LWIKÖÖ 'BƆGƲ 18
18
'Kwa 'na-a tlɩnɩya yawʋ -Lagɔɔ -bɛlɩpade -nɩ
1Zezwi gba-a sa'a ɔ 'wʋbhlinɩngwaa de 'bhë, 'n ɔ jua-a 'nine 'panɩ ɔ 'kʋa 'dɩ 'mö zʋ naa: Wa 'pa -bɛlɩ 'kɔmʋʋ, 'kwa 'na-a tlɩnʋa yawʋ -nɩ. 2Ɔ nɛ: “-Ma 'gbë -bhlʋ 'mö -zijlitunyɔ -bhlʋ -wʋ-ɔ -ma, ɔ'ɔ -Lagɔɔ nganɔ -gömö -ka, ɔ gbʋ 'nɩ la 'yɛ nɩkpɛ 'mö -wʋ. 3-Ma gbë la'aa 'mö, 'kuzlenglɔ -bhlʋ -wʋ la 'yɛ-ɛ -ma, 'mɔ nɩkpa pla-a gbʋ. 'N ɔ ghlɩ-ɛ -bha -zijlitunyɔ la'a 'kɔmʋʋ, 'n ɔ nʋ-a: Tu na -zijle. 4-Ma ɔ 'bhɛyɩ, 'n 'nglɔ 'tʋtʋnʋ-ɔ -ma 'mö 'kɔmʋʋ, -zijlitunyɔ 'nɩ yɩlɩɔ 'klʋ, 'n 'bɩ ji-a 'mö gwlɛ. 'Ylɩ -bhlʋ, 'n -zijlitunyɔɔ 'bhë ji-a dlɩ 'pa, ɔ nɛ naa: 'Dɛdɛ'ɛ n'n -Lagɔɔ nganɔ -gömö -ka, na gbʋ 'nɩ nɩkpɛ 'mö -wʋ 'bhë-ë, 5'kuzlenglɔ la'a, ɔ -zijle n ji-a tuo ɔ ji'i-a 'mö -sa 'kɔmʋʋ yʋlʋa kwla'a ji.” 6Nyininyɔ nɛ -bha -gömö naa: “A pönɩ -lɛ -zijlitunyɔ -ɔ 'nɩ-a 'mö slɛnɩɛ nglie wɛlɩ 'yukwli. 7Ɔ nʋ la'a -sa-a -nɩ-ɛ, e 'kë zi -Lagɔ -ʋ slɛnɩ-a 'mö, ʋ -lʋa ʋ -sa-a -bha, sa zlɩ zɩ-a sa sɛ julu-a -wa -wʋʋ-a 'mö winɩ 'le, ʋ -yɛɛ cɛ wa gbʋ 'mö plaa ji bɩ-ɩ ji-a 'mö gwlɛɛ 'nɩ-ɩ? 8'Bhëbhë, sa'a n gba-a sa'a a de naa: 'Wʋ ʋ ji-a -gaganɩɛ ʋ 'kʋa 'wʋ ji. -Ma ɩ 'mö, Nɩkpɛɛ 'Gu -yɛ ji-e, ɔ ji bhe ma'a dʋdʋkpata'a nɩkpa -wa ka-a -Lagɔ dlɩ 'wʋ ghlɩ 'nɩ-ɩ?”
Falizɩɛyi -yɛ lepoo mëniköbhanyɔ 'sɔɔ 'nine
9Nɩkpa -mʋmʋa -wa pa-a dlɩ naa, 'mö wa slɛnɩ-ɛ -bha -Lagɔɔ 'ji 'klʋ, 'n wa fɩna-a ɩ yɛ wa linɩkpa 'wʋ wa yɛ Zezwi 'pa-a nine la'a, ɔ nɛ naa: 10“Nɩkpa 'sɔ mʋa-a mö-ö -ma -Lagɔbudu 'kadʋ 'mö wa 'yɛ -bɛlɩ 'paa yɛ. -Mʋmɔ glɩnɩ falizɩɛyi, 'n -mɔbha glɩnɩ-a lepoo mëniköbhanyɔ. 11Wa nyini-e -ma, falizɩɛyi 'nɩgbönɩɔ ghayɩ, 'n ɔ ji-a dlɩ zɔmö -Lagɔ -bɛlɩ 'panɩ, ɔ nɛ naa: -Atʋ -Lagɔ, n -bhalɩmö, sa n'n-a 'pɩnɩkpa -mʋabhaa swɩ -wʋɔ yɛ, -wa glɩnɩ-a 'wingwa, -wa 'nɩ-a 'mö slɛnɩ, -wa glɩnɩ-a gbɩyɩlɩngwa, lepoo mëniköbhanyɔ -laa 'bhë sa n'n-a ɔ swɩ 'jinylolie nʋnyɔ glɩnɩɛ yɛ. 12-Ma 'pɛlʋwlu -bhlʋ 'mö n 'sʋnʋ lɔlɔ 'wʋ 'sɔ, -li 'bhuo n ghlɩ-a, ɩ -dlinɩkugbïa pa n -nyɛmö -bha. 13Lepoo mëniköbhanyɔɔ -nɩ-ɛ, ɔ 'nɩgbö -ma nimï nimï, ɔ'ɔ -lɛ 'wluo 'bhë 'libhï ɔ 'yɛ -Lagɔ 'wʋ yɩlɩ, ɔ ka 'köklɩ 'ji cɛ 'n ɔ ji-a -Lagɔ -bɛlɩ 'pa, ɔ nɛ: -Yie! -Atʋ -Lagɔ, 'pa na de ngazɩdlɩ, 'jinylolie nʋnyɔ n glɩnɩ -bha. 14Sa'a n gba-a naa, lepoo mëniköbhanyɔ -ɔ 'pa-a sa'a -Lagɔ -bɛlɩ, ɔ -wʋ-a 'ligbë'ë mö 'le, ɔ 'jinylolie gbʋ-ʋ bhɩa -bha, -mɔbhaa -lie gbʋ 'nɩ-ɛ -nɩ bhɩa. -Ma ɩ 'mö, -ɔ 'ghlimanɩ-a ɔjɩ-ɛ, sɛ -Lagɔ jio-a nyinianɩɛ, -ɔ nyinianɩ-a ɔjɩ yɛ, 'mɔ -Lagɔ ji-a 'ghlimanɩɛ.”
Zezwi yɛ 'gwiekikiee 'ji palɩ
15'Ylɩ -bhlʋ, 'n nɩkpa ji-a Zezwi 'gwiekikie -la, ɔ 'kʋa cɛ -gömö zʋ ɔ 'kʋa 'nyupalɩ 'paa yɛ. Ɔ 'wʋbhlinɩngwa yɩlɩɩ-a 'wʋ 'n wa ji-a nɩkpa la'a 'lʋnʋ. 16Zezwi wɔzʋa-a, ɔ nɛ -bha wa de naa: “A 'tati 'gwiekikie 'ji wa 'yɛ ma'a na 'bhɛyɩ ji. A 'na-a -sʋa 'yuo -nɩ. -Wʋʋ yɛ-a, nɩkpa -wa -wʋ-a wa swɩ, mʋa-a ji-e -ma -Lagɔɔ nyininyinipɩ 'wʋ möö. 17'Dɩɛ -dɩ n 'nyɛya-a sa'a naa: -Ɔ nɩ -Lagɔɔ nyininyinipɩ 'wʋɔ wɛlɩ 'gwikikeyie swɩ 'wʋ nglu ɔ 'na -ma ɛ 'wʋ mö.”
Wʋlʋwʋlʋnyɔ -bhlʋ yɛ 'kɔgwlɛpɩɛ yɛ Zezwi ngli 'jɩbha
18'Ylɩ -bhlʋ, 'zwiföyi 'kadɔ -bhlʋ, mɔ-ɔ ghlɩ-ɛ -bha Zezwi, 'n ɔ jio-a ngli 'jɩbha, ɔ nɛ naa: “-Abhitɩbha -ɔ -ga cɛ, sa n ji-a 'mö zʋzʋnʋɔ n 'yɛ 'kɔgwlɛpɩ ghlɩ 'nɩ?” 19Zezwi nɛ naa: “Manɩɛ yɛ -n la'a-a -ɔ -ga cɛ 'nɩ? -Bɛ 'nɩ cɛ -ga, 'n ɛ nɩ -Lagɔ -bhlʋ 'tɩ glɩnɩ. 20Gbö -Lagɔ -nyɛya-a -n jiɩ. -Lagɔ nɛ naa:
-N 'na-a yɩlɩ gbʋ -nɩ,
-n 'na-a 'lɩbha 'kuë -nɩ,
-n 'na-a ghli 'wi -nɩ,
-n 'na-a 'pa -na linɩkpɛ gbʋ -gömö -nɩ,
zʋ -bha -na -tɩbha -yɛ -na -da 'sɔ.”
