Jon 4
4
Jisas ye Samaria abu bogl ka dibrika
1-3Ana igne i yoba tau ere mogl, Farisi yoba di tedre, Yoba mere kide ye Jisas duglo beglko, Jisas ye yoba mere kide nigl bugl tome digwa. Yoba Jon duglo beglkwa i tau kuri meglko, Jisas duglo beglkwa i mere kide meglmiwe di, yegl digwa. Ye yegl digwa ba Jisas yene ta yoba nigl bugl tekrukwa. Ye duglo beglkwa yagl meglkwa i, ye yoba nigl bugl teigwa pre yoba yegl digwa. Ana yoba tau ye Farisi yoba ka yegl di teigo, prikwa i, Jisas pre kan eruko, ye duglo beglkwa yagl bogl distrik Judia kide kodidre, ede ikne distrik Galili enamnedi eigwa. 4Ye konbauna ede eimara i, ye ede distrik Samaria suna pidre, ede distrik Galili enaiglkwa paugwa.
5Ana Jisas duglo beglkwa yagl bogl ye ede distrik Samaria suna pidre, ede taun ta Sikar we dimara eigwa. Taun Sikar i, yagl Jekop okna ibo ere mogl, dumo makan ta wam Josep tomara i, magigl yogwa. 6Te, taun Sikar i meda kra, maugl nigl ta Jekop okna ibo wauglkwa i, nigl moglkwa. Ana Jisas ye duglo beglkwa yagl i bogl konbauna ede u belo mere yegl dumo i wigo, ye konbauna eglke wigwa i pre Jisas toglabugl dugo, ye maugl nigl moglmara magigl i, ame di moglkwa.
7-8Ana Jisas ye maugl nigl moglmara magigl i, ame di moglko, ye duglo beglkwa yagl i, Jisas kide kodo, ye ede pi taun Sikar suna pi, kaya mokna topo sinamnedi ede eigwa. Eigo, Jisas swara moglko, Samaria abu ta maugl nigl i mina nigl koragledi ugwa. Ugo, Jisas ye di te, Na nigl ta kogl naro, nenaluwe di, yegl dugwa. 9Yegl dugo, Samaria abu i di ikne ede te, yegl dugwa, Na Samaria abu moglko, ene Juda yagl motnga. Yegl pre ene siragl eruko, Na nigl kogl naro dine? di, yegl dugwa. Ye yegl dugwa i, i siragl pre Juda yoba ye Samaria yoba kide kaningwa pre ye akie moglkre, denbi dikre, erikwa.
10Ana abu i ye Jisas yegl di pruko, Jisas aglke kor yegl dugwa, Na komono kana ene nigl kogl naro diga ba na erme ka ebrie ta dibo, pratnga. God ene siragl mere yoko kaima ere wakai ere tenagledi prukwa i, ene pre pogl sidre, te na ira moglka i, ene ta pre pogl sina, ene ere mogl, Na Nigl kogl naro di natngo. Te, ene yegl ta dina, na kaima nigl kor kogl ene teigo we di, Jisas ka ebrie yegl dugwa. 11Yegl dugo, abu i yegl dugwa, Yagl Kade, ene nigl kogl naratnga i, ene nigl migi ta yukitnga, te maugl nigl magigl i ama waugl ede atne kaima eigwa. Yegl pre ene nigl kor pre dinga i, aglo kogl naratne? dugwa. 12Maugl nigl magigl i, no neno Jekop waugl norukwa. Yene okna ibo maugl nigl i mina nigl kogl nedre, wama kogl tedre, agl bugla ta kuglkwa i ama kogl togwa. Ene pitnga i, ene mogl mitna ede, neno Jekop i egre atne ediedi pitno? dugwa. 13Yegl dugo, Jisas di ikne ede tedre, Maugl nigl magigl i mina yoba ta kogl nenan, ye okuo aglke kor nigl gorabe dugwa. 14Yegl erabuka ba na nigl kogl, yoba ta tenaglka i, yoba ta nenan, ye okuo ege swara ta nigl goglkrabuka. Na nigl kogl tenaglka i, nigl ogo beimere yegl, ye moglmara suna i u pai moglsre, ye aimadi kamin kor morabuka i tenabiwe di, Jisas yegl dugwa.
