Matyu 27
27
Jisas agre i pi, Pailat moglmara eigwa
(Mak 15.1, Luk 23.1-2, Jon 18.28-32)
1Ana tagana mogl, tawa teigwa bito yoba meglkwa i yeigo, Juda yoba kade yeigo, ye ka di koglsre, Jisas si goramniwe digwa. 2Yegl didre, ye Jisas kane kogl i pi gavana Pailat moglmara edigwa.
Judas ye yene wi si goglkwa
3Ana Judas, ye Jisas i pi kudamo ikne ogo mina yogwa yagl ikra, ye Jisas si goramne digwa i prisre, aglau eriwedi pre, mige silva 30-pela yugwa ikra, te ikne ede, tawa teigwa bitno yoba meglkwa ya Juda yoba kade i, togwa. 4Tedre, yegl dugwa, Na tadaglme ere yagl ta aglau erekrukwa i, yu ene ogono mina yeiwe dugwa. Yegl dugo, ye di ikne ede, No kogono paikrukwa. Enene mina pamiwe digwa. 5Yegl digo, Judas mige silva ikra puk si tawa teigwa yugu togl suna edidre, yene nugu mina kan si, yene wi si goglkwa.
6Ana tawa teigwa yoba bitno meglkwa i, ye mige silva ta Judas te ikne edugwa i, i pre yegl digwa, Mige i mina yoba si goramnedi topo erumga pre mige i mina God yugumo yugugl bona sidre, God kogonmo eramnedi eun, kuno erekrabiwe digwa. 7Yegl didre, ye ka di kogl, mige i pi dumo makan ta gigl pene yenabedi topo sinamniwe digwa. Dumo makan i, yagl ta makan koglwa sin bekugwa yagl ta makanmo topo sidre, yoba pere Juda yoba moglkraiglkwa i, gigl peneno yenabedi topo sigwa. 8Yegl pre makan topo erikwa i, yoba ere mogl, bormai dumo we digwa. Te, erme pra, yoba ama yegl di pai meglkwa. 9-10Makan topo simara i mina ka kep yagl Jeremaia okna ka ta boglkwa i, pai yugwa. Ye boglkwa i, yegl boglkwa, Yagl Kade na di narumere yegl, yoba i mige 30-pela i pi yagl ta makan koglwa sin bekugwa yagl makanmo topo sinaiglkwa. Mige silva i, Israel yoba kanigwa, mige i mina yagl swara ta topo sumun, kuno erabedi kanimiwe di, yegl boglkwa.#27.9-10 Sekaraia 11.12-13
Pailat Jisas kira pogl prukwa
(Mak 15.2-5, Luk 23.3-5, Jon 18.33-38)
11Ana Jisas ye gavana gumuglo mina adigl moglko, gavana ye di pre, yegl dugwa, Ene Juda yoba kingno motno? dugwa. Yegl dugo, Jisas di ikne ede, yegl dugwa, Ene dinga i, kaima diniwe dugwa. 12Yegl dugo, tawa teigwa yoba bitno meglkwa i ya Juda yoba kade ye Jisas aglau kane kane erume digo, Jisas ka swara ta di ikne edekrukwa. 13Di ikne edekruko, Pailat ye di pre, yegl dugwa, Ye ene aglau kane kane etne digwa i, ene pitno mo prikitne? dugwa. 14Gavana yegl dugwa ba Jisas ka swara kaima ta di ikne edekrukwa pre ye kandre, nagie koglkwa.
