Oknayene Ibo 24
24
Abraham nigl kogonmo yagl dedugo, ye abai Rebeka bogl i, Aisak togwa
1Ana God ye Abraham siragl ta erukwa i, ake ple di tedre, Abraham ere wakai ere togwa. Yegl eruko, Abraham mogl pi, kidagl kaima yogwa. 2Kidagl kaima yedre, ye nigl kogonmo yagl ta ede okna pidre, Abraham taraglmo mudu sugl moglkwa i, Wo dugo, ugwa. Ye ugo, Abraham yegl di togwa, Ene ogn na bikina wagle atne padiglo#24.2 Okna ibo i, mabuno yegl ta paugwa. Yoba ka dinaiglkwa i, giglede panabuka pre, ye ogono yoba ta di tenaiglka i, bikino wagle atne padiglsre, ka di te padraiglkwa.. 3Padiglsre, ene Yawe, God heven ibo ya makan atne nem moglkwa i, ye kagie mina ka kaima di nare padratnedi prika. Na Kenan yoba dumono suna kipaiga ba ene Kenan abai ta bogl i na wana tekratnga i pre dinatnedi prika. 4Ene Kenan abai ta bogl i tekre, ene ede pi na dumo kamina, yobanama meglmara pidre, abai ta yu, wana Aisak tenatniwe di, yegl dugwa. 5Yegl dugo, ye nigl kogonmo yagl i di ikne ede, yegl dugwa, Ana na abai ta doko kanibo, abai i magigl i ta una kiurie dinan we? Na ene wan auro i pi, dumo kaminen okna kipanga i edenaglo? di, yegl dugwa. 6Yegl dugo, Abraham di ikne ede, Mane dugwa. Ene na wana auro i pi edekratniwa! 7Yawe, God heven ibo moglkwa i, na nina yobama bogl dumo kamina akie munga igne na auro yu, magigl i edugwa. Na magigl i edidre, ye na di nare, makan magigl i ene gawanma tenaluwe dugwa. Ana ye erme angelomo dedenan, angelomo ede okna pi, ene ake ple di tenan, ene na dumo kamina pi abai ta yu, wana tenatnga. 8Ba ene abai ta doko kan, abai i ukragledi pran, ene ka kaima di nare padratnga i mina kogonen dudunabuka. Ba ene na wana auro i pi dumo kamina edekratniwe di, yegl dugwa. 9Dugo, nigl kogon yagl i ogo Abraham bikie wagle atne padiglsre, ye sugl moglkwa yagl Abraham dumere ka kaima di te paduglkwa.
10Ana Abraham ye nigl kogonmo yagl i taragl wakai kane kane abai nem agiglema tenabuka pre togo, nigl kogonmo yagl i Abraham kamelmo 10-pela idre, taragl wakai kane kane ikra mokono bolamugl edidre, taun ta Abraham agigle Nahor okna kipamara, dumo makan kade Mesopotemia suna i, ede ogwa. 11Ye ede pi moglkwa, taun i mim eruko, plau didre, taun bina maugl nigl moglmara magigl kamel i pi edidre, kamel ogono kaglno bodraiglmedi eruko, ye bodugl pai meglkwa. Mim erukwa igne i abu ede taun meda pi, nigl keglkwa egemo yogwa. 12Kamel ogono kaglno bodugl pai meglko, Abraham nigl kogonmo yagl i ye Yawe agle di, yegl dugwa, Yawe yo, na sugl moglkwa yagl Abraham Godmo motnga ikra we, ene ake ple di narsre, te Abraham mirie gogl, ere wakai ere ten, abai ta doko inagledi wiga i kanaluwa. 13Na we, na maugl nigl moglmara magigl moglko, yoba magigl i kipai meglkwa abroma ede taun meda u, nigl koramnedi wigwa. 14Ana na erme ene yegl di priwa, abai magigl i wibi, na swara ta di te, Na nigl goglka. Ene nigl kogl kake yunga i ake atne ede natn, nenaglba yegl dibo, abai ta di ikne ede, Ene nigl no! Na ama nigl kogl, kamelnen tenagle di, yegl ta dinan we, ene abai i Aisak enabedi kere inedi praglka. Te, abai yegl ta dinan, ene Abraham mirie gogl, ere wakai ere tenedi praluwe di, yegl dugwa.