15Ana Jisas ka yegl di kodugo, Samaria abu i ere mogl, yegl dugwa, Yagl Kade yo, ene nigl pre dinga i, kogl naro dugwa. Kogl natn, na nigl goglkre, nigl pre ege ege magigl wiga i, ta ukragle dugwa. 16Dugo, Jisas di ikne ede tedre, Ene pi win agle din, akie wiro dugwa. 17Akie wiro dugo, abu i di ikne ede tedre, Na wina ta moglkrume dugwa. Wina ta moglkrume dugo, Jisas ye di ikne ede te, Ka kaima diniwa. Ene win ta moglkrume dugwa. 18Ene okna yagl 5-pela bage bage enga te, ene erme yagl ta bogl akie kipai miurka i ama ene win ta moglkrukwa. Ene kuno diniwe di, Jisas yegl dugwa.
19Ana Jisas ka yegl dugo, abu i aglke kor yegl dugwa, Yagl Kade yo, ene ka kep yoba ta motnedi kanie dugwa. 20Ka kep yoba ta motnga pre na ene ka kira ta poragledi prika. No kowano awano muglo meglbi magigl i mina God kagie kade teigwa ba ene Juda yoba meglkwa i, dumo Jerusalem swara i, yoba God kagie kade tenaiglkwa pamiwe di, yegl digwa. Ene Juda yoba kuno dimo mo no Samaria yoba kuno dumne? di, yegl dugwa. 21Yegl dugo, Jisas ye di ikne ede te, yegl dugwa, Na ene ka kaima di teiga, okuo ene muglo meglbi i mo dumo Jerusalem mo dumo aglo mere ta God Nem kagie kade tenaiglkwa i, ene dumo i ta pre yubun dekraiglmiwe dugwa. 22Ene Samaria yoba i, ene God pre pogl sikre, kagie kade teigwa. No Juda yoba munga i, God pre pogl sidre, kagie kade tomga. I siragl pre God ye siragl mere yoba ere inagle dugwa i, ye no Juda yoba di noruko, prumga. 23Yegl paugwa ba ege ta okuo plau dinabuka i mina ya erme pra, yoba kaima ta God Nem kagie kade tenamnedi praiglkwa i, ye muglo meglbi i mo dumo Jerusalem we di prikre, kiano mina God ka kaima kagie kade tenaiglmiwe dugwa. Yoba yegl mere praiglkwa i, Na Nina God ye yoba i na kagna kade naraiglmedi prukwa. 24God ye murubuglo moglkwa. Yegl pre yoba ta ye kagie kade tenaiglkwa i, ye kiano mina ka kaima kagie kade tenaiglkwa pamiwe di, Jisas yegl dugwa.
25Ana Jisas ka yegl di kodugo, abu i ere mogl, yegl dugwa, Na prika, God Kere Yugwa Yagl, Krais we digwa i, okuo unabuka. Ye unan, ka atne paugwa mudu di pogl norabiwe dugwa. 26Yegl dugo, Jisas ye di ikne ede te, Na ene ka di te moglka i, na yagl dinga i moluwe di, Jisas yegl dugwa.
27Ana igne i Jisas duglo beglkwa yagl ye taun suna kaya mokna topo si idre, ede ikne wigwa. Ede ikne u kanigwa, Jisas ye Samaria abu i bogl ka dibriko, kanigwa. Ye kandre, Samaria abu bogl ka dibredi wai kiglkwa ba ye abu i di prisre, Ene siragl pre une? dinaiglkwa mo Jisas di pre, Ene siragl pre abu i bogl ka dibre? dinaiglkwa i yubunde prikwa pre ka ta dikrikwa. 28Ana yagl wagle i ede ikne wigo, abu i ye nigl migimo kide kodidre, ede ikne taun suna pi, yoba taun suna meglkwa i di te, yegl dugwa, 29Yagl ta na mabuno siragl mere ta erika i, mudu di pogl nare kodugwa. Nono Krais unabiwe dumga ikra, yagl i ye moglmo mo ene kanaiglma wio! di, abu i yegl dugwa. 30Yegl dugo, yoba taun suna meglkwa i ye abu i sika sigo, akie taun kide kodo, ede pi Jisas moglmara eigwa.
31Ana abu i, Jisas moglmara kide kodo, ede taun suna ogwa igne i Jisas duglo beglkwa yagl ere mogl, ye di te, Tisa, kaya mokna topo si yumga i, tau i no digwa. 32Yegl digwa ba Jisas ye di ikne ede te, Na kaya mokna neiga, dana erukwa ba ene ta kankrimiwe dugwa. 33Dugo, ye duglo beglkwa yagl ere mogl, yene di ikne ikne ede, Yoba ta kaya mokna yu Jisas togo, nomo mo? di, yegl digwa. 34Yegl di meglko, Jisas kor di togwa, God na dedugwa i, na ye eratnedi prumere ersre, kogon dedumere ere kodinaglka i, na kaya mokna neiga, dana erukwa mere yegl paugwa pre diwe, di, Jisas yegl dugwa.
35Yoba ege mere digwa i, Kugl mogo sudiglsre, ba 4-pela sugl mogl, okuo mogo denan, si yunamga. Tabre ta si yukramne digwa. Yegl digwa ba ene prio. Ene gumuglno mina kaya togl kanibi, kugl mogo de kodumedi kanaiglmiwe, dugwa. 36Te, yoba kugl mogo si yugwa i, makandigle topo imere mere yegl idre, aimadi kamin kor morabara pre kugl mogo ama si yugwa. Yegl pre kugl mogo suduglkwa yoba ya si yugwa yoba akie gun yenaiglkwa pame dugwa.
37Yoba ka ta ama kugl mogo pre ege mere digwa i, yegl dime dugwa, Kogon yoba tau ede okna pidre, kugl mogo sudiglko, okuo kogon yoba pere tau u si yuime digwa. Ye digwa i, God kogonmo pre ama kuno erume dugwa. 38I siragl pre ene kugl mogo si yuigwa i, ene kogon podo ere, ere yaglkrikwa. Yoba pere pi kogon podo ersre, kugl mogo ere yaiglko, ene pi si yuio die dugwa.
39Ana Samaria abu ikra ye yoba di te, Yagl ta na mabuno siragl mere ta erimere i, di nogugl ede nare kodume dugwa i, Samaria yoba tau mere ye taun suna kipai meglkwa i prisre, ye ka dumara i, Jisas pre mediglkwa. 40Pre mediglkwa pre ye ede pi Jisas taun meda moglmara eigwa igne, ye Jisas di pre, ege tau akie mun, ene okuo ede enaiglmiwe digo, Jisas ye duglo beglkwa yagl bogl ege suo dumo i paigwa. 41Ye ege suo dumo i paigwa pre Samaria yoba kor tau mere ama Jisas ka dugwa prisre, ye pre mediglkwa. 42Te, yoba tau komono kana abu ikra ka dumara Jisas pre mediglkwa i ama Jisas ka dugwa i prisre, abu i di te, yegl digwa, No okna ene ka di notnga i prisre, Jisas pre medunga ba erme ene ka dinara swara i pre ta pre mediglkunga. No nono ama Jisas ka dugwa i prisre, pre pogl sumga. Yoba uglo koglo koglo meglkwa i, ye ere inabuka yagl ka kaima moglmiwe di, yegl digwa.
Jisas ye yagl kade ta wam ere i kor edugwa
43Ana Jisas ege suo dumo i padre, dumo i kide kodo ede distrik Galili suna ogwa. 44I siragl pre Jisas yene okna dugwa i, God kamo kep yoba ta morabuka i, ye yene dumomugl i keme yoba ye kagie kade tekraiglkwa ba dumo bage ta moraiglkwa i ye kagie kade tenaiglme dugwa. 45Yegl pre Jisas prukwa i, Nasaret yoba na kana ta prikraiglkwa pamedi prukwa pre ye duglo beglkwa yoba bogl dumo Nasaret pikre, ede distrik Galili suna pi, dumo tau wan ede eigo, Galili yoba ye Jisas kogl kare di, di igwa. I siragl pre okna ege kade ta, God ye Israel yoba kowano awano oglo sumedi pre meglkwa igne i Galili yoba tau mere ede Jerusalem pidre, Jisas ye kimagl tau erukwa i, kanigwa pre erme ye di igwa.
46-47Ana Jisas ye duglo beglkwa yagl bogl ye distrik Galili suna i, dumo kebra ta kagie Kana we digwa, okna Jisas nigl ere i wain edugwa dumo ikra eigwa. Eigo, yagl kade ta King Herot kogonmo ere togwa i, ye dumo Kaperneam mogl, Jisas ye duglo beglkwa yagl bogl ede dumo Kana wime digo, prukwa. Yagl i, ye wam kide si, goragledi erukwa. Yegl pre yoba Jisas distrik Judia kide kodo, ede Galili suna ume digo, prukwa igne, ye ede Kana pidre, Jisas di te, Na wana goragledi eruko, wiga. Nono ede ikne obugl, ene na wana ere i kor edinatnedi priwe, di, yegl di togwa. 48Di togo, Jisas ye di te, yegl dugwa, Ene yoba magigl meglkwa i, na kimagl podo tau eribo, ene kandre keme na pre medraiglkwa paugwa. Ene ta kankribi, na ta pre mediglkraiglkwa pamiwe dugwa. 49Yegl dugo, yagl i aglke kor dugwa, Yagl Kade yo, na wana gorabuka magigl erukwa. Ene tabre un, nono ede enabugle dugwa. 50Yegl dugo, Jisas di ikne ede tedre, Ene ede ikne po. Ene wan goglkre, kor morabiwe dugwa. Jisas yegl dugo, yagl i ye Jisas ka kaima dumedi pre mediglsre, ede ogwa.
51Ana yagl i ye ede ikne pi konbo bage padre, tagna ta konbauna ede pi moglko, ye niglmo kogonmo yoba tau pi bage tegigl yeidre, ye di teigwa, Ene wan aragan eruko, kor moglmiwe di, yegl di teigwa. 52Di teigo, yagl i prisre, Aunake aragan erume? dugwa. Dugo, ye di ikne ede te, Eduedi, belo ikne mere yegl ye nagie niga dugwa i dudugo, aragan erume digwa. 53Yegl digo, yagl i prisre, kina gudu pre ikne ede prukwa i, Jisas ye eduedi belo ikne mere yegl na di nare, Wan kor morabiwe di, yegl di narukwa. Ka kaima ye dumere kra pamiwedi, yegl di prukwa. Yegl pre yagl i ya yoba ye kipamara akie paigwa i, mudu Jisas pre mediglkwa. 54Jisas ye distrik Judia kide kodidre, distrik Galili u kimagl yegl ta erukwa i, ye distrik Galili suna kimagl okna swara ta ersre, erme ege suo kimagl erukwa.
Currently Selected:
Jon 4: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission
Jon 4
4
Jisas ye Samaria abu bogl ka dibrika
1-3Ana igne i yoba tau ere mogl, Farisi yoba di tedre, Yoba mere kide ye Jisas duglo beglko, Jisas ye yoba mere kide nigl bugl tome digwa. Yoba Jon duglo beglkwa i tau kuri meglko, Jisas duglo beglkwa i mere kide meglmiwe di, yegl digwa. Ye yegl digwa ba Jisas yene ta yoba nigl bugl tekrukwa. Ye duglo beglkwa yagl meglkwa i, ye yoba nigl bugl teigwa pre yoba yegl digwa. Ana yoba tau ye Farisi yoba ka yegl di teigo, prikwa i, Jisas pre kan eruko, ye duglo beglkwa yagl bogl distrik Judia kide kodidre, ede ikne distrik Galili enamnedi eigwa. 4Ye konbauna ede eimara i, ye ede distrik Samaria suna pidre, ede distrik Galili enaiglkwa paugwa.
5Ana Jisas duglo beglkwa yagl bogl ye ede distrik Samaria suna pidre, ede taun ta Sikar we dimara eigwa. Taun Sikar i, yagl Jekop okna ibo ere mogl, dumo makan ta wam Josep tomara i, magigl yogwa. 6Te, taun Sikar i meda kra, maugl nigl ta Jekop okna ibo wauglkwa i, nigl moglkwa. Ana Jisas ye duglo beglkwa yagl i bogl konbauna ede u belo mere yegl dumo i wigo, ye konbauna eglke wigwa i pre Jisas toglabugl dugo, ye maugl nigl moglmara magigl i, ame di moglkwa.
7-8Ana Jisas ye maugl nigl moglmara magigl i, ame di moglko, ye duglo beglkwa yagl i, Jisas kide kodo, ye ede pi taun Sikar suna pi, kaya mokna topo sinamnedi ede eigwa. Eigo, Jisas swara moglko, Samaria abu ta maugl nigl i mina nigl koragledi ugwa. Ugo, Jisas ye di te, Na nigl ta kogl naro, nenaluwe di, yegl dugwa. 9Yegl dugo, Samaria abu i di ikne ede te, yegl dugwa, Na Samaria abu moglko, ene Juda yagl motnga. Yegl pre ene siragl eruko, Na nigl kogl naro dine? di, yegl dugwa. Ye yegl dugwa i, i siragl pre Juda yoba ye Samaria yoba kide kaningwa pre ye akie moglkre, denbi dikre, erikwa.
10Ana abu i ye Jisas yegl di pruko, Jisas aglke kor yegl dugwa, Na komono kana ene nigl kogl naro diga ba na erme ka ebrie ta dibo, pratnga. God ene siragl mere yoko kaima ere wakai ere tenagledi prukwa i, ene pre pogl sidre, te na ira moglka i, ene ta pre pogl sina, ene ere mogl, Na Nigl kogl naro di natngo. Te, ene yegl ta dina, na kaima nigl kor kogl ene teigo we di, Jisas ka ebrie yegl dugwa. 11Yegl dugo, abu i yegl dugwa, Yagl Kade, ene nigl kogl naratnga i, ene nigl migi ta yukitnga, te maugl nigl magigl i ama waugl ede atne kaima eigwa. Yegl pre ene nigl kor pre dinga i, aglo kogl naratne? dugwa. 12Maugl nigl magigl i, no neno Jekop waugl norukwa. Yene okna ibo maugl nigl i mina nigl kogl nedre, wama kogl tedre, agl bugla ta kuglkwa i ama kogl togwa. Ene pitnga i, ene mogl mitna ede, neno Jekop i egre atne ediedi pitno? dugwa. 13Yegl dugo, Jisas di ikne ede tedre, Maugl nigl magigl i mina yoba ta kogl nenan, ye okuo aglke kor nigl gorabe dugwa. 14Yegl erabuka ba na nigl kogl, yoba ta tenaglka i, yoba ta nenan, ye okuo ege swara ta nigl goglkrabuka. Na nigl kogl tenaglka i, nigl ogo beimere yegl, ye moglmara suna i u pai moglsre, ye aimadi kamin kor morabuka i tenabiwe di, Jisas yegl dugwa.
15Ana Jisas ka yegl di kodugo, Samaria abu i ere mogl, yegl dugwa, Yagl Kade yo, ene nigl pre dinga i, kogl naro dugwa. Kogl natn, na nigl goglkre, nigl pre ege ege magigl wiga i, ta ukragle dugwa. 16Dugo, Jisas di ikne ede tedre, Ene pi win agle din, akie wiro dugwa. 17Akie wiro dugo, abu i di ikne ede tedre, Na wina ta moglkrume dugwa. Wina ta moglkrume dugo, Jisas ye di ikne ede te, Ka kaima diniwa. Ene win ta moglkrume dugwa. 18Ene okna yagl 5-pela bage bage enga te, ene erme yagl ta bogl akie kipai miurka i ama ene win ta moglkrukwa. Ene kuno diniwe di, Jisas yegl dugwa.
19Ana Jisas ka yegl dugo, abu i aglke kor yegl dugwa, Yagl Kade yo, ene ka kep yoba ta motnedi kanie dugwa. 20Ka kep yoba ta motnga pre na ene ka kira ta poragledi prika. No kowano awano muglo meglbi magigl i mina God kagie kade teigwa ba ene Juda yoba meglkwa i, dumo Jerusalem swara i, yoba God kagie kade tenaiglkwa pamiwe di, yegl digwa. Ene Juda yoba kuno dimo mo no Samaria yoba kuno dumne? di, yegl dugwa. 21Yegl dugo, Jisas ye di ikne ede te, yegl dugwa, Na ene ka kaima di teiga, okuo ene muglo meglbi i mo dumo Jerusalem mo dumo aglo mere ta God Nem kagie kade tenaiglkwa i, ene dumo i ta pre yubun dekraiglmiwe dugwa. 22Ene Samaria yoba i, ene God pre pogl sikre, kagie kade teigwa. No Juda yoba munga i, God pre pogl sidre, kagie kade tomga. I siragl pre God ye siragl mere yoba ere inagle dugwa i, ye no Juda yoba di noruko, prumga. 23Yegl paugwa ba ege ta okuo plau dinabuka i mina ya erme pra, yoba kaima ta God Nem kagie kade tenamnedi praiglkwa i, ye muglo meglbi i mo dumo Jerusalem we di prikre, kiano mina God ka kaima kagie kade tenaiglmiwe dugwa. Yoba yegl mere praiglkwa i, Na Nina God ye yoba i na kagna kade naraiglmedi prukwa. 24God ye murubuglo moglkwa. Yegl pre yoba ta ye kagie kade tenaiglkwa i, ye kiano mina ka kaima kagie kade tenaiglkwa pamiwe di, Jisas yegl dugwa.
25Ana Jisas ka yegl di kodugo, abu i ere mogl, yegl dugwa, Na prika, God Kere Yugwa Yagl, Krais we digwa i, okuo unabuka. Ye unan, ka atne paugwa mudu di pogl norabiwe dugwa. 26Yegl dugo, Jisas ye di ikne ede te, Na ene ka di te moglka i, na yagl dinga i moluwe di, Jisas yegl dugwa.
27Ana igne i Jisas duglo beglkwa yagl ye taun suna kaya mokna topo si idre, ede ikne wigwa. Ede ikne u kanigwa, Jisas ye Samaria abu i bogl ka dibriko, kanigwa. Ye kandre, Samaria abu bogl ka dibredi wai kiglkwa ba ye abu i di prisre, Ene siragl pre une? dinaiglkwa mo Jisas di pre, Ene siragl pre abu i bogl ka dibre? dinaiglkwa i yubunde prikwa pre ka ta dikrikwa. 28Ana yagl wagle i ede ikne wigo, abu i ye nigl migimo kide kodidre, ede ikne taun suna pi, yoba taun suna meglkwa i di te, yegl dugwa, 29Yagl ta na mabuno siragl mere ta erika i, mudu di pogl nare kodugwa. Nono Krais unabiwe dumga ikra, yagl i ye moglmo mo ene kanaiglma wio! di, abu i yegl dugwa. 30Yegl dugo, yoba taun suna meglkwa i ye abu i sika sigo, akie taun kide kodo, ede pi Jisas moglmara eigwa.
31Ana abu i, Jisas moglmara kide kodo, ede taun suna ogwa igne i Jisas duglo beglkwa yagl ere mogl, ye di te, Tisa, kaya mokna topo si yumga i, tau i no digwa. 32Yegl digwa ba Jisas ye di ikne ede te, Na kaya mokna neiga, dana erukwa ba ene ta kankrimiwe dugwa. 33Dugo, ye duglo beglkwa yagl ere mogl, yene di ikne ikne ede, Yoba ta kaya mokna yu Jisas togo, nomo mo? di, yegl digwa. 34Yegl di meglko, Jisas kor di togwa, God na dedugwa i, na ye eratnedi prumere ersre, kogon dedumere ere kodinaglka i, na kaya mokna neiga, dana erukwa mere yegl paugwa pre diwe, di, Jisas yegl dugwa.
35Yoba ege mere digwa i, Kugl mogo sudiglsre, ba 4-pela sugl mogl, okuo mogo denan, si yunamga. Tabre ta si yukramne digwa. Yegl digwa ba ene prio. Ene gumuglno mina kaya togl kanibi, kugl mogo de kodumedi kanaiglmiwe, dugwa. 36Te, yoba kugl mogo si yugwa i, makandigle topo imere mere yegl idre, aimadi kamin kor morabara pre kugl mogo ama si yugwa. Yegl pre kugl mogo suduglkwa yoba ya si yugwa yoba akie gun yenaiglkwa pame dugwa.
37Yoba ka ta ama kugl mogo pre ege mere digwa i, yegl dime dugwa, Kogon yoba tau ede okna pidre, kugl mogo sudiglko, okuo kogon yoba pere tau u si yuime digwa. Ye digwa i, God kogonmo pre ama kuno erume dugwa. 38I siragl pre ene kugl mogo si yuigwa i, ene kogon podo ere, ere yaglkrikwa. Yoba pere pi kogon podo ersre, kugl mogo ere yaiglko, ene pi si yuio die dugwa.
39Ana Samaria abu ikra ye yoba di te, Yagl ta na mabuno siragl mere ta erimere i, di nogugl ede nare kodume dugwa i, Samaria yoba tau mere ye taun suna kipai meglkwa i prisre, ye ka dumara i, Jisas pre mediglkwa. 40Pre mediglkwa pre ye ede pi Jisas taun meda moglmara eigwa igne, ye Jisas di pre, ege tau akie mun, ene okuo ede enaiglmiwe digo, Jisas ye duglo beglkwa yagl bogl ege suo dumo i paigwa. 41Ye ege suo dumo i paigwa pre Samaria yoba kor tau mere ama Jisas ka dugwa prisre, ye pre mediglkwa. 42Te, yoba tau komono kana abu ikra ka dumara Jisas pre mediglkwa i ama Jisas ka dugwa i prisre, abu i di te, yegl digwa, No okna ene ka di notnga i prisre, Jisas pre medunga ba erme ene ka dinara swara i pre ta pre mediglkunga. No nono ama Jisas ka dugwa i prisre, pre pogl sumga. Yoba uglo koglo koglo meglkwa i, ye ere inabuka yagl ka kaima moglmiwe di, yegl digwa.
Jisas ye yagl kade ta wam ere i kor edugwa
43Ana Jisas ege suo dumo i padre, dumo i kide kodo ede distrik Galili suna ogwa. 44I siragl pre Jisas yene okna dugwa i, God kamo kep yoba ta morabuka i, ye yene dumomugl i keme yoba ye kagie kade tekraiglkwa ba dumo bage ta moraiglkwa i ye kagie kade tenaiglme dugwa. 45Yegl pre Jisas prukwa i, Nasaret yoba na kana ta prikraiglkwa pamedi prukwa pre ye duglo beglkwa yoba bogl dumo Nasaret pikre, ede distrik Galili suna pi, dumo tau wan ede eigo, Galili yoba ye Jisas kogl kare di, di igwa. I siragl pre okna ege kade ta, God ye Israel yoba kowano awano oglo sumedi pre meglkwa igne i Galili yoba tau mere ede Jerusalem pidre, Jisas ye kimagl tau erukwa i, kanigwa pre erme ye di igwa.
46-47Ana Jisas ye duglo beglkwa yagl bogl ye distrik Galili suna i, dumo kebra ta kagie Kana we digwa, okna Jisas nigl ere i wain edugwa dumo ikra eigwa. Eigo, yagl kade ta King Herot kogonmo ere togwa i, ye dumo Kaperneam mogl, Jisas ye duglo beglkwa yagl bogl ede dumo Kana wime digo, prukwa. Yagl i, ye wam kide si, goragledi erukwa. Yegl pre yoba Jisas distrik Judia kide kodo, ede Galili suna ume digo, prukwa igne, ye ede Kana pidre, Jisas di te, Na wana goragledi eruko, wiga. Nono ede ikne obugl, ene na wana ere i kor edinatnedi priwe, di, yegl di togwa. 48Di togo, Jisas ye di te, yegl dugwa, Ene yoba magigl meglkwa i, na kimagl podo tau eribo, ene kandre keme na pre medraiglkwa paugwa. Ene ta kankribi, na ta pre mediglkraiglkwa pamiwe dugwa. 49Yegl dugo, yagl i aglke kor dugwa, Yagl Kade yo, na wana gorabuka magigl erukwa. Ene tabre un, nono ede enabugle dugwa. 50Yegl dugo, Jisas di ikne ede tedre, Ene ede ikne po. Ene wan goglkre, kor morabiwe dugwa. Jisas yegl dugo, yagl i ye Jisas ka kaima dumedi pre mediglsre, ede ogwa.
51Ana yagl i ye ede ikne pi konbo bage padre, tagna ta konbauna ede pi moglko, ye niglmo kogonmo yoba tau pi bage tegigl yeidre, ye di teigwa, Ene wan aragan eruko, kor moglmiwe di, yegl di teigwa. 52Di teigo, yagl i prisre, Aunake aragan erume? dugwa. Dugo, ye di ikne ede te, Eduedi, belo ikne mere yegl ye nagie niga dugwa i dudugo, aragan erume digwa. 53Yegl digo, yagl i prisre, kina gudu pre ikne ede prukwa i, Jisas ye eduedi belo ikne mere yegl na di nare, Wan kor morabiwe di, yegl di narukwa. Ka kaima ye dumere kra pamiwedi, yegl di prukwa. Yegl pre yagl i ya yoba ye kipamara akie paigwa i, mudu Jisas pre mediglkwa. 54Jisas ye distrik Judia kide kodidre, distrik Galili u kimagl yegl ta erukwa i, ye distrik Galili suna kimagl okna swara ta ersre, erme ege suo kimagl erukwa.
Currently Selected:
:
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission