Mateo 20

1“Anwuro Ahennie ne te kyɛ efiewura bie bɔ ɔhɔle dwaaso ngyerɛmɔ tutuutu, kyɛ ɔkwaapena apaafoɛ maa bɛbayɛ ye bobe boo nu adwuma. 2Ɔne bɛhane ye kyɛ, kyẽa ne kɔ awieɛ a, ɔkɔma bɛ dɛnare kõ, yeti bɛne ye hɔle ɛboo nanu. 3Ɔbɔle kɔyɛ ngyerɛmɔ 9:00#20:3 Ngyerɛaseɛ Tee: “Dɔn bɔ ɔtɔ so nza” ne, ɔhɔle kuro nu, na onwuni kyɛ ebiemɔ gyi-gyi dɔ bɔ bɛnyɛ hwee. 4Yeɛ ɔha hyirele bɛ kyɛ, ‘Ɛmɔ koso, ɛmɔse bɛɛyɛ me bobe boo nanu adwuma, na ngotua ɛmɔ kerɛ kama.’ 5Yeti, bɛhɔle. Na osa hɔle kuro nu kɔyɛ eyia 12:00#20:5 Ngyerɛaseɛ Tee: “Dɔn bɔ ɔtɔ so nzia” ne eyia 3:00#20:5 Ngyerɛaseɛ Tee: “Dɔn bɔ ɔtɔ so ngona” ɔɔyɛle sɔ ala. 6Na nnɔsoa kɔyɛ 5:00#20:6 Ngyerɛaseɛ Tee: “Dɔn bɔ ɔtɔ so buru ne kõ” ne, osa hɔle, na onwuni kyɛ ebiemɔ tɛ́ gyi-gyi dɔ bɔ bɛnyɛ hwee. Yeɛ obisale bɛ kyɛ: ‘Nzuati yeɛ ɛmɔ agyina wa ɛnɛ kyẽa namu bɔ ɛmɔ anyɛ adwuma biala ne?’ 7Bɛyele ye noa kyɛ: ‘Ebiala ammɔ yɛ paa.’ Yeɛ ɔhane kyɛ: ‘Ɛmɔ koso, ɛmɔse bɛɛyɛ me boo nanu adwuma.’ 8Odwuli nnɔsoa ne, ɛboo wura ne frɛle bɔ ɔnea apaafoɛ naso ne, yeɛ ɔha hyirele ye kyɛ, ‘Frɛ apaafoɛ nemɔ na fa b'akatua ma bɛ, hyɛ yebo fi bɔ ɔpɛ yebo naso kodwu bɔ oli moa naso.’ 9Bɛ bɔ bɛwale nnɔsoa 5:00 ne wale ne, ɔmane bɛ nu biala dɛnare kõ. 10Yeti, ɔfrɛle bɛ bɔ bɛli moa ne maa bɛwale ne, né b'adwene yɛ bɛ kyɛ bekonya pee bɛkɔtra bɛ bɔ bɛpɛle yebo ne. 11Ɔfale b'akatua ne mane bɛ ne, bɛbobɔle bɛ bonyi bɛguale efiewura naso 12kyɛ, ‘Bɛ bɔ bɛwale siɛ ne yɛle adwuma dɔnhwere komapɛ, nakoso yɛbɔ yayɛ adwuma fi ngyerɛmɔ tonn maa eyia ayera yɛ ne, ama yɛ ne bɛ mukoraati akatua kõ.’ 13Nakoso, ɔha hyirele ye kyɛ, ‘Me damvo, mayɛ wɔ bɔne hɔ? Nná dɛnare kõ yeɛ mene wɔ hane ye nwo dwirɛ ɔ, anaa melaka? 14De wɔ sikaa na kɔ, bɔ mafa mama wɔ ne, ebiala yeɛ mefa mema bɔ oli wɔ si ne ɔ. 15Me bɔbɔ me nikye koso, nnne ye nwo atee kyɛ mefa meyɛ bɔ mekuro anaa? Anaa pa bɔ meyɛ ne yɛ wɔ yea.’ 16Yeti, bɔ ɔpɛ yebo ne koli moa, na bɔ oli moa ne kɔpɛ yebo.”

17Bɛnate atee so bɛfo bɛkɔ Yerusalem ne, Yesu frɛle asuafoɛ 12 ne hɔle ahameɛ, na ɔha hyirele bɛ kyɛ: 18“Ɛmɔnea, yɛfo yɛkɔ Yerusalem, na bɛkɔfa Sona Awa ne bɛkowura sɔfo mbanyi ne atwerɛfoɛ ne sa. Bɛkobu ye kumfɔ, 19ná bafa ye bama maen-maen nanufoɛ ne kyɛ bɛgoro ye nwo, bɛgwa ye, na bɛbɔ ye asɛnnua nu; nakoso ɛlɛsa si ne okotingye.”

20Ye si ne, Sebedeo mmaa nemɔ ne bɛ maame wale Yesu berɛ, na bɛbule ndwerɛ wɔ ye nyunu bɛsrɛle ye kyɛ ɔyɛ nikye bie ma bɛ. 21Obisale bɛ kyɛ: “Nzu yeɛ ɛmɔpena ɔ?” Ɔha hyirele ye kyɛ: “Hyɛ me bɔ kyɛ, me mmaa nyɔ he, ɛkɔmaa kõ kɔtena wɔ bɛen na kõ atena wɔ famaa wɔ w'ahennie nu.” 22Yesu bisale bɛ kyɛ: “Ɛmɔse nikye bɔ ɛmɔbisa ne? Kwangoa bɔ mebaano ne, ɛmɔ kɔhora ye no?” Bɛhane kyɛ: “Yoo, yɛkɔhora.” 23Yeɛ Yesu hane kyɛ: “Kwangoa ne de, ɛmɔ kɔno, nakoso me bɛen so ne me famaa so ne de, ɔtte me deɛ ná mafa mama ɛmɔ, mmom bɛ bɔ me Baba asiesie ama bɛ ne, bɛ yeɛ ɔte bɛ deɛ ɔ.” 24Buru bɔ baha ne tele ɛhe ne, bɛ nye borole aliemaa nyɔ naso paa. 25Nakoso Yesu frɛle bɛ, yeɛ ɔha hyirele bɛ kyɛ: “Ɛmɔse kyɛ maen-maen nemɔ nu ne, bɛ bɔ bɛdi tumi ne di mmenia naso bakoma, na atitire ne fa bɛ tumi hyɛ bɛ so. 26Nakoso, ɛmɔ nu de, nnɛmɔ maa ɔba ye sɔ; mmom ebiala bɔ ɔpena kyɛ ɔyɛ titire ne, odikyɛ ɔsõ bɛ bɔ baha ne, 27na bɔ ɔpena kyɛ odi anyunu ne, odikyɛ ɔyɛ akoaa. 28Sɔ ala yeɛ sona Awa ne amma kyɛ bɛsõ ye, mmom ɔwale kyɛ ɔbaasõ, ná ɔfa ye ngoa yɛ agyedeɛ fa de mmeni pee.”

29Bɛkɔ Yeriko ne, mmeni pee lili ye si. 30Né anyesiniwaafoɛ nyɔ bie te atee ne noa, na bɛtele kyɛ Yesu pɛ nu ne, bɛteɛteane nu kyɛ: “Awurade, David awa, nwu yɛ anwunvo!” 31Nakoso mmenia ne teɛteane bɛ, na bɛha bɛhyirele bɛ kyɛ bɛyɛ konn. Nakoso bɛteɛteane nu serɛ kyɛ: “Awurade, David Awa, nwu yɛ anwunvo!” 32Yeti Yesu gyinane, na ɔfrɛle bɛ, yeɛ ɔha hyirele bɛ kyɛ: “Nzu yeɛ ɛmɔpena kyɛ meyɛ mema ɛmɔ ɔ?” 33Bɛhane kyɛ: “Awurade, yɛpena kyɛ yɛ nye te.” 34Edwirɛ ne yɛle Yesu aworabɔ, yeti ɔfale ye sa hane bɛ nye ne, na ɛberɛ ala, bɛnwuni nikye, ná bɛlili ye si.

Currently Selected:

Mateo 20: SNT

Highlight

Compare

Copy

Want to have your highlights saved across all your devices? Sign up or sign in

This translation of the Bible in Sehwi is provided for personal, educational, and church use. No part of this publication may be reproduced, distributed, or transmitted in any form or by any means, including photocopying, recording, or other electronic or mechanical methods, without prior written permission of the copyright holder, except in the case of brief quotations embodied in critical reviews and certain other noncommercial uses permitted by copyright law.

Authorized digital distribution may be made through approved Bible platforms and partner organizations under license.

For permission requests, write to the publisher at the address below:

LexiHUB

Box 2, Sefwi Juaboso, Western North Region, Ghana

Email: info.lexihub@gmail.com

Learn More About New Testament Bible