Pailat Jisas ede prak mina si golo dugwa
(Mak 15.6-15, Luk 23.13-25, Jon 18.39–19.16)
15Ana bugla yugu swara swarade Juda yoba egeno kade i ugwa igne, Pailat ye Juda yoba taragl ta ere togwa. Ye kane yoba swara ta kagie daiglko, Pailat ye yoba i kane paikrabedi i meda edugwa. 16Ana igne i yagl kide kaima ta kane yugu pai moglkwa, kagie Jisas Barabas we digwa. 17Ege i plau dugwa pre Juda yoba tau mere u Pailat moglmara makai sinamnedi eriko, Pailat ye di pre yegl dugwa, Na yoba ira ta kane pai dinabedi i meda ede noratnedi prime? Jisas kagie ta Barabas we digwa i, i meda edenaglo mo Jisas ta, yoba ye God Kere Yugwa Yagl moglme digwa i, i meda edenagle? dugwa. 18Siragl pre Pailat yegl dugwa i, Juda yoba kade wagle ye Jisas yoko kiam sidre, ye na moglmara edigwa pamedi prukwa. 19Ana Pailat ye jas siamo mina ame di moglko, ye ebie ka ta kep ere dedugo, pi Pailat di teigo, prukwa. Ka yegl dugwa, Yagl du moglkwa i, ene taragl ta ere tekro. Na erme ugl kubu kanimara i, ye kandre, yubun tau mere ugl kubu mina iwe dugwa.
20Tawa teigwa yoba bitno meglkwa i ya Juda yoba kade meglkwa i, ye yoba mere makai simara mudu kinano sidre, yegl di teigwa, Ene gavana di te, yagl Barabas i meda ede norsre, Jisas si goglo dio! di, yegl digo, yoba i, ye nomane yegl igwa. 21Ana gavana i, aglke kor yegl dugwa, Yagl suo miurara suna i, na yoba ira ta i meda edinatnedi prime? dugwa. Yegl dugo, ye Barabas we digwa. 22Digo, Pailat ye di pre yegl dugwa, Ana yagl Jisas, ye God Kere Yugwa yagl moglme digwa i, na siragl ere tenagle? dugwa. Yegl dugo, yoba mudu i, Ye ede prak mina si goglo! digwa. 23Yoba i yegl digo, Pailat aglke kor yegl dugwa, Ye mabuno kide siragl mere erukwa pre na ye si goragle? dugwa. Dugwa ba yoba ka podo di pai moglsre, Ye ede prak mina si goglo! digwa.
24Ana Pailat kanugwa i, ye ka dumara i, Juda yoba nomane ta ikrikwa ba kuda eramnedi eraiglkwa mere yegl kandre, nigl kogl yoba mudu gumuglno mina ogo nigl koglsre, yegl dugwa, Yagl gorabuka i, na mabuno ta moglkraglka. Enene mina pamiwe dugwa. 25Yegl dugo, yoba mere u makai sigwa i, yegl digwa, Yagl gorabuka i, no gagroma bogl mabuno moramga pre ka inamga panan, ka inamniwe digwa. 26Yegl digo, Pailat ye Barabas kane pamara i meda edidre, ye soldiamo Jisas duglnai sinaiglmedi di togo, ye duglnai sigwa. Duglnai sigo, Pailat ye i pi ede prak mina si golo dugwa.
Soldia Jisas agai gorabedi ere kide ere teigwa
(Mak 15.16-20, Jon 19.2-3)
27Ana Pailat soldiamo i, ye Jisas i pi, gavana toglmo suna edidre, agle digo, soldia mudu Jisas moglmara wigwa. 28Wigo, ye Jisas gaglmo gugl edidre, gagl olto ta gogl yogwa i ede teigwa. 29Ede tedre, kewan kagigle ake kegmane ere, king bitno gagl erimere yegl ye bre mina padigl tedre, megagle kuba ogo wo mina teigo, akugwa. Yegl ersre, ye goglkono bodugl tedre, ye agai gorabedi yegl digwa, Juda yoba kingno, no ene di wakai yei tomniwe digwa. 30Yegl didre, eur si ogo nagie mina ede, megagle kuba ikra idre, ye bre mina ege mere sigwa. 31Ana Jisas agai gorabedi ere kodidre, lap gogl ikra gugl edidre, Jisas yene gaglmo aglke kor ede ikne ede tedre, ye ede prak mina si goramnedi agre i ede meda eigwa
Jisas ede prak mina sigwa
(Mak 15.21-32, Luk 23.26-43, Jon 19.17-27)
32Ana soldia ye Jisas agre i ede taun meda eigo, yagl ta dumo Sairini nem moglkwa, kagie Saimon we digwa i, tegigl yeigwa. Ye Saimon bogl tegigl yeigo, Jisas ede prakmo i, Saimon kake tenabedi soldia teigo, kake i ede ogwa. 33Ye ede pi dumo ta Golgota we dimara i, plau digwa. Kagie Golgota i, mem paugwa, Bre Yobuglo dumo. 34Ye dumo i udre, nigl wain tau giugl marasin bogl toide i swara edigwa i, Jisas nenabedi teigo, ye ne prisre, mane di, nekrukwa. 35Nekruko, soldia wagle ye Jisas ede prak mina si padiglsre, ye kuguglmo gaglmo swara swarade inamnedi kas mere yegl sigwa. 36Ye yegl ersre, dumo i ame di mogl, Jisas sugl kan meglkwa. 37Te, Jisas ede prak mina sigwa igne, yoba aglauno bogl padigl, padigl erimere yegl, Jisas bre tebe yegl bogl padiglkwa, I Jisas, Juda yoba kingno moglmiwe di, yegl bogl padiglkwa.
38 Ana ye Jisas ede prak mina simara i, kunogl gogl yoba suo ta ogo wo kra sidre, ta kodo kra akie si padiglkwa. 39Jisas ede prak mina pai moglko, yoba konbauna iro ya erikwa i, ye kagie ere kide ersre, bitno pia si, 40yegl digwa, Ene God yugumo si gur di atne edidre, ege suota mina kor kenagle dinga. Ene God Wam kaima motn, ene enene ere idre, ede prak kide kodo, ede atne wo! digwa. 41Kuno yegl tawa teigwa yoba bitno meglkwa i yeigo, God lomo beke teigwa yoba yeigo, te, Juda yoba kade bogl Jisas kenaglmo sidre, yegl digwa, 42Yagl i, ye yoba pere ere yugwa ba ye yene ere inabuka i, kuno ta erekrukwa paugwa. Ye Israel kingno kaima moran, erme ede prak kide kodo, ede atne wo do! Ede atne unan, no kandre, ye pre medramga. 43Te, ye God pre mediglsre, Na God Wam moluwe dugwa pre God ye wakai kanan, ye ere yo do! digwa. 44Te, kunogl gogl yoba akie ede prak mina sigwa i, dimere kuno yegl Jisas kenaglmo si miurka.
Jisas goglkwa
(Mak 15.33-41, Luk 23.44-49, Jon 19.28-30)
45Ana ermine, belo mere yegl, dumo magigl i mim mudu ake wai di pai mogl ogo, ade kwia 3 klok yogwa. 46Ade kwia 3 klok yogo, Jisas ka podo di, yegl dugwa, Eli, Eli, lama sabaktani dugwa. Ye ka dugwa i mabuno yegl paugwa, Na Godna, na Godna, ene siragl pre na mokon natne?#27.46 Giglage 22.1 dugwa. 47Ana Jisas ka yegl dugo, yoba tau magigl adigl meglkwa i prisre, Ye ka kep yagl Elaija agle dumiwe digwa. 48Yegl digo, ye meglmara suna i, yagl swara ta muku di ede pi giagin ta idre, wain nuglo ku erukwa tau giagin mina si bai, buko mina padiglsre, i pi Jisas moglmara bi di nenabedi togo, nogwa. 49Nogwa ba yoba tau magigl meglkwa i, yegl digwa, Ye kanige ero! Elaija u ye ere inabo mo, nono kanamniwe di, yegl digwa. 50Ana Jisas yegl pai moglsre, aglke kor ka podo ta didre, goglkwa.
51Ana Jisas goglko, lap podo ta tawa teigwa yugu yugugl kra keglkwa i, mitna ibo yei, suna wom si argla di, ede ime u, i koglo koglo edugwa. Yegl eruko, imem udre, kobuglo kade kade si buko dugwa. 52Yegl eruko, te yoba geglkwa kobuglo mur yeimara i, kobuglo mur tau yauruko, God yobama tau mere okna geglkwa i, ogono nagino mina adiglkwa. 53Ye adiglsre, kobuglo mur kide kodo wan meglko, Jisas adigl u kor ogwa igne, ye mudu ede God taunmo, Jerusalem suna wigo, yoba tau mere ye kanigwa.
54Te, soldia bitno yagl ta soldia tau bogl Jisas sugl kan meglkwa i, ye imem ta ugwa i prisre, taragl kane kane plau dugwa i kandre, kudugl podo gogl, yegl digwa, Yagl i, ye kaima God Wam moglmiwe digwa.
55Ana abu tau Jisas distrik Galili kide kodidre, umara ye sika si, ake ple di teigwa i, abumo wagle i, ye eglke iro mogl, kan meglkwa. 56Ye meglmara suna i, Maria ta, dumo Makdala mam moglkwa i, moglko, Maria ta, Jems ya Josep mano moglkwa i, moglko, yagl Sebedi wam suo mano moglkwa i, ama moglkwa.
Jisas ogo nagie i pi kobuglo mur yeigwa
(Mak 15.42-47, Luk 23.50-55, Jon 19.38-42)
57Ana min paugo, yagl ta mige mere kan yogwa dumo Arimatea nem ta moglkwa ugwa. Ye kagie Josep we digo, ye ama Jisas duglo boglkwa yagl ta moglkwa. 58Yagl Josep i, ye Jisas ogo nagie inagledi pre, Pailat moglmara pi di pruko, Pailat ye soldia tau Jisas ogo nagie Josep tenaiglmedi di togo, teigwa. 59Teigo, Josep ye Jisas ogo nagie idre, lap kruo pe sugwa ta mina ogo nagie wersre, 60i pi kobuglo mur atne yogwa. Kobuglo mur i, Josep yene kobuglo mina pere yogo, yoba swara ta ogono nagino atne yeikrimara yogwa. Ye Jisas ogo nagie kubuglo mur i mina yedre, kobuglo podo ta memgo yogwa i, ake nu si, kobuglo dra si kegl didre, ede ogwa. 61Te, ye kobuglo mur yomara i, Maria, dumo Makdala mam moglkwa i yogo, Maria ta bogl akie ame di mogl, kanibrika.
Soldia kobuglo mur sugl kan meglkwa
62 Ana Juda yoba taragl tau ere wakai erikwa ege ikra dudugo, Sabat de yogo, tawa teigwa yoba bitno meglkwa i, Farisi yoba bogl akie Pailat moglmara makai sidre, 63yegl digwa, Yagl kade yo, no erme prumga i, yagl ta yoba bakagl togwa ikra kor moglkwa igne, ye na goglsre, ege suota pai mogl, adigl u kor enaluwe dugwa. 64Yegl pre no yegl di prumga, ene soldianen tau dedin, ye kobuglo mur yeimara i, sugl mogl ebi, ege namba 3 i, dudinabedi prumniwa. Ta manan, kowai ye duglo beglkwa yoba ta ugl mage ere, ye ogo nagie kunogl i pidre, yoba di te, Ye adigl u kor omiwe dibi, i kide panabuka. Yegl eribi, yagl i yoba okna bakagl togwa i, kebra dagl panabuka ba ye duglo beglkwa yoba okuo yoba bakagl tenaiglkwa i, podo panabiwe digwa. 65Yegl digo, Pailat di ikne ede, Pra. Ene primere yegl soldia tau kobuglo mur sugl moraiglmedi i pi edio! dugwa. 66Yegl dugo, ye pi kobuglo dra ta si kegl dugwa i, yoba ta ake dinaiglmedi biga kogl padiglsre, soldia tau sugl kan moraiglmedi edigwa meglkwa.
Currently Selected:
Matyu 27: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission
Matyu 27
27
Jisas agre i pi, Pailat moglmara eigwa
(Mak 15.1, Luk 23.1-2, Jon 18.28-32)
1Ana tagana mogl, tawa teigwa bito yoba meglkwa i yeigo, Juda yoba kade yeigo, ye ka di koglsre, Jisas si goramniwe digwa. 2Yegl didre, ye Jisas kane kogl i pi gavana Pailat moglmara edigwa.
Judas ye yene wi si goglkwa
3Ana Judas, ye Jisas i pi kudamo ikne ogo mina yogwa yagl ikra, ye Jisas si goramne digwa i prisre, aglau eriwedi pre, mige silva 30-pela yugwa ikra, te ikne ede, tawa teigwa bitno yoba meglkwa ya Juda yoba kade i, togwa. 4Tedre, yegl dugwa, Na tadaglme ere yagl ta aglau erekrukwa i, yu ene ogono mina yeiwe dugwa. Yegl dugo, ye di ikne ede, No kogono paikrukwa. Enene mina pamiwe digwa. 5Yegl digo, Judas mige silva ikra puk si tawa teigwa yugu togl suna edidre, yene nugu mina kan si, yene wi si goglkwa.
6Ana tawa teigwa yoba bitno meglkwa i, ye mige silva ta Judas te ikne edugwa i, i pre yegl digwa, Mige i mina yoba si goramnedi topo erumga pre mige i mina God yugumo yugugl bona sidre, God kogonmo eramnedi eun, kuno erekrabiwe digwa. 7Yegl didre, ye ka di kogl, mige i pi dumo makan ta gigl pene yenabedi topo sinamniwe digwa. Dumo makan i, yagl ta makan koglwa sin bekugwa yagl ta makanmo topo sidre, yoba pere Juda yoba moglkraiglkwa i, gigl peneno yenabedi topo sigwa. 8Yegl pre makan topo erikwa i, yoba ere mogl, bormai dumo we digwa. Te, erme pra, yoba ama yegl di pai meglkwa. 9-10Makan topo simara i mina ka kep yagl Jeremaia okna ka ta boglkwa i, pai yugwa. Ye boglkwa i, yegl boglkwa, Yagl Kade na di narumere yegl, yoba i mige 30-pela i pi yagl ta makan koglwa sin bekugwa yagl makanmo topo sinaiglkwa. Mige silva i, Israel yoba kanigwa, mige i mina yagl swara ta topo sumun, kuno erabedi kanimiwe di, yegl boglkwa.#27.9-10 Sekaraia 11.12-13
Pailat Jisas kira pogl prukwa
(Mak 15.2-5, Luk 23.3-5, Jon 18.33-38)
11Ana Jisas ye gavana gumuglo mina adigl moglko, gavana ye di pre, yegl dugwa, Ene Juda yoba kingno motno? dugwa. Yegl dugo, Jisas di ikne ede, yegl dugwa, Ene dinga i, kaima diniwe dugwa. 12Yegl dugo, tawa teigwa yoba bitno meglkwa i ya Juda yoba kade ye Jisas aglau kane kane erume digo, Jisas ka swara ta di ikne edekrukwa. 13Di ikne edekruko, Pailat ye di pre, yegl dugwa, Ye ene aglau kane kane etne digwa i, ene pitno mo prikitne? dugwa. 14Gavana yegl dugwa ba Jisas ka swara kaima ta di ikne edekrukwa pre ye kandre, nagie koglkwa.
Pailat Jisas ede prak mina si golo dugwa
(Mak 15.6-15, Luk 23.13-25, Jon 18.39–19.16)
15Ana bugla yugu swara swarade Juda yoba egeno kade i ugwa igne, Pailat ye Juda yoba taragl ta ere togwa. Ye kane yoba swara ta kagie daiglko, Pailat ye yoba i kane paikrabedi i meda edugwa. 16Ana igne i yagl kide kaima ta kane yugu pai moglkwa, kagie Jisas Barabas we digwa. 17Ege i plau dugwa pre Juda yoba tau mere u Pailat moglmara makai sinamnedi eriko, Pailat ye di pre yegl dugwa, Na yoba ira ta kane pai dinabedi i meda ede noratnedi prime? Jisas kagie ta Barabas we digwa i, i meda edenaglo mo Jisas ta, yoba ye God Kere Yugwa Yagl moglme digwa i, i meda edenagle? dugwa. 18Siragl pre Pailat yegl dugwa i, Juda yoba kade wagle ye Jisas yoko kiam sidre, ye na moglmara edigwa pamedi prukwa. 19Ana Pailat ye jas siamo mina ame di moglko, ye ebie ka ta kep ere dedugo, pi Pailat di teigo, prukwa. Ka yegl dugwa, Yagl du moglkwa i, ene taragl ta ere tekro. Na erme ugl kubu kanimara i, ye kandre, yubun tau mere ugl kubu mina iwe dugwa.
20Tawa teigwa yoba bitno meglkwa i ya Juda yoba kade meglkwa i, ye yoba mere makai simara mudu kinano sidre, yegl di teigwa, Ene gavana di te, yagl Barabas i meda ede norsre, Jisas si goglo dio! di, yegl digo, yoba i, ye nomane yegl igwa. 21Ana gavana i, aglke kor yegl dugwa, Yagl suo miurara suna i, na yoba ira ta i meda edinatnedi prime? dugwa. Yegl dugo, ye Barabas we digwa. 22Digo, Pailat ye di pre yegl dugwa, Ana yagl Jisas, ye God Kere Yugwa yagl moglme digwa i, na siragl ere tenagle? dugwa. Yegl dugo, yoba mudu i, Ye ede prak mina si goglo! digwa. 23Yoba i yegl digo, Pailat aglke kor yegl dugwa, Ye mabuno kide siragl mere erukwa pre na ye si goragle? dugwa. Dugwa ba yoba ka podo di pai moglsre, Ye ede prak mina si goglo! digwa.
24Ana Pailat kanugwa i, ye ka dumara i, Juda yoba nomane ta ikrikwa ba kuda eramnedi eraiglkwa mere yegl kandre, nigl kogl yoba mudu gumuglno mina ogo nigl koglsre, yegl dugwa, Yagl gorabuka i, na mabuno ta moglkraglka. Enene mina pamiwe dugwa. 25Yegl dugo, yoba mere u makai sigwa i, yegl digwa, Yagl gorabuka i, no gagroma bogl mabuno moramga pre ka inamga panan, ka inamniwe digwa. 26Yegl digo, Pailat ye Barabas kane pamara i meda edidre, ye soldiamo Jisas duglnai sinaiglmedi di togo, ye duglnai sigwa. Duglnai sigo, Pailat ye i pi ede prak mina si golo dugwa.
Soldia Jisas agai gorabedi ere kide ere teigwa
(Mak 15.16-20, Jon 19.2-3)
27Ana Pailat soldiamo i, ye Jisas i pi, gavana toglmo suna edidre, agle digo, soldia mudu Jisas moglmara wigwa. 28Wigo, ye Jisas gaglmo gugl edidre, gagl olto ta gogl yogwa i ede teigwa. 29Ede tedre, kewan kagigle ake kegmane ere, king bitno gagl erimere yegl ye bre mina padigl tedre, megagle kuba ogo wo mina teigo, akugwa. Yegl ersre, ye goglkono bodugl tedre, ye agai gorabedi yegl digwa, Juda yoba kingno, no ene di wakai yei tomniwe digwa. 30Yegl didre, eur si ogo nagie mina ede, megagle kuba ikra idre, ye bre mina ege mere sigwa. 31Ana Jisas agai gorabedi ere kodidre, lap gogl ikra gugl edidre, Jisas yene gaglmo aglke kor ede ikne ede tedre, ye ede prak mina si goramnedi agre i ede meda eigwa
Jisas ede prak mina sigwa
(Mak 15.21-32, Luk 23.26-43, Jon 19.17-27)
32Ana soldia ye Jisas agre i ede taun meda eigo, yagl ta dumo Sairini nem moglkwa, kagie Saimon we digwa i, tegigl yeigwa. Ye Saimon bogl tegigl yeigo, Jisas ede prakmo i, Saimon kake tenabedi soldia teigo, kake i ede ogwa. 33Ye ede pi dumo ta Golgota we dimara i, plau digwa. Kagie Golgota i, mem paugwa, Bre Yobuglo dumo. 34Ye dumo i udre, nigl wain tau giugl marasin bogl toide i swara edigwa i, Jisas nenabedi teigo, ye ne prisre, mane di, nekrukwa. 35Nekruko, soldia wagle ye Jisas ede prak mina si padiglsre, ye kuguglmo gaglmo swara swarade inamnedi kas mere yegl sigwa. 36Ye yegl ersre, dumo i ame di mogl, Jisas sugl kan meglkwa. 37Te, Jisas ede prak mina sigwa igne, yoba aglauno bogl padigl, padigl erimere yegl, Jisas bre tebe yegl bogl padiglkwa, I Jisas, Juda yoba kingno moglmiwe di, yegl bogl padiglkwa.
38 Ana ye Jisas ede prak mina simara i, kunogl gogl yoba suo ta ogo wo kra sidre, ta kodo kra akie si padiglkwa. 39Jisas ede prak mina pai moglko, yoba konbauna iro ya erikwa i, ye kagie ere kide ersre, bitno pia si, 40yegl digwa, Ene God yugumo si gur di atne edidre, ege suota mina kor kenagle dinga. Ene God Wam kaima motn, ene enene ere idre, ede prak kide kodo, ede atne wo! digwa. 41Kuno yegl tawa teigwa yoba bitno meglkwa i yeigo, God lomo beke teigwa yoba yeigo, te, Juda yoba kade bogl Jisas kenaglmo sidre, yegl digwa, 42Yagl i, ye yoba pere ere yugwa ba ye yene ere inabuka i, kuno ta erekrukwa paugwa. Ye Israel kingno kaima moran, erme ede prak kide kodo, ede atne wo do! Ede atne unan, no kandre, ye pre medramga. 43Te, ye God pre mediglsre, Na God Wam moluwe dugwa pre God ye wakai kanan, ye ere yo do! digwa. 44Te, kunogl gogl yoba akie ede prak mina sigwa i, dimere kuno yegl Jisas kenaglmo si miurka.
Jisas goglkwa
(Mak 15.33-41, Luk 23.44-49, Jon 19.28-30)
45Ana ermine, belo mere yegl, dumo magigl i mim mudu ake wai di pai mogl ogo, ade kwia 3 klok yogwa. 46Ade kwia 3 klok yogo, Jisas ka podo di, yegl dugwa, Eli, Eli, lama sabaktani dugwa. Ye ka dugwa i mabuno yegl paugwa, Na Godna, na Godna, ene siragl pre na mokon natne?#27.46 Giglage 22.1 dugwa. 47Ana Jisas ka yegl dugo, yoba tau magigl adigl meglkwa i prisre, Ye ka kep yagl Elaija agle dumiwe digwa. 48Yegl digo, ye meglmara suna i, yagl swara ta muku di ede pi giagin ta idre, wain nuglo ku erukwa tau giagin mina si bai, buko mina padiglsre, i pi Jisas moglmara bi di nenabedi togo, nogwa. 49Nogwa ba yoba tau magigl meglkwa i, yegl digwa, Ye kanige ero! Elaija u ye ere inabo mo, nono kanamniwe di, yegl digwa. 50Ana Jisas yegl pai moglsre, aglke kor ka podo ta didre, goglkwa.
51Ana Jisas goglko, lap podo ta tawa teigwa yugu yugugl kra keglkwa i, mitna ibo yei, suna wom si argla di, ede ime u, i koglo koglo edugwa. Yegl eruko, imem udre, kobuglo kade kade si buko dugwa. 52Yegl eruko, te yoba geglkwa kobuglo mur yeimara i, kobuglo mur tau yauruko, God yobama tau mere okna geglkwa i, ogono nagino mina adiglkwa. 53Ye adiglsre, kobuglo mur kide kodo wan meglko, Jisas adigl u kor ogwa igne, ye mudu ede God taunmo, Jerusalem suna wigo, yoba tau mere ye kanigwa.
54Te, soldia bitno yagl ta soldia tau bogl Jisas sugl kan meglkwa i, ye imem ta ugwa i prisre, taragl kane kane plau dugwa i kandre, kudugl podo gogl, yegl digwa, Yagl i, ye kaima God Wam moglmiwe digwa.
55Ana abu tau Jisas distrik Galili kide kodidre, umara ye sika si, ake ple di teigwa i, abumo wagle i, ye eglke iro mogl, kan meglkwa. 56Ye meglmara suna i, Maria ta, dumo Makdala mam moglkwa i, moglko, Maria ta, Jems ya Josep mano moglkwa i, moglko, yagl Sebedi wam suo mano moglkwa i, ama moglkwa.
Jisas ogo nagie i pi kobuglo mur yeigwa
(Mak 15.42-47, Luk 23.50-55, Jon 19.38-42)
57Ana min paugo, yagl ta mige mere kan yogwa dumo Arimatea nem ta moglkwa ugwa. Ye kagie Josep we digo, ye ama Jisas duglo boglkwa yagl ta moglkwa. 58Yagl Josep i, ye Jisas ogo nagie inagledi pre, Pailat moglmara pi di pruko, Pailat ye soldia tau Jisas ogo nagie Josep tenaiglmedi di togo, teigwa. 59Teigo, Josep ye Jisas ogo nagie idre, lap kruo pe sugwa ta mina ogo nagie wersre, 60i pi kobuglo mur atne yogwa. Kobuglo mur i, Josep yene kobuglo mina pere yogo, yoba swara ta ogono nagino atne yeikrimara yogwa. Ye Jisas ogo nagie kubuglo mur i mina yedre, kobuglo podo ta memgo yogwa i, ake nu si, kobuglo dra si kegl didre, ede ogwa. 61Te, ye kobuglo mur yomara i, Maria, dumo Makdala mam moglkwa i yogo, Maria ta bogl akie ame di mogl, kanibrika.
Soldia kobuglo mur sugl kan meglkwa
62 Ana Juda yoba taragl tau ere wakai erikwa ege ikra dudugo, Sabat de yogo, tawa teigwa yoba bitno meglkwa i, Farisi yoba bogl akie Pailat moglmara makai sidre, 63yegl digwa, Yagl kade yo, no erme prumga i, yagl ta yoba bakagl togwa ikra kor moglkwa igne, ye na goglsre, ege suota pai mogl, adigl u kor enaluwe dugwa. 64Yegl pre no yegl di prumga, ene soldianen tau dedin, ye kobuglo mur yeimara i, sugl mogl ebi, ege namba 3 i, dudinabedi prumniwa. Ta manan, kowai ye duglo beglkwa yoba ta ugl mage ere, ye ogo nagie kunogl i pidre, yoba di te, Ye adigl u kor omiwe dibi, i kide panabuka. Yegl eribi, yagl i yoba okna bakagl togwa i, kebra dagl panabuka ba ye duglo beglkwa yoba okuo yoba bakagl tenaiglkwa i, podo panabiwe digwa. 65Yegl digo, Pailat di ikne ede, Pra. Ene primere yegl soldia tau kobuglo mur sugl moraiglmedi i pi edio! dugwa. 66Yegl dugo, ye pi kobuglo dra ta si kegl dugwa i, yoba ta ake dinaiglmedi biga kogl padiglsre, soldia tau sugl kan moraiglmedi edigwa meglkwa.
Currently Selected:
:
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission