɩ ɔ 'pɔ-ɔ 'yɛ -bha. 43'Manɩɛ 'bhë n ka na-a 'ji 'n na Nyininyɔɔ -da ji'i-a yɩlɩ kwla'a 'nɩ? 44Yie, n 'nʋ-ɔ -na bhalɩbhalɩwɛlɩ tɔngʋ, gu -ɔɔ nɩkplako n -su-o la'a 'mʋnaa yɛ 'mö ɔ gbʋgbɔ-a -ma na 'mlɩ. 45Mali, -nmö kɩ-a dlɩ 'wʋ naa, -ɩ -aa Nyininyɔ gba-a -na de 'wʋ ɩ ji-a 'wlenɩɛ, 'mʋna -lɩbhamö.”
Mali yɛ -Lagɔ bhlɩnɩ
46Elizabɛtɩ gba-a sa'a, Mali nɛ:
“Na Nyininyɔ -Lagɔɔ 'nglɩ n 'ghlimanɩ -bha.
47Na Puanyɔ -Lagɔɔ yɛ, -ma na dlɩ zɔmö 'mʋnaa 'nyize.
48-Wʋʋ yɛ-a, -amö 'nɩ-ɛ la'a na-a -lu 'ji -ka -amö ʋ jinɩ-a 'wʋ.
Tɛnɩ-a 'mö la'a -zɩnɩ'ɩ,
nɩkpa bhuo-o ji-a sɛ jɩblɩnɩɛ naa -Lagɔ pa'a-a 'nyupalɩ.
49-Wʋʋ yɛ-a, -li 'kadɩ 'mötɛnɩ -Lagɔ nʋ'ʋ-a 'ji.
Ʋ 'nglɩ 'wlawla ɩ -wʋ -bha.
50Nɩkpa la'a 'bhuo -wa ka-a ʋ nganɔ -gömö,
wa de ʋ pa-a ngazɩdlɩ 'ylʋbö -ylʋbö 'ylʋbö 'mö.
51Ʋ 'mötɛnɔ ʋ tulua-a -bha,
-wa gbɔ-a -gömö -ma wa dlɩ-a zɔmö 'n ʋ jua-a -dɩdɩnɩ.
52'Kadɩ ʋ nyinianɩ-a yɛ,
'n ʋ ji-a 'kikie 'wlu 'libhï.
53Ngazɩngwa ʋ 'nyɛ-a -lie -lie -bebe,
'bhë 'n ʋ ji-a wʋlʋwʋlʋngwa 'wʋ tɩ.
54Izlayɛlɩɛ nɩkpa -wa glɩnɩ-a ʋ 'jiwʋngwa,
'mʋa ʋ ji-a 'wʋ, ʋ dlɩ 'nɩ-ɛ -bha ʋ ngazɩdlɩɛ de 'wʋ 'mʋnɔnʋ.
55Sa ʋ gba la-a -aa -lowlengwa Ablaamö -yɛ ɔ ngëyi 'sɔɔ de,
-sɩbha ʋ 'wlenɩɩ-a 'wʋ.”
56Mali -sa-a -ma Elizabɛtɩɛ 'bhɛyɩ 'cʋɩ taa swɩ, 'bhë 'n ɔ ji-e -ma ɔ 'bhɛyɩ nimï mö.
Sa wa gwalɩgwalɩnɩ-a Za Badizɩ 'mö
57Elizabɛtɩɛ 'wlusade nyini-a, 'n ɔ ji-a nyɩbhɛlʋgu gwalɩ. 58Sa -Lagɔ yɩlɩ-a ɔ ngazɩklʋ, ɔ yawʋglɩngwa -yɛ ɔ -lowlengwa 'sɔ 'nʋɩ-a, 'n wa ji-a ji, 'n wa -nyɔɔ 'sɔ ji-a 'mʋna li. 59'Ylɩ -ngbɔtazlɩ 'mö, 'n wa ji-a 'wlu 'titanɩ wa 'yɛ 'guo zɔmö 'wʋ -dɩɛ yɛ. Ɔ 'nglɩpazlɩ la-a 'gamöö yɛ wa 'jɩbha wa 'kɔ la ɔ -tɩbha zianɩ. 60'N ɔ -da ji-a gbʋ -dɩ, ɔ nɛ: “'Bhëbhë, ɔ nglɩ-ɩ yɛ-a Za.” 61Wa nɛ: “Nglɩ -la 'nɩ -ma -na -kosu 'ji -wʋ.” 62'N wa ji-a Zakali -kɔtɩ nya ngli 'jɩbhanɩ naa, nglɩ -mɩ wa ji-a ɔ 'gu 'paa 'nɩ? 63Zakali 'jɩbha-a 'klʋcɛlɩsupɩa, 'n ɔ ji-e -bha a -gömö 'cɛlɩ naa: “'Guo nglɩ-ɩ -yɛ-a Za.” Nglɩ -ɩ ɔ 'cɛlɩ-a wa yɩlɩɩ-a, wa 'bhuo ngli-i mönʋa -bha. 64-Bha -gaganɩlɩ'ɩ, 'n Zakalie mɩɔ ji-a bulonʋ, 'n ɔ ji-a gbʋ -dɩ, ɔ-ɔ la'a -Lagɔɔ 'nglɩ 'ghlimanɩ 'le. 65Ɔ yawʋglɩngwa 'bhuo nganɔ 'lɩbhʋa-a tenyi, -ma Zwidee -gligbï yawʋ gbï la'a -ɩ glɩ-ɛ -ma -gɔgɔgbɩ nyɩdɩ, -ma ɩ 'bhuo 'mö 'mɩ dɩ la'a bhɩa-a 'ji. 66Nɩkpa la'a 'bhuo -wa 'nʋɩ-a, dlɩ zɔmö wa zʋnʋɩ-a yɛ, 'n wa 'jɩbhajɩbhanɩ-a ngli naa: “'Wuë! Gu -la nɩkpɛɛ -mɔ ɔ ji-a glɩnɩ-ɛ 'nɩ?” 'N Nyininyɔ -Lagɔɔ 'mötɛnɔ -wʋ la-a 'dɛdɛ'ɛ 'mɔ 'gu -gömö.
-Lagɔ gbanɩ-a Zakali 'mö lʋ -ʋ ɔ bhlɩ-a
67Zuzu 'Wlawla ye-a 'guo -tɩbha Zakalie dlɩ zɔmö 'n -Lagɔ jio-a 'mö gbanɩ. Ɔ nɛ:
68“-Aa Nyininyɔ Izlayɛlɩɛ -Lagɔɔ 'nglɩ 'ghlimanɩ.
Sa ʋ 'pa-a -aa de dlɩ 'n ʋ -jiya-a gïyikwla 'mö -saa yɛ.
69Mʋ-ʋ -nyɛya-a 'pʋpʋɛ 'kadɛ -ɛ 'bhönɩ-ɛ -ma ʋ nyɩgbajʋlʋ Davidɩɛ -kosu 'ji.
70Sa ʋ 'bhë gbanɩɩ la-a -ma -Lagɔɔ 'mögbanɩngwa 'mö -benyido'o, mɩ-ɩ 'wlenɩ-a 'wʋ.
71Mʋ-ʋ -jiya-a nɩkpa -wa -jɛbhɛlɩya-a -yɛ -wa glɩnɩ-a -aa tʋngwa 'sɔ -gömö -saa.
72Sa ʋ 'pa-a -aa -lowlengwaa de ngazɩdlɩ -sɩbha la'a.
Ʋ dlɩ yɛ -bha ʋ -nyʋa 'sɔɔ -ghöbhanɔɔ de -bhlinɩ 'bhë.
73Sa 'bhë ʋ zlugonʋ la-a -aa -tɩbha Ablaamö cɛ naa:
74Ʋ -jiya -aa tʋngwa -gömö -sa,
-a -yɛ ʋ libho nʋ 'le -wʋ -a ji-e nganɔ -gömö -ka.
75-A 'yɛ -bha ʋ 'ji 'klʋ 'wlawla -wʋ,
-aa namönamöbhʋ 'yɛ -bha ʋ 'ji 'klʋ 'mö slɛnɩ 'ylɩ bhuo -a ji-e ma'a 'pɩ 'wʋ -saa 'mö.
76-Nmö na 'guo -nɩ-ɛ,
-Lagɔ -ʋ -wʋ-ɔ -ma -Lagɔtapɛ'ɛɛ 'mögbanɩnyɔ wa -jimö-a laa.
-Nmö ji-a -aa Nyininyɔ 'yu -ganɩɛ,
-n 'yɛ ɔ 'yuogblʋ göganɩ.
77-Nmö ji-a ɔ -zakpa 'möö -lʋa 'dɩ -sanɩɛ naa,
ɔ ji wa 'jinylolie gbʋ 'ji 'tatinɩ wa 'yɛ 'pʋɔ yɛ.
78-Wʋʋ yɛ-a, -Lagɔ jɔnʋ ʋ jɔnʋ-a tenyi,
ngazɩdlɩ ʋ ka-aa yɛ,
sa zɩgbadlɩylʋvla 'nɩ-ɛ la'a glu 'wlʋ,
-sɩbha Puanyɔ -ɔ 'bhönɩ-ɛ -ma ʋ 'bhë dlɩ'ɩ -jiya-a 'gbamö 'wlʋɔ.
79Nɩkpa la'a -wa 'jinylolie 'misikpoko -wʋ-a 'ji,
-wa glɩ-ɛ -ma tlɩtlɩɛ 'mö ɔ 'kʋa -gömö ngöna.
Ɔ -kaya -gömöwlonɔɔ 'yuogblʋ de -slʋnʋ a 'kʋ 'wʋ namönɩ.”
Sa Zakali 'ghlimanɩ-a -Lagɔɔ 'nglɩ -sɩbha -la.
80'Guo -nɩ 'bhë, ɔ 'ghlimanɩ yaa, ɔ yɛmanɩ 'ji yaa, ɔ glɩ -ma yawʋdobhli 'klʋ, zlɩ -ɛɛ 'mö ɔ tuluanɩ-a ɔjɩ Izlayɛlɩɛ -zakpa 'ji 'n ɛ ji-a nyini.
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
Bete New Testament © Bible Society of Côte d'Ivoire 1996