21Nɩkpɛ la'a nɛ: “-Abhitɩbha, n-n -bhla 'gu 'wʋ, 'n n ji-a -ɩ -la 'bhuoo -bhazʋzʋɛ tɛ-ɛ.” 22Ɔ gba-a -sɩbha, Zezwi nɛ -bha ɔ de naa: “-Lu -bhlʋ tʋ-ɔ -bhla -na de 'wʋ. -N -yɛ mö -na -li bhuoo -n -ka-a, 'pɩ 'pɛlʋ -n 'yɛ ɩ mëni 'pʋangwa cɛ dlinɩ. -Bhaa do'o, -n ji -ma -Lagɔ 'wʋ wʋlʋwʋlʋɛ 'kadɛ ghlɩ. -N -yɛ-a 'mö -sɩbha nʋ 'bhë, ji -n ka'a -ganɩ.” 23Nɩkpɛ la'a, wʋlʋ ɔ wʋlʋ-a tenyie yɛ, Zezwi gba-a sa'a ɔ klʋ-ʋ tlɩ-a 'mö.
24Zezwi yɩlɩ-a ɔ 'klʋɔ 'mötlɩlɩ-ɛ, ɔ nɛ: “'Wuë! Nɩkpa -wa ka-a lɩ wa 'yɛ -ma -Lagɔɔ nyininyinipɩ 'wʋ mö, wa de 'mö ɩ 'tɛ-a lɛɛ! 25-Ma ɩ 'mö, -sʋkʋ 'kadʋ 'yɛ -bha 'sayie -dʋ 'ji 'plɩnɩ, mɩ-ɩ jɔnʋ-a 'wʋ wʋlʋwʋlʋnyɔ 'yɛ -ma -Lagɔɔ nyininyinipɩ 'wʋ möö bhla.” 26Zezwi gba-a sa'a, nɩkpa -wa -wʋɔ la-a 'yukwli pönɩ 'le, wa nɛ naa: “Ɩ -yɛ -sa 'mö -wʋ-ɔ, -mɔ bhɛlɩ-ɛ 'mö-a ɔ 'yɛ 'pʋ 'nɩ?” 27Zezwi nɛ naa: “-Ɩ la'a -ɩ 'tɛ-ɛ -bha nɩkpaa de 'wʋ, ɩ'ɩ -nɩ -bha -Lagɔɔ de 'wʋ 'tɛ-ɛ.”
28Ɔ gba-a sa'a 'n Piɛlɩ ji-a gbʋ -dɩ, ɔ nɛ naa: “Nyininyɔ, yie, -na yɛ -a tɩ-ɛ -bha -aa -li 'bhuo 'n -a -ganɩmö-ö la'a.” 29Zezwi nɛ -bha wa de: “'Dɩɛ -dɩ n 'nyɛya-a sa'a naa: Nɩkpɛ -yɛ -Lagɔɔ nyininyinipɩɛ yɛ ma'a 'pɩ 'wʋɔ -li -bha tɩ, ɛ ji 'ligbë glɩnɩ, ɛ ji ɔ 'nglɔ glɩnɩ, ɛ ji ɔ -dagwie glɩnɩ, ɛ ji ɔ -tɩbha -yɛ ɔ -da 'sɔ glɩnɩ, ɛ ji ɔ 'gwie glɩnɩ, ɔ -kʋa -bha tɩ, 30-sɩbhaa nɩkpɛ la'a, -Lagɔ jio -ɩ ɔ tɩ-ɛ -bhaa mlinɩlie -bɛ 'nyɛ 'bhë, ʋ jio 'yɛ zʋma 'kɔgwlɛpɩ 'nyɛ.”
