Matius 25
25
Smatna nane rciap turus denabe Yesuse nlafo hawe
1Yesuse nu hawe, “Lomanta Smat ta mali sorogaica nlafo hawe fare nkawasa ndadi Kolano mali ni smatna, tina fatailo laisa andeande tae: en malesna smat yafasa dut padamara bo rtotoman man ta nfasawca. 2Mali yafasa tasa, silime rbodok, silim tasa rpande. 3Silim ta rbodok tasa dute riri poci, ga dut egatna foloi pa. 4Ga silim ta rpande tasa en dute riri pocina fare riri egatna foloi.
5Males yafasa tasa rtotoman man ta nfasauca, ga mnu nlafo pana. Si damtututil gabe damtuli.
6Gabe wop fapaluan, si rgarayan smatna rgigam, ‘Ya, man ta nfasauca nlafo to! Mali to bo ttotoman i!’
7Rlonga tina males yafasa tasa rpaling, taga rfapepeya riri pocina. 8Fare males ta rbodok tasa dua males ta rpande tasa, ‘Fpo am egat faokoce, ningalena animam poci tae bo nmate to.’
9Ga males ta rpandena du laitane, ‘Amame bisa koce mew egat pa, ningalena osta egat tane nlafo pa bo amam fare mewna. Ta mafiana mew ffane to bo fgon egat mali smat ta rwagena.’
10Gabe males ta rbodokna rfane rgon egat. Oras ta si rfane rgon egat, man ta nfasauca nlafo. Ga males ta rpandena rsiape to, rcung farerer re man ta nfasauca mali gagaw ta rpeo i rameca, taga rkait bawaca.
11Fola tina, males ta rbodokna duwe rgon egatna, si dem bawaca rkait i to, gabe si dololaw, ‘Apa, Apa! Msalawe bawaca lae.’
12Ga man ta nfasauca nu pumul ebaica lolo nata, ‘Flonga, ya ifayala mew pa.’ ”
13Nafetange fola andeande cia, Yesuse nu hawe, “Gabe mew fjaga to, ningalena mew osta fto pa, opfis Ya bo ilafo hawena.”
Smat karajan ta rmanahan fare smat karajan ta rmanahan pa
(Luk. 19:11-27)
14Yesuse nu hawe, “Gabe Smat ta mali sorogaica nlafo hawe Nkawasa ndadi Kolano, tina ni rupana fatailo laisa andeande tae: En smat isa bo nfan lali gagaw ta laspa. Oras ta i bo nfan, i nololawe ni smat karajanna rfayalo farumi si, taga ni aratana si diyawa ni lalingna mfalaisa bo rdukna foloi hawe mali tina. 15Mali i ni smat karajan isa, i npo i tiwi mas tas pilim. Mali ni smat karajan isa ta nesa i haweca, i npo tiwi masna tas pilu. Taga, ni smat karajan ta nesana hawe, i npo tiwi masna tas pusa. I npo si kawasa tiwi mas tina, rderera si riri mampona isa-isa. Fola tina, i nfan.
16Gabe, smat karajan ta nyal tiwi mas tas pilim cia tina nfakiwaila tiwi tina, gabe i nduk tiwi masna tas pilim hawe. 17Laina bena re smat karajan ta nduk tiwi tas pilu cia. I nfakiwaila tiwi tina, gabe i nduk tiwi masna tas pilu hawe. 18Ga smat karajan ta nduk tiwi mas tas pusaca, i nfane ga n'gali lop mali nyinyenca, taga n'gogan tuan cia ni tiwina.
19Mnuna gaole taga riri tuanca nuwe. I nlafo laina, i nfayalo ni smat karajanna taga ncula si rfabinga i, mfalaisa re tiwi ta ipo mewna. 20Smat karajan ta nduk tiwi mas tasa pilim cia i lali ni tuanca taga npo i tiwi mas tas yafasa lali ni tuan cia. Gabe smat karajan cia nua ni tuan cia, ‘Laisa apa mdela ya mpo ya tiwi mas tas pilim hawe, ga oras tae mem, ya idukna tas pilim hawe.’
21Ga ni tuanca nua i, ‘Mafiana gaole ta awe mpei tina. Aw tane Ya nik smat karajan ta mmafia fare manahan. Awe manahan re okosesi ta nenena, gabe Ya osta ipo aw okosesi ta mamagal, gabe mali to bo farerer re ya, tfasangnang it farerer.’
22Fola tina, smat karajan ta nduk tiwi mas tas piluca i lali ni tuanca. Smat karajan cia nua ni tuanca laitane, ‘Apa, apa gabe laisa mdela ya mpo tiwi mas tas pilu hawe, oras tae mem, ya ifakiwaila ga iduk tas pilu hawe.’
23Gabe ni tuanca nua i, ‘Mafiana gaole ta awe mpei tina. Aw tane Ya nik smat karajan ta mmafia fare manahan. Ningalena awe manahan mali okosesi ta nenena, gabe tane Ya bo ipo aw okosesi ta mamagal. Gabe mali to bo mfarerer re Ya, bo tfasangnang it farerer!’
24Fola tina, smat karajan ta nduk tiwi mas tas pusaca i lali ni tuanca. Taga nua ni tuanca laitane, ‘Ya ito, apa wlomna cicoal. Apa jaga mfakati mali gagaw ta apa msake gei pa, fare apa jaga mnyal an bet mali bet ta aw mfatiwa pana. 25Gabe tina, oras ta apa mpo tiwi tane, ya ikamcait, matina denabe tiwi tane myangis. Gabe ta mafiana, tiwi tina ya igaile bo mati isa nyalna.’
26Fare, ni tuanca nua i, ‘Hei, aw tane smat karajan ta wlomna mayai fare mmabusu. Aw mto, ya jaga ifakati mali gagaw ta ya isake gei pana, fare ya jaga iyal an bet mali gagaw ta ya ifatiwa pana. 27Gabe ta mafiana, ya nik tiwi tina aw mfakiwaila bo oras ya ikuwena, ya bisa iyal tiwi tina fare ni foloina.’
28Gabe tuanca nua smat karajan ta nesana, ‘Fyale to tiwi mas tas pusa ta mali i ica, taga foce smat karajan ta nduk tiwi mas tas yafasa cia. 29Ningalena, gabe laisa smatna dailow ahai ta Ya ikuna, lomanta Jou Lahatalla n'gali i bo ntaifna lal. Ga smat ta dailow pa ahai ta Ya ikuna, ahai ta i ntona, Jou Lahatalla osta nyal hawe mali ii. 30Gabe, oras tae wagfo smat karajan ta ningale pa tae, taga ftopa i lali gagaw ta ndorororamca. Mali gagaw cia, smat ta bo rduk salna rtangis denabe fmorina kikik, ningale si rkangelana gaole.’ ”
Yesuse nfabinga mfalaisa lomanta oras ta I bo nadili farumi smatna
31Yesuse nu hawe, “Smat ta mali sorogaica bo nlafo hawe re ni kawasa ta mamagalna fare farumi malaikatna rfarerer re I, fare I bo ntotolang mali karapesa kolano ta nmamagalca. 32Mana, farumi suku bangsa osta rfayalo si mali I nbona. Fare I nfara si ndadi gagaw pilu, laisa smat ta rjaga domba nfara ni dombana mali kabilna. 33Smat ta jaga rderera be Jou ni mauna, si tina fatailo laisa dombana, ga i bo nfayalo si mali I ni welana. Ga smat ta rderera Jou ni mau pana, si tina fatailo laisa kabilna, ga I bo nfayalo si mali I ni balitna. 34Oras tina, Smat ta mali sorogaica ndadi Kolano cia bo nua smat ta si mali ni welana, ‘Flafo mali to mew ta Ya nik Apaca nbarakati mewna! Flafo to mali gagaw ta Ya bo Ikawasa idadi Kolano, Ya ifasadia to gagaw bo ipo mew mana mali tantuba be oras ta dunia tae ndadi ina. 35Ningalena, oras ta Ya ibibisil, mewe fatub Ya. Oras Ya glaok yamang, mewe faroma Ya waya. Oras Ya ilafo potalil mali, mew ta fyal Ya mali nimew ebai i. 36Oras ta Ya nik kabaya pa, mewe fpo Ya kabaya. Oras Ya ikowil, mew ffapepeya Ya. Oras ta Ya mali buica, mewe flafo fem Ya.’
37Ga smat ta jaga rpei okosesi ta molangna bo dua I laitane, ‘Jou, popise i ga ame kem Jou mbibisilna ame kfaseli Aw, Jou glaom yamang gabe kfaroma Aw waya? 38Popisei ame kem Jou ndadi smat po mali animam batang tae gabe amame kololaw Jou mali animam ebai i? Fare popisei ame kem Jou nim kabaya pa gabe ame kpo Jou kabaya? 39Fare popisei ame kem Jou mowil gabe ame kleleane Jou? Fare popisei ame kem Jou mali buica gabe ame klafo kem Aw Jou?’
40Lomanta fola Kolano cia nua si laitane, ‘Flolam famafia ta Ya ikua mew tane, farumi ta mew fpei bo fgali Ya nik del ta smatna du si riri ngale pa, tina fatailo laisa mew fpeo mali Ya i.’
41Gabe I bo nua smat ta mali ni balitna laitane, ‘Fdirake mew mantane to smat ta Jou npei fduk salsal ta tebteb, fare lali to bo fsung mali yap ta nmatmat pa cia, ta rfasiap i bo setanna riri kolanoca fare ni wawaina. 42Ningale, oras ta Ya ibibisil, mewe fatub Ya pa. Oras Ya glaok yamang, mew faroma Ya waya pa. 43Laina bena, Ya smat Ya potalil mali nimew batang tane, mewe fololaw Ya mali nimew ebai i pa. Oras ta Ya nik kabaya pa, mewe fpo Ya kabaya pa. Oras Ya ikowil, mewe ffapepeya Ya pa, fare oras ta Ya mali buica, mewe flafo fem Ya pa.’
44Gabe lomanta smat tina osta du laitane, ‘Jou, popise i ame kem Jou mbibisilna, glaom yamang, mdadi smat po aw mali smate ni batang, nim kabaya pa, mowil, fare Aw mali buica ga ame kleleane Aw pa Jou?’
45Gabe I osta ncanglo si laitane, ‘Flolam famafia ta Ya ikuwa mew tane, wol del wol mew failow pa bo fgali smat faisa mali Ya nik del ta smatna du riri ngale pa, tina laisa mew failow pa bo fgali Ya na.’ ”
46Gabe Yesuse nu hawe, “Smat ta rfaduli smat pana osta Joue nfasal si mali yap ta nmatmat pa cia denabe lali. Ga smat ta rpei be okosesi ta molang, osta rtubna re Jou Lahatallana denabe lali.”
Currently Selected:
Matius 25: BZQ
Highlight
Share
Compare
Copy
Want to have your highlights saved across all your devices? Sign up or sign in
2026 Indonesian Bible Society
Matius 25
25
Smatna nane rciap turus denabe Yesuse nlafo hawe
1Yesuse nu hawe, “Lomanta Smat ta mali sorogaica nlafo hawe fare nkawasa ndadi Kolano mali ni smatna, tina fatailo laisa andeande tae: en malesna smat yafasa dut padamara bo rtotoman man ta nfasawca. 2Mali yafasa tasa, silime rbodok, silim tasa rpande. 3Silim ta rbodok tasa dute riri poci, ga dut egatna foloi pa. 4Ga silim ta rpande tasa en dute riri pocina fare riri egatna foloi.
5Males yafasa tasa rtotoman man ta nfasauca, ga mnu nlafo pana. Si damtututil gabe damtuli.
6Gabe wop fapaluan, si rgarayan smatna rgigam, ‘Ya, man ta nfasauca nlafo to! Mali to bo ttotoman i!’
7Rlonga tina males yafasa tasa rpaling, taga rfapepeya riri pocina. 8Fare males ta rbodok tasa dua males ta rpande tasa, ‘Fpo am egat faokoce, ningalena animam poci tae bo nmate to.’
9Ga males ta rpandena du laitane, ‘Amame bisa koce mew egat pa, ningalena osta egat tane nlafo pa bo amam fare mewna. Ta mafiana mew ffane to bo fgon egat mali smat ta rwagena.’
10Gabe males ta rbodokna rfane rgon egat. Oras ta si rfane rgon egat, man ta nfasauca nlafo. Ga males ta rpandena rsiape to, rcung farerer re man ta nfasauca mali gagaw ta rpeo i rameca, taga rkait bawaca.
11Fola tina, males ta rbodokna duwe rgon egatna, si dem bawaca rkait i to, gabe si dololaw, ‘Apa, Apa! Msalawe bawaca lae.’
12Ga man ta nfasauca nu pumul ebaica lolo nata, ‘Flonga, ya ifayala mew pa.’ ”
13Nafetange fola andeande cia, Yesuse nu hawe, “Gabe mew fjaga to, ningalena mew osta fto pa, opfis Ya bo ilafo hawena.”
Smat karajan ta rmanahan fare smat karajan ta rmanahan pa
(Luk. 19:11-27)
14Yesuse nu hawe, “Gabe Smat ta mali sorogaica nlafo hawe Nkawasa ndadi Kolano, tina ni rupana fatailo laisa andeande tae: En smat isa bo nfan lali gagaw ta laspa. Oras ta i bo nfan, i nololawe ni smat karajanna rfayalo farumi si, taga ni aratana si diyawa ni lalingna mfalaisa bo rdukna foloi hawe mali tina. 15Mali i ni smat karajan isa, i npo i tiwi mas tas pilim. Mali ni smat karajan isa ta nesa i haweca, i npo tiwi masna tas pilu. Taga, ni smat karajan ta nesana hawe, i npo tiwi masna tas pusa. I npo si kawasa tiwi mas tina, rderera si riri mampona isa-isa. Fola tina, i nfan.
16Gabe, smat karajan ta nyal tiwi mas tas pilim cia tina nfakiwaila tiwi tina, gabe i nduk tiwi masna tas pilim hawe. 17Laina bena re smat karajan ta nduk tiwi tas pilu cia. I nfakiwaila tiwi tina, gabe i nduk tiwi masna tas pilu hawe. 18Ga smat karajan ta nduk tiwi mas tas pusaca, i nfane ga n'gali lop mali nyinyenca, taga n'gogan tuan cia ni tiwina.
19Mnuna gaole taga riri tuanca nuwe. I nlafo laina, i nfayalo ni smat karajanna taga ncula si rfabinga i, mfalaisa re tiwi ta ipo mewna. 20Smat karajan ta nduk tiwi mas tasa pilim cia i lali ni tuanca taga npo i tiwi mas tas yafasa lali ni tuan cia. Gabe smat karajan cia nua ni tuan cia, ‘Laisa apa mdela ya mpo ya tiwi mas tas pilim hawe, ga oras tae mem, ya idukna tas pilim hawe.’
21Ga ni tuanca nua i, ‘Mafiana gaole ta awe mpei tina. Aw tane Ya nik smat karajan ta mmafia fare manahan. Awe manahan re okosesi ta nenena, gabe Ya osta ipo aw okosesi ta mamagal, gabe mali to bo farerer re ya, tfasangnang it farerer.’
22Fola tina, smat karajan ta nduk tiwi mas tas piluca i lali ni tuanca. Smat karajan cia nua ni tuanca laitane, ‘Apa, apa gabe laisa mdela ya mpo tiwi mas tas pilu hawe, oras tae mem, ya ifakiwaila ga iduk tas pilu hawe.’
23Gabe ni tuanca nua i, ‘Mafiana gaole ta awe mpei tina. Aw tane Ya nik smat karajan ta mmafia fare manahan. Ningalena awe manahan mali okosesi ta nenena, gabe tane Ya bo ipo aw okosesi ta mamagal. Gabe mali to bo mfarerer re Ya, bo tfasangnang it farerer!’
24Fola tina, smat karajan ta nduk tiwi mas tas pusaca i lali ni tuanca. Taga nua ni tuanca laitane, ‘Ya ito, apa wlomna cicoal. Apa jaga mfakati mali gagaw ta apa msake gei pa, fare apa jaga mnyal an bet mali bet ta aw mfatiwa pana. 25Gabe tina, oras ta apa mpo tiwi tane, ya ikamcait, matina denabe tiwi tane myangis. Gabe ta mafiana, tiwi tina ya igaile bo mati isa nyalna.’
26Fare, ni tuanca nua i, ‘Hei, aw tane smat karajan ta wlomna mayai fare mmabusu. Aw mto, ya jaga ifakati mali gagaw ta ya isake gei pana, fare ya jaga iyal an bet mali gagaw ta ya ifatiwa pana. 27Gabe ta mafiana, ya nik tiwi tina aw mfakiwaila bo oras ya ikuwena, ya bisa iyal tiwi tina fare ni foloina.’
28Gabe tuanca nua smat karajan ta nesana, ‘Fyale to tiwi mas tas pusa ta mali i ica, taga foce smat karajan ta nduk tiwi mas tas yafasa cia. 29Ningalena, gabe laisa smatna dailow ahai ta Ya ikuna, lomanta Jou Lahatalla n'gali i bo ntaifna lal. Ga smat ta dailow pa ahai ta Ya ikuna, ahai ta i ntona, Jou Lahatalla osta nyal hawe mali ii. 30Gabe, oras tae wagfo smat karajan ta ningale pa tae, taga ftopa i lali gagaw ta ndorororamca. Mali gagaw cia, smat ta bo rduk salna rtangis denabe fmorina kikik, ningale si rkangelana gaole.’ ”
Yesuse nfabinga mfalaisa lomanta oras ta I bo nadili farumi smatna
31Yesuse nu hawe, “Smat ta mali sorogaica bo nlafo hawe re ni kawasa ta mamagalna fare farumi malaikatna rfarerer re I, fare I bo ntotolang mali karapesa kolano ta nmamagalca. 32Mana, farumi suku bangsa osta rfayalo si mali I nbona. Fare I nfara si ndadi gagaw pilu, laisa smat ta rjaga domba nfara ni dombana mali kabilna. 33Smat ta jaga rderera be Jou ni mauna, si tina fatailo laisa dombana, ga i bo nfayalo si mali I ni welana. Ga smat ta rderera Jou ni mau pana, si tina fatailo laisa kabilna, ga I bo nfayalo si mali I ni balitna. 34Oras tina, Smat ta mali sorogaica ndadi Kolano cia bo nua smat ta si mali ni welana, ‘Flafo mali to mew ta Ya nik Apaca nbarakati mewna! Flafo to mali gagaw ta Ya bo Ikawasa idadi Kolano, Ya ifasadia to gagaw bo ipo mew mana mali tantuba be oras ta dunia tae ndadi ina. 35Ningalena, oras ta Ya ibibisil, mewe fatub Ya. Oras Ya glaok yamang, mewe faroma Ya waya. Oras Ya ilafo potalil mali, mew ta fyal Ya mali nimew ebai i. 36Oras ta Ya nik kabaya pa, mewe fpo Ya kabaya. Oras Ya ikowil, mew ffapepeya Ya. Oras ta Ya mali buica, mewe flafo fem Ya.’
37Ga smat ta jaga rpei okosesi ta molangna bo dua I laitane, ‘Jou, popise i ga ame kem Jou mbibisilna ame kfaseli Aw, Jou glaom yamang gabe kfaroma Aw waya? 38Popisei ame kem Jou ndadi smat po mali animam batang tae gabe amame kololaw Jou mali animam ebai i? Fare popisei ame kem Jou nim kabaya pa gabe ame kpo Jou kabaya? 39Fare popisei ame kem Jou mowil gabe ame kleleane Jou? Fare popisei ame kem Jou mali buica gabe ame klafo kem Aw Jou?’
40Lomanta fola Kolano cia nua si laitane, ‘Flolam famafia ta Ya ikua mew tane, farumi ta mew fpei bo fgali Ya nik del ta smatna du si riri ngale pa, tina fatailo laisa mew fpeo mali Ya i.’
41Gabe I bo nua smat ta mali ni balitna laitane, ‘Fdirake mew mantane to smat ta Jou npei fduk salsal ta tebteb, fare lali to bo fsung mali yap ta nmatmat pa cia, ta rfasiap i bo setanna riri kolanoca fare ni wawaina. 42Ningale, oras ta Ya ibibisil, mewe fatub Ya pa. Oras Ya glaok yamang, mew faroma Ya waya pa. 43Laina bena, Ya smat Ya potalil mali nimew batang tane, mewe fololaw Ya mali nimew ebai i pa. Oras ta Ya nik kabaya pa, mewe fpo Ya kabaya pa. Oras Ya ikowil, mewe ffapepeya Ya pa, fare oras ta Ya mali buica, mewe flafo fem Ya pa.’
44Gabe lomanta smat tina osta du laitane, ‘Jou, popise i ame kem Jou mbibisilna, glaom yamang, mdadi smat po aw mali smate ni batang, nim kabaya pa, mowil, fare Aw mali buica ga ame kleleane Aw pa Jou?’
45Gabe I osta ncanglo si laitane, ‘Flolam famafia ta Ya ikuwa mew tane, wol del wol mew failow pa bo fgali smat faisa mali Ya nik del ta smatna du riri ngale pa, tina laisa mew failow pa bo fgali Ya na.’ ”
46Gabe Yesuse nu hawe, “Smat ta rfaduli smat pana osta Joue nfasal si mali yap ta nmatmat pa cia denabe lali. Ga smat ta rpei be okosesi ta molang, osta rtubna re Jou Lahatallana denabe lali.”
Currently Selected:
:
Highlight
Share
Compare
Copy
Want to have your highlights saved across all your devices? Sign up or sign in
2026 Indonesian Bible Society