15Ana nigl kogon yagl i kamage yegl ere moglko, abai ta nigl koragledi nigl migi kake i ede magigl ugwa. Ye kagie Rebeka we digwa. Abraham agigle Nahor ikra ebie Milka bogl okna yagl gak ta kiurka, kagie Betuel we dibrika. Rebeka ye Betuel abuglo moglkwa. 16Ye abai wakai kaima moglsre, ege swara ta kumugl yagl bogl paikrikwa. Ye ede magigl udre, ede maugl nigl moglmara yoglbo pi, nigl koglsre, ede ikne ugwa. 17Ede ikne ugo, nigl kogon yagl muku di pi, ye umara ogo, tegigl yebrika. Tegigl yebriko, nigl kogon yagl yegl dugwa, Ene nigl kogl yunga i kuri ta natn, nenaglba yegl dugwa. 18Ye yegl dugo, abai i ye di te, Yagl kade yo, ene no! didre, nigl migi tabre ake atne edidre, ye togwa. 19Ye nigl togo, yagl i pra ne kodugo, abai aglke kor dugwa, Na ama nigl kogl yu, kamelnen tebo, ye pra nenaiglmiwe di, yegl dugwa. 20Ye yegl didre, nigl tau migi mina kogl yugwa i tabre toiede ede baglkugl mina atne edidre, muku di ede maugl nigl moglmara pi, nigl koglsre, yagl i kamelmo mudu pre yu, toiede ede baglkugl mina atne ede togwa. 21Ye kamel nigl te moglko, nigl kogon yagl i ka ta dikre, abai i toro kan moglkwa. Ye kina gudu pre, Na kogon mina wiga i Yawe ake ple di narumo mo narekrumada di, kina yegl gudu prisre, toro kan moglkwa.
22Ana nigl kogon yagl ye abai i kan moglko, abai nigl kogl togo, kamel nigl ne kodigwa. Ne kodigo, yagl i poglai gumano gol ya ogono bogo gol suo gre yugwa abai i tenagledi i meda edugwa. Poglai gumano i yubunmo 6 grams mere yegl paugo, ogono bogo swara swarade yubuno 110 grams mere yegl paugwa. 23Ye taragl i, i meda edidre, abai di pre, Ene ira abuglo motne? dugwa. Didre, ye ama yegl dugwa, Na yagl tau ama idre wiga. No ene nen kipamara panamga agai ta yomo? dugwa. 24Yegl dugo, abai di ikne ede yegl dugwa, Na Betuel abuglo moglka. Na nina Betuel, ye Nahor ya Milka wano moglme dugwa. 25Yegl didre, ye ama yegl dugwa, Ene no kipamnara panaiglkwa agai pra yogwa. Te, kamel ama no kana panaiglkwa kuno erukwa. No kugl mere kamel nenaiglkwa pre yedre, kugl mere kamel kugl panaiglkwa pre yomne di, yegl dugwa. 26Abai yegl dugo, yagl i bre magide tedre, Yawe kagie kade togwa. 27Ye yegl dugwa, Yawe we, ye sigie kagie wanabuka. Ye na sugl moglkwa yagl Abraham Godmo moglsre, ye Ere wakai ere tenagle dumere keme Abraham mirie gogl, ere wakai ere togwa. Te, na we, Yawe na konbauna obuno di naruko, na ede Abraham yobama kipaimara wiwe dugwa.
28Ana abai we, ye muku di ede pi mam kipamara pidre, siragl taragl plau dugwa i mam ya nem agiglema di togo, prikwa. 29-30Ana Rebeka agigle ta moglkwa, kagie Laban we digwa. Ye abauglo yagl i ka dumere dugwa prisre, poglai gumano ya ogono bogo paduglkwa ikra kandre, muku di ede taun bina pi, maugl nigl ikra moglmara ogwa. Ye pidre, yagl i kamel meglmara adigl mogl pai moglko, kanugwa. 31Ye kandre, yegl dugwa, Ene we, Yawe ene ere wakai ere tomiwa. No yugu ere wakai ersre, kamel panaiglmara ama ere wakai erumga. Yegl pre ene na kipaimara unatniwa! Ene siragl pre taun bina adigl mogl pai motne? di, yegl dugwa.