Zezwi yɛ ta do'o ɔ tlɩtlɩɛ -yɛ ɔ gluwlʋwlʋɛ 'sɔɔ gbʋ gba
31Zezwi -yɛ ɔ tiatiangwa kugbïa 'sɔ -kpɔ 'sɔ do-a yawʋ, ɔ nɛ -bha wa de naa: “Zelwizalɛmö -a -wʋ-ɔ la'a mö 'le. -A -yɛ -ma nyini-e, -ɩ la'a 'bhuo -Lagɔɔ 'mögbanɩngwa 'cɛlɩ la-a Nɩkpɛɛ 'Guo yɛ, 'wʋ ɩ ji-a 'wlenɩɛ. 32Nɩkpa -wa 'nɩ-a 'zwiföa glɩnɩ 'mʋa wa jio-a kunʋɔ, wa 'kɔ-a gla palɩ, wa 'kɔ-a sa, wa 'kɔ-a -dlɛ 'wʋ sulu. 33Wa -kɔɔ -plɩ 'sɛlɩnɩ 'bhë, wa 'kɔ-a 'lɩbha ɔ 'yɛ-a tlɩ. Ɔ -yɛ tlɩ 'bhë 'ylɩɛ tazlɩ 'mö ɔ 'yɛ-a glu 'wlʋ.” 34Zezwi gba-a sa'a wa de-e, wɛlɩ la'a 'klʋ ɩ 'gɔ-ɔ -bha wa dee yɛ, wa 'nɩɩ-ɩ 'mö 'nʋ.
Zezwi yɛ -ma Zelikoo 'lɔkpɔlɔkpɔnyɔ -bhlʋ göpö
35Zezwi-e -bha Zelikoo 'gbë yawʋ nyini 'le, 'lɔkpɔlɔkpɔnyɔ -bhlʋ glɩ -bha 'yuogblʋɔ -kʋkʋngoyawʋ, 'n ɔ -wʋ-a nɩkpa 'jɩbhanɩ 'le. 36Nɩkpɛ la'a 'nʋ-a -wa -wʋ-a 'plɩ 'lee jɔ-ɔ, ɔ 'jɩbha-a ngli, 37'n wa jio-a 'dɩ -sanɩ naa Nazalɛtɩɛ Zezwi -wʋ-a 'plɩ 'le. 38Wa -sanɩɔ-a 'dɩ, 'n ɔ ji-a 'mö 'kpö, ɔ nɛ: “Davidɩɛ 'Gu Zezwi, n -bhiamö yawʋ yɩlɩ na ngazɩklʋ!” 39Ɔ 'kpö-ö sa'a 'mö, -wa la'a -wa -ga-a -ma 'yu 'n wa jio-a 'wliyawʋ nylanɩ, wa nɛ: “Zʋ yɩ ngo yɛ 'na-a!” 'Mɩɛ 'bhë ɔ nyla-a tenyi, 'n ɔ nʋ-a: “Davidɩɛ 'Gu Zezwi, yɩlɩ na ngazɩklʋ!” 40'N Zezwi ji-a 'nɩgbö, ɔ nɛ: “A -nyɔɔ ji.” Wa -nyɔɔ nyini-e -bha ɔ yawʋ-ɔ, 'n Zezwi jio-a ngli 'jɩbha naa: 41“'Manɩ -n 'jɩbha-a n 'yɛ -na de nʋ 'nɩ?” Ɔ nɛ: “Nyininyɔ, n -bhiamö yawʋ kalɩ na 'jie n 'yɛ sɛ jɩnɩmanɩ.” 42Ɔ gba-a sa'a, Zezwi nɛ -bha ɔ de naa: “-Na -Lagɔɔ dlɩwʋkakʋ -kamö pua 'bhë, -na 'jie jɩnɩmanɩ yɛ.” 43-Bha -gaganɩlɩ'ɩ, 'n 'lɔkpɔlɔkpɔnyɔ 'jie ji-a 'kaluo. Ɔ-ɔ -Lagɔɔ 'nglɩ 'ghlimanɩ 'le 'n ɔ ji-a Zezwi 'bɩ bhlinɩ. Nɩkpa 'bhuo yɩlɩ-a -ɩ la'a, 'n wa ji 'yɛ-a -nɩ -Lagɔɔ 'nglɩ 'ghlimanɩ.
Currently Selected:
LWIKÖÖ 'BƆGƲ 18: BNT96
Highlight
Copy
Compare
Share
Want to have your highlights saved across all your devices? Sign up or sign in
Bete New Testament © Bible Society of Côte d'Ivoire 1996
LWIKÖÖ 'BƆGƲ 18
18
'Kwa 'na-a tlɩnɩya yawʋ -Lagɔɔ -bɛlɩpade -nɩ
1Zezwi gba-a sa'a ɔ 'wʋbhlinɩngwaa de 'bhë, 'n ɔ jua-a 'nine 'panɩ ɔ 'kʋa 'dɩ 'mö zʋ naa: Wa 'pa -bɛlɩ 'kɔmʋʋ, 'kwa 'na-a tlɩnʋa yawʋ -nɩ. 2Ɔ nɛ: “-Ma 'gbë -bhlʋ 'mö -zijlitunyɔ -bhlʋ -wʋ-ɔ -ma, ɔ'ɔ -Lagɔɔ nganɔ -gömö -ka, ɔ gbʋ 'nɩ la 'yɛ nɩkpɛ 'mö -wʋ. 3-Ma gbë la'aa 'mö, 'kuzlenglɔ -bhlʋ -wʋ la 'yɛ-ɛ -ma, 'mɔ nɩkpa pla-a gbʋ. 'N ɔ ghlɩ-ɛ -bha -zijlitunyɔ la'a 'kɔmʋʋ, 'n ɔ nʋ-a: Tu na -zijle. 4-Ma ɔ 'bhɛyɩ, 'n 'nglɔ 'tʋtʋnʋ-ɔ -ma 'mö 'kɔmʋʋ, -zijlitunyɔ 'nɩ yɩlɩɔ 'klʋ, 'n 'bɩ ji-a 'mö gwlɛ. 'Ylɩ -bhlʋ, 'n -zijlitunyɔɔ 'bhë ji-a dlɩ 'pa, ɔ nɛ naa: 'Dɛdɛ'ɛ n'n -Lagɔɔ nganɔ -gömö -ka, na gbʋ 'nɩ nɩkpɛ 'mö -wʋ 'bhë-ë, 5'kuzlenglɔ la'a, ɔ -zijle n ji-a tuo ɔ ji'i-a 'mö -sa 'kɔmʋʋ yʋlʋa kwla'a ji.” 6Nyininyɔ nɛ -bha -gömö naa: “A pönɩ -lɛ -zijlitunyɔ -ɔ 'nɩ-a 'mö slɛnɩɛ nglie wɛlɩ 'yukwli. 7Ɔ nʋ la'a -sa-a -nɩ-ɛ, e 'kë zi -Lagɔ -ʋ slɛnɩ-a 'mö, ʋ -lʋa ʋ -sa-a -bha, sa zlɩ zɩ-a sa sɛ julu-a -wa -wʋʋ-a 'mö winɩ 'le, ʋ -yɛɛ cɛ wa gbʋ 'mö plaa ji bɩ-ɩ ji-a 'mö gwlɛɛ 'nɩ-ɩ? 8'Bhëbhë, sa'a n gba-a sa'a a de naa: 'Wʋ ʋ ji-a -gaganɩɛ ʋ 'kʋa 'wʋ ji. -Ma ɩ 'mö, Nɩkpɛɛ 'Gu -yɛ ji-e, ɔ ji bhe ma'a dʋdʋkpata'a nɩkpa -wa ka-a -Lagɔ dlɩ 'wʋ ghlɩ 'nɩ-ɩ?”
Falizɩɛyi -yɛ lepoo mëniköbhanyɔ 'sɔɔ 'nine
9Nɩkpa -mʋmʋa -wa pa-a dlɩ naa, 'mö wa slɛnɩ-ɛ -bha -Lagɔɔ 'ji 'klʋ, 'n wa fɩna-a ɩ yɛ wa linɩkpa 'wʋ wa yɛ Zezwi 'pa-a nine la'a, ɔ nɛ naa: 10“Nɩkpa 'sɔ mʋa-a mö-ö -ma -Lagɔbudu 'kadʋ 'mö wa 'yɛ -bɛlɩ 'paa yɛ. -Mʋmɔ glɩnɩ falizɩɛyi, 'n -mɔbha glɩnɩ-a lepoo mëniköbhanyɔ. 11Wa nyini-e -ma, falizɩɛyi 'nɩgbönɩɔ ghayɩ, 'n ɔ ji-a dlɩ zɔmö -Lagɔ -bɛlɩ 'panɩ, ɔ nɛ naa: -Atʋ -Lagɔ, n -bhalɩmö, sa n'n-a 'pɩnɩkpa -mʋabhaa swɩ -wʋɔ yɛ, -wa glɩnɩ-a 'wingwa, -wa 'nɩ-a 'mö slɛnɩ, -wa glɩnɩ-a gbɩyɩlɩngwa, lepoo mëniköbhanyɔ -laa 'bhë sa n'n-a ɔ swɩ 'jinylolie nʋnyɔ glɩnɩɛ yɛ. 12-Ma 'pɛlʋwlu -bhlʋ 'mö n 'sʋnʋ lɔlɔ 'wʋ 'sɔ, -li 'bhuo n ghlɩ-a, ɩ -dlinɩkugbïa pa n -nyɛmö -bha. 13Lepoo mëniköbhanyɔɔ -nɩ-ɛ, ɔ 'nɩgbö -ma nimï nimï, ɔ'ɔ -lɛ 'wluo 'bhë 'libhï ɔ 'yɛ -Lagɔ 'wʋ yɩlɩ, ɔ ka 'köklɩ 'ji cɛ 'n ɔ ji-a -Lagɔ -bɛlɩ 'pa, ɔ nɛ: -Yie! -Atʋ -Lagɔ, 'pa na de ngazɩdlɩ, 'jinylolie nʋnyɔ n glɩnɩ -bha. 14Sa'a n gba-a naa, lepoo mëniköbhanyɔ -ɔ 'pa-a sa'a -Lagɔ -bɛlɩ, ɔ -wʋ-a 'ligbë'ë mö 'le, ɔ 'jinylolie gbʋ-ʋ bhɩa -bha, -mɔbhaa -lie gbʋ 'nɩ-ɛ -nɩ bhɩa. -Ma ɩ 'mö, -ɔ 'ghlimanɩ-a ɔjɩ-ɛ, sɛ -Lagɔ jio-a nyinianɩɛ, -ɔ nyinianɩ-a ɔjɩ yɛ, 'mɔ -Lagɔ ji-a 'ghlimanɩɛ.”
Zezwi yɛ 'gwiekikiee 'ji palɩ
15'Ylɩ -bhlʋ, 'n nɩkpa ji-a Zezwi 'gwiekikie -la, ɔ 'kʋa cɛ -gömö zʋ ɔ 'kʋa 'nyupalɩ 'paa yɛ. Ɔ 'wʋbhlinɩngwa yɩlɩɩ-a 'wʋ 'n wa ji-a nɩkpa la'a 'lʋnʋ. 16Zezwi wɔzʋa-a, ɔ nɛ -bha wa de naa: “A 'tati 'gwiekikie 'ji wa 'yɛ ma'a na 'bhɛyɩ ji. A 'na-a -sʋa 'yuo -nɩ. -Wʋʋ yɛ-a, nɩkpa -wa -wʋ-a wa swɩ, mʋa-a ji-e -ma -Lagɔɔ nyininyinipɩ 'wʋ möö. 17'Dɩɛ -dɩ n 'nyɛya-a sa'a naa: -Ɔ nɩ -Lagɔɔ nyininyinipɩ 'wʋɔ wɛlɩ 'gwikikeyie swɩ 'wʋ nglu ɔ 'na -ma ɛ 'wʋ mö.”
Wʋlʋwʋlʋnyɔ -bhlʋ yɛ 'kɔgwlɛpɩɛ yɛ Zezwi ngli 'jɩbha
18'Ylɩ -bhlʋ, 'zwiföyi 'kadɔ -bhlʋ, mɔ-ɔ ghlɩ-ɛ -bha Zezwi, 'n ɔ jio-a ngli 'jɩbha, ɔ nɛ naa: “-Abhitɩbha -ɔ -ga cɛ, sa n ji-a 'mö zʋzʋnʋɔ n 'yɛ 'kɔgwlɛpɩ ghlɩ 'nɩ?” 19Zezwi nɛ naa: “Manɩɛ yɛ -n la'a-a -ɔ -ga cɛ 'nɩ? -Bɛ 'nɩ cɛ -ga, 'n ɛ nɩ -Lagɔ -bhlʋ 'tɩ glɩnɩ. 20Gbö -Lagɔ -nyɛya-a -n jiɩ. -Lagɔ nɛ naa:
-N 'na-a yɩlɩ gbʋ -nɩ,
-n 'na-a 'lɩbha 'kuë -nɩ,
-n 'na-a ghli 'wi -nɩ,
-n 'na-a 'pa -na linɩkpɛ gbʋ -gömö -nɩ,
zʋ -bha -na -tɩbha -yɛ -na -da 'sɔ.”
21Nɩkpɛ la'a nɛ: “-Abhitɩbha, n-n -bhla 'gu 'wʋ, 'n n ji-a -ɩ -la 'bhuoo -bhazʋzʋɛ tɛ-ɛ.” 22Ɔ gba-a -sɩbha, Zezwi nɛ -bha ɔ de naa: “-Lu -bhlʋ tʋ-ɔ -bhla -na de 'wʋ. -N -yɛ mö -na -li bhuoo -n -ka-a, 'pɩ 'pɛlʋ -n 'yɛ ɩ mëni 'pʋangwa cɛ dlinɩ. -Bhaa do'o, -n ji -ma -Lagɔ 'wʋ wʋlʋwʋlʋɛ 'kadɛ ghlɩ. -N -yɛ-a 'mö -sɩbha nʋ 'bhë, ji -n ka'a -ganɩ.” 23Nɩkpɛ la'a, wʋlʋ ɔ wʋlʋ-a tenyie yɛ, Zezwi gba-a sa'a ɔ klʋ-ʋ tlɩ-a 'mö.
24Zezwi yɩlɩ-a ɔ 'klʋɔ 'mötlɩlɩ-ɛ, ɔ nɛ: “'Wuë! Nɩkpa -wa ka-a lɩ wa 'yɛ -ma -Lagɔɔ nyininyinipɩ 'wʋ mö, wa de 'mö ɩ 'tɛ-a lɛɛ! 25-Ma ɩ 'mö, -sʋkʋ 'kadʋ 'yɛ -bha 'sayie -dʋ 'ji 'plɩnɩ, mɩ-ɩ jɔnʋ-a 'wʋ wʋlʋwʋlʋnyɔ 'yɛ -ma -Lagɔɔ nyininyinipɩ 'wʋ möö bhla.” 26Zezwi gba-a sa'a, nɩkpa -wa -wʋɔ la-a 'yukwli pönɩ 'le, wa nɛ naa: “Ɩ -yɛ -sa 'mö -wʋ-ɔ, -mɔ bhɛlɩ-ɛ 'mö-a ɔ 'yɛ 'pʋ 'nɩ?” 27Zezwi nɛ naa: “-Ɩ la'a -ɩ 'tɛ-ɛ -bha nɩkpaa de 'wʋ, ɩ'ɩ -nɩ -bha -Lagɔɔ de 'wʋ 'tɛ-ɛ.”
28Ɔ gba-a sa'a 'n Piɛlɩ ji-a gbʋ -dɩ, ɔ nɛ naa: “Nyininyɔ, yie, -na yɛ -a tɩ-ɛ -bha -aa -li 'bhuo 'n -a -ganɩmö-ö la'a.” 29Zezwi nɛ -bha wa de: “'Dɩɛ -dɩ n 'nyɛya-a sa'a naa: Nɩkpɛ -yɛ -Lagɔɔ nyininyinipɩɛ yɛ ma'a 'pɩ 'wʋɔ -li -bha tɩ, ɛ ji 'ligbë glɩnɩ, ɛ ji ɔ 'nglɔ glɩnɩ, ɛ ji ɔ -dagwie glɩnɩ, ɛ ji ɔ -tɩbha -yɛ ɔ -da 'sɔ glɩnɩ, ɛ ji ɔ 'gwie glɩnɩ, ɔ -kʋa -bha tɩ, 30-sɩbhaa nɩkpɛ la'a, -Lagɔ jio -ɩ ɔ tɩ-ɛ -bhaa mlinɩlie -bɛ 'nyɛ 'bhë, ʋ jio 'yɛ zʋma 'kɔgwlɛpɩ 'nyɛ.”
Zezwi yɛ ta do'o ɔ tlɩtlɩɛ -yɛ ɔ gluwlʋwlʋɛ 'sɔɔ gbʋ gba
31Zezwi -yɛ ɔ tiatiangwa kugbïa 'sɔ -kpɔ 'sɔ do-a yawʋ, ɔ nɛ -bha wa de naa: “Zelwizalɛmö -a -wʋ-ɔ la'a mö 'le. -A -yɛ -ma nyini-e, -ɩ la'a 'bhuo -Lagɔɔ 'mögbanɩngwa 'cɛlɩ la-a Nɩkpɛɛ 'Guo yɛ, 'wʋ ɩ ji-a 'wlenɩɛ. 32Nɩkpa -wa 'nɩ-a 'zwiföa glɩnɩ 'mʋa wa jio-a kunʋɔ, wa 'kɔ-a gla palɩ, wa 'kɔ-a sa, wa 'kɔ-a -dlɛ 'wʋ sulu. 33Wa -kɔɔ -plɩ 'sɛlɩnɩ 'bhë, wa 'kɔ-a 'lɩbha ɔ 'yɛ-a tlɩ. Ɔ -yɛ tlɩ 'bhë 'ylɩɛ tazlɩ 'mö ɔ 'yɛ-a glu 'wlʋ.” 34Zezwi gba-a sa'a wa de-e, wɛlɩ la'a 'klʋ ɩ 'gɔ-ɔ -bha wa dee yɛ, wa 'nɩɩ-ɩ 'mö 'nʋ.
Zezwi yɛ -ma Zelikoo 'lɔkpɔlɔkpɔnyɔ -bhlʋ göpö
35Zezwi-e -bha Zelikoo 'gbë yawʋ nyini 'le, 'lɔkpɔlɔkpɔnyɔ -bhlʋ glɩ -bha 'yuogblʋɔ -kʋkʋngoyawʋ, 'n ɔ -wʋ-a nɩkpa 'jɩbhanɩ 'le. 36Nɩkpɛ la'a 'nʋ-a -wa -wʋ-a 'plɩ 'lee jɔ-ɔ, ɔ 'jɩbha-a ngli, 37'n wa jio-a 'dɩ -sanɩ naa Nazalɛtɩɛ Zezwi -wʋ-a 'plɩ 'le. 38Wa -sanɩɔ-a 'dɩ, 'n ɔ ji-a 'mö 'kpö, ɔ nɛ: “Davidɩɛ 'Gu Zezwi, n -bhiamö yawʋ yɩlɩ na ngazɩklʋ!” 39Ɔ 'kpö-ö sa'a 'mö, -wa la'a -wa -ga-a -ma 'yu 'n wa jio-a 'wliyawʋ nylanɩ, wa nɛ: “Zʋ yɩ ngo yɛ 'na-a!” 'Mɩɛ 'bhë ɔ nyla-a tenyi, 'n ɔ nʋ-a: “Davidɩɛ 'Gu Zezwi, yɩlɩ na ngazɩklʋ!” 40'N Zezwi ji-a 'nɩgbö, ɔ nɛ: “A -nyɔɔ ji.” Wa -nyɔɔ nyini-e -bha ɔ yawʋ-ɔ, 'n Zezwi jio-a ngli 'jɩbha naa: 41“'Manɩ -n 'jɩbha-a n 'yɛ -na de nʋ 'nɩ?” Ɔ nɛ: “Nyininyɔ, n -bhiamö yawʋ kalɩ na 'jie n 'yɛ sɛ jɩnɩmanɩ.” 42Ɔ gba-a sa'a, Zezwi nɛ -bha ɔ de naa: “-Na -Lagɔɔ dlɩwʋkakʋ -kamö pua 'bhë, -na 'jie jɩnɩmanɩ yɛ.” 43-Bha -gaganɩlɩ'ɩ, 'n 'lɔkpɔlɔkpɔnyɔ 'jie ji-a 'kaluo. Ɔ-ɔ -Lagɔɔ 'nglɩ 'ghlimanɩ 'le 'n ɔ ji-a Zezwi 'bɩ bhlinɩ. Nɩkpa 'bhuo yɩlɩ-a -ɩ la'a, 'n wa ji 'yɛ-a -nɩ -Lagɔɔ 'nglɩ 'ghlimanɩ.
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
Bete New Testament © Bible Society of Côte d'Ivoire 1996