Mateo 7

1“Nnɛmɔbu atɛn, ná bammu ɛmɔ atɛn; 2ofikyɛ kyɛbɔ ɛmɔbu mmenia atɛn ne, sɔ ala yeɛ bɛkobu ɛmɔ atɛn ɔ. Na kongo bɔ ɛmɔfa bɛsusu nikye bɛma mmenia ne, ɛhene ala yeɛ bɛkɔfa bɛkosusu bɛkɔma ɛmɔ ɔ.

3“Nzuati yeɛ ɛkora nwu ndɛtɛ bɔ ɔla eliema nye so, ná mbuna#7:3 Mbuna te bakaa bɔ bɛfa bɛbɔ sua so. bɔ ɔla wɔ bɔbɔ wɔ nye so ne de, ɛnnwu ye ɔ? 4Na ɔkɔyɛ sɛɛ na ahora aha ahyire eliema kyɛ, ‘Ma nye ndɛtɛ bɔ ɔla wɔ nye so ne, nakoso wɔ de, nea, mbuna yeɛ ɔla wɔ nye so ɔ?’ 5Nyaatwomniɛ, di moa ye mbuna bɔ ɔla wɔ nye so ne, ɛhene kɔmaa ekonwu nikye yé, na ahora aye ndɛtɛ bɔ ɔla eliema ne nye so ne.

6“Nnɛmɔfa nikye bɔ ɔte krongron bɛma ngyea, na nnɛmɔfa agudeɛ pa bɛgua mbrako nyunu, ná bandietia so, bangakyi bɛ nwo bandete ɛmɔ nu.

7“Ɛmɔhɔ so bɛbisa, na ɛmɔ sa kɔha ye; ɛmɔhɔ so bɛpena, na ɛmɔ konwu ye, na ɛmɔhɔ so bɛbɔnu, na bɛkɔbukye ɛmɔ. 8Ofikyɛ ebiala bɔ ɔkɔso bisa ne, ye sa ka ye; ebiala bɔ ɔkɔso pena ne, onwu ye, na ebiala bɔ ɔkɔso bɔnu ne, bɛbukye ye.

9“Ɛmɔ nu nwa, yeɛ ɔwa serɛ ye paanoo a, ɔkɔfa nyɔboɛ kowura ye sa nu ɔ? 10Anaa ɔserɛ egyein a, ɔkɔfa ɛwoo kɔma ye ɔ? 11Ɛmɔ bɔ ɛmɔte abɔnefoɛ ne po, sɛ ɛmɔse kyɛ, odikyɛ ɛmɔma ɛmɔ mmaa mɔ nikye pa a, ye de, nzuati yeɛ ɛmɔ Baba bɔ ɔwɔ anwuro ne ngɔfa nikye pa ngɔma bɛ bɔ bɛbisa ye ne ɔ?

12“Yeti, nikye biala bɔ ɛmɔpena kyɛ mmenia yɛ ma ɛmɔ ne, ɛmɔ koso ɛmɔyɛ sɔ ala bɛma bɛ. Ofikyɛ sɔ ala yeɛ mmeraa ne adiifoɛ ne ka ɔ.

13“Ɛmɔfa anoa kamba nanu, ofikyɛ anoa piri ne atee kandinga ne kɔ ewue nu, na bɛ bɔ bɛnate so ne sone paa. 14Nakoso anoa kamba ne, ɔne atee fianwo#7:14 Anaa “Teamaa.” ne yeɛ ɔkɔ ngoa nu ɔ, ná mmenia kaa bie yeɛ bɛnwu ye ɔ.

15“Ɛmɔnea ɛmɔ nwo ye wɔ ngondombo adiifoɛ nwo, bɛba ɛmɔ berɛ a, ɛyɛ a ne bafa mmoan nwomaa bawura bɛ nwo, nakoso bɛte mbataku bɔ bɛdi adufum. 16Bɛ mmaa#7:16 Anaa “Nneyɛɛ.” yeɛ ɔkɔmaa ɛmɔ konwu bɛ ɔ. Aso, bɛtete bobe wɔ mmowie so, anaa bɛtete borɔdoma wɔ ɛfone so? 17Sɔ ala yeɛ bakaa pa biala su mmaa pa, na bakaa bɔ ɔttemaye biala su mmaa tɛɛ. 18Bakaa pa ngɔhora ngosu mmaa tɛɛ, na bakaa bɔ ɔttemaye ngɔhora ngosu mmaa pa. 19Bakaa biala bɔ onzu mmaa pa ne, bɛpɛ na bagyi bagua see nu. 20Bɔ ɔte yeɛ ole kyɛ, bɛ mmaa#7:20 Anaa “Nneyɛɛ.” yeɛ ɔkɔmaa ɛmɔ konwu bɛ ɔ.

21“Nná ebiala bɔ ɔka kyire me kyɛ, ‘Awurade, Awurade’ ne yeɛ ɔkɔhɔ anwuro Ahennie nanu ɔ, mmom bɛ bɔ bɛyɛ bɔ me Baba bɔ ɔwɔ anwuro ne kuro ne, bɛ yeɛ bɛkɔhɔ nu ɔ. 22Sɔ kyẽa ne, mmeni pee kɔha kohyire me kyɛ: ‘Awurade, Awurade, yɛfale wɔ dumaa yɛhyɛle ngɔm, yɛfale wɔ dumaa yɛtule sunzummɔne, na yɛfale wɔ dumaa yɛyɛle anwanwadeɛ pee!’ 23Ná ɛberɛ yeɛ ngɔha ngohyire bɛ kyɛ: ‘Menze ɛmɔ koraa! Ɛmɔfi me so bɛhɔ, ɛmɔ bɔ ɛmɔyɛ nningyein bɔ ɔttemaye.’

24“Ebiala bɔ otie me dwirɛ he, na ɔfa yɛ adwuma ne, ɔte kyɛ nyanzaniɛ bie bɔ osili ye sua siele nyɔbotaen bie so ne. 25Nzue tɔle, na oyili, na mvrama tu bɔle sua ne, nakoso wammu, ofikyɛ né wasi wasie nyɔbotaen so.

26“Na ebiala bɔ otie me dwirɛ, nakoso ɔmva nnyɛ adwuma ne, ɔkɔyɛ kyɛ kwasea bie bɔ osili ye sua siele anweaa nu ne. 27Nzue tɔle, na oyili, na mvrama tu bɔle sua ne, na obuli, obubuli koraa.”

28Yesu dwudwo yiele ne, kyɛbɔ ohyirehyirele bɛ ne maa bɛ nwo dwirili bɛ, 29ofikyɛ ne okyirekyire bɛ kyɛ ebie bɔ ole tumi, ná ɔtte kyɛ b'atwerɛfoɛ nemɔ.

Currently Selected:

Mateo 7: SNT

Highlight

Compare

Copy

Want to have your highlights saved across all your devices? Sign up or sign in

This translation of the Bible in Sehwi is provided for personal, educational, and church use. No part of this publication may be reproduced, distributed, or transmitted in any form or by any means, including photocopying, recording, or other electronic or mechanical methods, without prior written permission of the copyright holder, except in the case of brief quotations embodied in critical reviews and certain other noncommercial uses permitted by copyright law.

Authorized digital distribution may be made through approved Bible platforms and partner organizations under license.

For permission requests, write to the publisher at the address below:

LexiHUB

Box 2, Sefwi Juaboso, Western North Region, Ghana

Email: info.lexihub@gmail.com

Learn More About New Testament Bible