32Laban ka yegl dugwa pre Abraham nigl kogonmo yagl i Laban bogl akie ede pi Laban kipamara ebriko, nigl kogon yagl ede yugugl ogwa. Ede yugugl ogo, Laban yoba di togo, ye bonagana kamel mina padigl yuigwa i, i makandigle edidre, kamel kugl nenaiglkwa i tedre, kamel kugl panaiglkwa kugl i ama ede tedre, erikwa. Yegl ersre, Abraham nigl kogonmo yagl ya yagl tau akie wigwa i kaglno nigl koraiglkwa pre nigl kogl yuigwa. 33Yegl eriko, yoba tau kaya mokna gagl yu ye nenaiglmedi teigwa. Teigo, nigl kogon yagl i yegl dugwa, Na kaya mokna oglade nekraglka. Na kogon mina wiga pre kogon i di tedre, okuo nenaluwe di, yegl dugwa. Yegl dugo, Laban di ikne ede, Ana do! dugwa.
34Ana nigl kogon yagl i yegl dugwa, Na we, na Abraham nigl kogonmo yagl moglka. 35Yawe ye Abraham ka kaima ere wakai ere togo, Abraham taragl mere kaima kan yogwa. Ye ere mogl, sipsip ya meme ya kau Abraham tedre, kamel ya donki tedre, nigl kogon yagl abu ya silva ya gol togo, kan yogwa. 36Ana Abraham ebie Sara we, ye kidagl yei kodugwa igne yagl gak ta kuglko, Abraham taraglmo mudu wam i togwa. 37Tedre, ye ama na yegl di narukwa, Ene na ka kaima di nare padratnga. Na Kenan yoba dumono suna kipaiga ba Kenan abai ta bogl i wana tekratnga. 38Ene na nina dumo kaminmo, yobanama kipai meglmara pidre, abai ta yu, wana tenatniwe dugwa. 39Dugo, na di ikne ede, yegl diga, Na abai ta doko kanibo, abai i na bogl akie ta una kiuran, na siragl eragle? diga. 40Digo, ye yegl dugwa, Na Yawe kamo duglo bogl moglka. Ye angelomo ene kogonen u wakai enabedi dedenan, ene angelo bogl akie ede nina dumo kaminmo, yobanama kipai meglmara ebr, abai ta yu, wana tenatnga. 41Te, ene na yobanama kipai meglmara en, ye abai ta tekribi, na ka kaima di nare padratnga i mina kogonen dudinabiwe di, Abraham yegl dume di, nigl kogon yagl i yegl dugwa.
42Nigl kogon yagl i ka yegl didre, ye ama ere mogl, ka yegl dugwa, Ana Abraham yegl di narukwa pre na erme ede maugl nigl moglmara taun bina udre, Yawe agle di, yegl diga, Yawe yo, na sugl moglkwa yagl Abraham Godmo motnga ikra we, ene na kogon mina wiga i ake ple di natn, abai ta doko inagledi wiga i kanaluwa. 43Na we, na maugl nigl moglmara magigl adigl moglka. Ana na erme ene yegl di priwa, Abai ta nigl kogl yunan, na ye di pre, Ene nigl kogl yunga i kuri ta natn, nenaglba yegl dibo, 44ye na di nare, Ene no! Na ama nigl kogl, kamelnen tenagle dinan we, ene abai i na sugl moglkwa yagl wam enabedi kere inedi praluwe di, yegl diga.
45Ana nana nomana mina kamage yegl ere moglko, Rebeka nigl migi kake yu taun meda udre, ede maugl nigl moglmara yoglbo pi, nigl koglkwa. Ye nigl koglsre, ede ie ugo, na ye di pre, Nigl ta nenaglba yegl diga. 46Na yegl digo, ye nigl migi tabre ake atne edidre, di ikne ede, yegl dugwa, Ene no! Na ama nigl kogl, kamelnen tenaluwe dugwa. Yegl dugwa pre na nigl neiga. Na nigl neigo, ye ama nigl kogl, kamelna togwa. 47Te kodugo, na di pre, Ene ira abuglo motne? diga. Na yegl digo, ye di ikne ede, yegl dugwa, Na Betuel abuglo moglka. Na nina Betuel, ye Nahor ya Milka wano moglme dugwa. Yegl dugo, na poglai guma padigl tedre, ogo bogo suo ama ere teiga. 48Taragl i tedre, na bitna magide te, Yawe, na sugl moglkwa yagl Abraham Godmo moglkwa i kagie kade tedre, Sigie kagie wanabiwe diga. Yawe na konbauna obuno di naruko, na Abraham agigle wam kipamara wiga. Ye abuglo, bogl i Abraham wam tenaglka kuno erabuka. 49Yegl pre erme ene na sugl moglkwa yagl Abraham ere wakai ere tedre, mabuno du ere tenamnedi pribi, na di nario. Te, ta manan, i ama di nario. Ene di naribi na siragl eraglka pre pogl sinaluwe di, Abraham nigl kogonmo yagl yegl dugwa.
50Abraham nigl kogonmo yagl yegl di kodugo, Laban ya abai nem Betuel di ikne ede, yegl dibrika, Ka dinga i no wagle paikrukwa pre no siragl we dinabugle? Taragl i poglkwa Yawe wagle paugwa. 51Rebeka magigl i moglkwa. Ene auro i ede enatnga. Auro i pi edin, Yawe ene di tomere Rebeka ye ene sugl moglkwa yagl wam i ebie morabiwe di, yegl dibrika.
52Ana Abraham nigl kogonmo yagl i ye kano prisre, goglko bodugl, bre magide Yawe togwa. 53Ye bre magide Yawe tedre, taragl silva ya gol ya kugugl gagl gre yugwa i meda edidre, Rebeka togwa. Taragl i Rebeka tedre, ye ama taragl tau mige podo boglkwa Rebeka mam ya agigle togwa.
54Ana Abraham nigl kogonmo yagl i yegl ere kodugo, ye yagl tau akie wigwa i bogl kaya mokna ya nigl ki nedre, ugl paigwa. Ugl padre, adiglkwa igne, nigl kogon yagl i yegl dugwa, Ene prawe dibi, na sugl moglkwa yagl moglmara ede enagle dugwa. 55Ye yegl dugwa ba abai i agigle ya mam ere mogl, yegl dibrika, Nono ege sugunagle 10-pela de mere ki yegl ta akie mun, ene abai idre, ede enaiglmiwe di, yegl dibrika. 56Yegl dibriko, nigl kogon yagl di ikne ede, yegl dugwa, Na kogon mina wiga i, Yawe na ake ple di narukwa pre na tabre ta pikrabedi erekriro! Ene prawe dibi, na sugl moglkwa yagl moglmara ede enagle di, yegl dugwa. 57Yegl dugo, ye aglke kor dibrika, No abai agle dubugl, unan, yene di prabuglka. Ye erme ede enabo mo pikrabo mo i pre di prabugle dibrika. 58Ye yegl didre, Rebeka agle dibriko, Rebeka ugwa. Rebeka ugo, ye di pre, Ene yagl magigl moglkwa i bogl ede enabro? dibrika. Dibriko, Rebeka di ikne ede, No ede enabugle dugwa. 59Yegl dugwa pre ye di te, Prawa, Rebeka ede enabiwe didre, nigl kogon abu ta Rebeka gak kebra moglkwa igne ye sugl moglkwa i ama Akie ede enabriwe dibrika. 60Yegl dibriko, ye nem agiglema ere mogl, Rebeka di wakai yei te, yegl digwa, Abaro yo, ene gawanma u milion tau enaiglmiwa. Ye kuda ikne kuda bogl tedre, yobuglo eraiglmiwe di, yegl digwa. 61Yegl digo, Rebeka ya ye nigl kogonmo abu tau akie kamel au sidre, nigl kogon yagl i bogl akie ede eigwa.
62Ana Aisak we, ye nigl Bir Lahai Roi ogo beimara ikra kide kodidre, dumo makan Negev suna kipaugwa. 63Ye ege swara ta poko dugwa igne, ede meda pi, kugl moglmara wan moglkwa. Ye wan moglsre, kan iro ede kamel tau wigwa kanugwa. 64Te, Rebeka we, ye kamel au sidre, ugwa. Udre, ye kan iro ede Aisak kandre, kamel au sugwa kide kodidre, ede maginagle ogwa. 65Pidre, ye nigl kogon yagl ikra yegl di prukwa, Yagl ta kugl moglmara nono tegigl yenagledi ugwa. Yagl i ira ume? dugwa. Yegl dugo, nigl kogon yagl i di ikne ede, yegl dugwa, Yagl i Aisak, na sugl moglkwa yagl moglmiwe dugwa. Yegl dugwa pre Rebeka lap ta idre, guma dra si kegl dugwa. 66Aisak ugo, nigl kogon yagl ye kogon mina pi, siragl mere erukwa i mudu Aisak di togwa. 67Ye Aisak di te kodugo, Aisak ye Rebeka agre i ede pi sel yugu ta Aisak mam Sara okna kipamara ogwa. Agre i ede ogo, ye yagl abu miurka. Yagl abu miurko, Aisak ye Rebeka dem muduo tedre, ye okna mam Sara goglkwa pre mirie gogl moglkwa i, erme tau aragan erukwa.
Currently Selected:
Oknayene Ibo 24: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission
Oknayene Ibo 24
24
Abraham nigl kogonmo yagl dedugo, ye abai Rebeka bogl i, Aisak togwa
1Ana God ye Abraham siragl ta erukwa i, ake ple di tedre, Abraham ere wakai ere togwa. Yegl eruko, Abraham mogl pi, kidagl kaima yogwa. 2Kidagl kaima yedre, ye nigl kogonmo yagl ta ede okna pidre, Abraham taraglmo mudu sugl moglkwa i, Wo dugo, ugwa. Ye ugo, Abraham yegl di togwa, Ene ogn na bikina wagle atne padiglo#24.2 Okna ibo i, mabuno yegl ta paugwa. Yoba ka dinaiglkwa i, giglede panabuka pre, ye ogono yoba ta di tenaiglka i, bikino wagle atne padiglsre, ka di te padraiglkwa.. 3Padiglsre, ene Yawe, God heven ibo ya makan atne nem moglkwa i, ye kagie mina ka kaima di nare padratnedi prika. Na Kenan yoba dumono suna kipaiga ba ene Kenan abai ta bogl i na wana tekratnga i pre dinatnedi prika. 4Ene Kenan abai ta bogl i tekre, ene ede pi na dumo kamina, yobanama meglmara pidre, abai ta yu, wana Aisak tenatniwe di, yegl dugwa. 5Yegl dugo, ye nigl kogonmo yagl i di ikne ede, yegl dugwa, Ana na abai ta doko kanibo, abai i magigl i ta una kiurie dinan we? Na ene wan auro i pi, dumo kaminen okna kipanga i edenaglo? di, yegl dugwa. 6Yegl dugo, Abraham di ikne ede, Mane dugwa. Ene na wana auro i pi edekratniwa! 7Yawe, God heven ibo moglkwa i, na nina yobama bogl dumo kamina akie munga igne na auro yu, magigl i edugwa. Na magigl i edidre, ye na di nare, makan magigl i ene gawanma tenaluwe dugwa. Ana ye erme angelomo dedenan, angelomo ede okna pi, ene ake ple di tenan, ene na dumo kamina pi abai ta yu, wana tenatnga. 8Ba ene abai ta doko kan, abai i ukragledi pran, ene ka kaima di nare padratnga i mina kogonen dudunabuka. Ba ene na wana auro i pi dumo kamina edekratniwe di, yegl dugwa. 9Dugo, nigl kogon yagl i ogo Abraham bikie wagle atne padiglsre, ye sugl moglkwa yagl Abraham dumere ka kaima di te paduglkwa.
10Ana Abraham ye nigl kogonmo yagl i taragl wakai kane kane abai nem agiglema tenabuka pre togo, nigl kogonmo yagl i Abraham kamelmo 10-pela idre, taragl wakai kane kane ikra mokono bolamugl edidre, taun ta Abraham agigle Nahor okna kipamara, dumo makan kade Mesopotemia suna i, ede ogwa. 11Ye ede pi moglkwa, taun i mim eruko, plau didre, taun bina maugl nigl moglmara magigl kamel i pi edidre, kamel ogono kaglno bodraiglmedi eruko, ye bodugl pai meglkwa. Mim erukwa igne i abu ede taun meda pi, nigl keglkwa egemo yogwa. 12Kamel ogono kaglno bodugl pai meglko, Abraham nigl kogonmo yagl i ye Yawe agle di, yegl dugwa, Yawe yo, na sugl moglkwa yagl Abraham Godmo motnga ikra we, ene ake ple di narsre, te Abraham mirie gogl, ere wakai ere ten, abai ta doko inagledi wiga i kanaluwa. 13Na we, na maugl nigl moglmara magigl moglko, yoba magigl i kipai meglkwa abroma ede taun meda u, nigl koramnedi wigwa. 14Ana na erme ene yegl di priwa, abai magigl i wibi, na swara ta di te, Na nigl goglka. Ene nigl kogl kake yunga i ake atne ede natn, nenaglba yegl dibo, abai ta di ikne ede, Ene nigl no! Na ama nigl kogl, kamelnen tenagle di, yegl ta dinan we, ene abai i Aisak enabedi kere inedi praglka. Te, abai yegl ta dinan, ene Abraham mirie gogl, ere wakai ere tenedi praluwe di, yegl dugwa.
15Ana nigl kogon yagl i kamage yegl ere moglko, abai ta nigl koragledi nigl migi kake i ede magigl ugwa. Ye kagie Rebeka we digwa. Abraham agigle Nahor ikra ebie Milka bogl okna yagl gak ta kiurka, kagie Betuel we dibrika. Rebeka ye Betuel abuglo moglkwa. 16Ye abai wakai kaima moglsre, ege swara ta kumugl yagl bogl paikrikwa. Ye ede magigl udre, ede maugl nigl moglmara yoglbo pi, nigl koglsre, ede ikne ugwa. 17Ede ikne ugo, nigl kogon yagl muku di pi, ye umara ogo, tegigl yebrika. Tegigl yebriko, nigl kogon yagl yegl dugwa, Ene nigl kogl yunga i kuri ta natn, nenaglba yegl dugwa. 18Ye yegl dugo, abai i ye di te, Yagl kade yo, ene no! didre, nigl migi tabre ake atne edidre, ye togwa. 19Ye nigl togo, yagl i pra ne kodugo, abai aglke kor dugwa, Na ama nigl kogl yu, kamelnen tebo, ye pra nenaiglmiwe di, yegl dugwa. 20Ye yegl didre, nigl tau migi mina kogl yugwa i tabre toiede ede baglkugl mina atne edidre, muku di ede maugl nigl moglmara pi, nigl koglsre, yagl i kamelmo mudu pre yu, toiede ede baglkugl mina atne ede togwa. 21Ye kamel nigl te moglko, nigl kogon yagl i ka ta dikre, abai i toro kan moglkwa. Ye kina gudu pre, Na kogon mina wiga i Yawe ake ple di narumo mo narekrumada di, kina yegl gudu prisre, toro kan moglkwa.
22Ana nigl kogon yagl ye abai i kan moglko, abai nigl kogl togo, kamel nigl ne kodigwa. Ne kodigo, yagl i poglai gumano gol ya ogono bogo gol suo gre yugwa abai i tenagledi i meda edugwa. Poglai gumano i yubunmo 6 grams mere yegl paugo, ogono bogo swara swarade yubuno 110 grams mere yegl paugwa. 23Ye taragl i, i meda edidre, abai di pre, Ene ira abuglo motne? dugwa. Didre, ye ama yegl dugwa, Na yagl tau ama idre wiga. No ene nen kipamara panamga agai ta yomo? dugwa. 24Yegl dugo, abai di ikne ede yegl dugwa, Na Betuel abuglo moglka. Na nina Betuel, ye Nahor ya Milka wano moglme dugwa. 25Yegl didre, ye ama yegl dugwa, Ene no kipamnara panaiglkwa agai pra yogwa. Te, kamel ama no kana panaiglkwa kuno erukwa. No kugl mere kamel nenaiglkwa pre yedre, kugl mere kamel kugl panaiglkwa pre yomne di, yegl dugwa. 26Abai yegl dugo, yagl i bre magide tedre, Yawe kagie kade togwa. 27Ye yegl dugwa, Yawe we, ye sigie kagie wanabuka. Ye na sugl moglkwa yagl Abraham Godmo moglsre, ye Ere wakai ere tenagle dumere keme Abraham mirie gogl, ere wakai ere togwa. Te, na we, Yawe na konbauna obuno di naruko, na ede Abraham yobama kipaimara wiwe dugwa.
28Ana abai we, ye muku di ede pi mam kipamara pidre, siragl taragl plau dugwa i mam ya nem agiglema di togo, prikwa. 29-30Ana Rebeka agigle ta moglkwa, kagie Laban we digwa. Ye abauglo yagl i ka dumere dugwa prisre, poglai gumano ya ogono bogo paduglkwa ikra kandre, muku di ede taun bina pi, maugl nigl ikra moglmara ogwa. Ye pidre, yagl i kamel meglmara adigl mogl pai moglko, kanugwa. 31Ye kandre, yegl dugwa, Ene we, Yawe ene ere wakai ere tomiwa. No yugu ere wakai ersre, kamel panaiglmara ama ere wakai erumga. Yegl pre ene na kipaimara unatniwa! Ene siragl pre taun bina adigl mogl pai motne? di, yegl dugwa.
32Laban ka yegl dugwa pre Abraham nigl kogonmo yagl i Laban bogl akie ede pi Laban kipamara ebriko, nigl kogon yagl ede yugugl ogwa. Ede yugugl ogo, Laban yoba di togo, ye bonagana kamel mina padigl yuigwa i, i makandigle edidre, kamel kugl nenaiglkwa i tedre, kamel kugl panaiglkwa kugl i ama ede tedre, erikwa. Yegl ersre, Abraham nigl kogonmo yagl ya yagl tau akie wigwa i kaglno nigl koraiglkwa pre nigl kogl yuigwa. 33Yegl eriko, yoba tau kaya mokna gagl yu ye nenaiglmedi teigwa. Teigo, nigl kogon yagl i yegl dugwa, Na kaya mokna oglade nekraglka. Na kogon mina wiga pre kogon i di tedre, okuo nenaluwe di, yegl dugwa. Yegl dugo, Laban di ikne ede, Ana do! dugwa.
34Ana nigl kogon yagl i yegl dugwa, Na we, na Abraham nigl kogonmo yagl moglka. 35Yawe ye Abraham ka kaima ere wakai ere togo, Abraham taragl mere kaima kan yogwa. Ye ere mogl, sipsip ya meme ya kau Abraham tedre, kamel ya donki tedre, nigl kogon yagl abu ya silva ya gol togo, kan yogwa. 36Ana Abraham ebie Sara we, ye kidagl yei kodugwa igne yagl gak ta kuglko, Abraham taraglmo mudu wam i togwa. 37Tedre, ye ama na yegl di narukwa, Ene na ka kaima di nare padratnga. Na Kenan yoba dumono suna kipaiga ba Kenan abai ta bogl i wana tekratnga. 38Ene na nina dumo kaminmo, yobanama kipai meglmara pidre, abai ta yu, wana tenatniwe dugwa. 39Dugo, na di ikne ede, yegl diga, Na abai ta doko kanibo, abai i na bogl akie ta una kiuran, na siragl eragle? diga. 40Digo, ye yegl dugwa, Na Yawe kamo duglo bogl moglka. Ye angelomo ene kogonen u wakai enabedi dedenan, ene angelo bogl akie ede nina dumo kaminmo, yobanama kipai meglmara ebr, abai ta yu, wana tenatnga. 41Te, ene na yobanama kipai meglmara en, ye abai ta tekribi, na ka kaima di nare padratnga i mina kogonen dudinabiwe di, Abraham yegl dume di, nigl kogon yagl i yegl dugwa.
42Nigl kogon yagl i ka yegl didre, ye ama ere mogl, ka yegl dugwa, Ana Abraham yegl di narukwa pre na erme ede maugl nigl moglmara taun bina udre, Yawe agle di, yegl diga, Yawe yo, na sugl moglkwa yagl Abraham Godmo motnga ikra we, ene na kogon mina wiga i ake ple di natn, abai ta doko inagledi wiga i kanaluwa. 43Na we, na maugl nigl moglmara magigl adigl moglka. Ana na erme ene yegl di priwa, Abai ta nigl kogl yunan, na ye di pre, Ene nigl kogl yunga i kuri ta natn, nenaglba yegl dibo, 44ye na di nare, Ene no! Na ama nigl kogl, kamelnen tenagle dinan we, ene abai i na sugl moglkwa yagl wam enabedi kere inedi praluwe di, yegl diga.
45Ana nana nomana mina kamage yegl ere moglko, Rebeka nigl migi kake yu taun meda udre, ede maugl nigl moglmara yoglbo pi, nigl koglkwa. Ye nigl koglsre, ede ie ugo, na ye di pre, Nigl ta nenaglba yegl diga. 46Na yegl digo, ye nigl migi tabre ake atne edidre, di ikne ede, yegl dugwa, Ene no! Na ama nigl kogl, kamelnen tenaluwe dugwa. Yegl dugwa pre na nigl neiga. Na nigl neigo, ye ama nigl kogl, kamelna togwa. 47Te kodugo, na di pre, Ene ira abuglo motne? diga. Na yegl digo, ye di ikne ede, yegl dugwa, Na Betuel abuglo moglka. Na nina Betuel, ye Nahor ya Milka wano moglme dugwa. Yegl dugo, na poglai guma padigl tedre, ogo bogo suo ama ere teiga. 48Taragl i tedre, na bitna magide te, Yawe, na sugl moglkwa yagl Abraham Godmo moglkwa i kagie kade tedre, Sigie kagie wanabiwe diga. Yawe na konbauna obuno di naruko, na Abraham agigle wam kipamara wiga. Ye abuglo, bogl i Abraham wam tenaglka kuno erabuka. 49Yegl pre erme ene na sugl moglkwa yagl Abraham ere wakai ere tedre, mabuno du ere tenamnedi pribi, na di nario. Te, ta manan, i ama di nario. Ene di naribi na siragl eraglka pre pogl sinaluwe di, Abraham nigl kogonmo yagl yegl dugwa.
50Abraham nigl kogonmo yagl yegl di kodugo, Laban ya abai nem Betuel di ikne ede, yegl dibrika, Ka dinga i no wagle paikrukwa pre no siragl we dinabugle? Taragl i poglkwa Yawe wagle paugwa. 51Rebeka magigl i moglkwa. Ene auro i ede enatnga. Auro i pi edin, Yawe ene di tomere Rebeka ye ene sugl moglkwa yagl wam i ebie morabiwe di, yegl dibrika.
52Ana Abraham nigl kogonmo yagl i ye kano prisre, goglko bodugl, bre magide Yawe togwa. 53Ye bre magide Yawe tedre, taragl silva ya gol ya kugugl gagl gre yugwa i meda edidre, Rebeka togwa. Taragl i Rebeka tedre, ye ama taragl tau mige podo boglkwa Rebeka mam ya agigle togwa.
54Ana Abraham nigl kogonmo yagl i yegl ere kodugo, ye yagl tau akie wigwa i bogl kaya mokna ya nigl ki nedre, ugl paigwa. Ugl padre, adiglkwa igne, nigl kogon yagl i yegl dugwa, Ene prawe dibi, na sugl moglkwa yagl moglmara ede enagle dugwa. 55Ye yegl dugwa ba abai i agigle ya mam ere mogl, yegl dibrika, Nono ege sugunagle 10-pela de mere ki yegl ta akie mun, ene abai idre, ede enaiglmiwe di, yegl dibrika. 56Yegl dibriko, nigl kogon yagl di ikne ede, yegl dugwa, Na kogon mina wiga i, Yawe na ake ple di narukwa pre na tabre ta pikrabedi erekriro! Ene prawe dibi, na sugl moglkwa yagl moglmara ede enagle di, yegl dugwa. 57Yegl dugo, ye aglke kor dibrika, No abai agle dubugl, unan, yene di prabuglka. Ye erme ede enabo mo pikrabo mo i pre di prabugle dibrika. 58Ye yegl didre, Rebeka agle dibriko, Rebeka ugwa. Rebeka ugo, ye di pre, Ene yagl magigl moglkwa i bogl ede enabro? dibrika. Dibriko, Rebeka di ikne ede, No ede enabugle dugwa. 59Yegl dugwa pre ye di te, Prawa, Rebeka ede enabiwe didre, nigl kogon abu ta Rebeka gak kebra moglkwa igne ye sugl moglkwa i ama Akie ede enabriwe dibrika. 60Yegl dibriko, ye nem agiglema ere mogl, Rebeka di wakai yei te, yegl digwa, Abaro yo, ene gawanma u milion tau enaiglmiwa. Ye kuda ikne kuda bogl tedre, yobuglo eraiglmiwe di, yegl digwa. 61Yegl digo, Rebeka ya ye nigl kogonmo abu tau akie kamel au sidre, nigl kogon yagl i bogl akie ede eigwa.
62Ana Aisak we, ye nigl Bir Lahai Roi ogo beimara ikra kide kodidre, dumo makan Negev suna kipaugwa. 63Ye ege swara ta poko dugwa igne, ede meda pi, kugl moglmara wan moglkwa. Ye wan moglsre, kan iro ede kamel tau wigwa kanugwa. 64Te, Rebeka we, ye kamel au sidre, ugwa. Udre, ye kan iro ede Aisak kandre, kamel au sugwa kide kodidre, ede maginagle ogwa. 65Pidre, ye nigl kogon yagl ikra yegl di prukwa, Yagl ta kugl moglmara nono tegigl yenagledi ugwa. Yagl i ira ume? dugwa. Yegl dugo, nigl kogon yagl i di ikne ede, yegl dugwa, Yagl i Aisak, na sugl moglkwa yagl moglmiwe dugwa. Yegl dugwa pre Rebeka lap ta idre, guma dra si kegl dugwa. 66Aisak ugo, nigl kogon yagl ye kogon mina pi, siragl mere erukwa i mudu Aisak di togwa. 67Ye Aisak di te kodugo, Aisak ye Rebeka agre i ede pi sel yugu ta Aisak mam Sara okna kipamara ogwa. Agre i ede ogo, ye yagl abu miurka. Yagl abu miurko, Aisak ye Rebeka dem muduo tedre, ye okna mam Sara goglkwa pre mirie gogl moglkwa i, erme tau aragan erukwa.
Currently Selected:
:
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission