Mak 4
4
Yagl ta kugl mogo suduglkwa ka ebrie
(Matyu 13.1-19, Luk 8.4-8)
1Ana Jisas aglke kor nigl nubun bina mogl, yoba God kamo beke togwa. Beke te moglko, yoba mere kide ye moglmara eigwa pre ye aglke kor ede baglkugl mina ede egli pi ame dugo, yoba mere kide nigle bina adigl meglkwa. 2Adigl meglko, Jisas ka ebrie mere kaima beke togwa.
Ta dugwa i, yegl dugwa, 3Ene prio! Yagl ta kugl mogo i pi suduragledi ede ogwa. 4Kugl mogo i pi sudugl ake pia sugo, kugl mogo tau yage konbauna sigwa. Kugl mogo i, kua pru di u neigwa. 5Te, tau, yage makan gaba kuri ta kobuglo bolamugl moglmara yage sigwa. Kugl mogo i, makan gaba mere yeikrumara yage sigwa pre tabre parikwa 6ba ade ede mitna ugwa igne, duglane ede atne pikrukwa pre kugl i tabre ade de, yaminugwa. 7Te, tau yage kan kagigle yaglkwa bogl moglmara sigwa. Kugl mogo i pare wi sigo, kan kagigle yaglkwa i ama akie pare ede mitna pi, kugl i atne edugo, kugl i mogo ta koglkrikwa. 8Te, kugl mogo tau yage makan wakai yomara sigwa. Kugl mogo i, pare ede mitna pi, mogo wakai koglkwa. Tau 30 keglko, tau 60 keglko, tau 100 keglmiwe di, yegl dugwa. 9Didre, ama ka ta yegl dugwa, Yoba na kana ta pramnedi praiglkwa i, na ka diga i wakai ere kinano gudu prio! dugwa.
Jisas siragl pre ka ebrie dugwa
(Matyu 13.10-17, Luk 8.9-10)
10Ana okuo Jisas yagl 12-pela ye duglo beglkwa yagl i yeigo, te yoba tau ye ama duglo beglkwa i yene moglsre, ye Jisas ka ebrie tau dugwa i mabuno pramnedi kira pogl prikwa. 11Kira pogl priko, Jisas ye di te, yegl dugwa, God yoba kingno morabuka kamo mem teke paugwa i, ye ene pre pogl sinaiglmedi pra we dugwa ba yoba meda meglkwa i, ka ebrie keme di tebo, praiglmiwe di, yegl dugwa. 12Na ka ebrie keme dinaglka i, ye kan kan eraiglkwa ba kan pogl sikraiglkwa pre diga. Te, ye pre pre eraiglkwa ba pre pogl sikraiglkwa pre diga. Te, ye nomane kor ibi, God ye tadaglmeno gugl ede dinabedi yegl diwe#4.12 Aisaia 6.9-10 dugwa.
Yagl ta kugl mogo suduglkwa ka ebrie i, Jias mabuno di nogugl edugwa
(Matyu 13.18-23, Luk 8.11-15)
13Ana Jisas ka yegl didre, ka ta ama yegl dugwa, Na ka ebrie swara ta kugl mogo pre erme diga i, ene pre pogl sikribi, ka ebrie tau okuo dinaglka i, ene siragl mere pre pogl sinaiglme? 14Na yagl ta kugl mogo suduglme diga i, yoba ta God kamo di togwa mere yegl moglkwa. 15Te, kugl mogo tau yage konbauna sime diga i, yoba tau God kamo prikwa ba Satan oglade u ye ka prikwa i, nomano mina i eglke edugwa. 16Te, kugl mogo tau yage kobuglo moglmara sime diga i, yoba tau God kamo prikwa igne, ye tabre pre idre, gun yeigwa. 17Ba duglane ede atne pikrumere mere yegl meglkwa pre ye ege sugunagle keme ka prikwa pre ka primara pre yubun ta teigwa mo ye ere sibi, ye tabre yage sinaiglkwa. 18Te kugl mogo tau yage kan kagigle yaglkwa boglmara sime diga i, yoba tau God kamo prikwa 19ba ye erme mogl pai eraiglkwa i ya, mige moni mere kan yenaiglkwa i ya, bona gana kane kane sinaiglkwa pre i mitna edigwa pre kan kagigle yaglkwa i kugl i atne edumere mere yegl, taragl i ye nomano mina kau sugo, ye mogo wakai ta koglkrikwa. 20Te, tau yage makan wakai yomara sime diga i, yoba tau God kamo wakai pre, duglo bogl, mogo wakai keglkwa. Tau ki 30 keglko, tau ki 60 keglko, tau ki 100 yegl keglmiwe di, yegl dugwa.
Yoba ken gaglsre, degigl gagl mina atne yeikraiglkwa
(Luk 8.16-18)
21 Jisas ka ta ama yegl di togwa, Yoba ken gagl yu degigl gagl mina atne edimo? Mo, lam beyemo mina padigl, nogugl yeikre, yu bogl atne yeimo? 22Kuno yegl mere ka siragl mere ta teke paugwa mo yoba pre pogl sikrikwa i, okuo ede nogugl unan, yoba pre pogl sinaiglkwa keme pre paugwa. 23Yoba na kana ta pramnedi pribi, wakai ere kinano gudu prio! dugwa.
24Jisas ka yegl didre, ama yegl dugwa, Ene ka erme prikwa i, wakai ere kinano gudu prio! Ene siragl mere ka i kinano gudu pre yubu sigwa i, God kuno yegl mere ene nomano tedre, nomane tau ama i tebe ede tenabiwe dugwa. 25Yoba tau na kana wakai ere kinano gudu praiglkwa i, God ye nomane tau te tebe edenabiwe dugwa. Ba yoba tau na kana wakai ere kinano gudu prikraiglkwa i, ye nomane kebra ta igwa i, God i eglke edenabiwe di, yegl dugwa.
Kugl mogo wi si parukwa ka ebrie
26Ana Jisas ka ebrie ta ama yegl dugwa, God yoba kingno mogl, ye suglno morabuka ege i, siragl mere unabuka i, yegl mere pamiwe dugwa. Yagl ta kugl mogo suduglkwa mere yegl paugwa. Yagl i kugl mogo i pi makan mina suduglsre, 27ye eduer ugl pai, tagna mogl adigl, yegl ere ogo, kugl mogo i yene pare, wi si ede mitna ogwa. Kugl mogo siragl mere pare, wi si erukwa i, yagl mogo suduglkwa i ta pre pogl sikrukwa. 28Makan yene eruko, kugl i mogo keglkwa. Komno kana kugl pare wi si ede mitna pidre, okuo mogo ninie ere kogl, okuo kaima i mogo de, bogl yome dugwa. 29Ana mogo dogwa igne, yagl ikra ye si inabuka egemo yogwa pre ye oglade si yumiwe di, yegl dugwa.
Ede mastet mogomo ka ebrie
(Matyu 13.31-32, Luk 13.18-19)
30Ana Jisas ka ta ama yegl dugwa, God yoba kingno mogl, suglno morabuka i, siragl mere panabe dinamne? Mo ka ebrie siragl mere di boramne? 31I ede mastet mogomo mere yegl ta pame dinaglka. Yagl ta mastet mogo ta i pi kaya mokna ere yaglmara suna yaglkwa. Ana mastet mogo i, kebra kaima yedre, kaya mokna mogo tau togwa 32ba mastet pare ede mitna ogwa igne, ede mere yegl pai, kaya mokna mudu egre i atne ede, yogagle kade sugo, bogume yogwa pre kua tau mere u yugo bagl paimiwe dugwa.
God kamo i, Jisas ka ebrie keme di togwa
(Matyu 13.34-35)
33-34Ana Jisas ka ebrie yegl tau mere didre, yoba mudu God kamo ka ebrie keme di togwa. Ka ebrie di tomara i, yoba ye pre pogl sinaiglkwa kuno erabuka yegl mere di togwa. Yoba ka ebrie keme di togwa ba ye yene duglo beglkwa yagl i bogl akie meglkwa igne, ye ka ebrie dugwa i mabunomo di nogugl ede togwa.
Jisas ka dugo, ir waga kudu ugwa bu yogwa
(Matyu 8.23-27, Luk 8.22-25)
35 Ana ege swara i min paugo, Jisas ye duglo beglkwa yagl di tedre, Nono ede nigl nubun koglo ibo omno dugwa. 36Ye baglkugl kuglo mogl, ka yegl dugwa pre ye duglo beglkwa yagl yoba mere kide meglmara i kide kodidre, Jisas auro i ede koglo ibo enamnedi baglkugl wagle eigwa. Te, yoba tau baglkugl tau ama idre, pere eigwa. 37-38Ana ye ede nigle suna eigo, Jisas ye baglkugl mokomugl mogl, ede iko ta yei, ugl pai moglkwa. Ugl pai moglko, ir waga kudu podo ta ugo, nigl si pepigl di, u baglkugl wagle si kau sinagledi erukwa. Yegl eruko, ye duglo beglkwa yagl ye uglo yoko, yegl digwa, Neno Yagle, no goramga i, ene prikitno? di, yegl digwa. 39Yegl digo, Jisas adiglsre, ir waga kudu ikra ka tedre, nigl sugwa i di te, Kiede moglo! dugwa. Dugo, ir ugwa i dudugo, nigl ama kiede kaima moglkwa. 40Yegl eruko, Jisas ye duglo beglkwa yagl di pre, yegl dugwa, Siragl eruko, ene kudugl geglme? Ene na yobuglna pre mediglkrimo? dugwa. 41Jisas yegl dugo, ye duglo beglkwa yagl ye Jisas kuduglmo podo goglsre, yegl digwa, Aya, yagl irane? Ye ir ya nigl akie ka togo, pribriwe di, yegl digwa.
Currently Selected:
Mak 4: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission
Mak 4
4
Yagl ta kugl mogo suduglkwa ka ebrie
(Matyu 13.1-19, Luk 8.4-8)
1Ana Jisas aglke kor nigl nubun bina mogl, yoba God kamo beke togwa. Beke te moglko, yoba mere kide ye moglmara eigwa pre ye aglke kor ede baglkugl mina ede egli pi ame dugo, yoba mere kide nigle bina adigl meglkwa. 2Adigl meglko, Jisas ka ebrie mere kaima beke togwa.
Ta dugwa i, yegl dugwa, 3Ene prio! Yagl ta kugl mogo i pi suduragledi ede ogwa. 4Kugl mogo i pi sudugl ake pia sugo, kugl mogo tau yage konbauna sigwa. Kugl mogo i, kua pru di u neigwa. 5Te, tau, yage makan gaba kuri ta kobuglo bolamugl moglmara yage sigwa. Kugl mogo i, makan gaba mere yeikrumara yage sigwa pre tabre parikwa 6ba ade ede mitna ugwa igne, duglane ede atne pikrukwa pre kugl i tabre ade de, yaminugwa. 7Te, tau yage kan kagigle yaglkwa bogl moglmara sigwa. Kugl mogo i pare wi sigo, kan kagigle yaglkwa i ama akie pare ede mitna pi, kugl i atne edugo, kugl i mogo ta koglkrikwa. 8Te, kugl mogo tau yage makan wakai yomara sigwa. Kugl mogo i, pare ede mitna pi, mogo wakai koglkwa. Tau 30 keglko, tau 60 keglko, tau 100 keglmiwe di, yegl dugwa. 9Didre, ama ka ta yegl dugwa, Yoba na kana ta pramnedi praiglkwa i, na ka diga i wakai ere kinano gudu prio! dugwa.
Jisas siragl pre ka ebrie dugwa
(Matyu 13.10-17, Luk 8.9-10)
10Ana okuo Jisas yagl 12-pela ye duglo beglkwa yagl i yeigo, te yoba tau ye ama duglo beglkwa i yene moglsre, ye Jisas ka ebrie tau dugwa i mabuno pramnedi kira pogl prikwa. 11Kira pogl priko, Jisas ye di te, yegl dugwa, God yoba kingno morabuka kamo mem teke paugwa i, ye ene pre pogl sinaiglmedi pra we dugwa ba yoba meda meglkwa i, ka ebrie keme di tebo, praiglmiwe di, yegl dugwa. 12Na ka ebrie keme dinaglka i, ye kan kan eraiglkwa ba kan pogl sikraiglkwa pre diga. Te, ye pre pre eraiglkwa ba pre pogl sikraiglkwa pre diga. Te, ye nomane kor ibi, God ye tadaglmeno gugl ede dinabedi yegl diwe#4.12 Aisaia 6.9-10 dugwa.
Yagl ta kugl mogo suduglkwa ka ebrie i, Jias mabuno di nogugl edugwa
(Matyu 13.18-23, Luk 8.11-15)
13Ana Jisas ka yegl didre, ka ta ama yegl dugwa, Na ka ebrie swara ta kugl mogo pre erme diga i, ene pre pogl sikribi, ka ebrie tau okuo dinaglka i, ene siragl mere pre pogl sinaiglme? 14Na yagl ta kugl mogo suduglme diga i, yoba ta God kamo di togwa mere yegl moglkwa. 15Te, kugl mogo tau yage konbauna sime diga i, yoba tau God kamo prikwa ba Satan oglade u ye ka prikwa i, nomano mina i eglke edugwa. 16Te, kugl mogo tau yage kobuglo moglmara sime diga i, yoba tau God kamo prikwa igne, ye tabre pre idre, gun yeigwa. 17Ba duglane ede atne pikrumere mere yegl meglkwa pre ye ege sugunagle keme ka prikwa pre ka primara pre yubun ta teigwa mo ye ere sibi, ye tabre yage sinaiglkwa. 18Te kugl mogo tau yage kan kagigle yaglkwa boglmara sime diga i, yoba tau God kamo prikwa 19ba ye erme mogl pai eraiglkwa i ya, mige moni mere kan yenaiglkwa i ya, bona gana kane kane sinaiglkwa pre i mitna edigwa pre kan kagigle yaglkwa i kugl i atne edumere mere yegl, taragl i ye nomano mina kau sugo, ye mogo wakai ta koglkrikwa. 20Te, tau yage makan wakai yomara sime diga i, yoba tau God kamo wakai pre, duglo bogl, mogo wakai keglkwa. Tau ki 30 keglko, tau ki 60 keglko, tau ki 100 yegl keglmiwe di, yegl dugwa.
Yoba ken gaglsre, degigl gagl mina atne yeikraiglkwa
(Luk 8.16-18)
21 Jisas ka ta ama yegl di togwa, Yoba ken gagl yu degigl gagl mina atne edimo? Mo, lam beyemo mina padigl, nogugl yeikre, yu bogl atne yeimo? 22Kuno yegl mere ka siragl mere ta teke paugwa mo yoba pre pogl sikrikwa i, okuo ede nogugl unan, yoba pre pogl sinaiglkwa keme pre paugwa. 23Yoba na kana ta pramnedi pribi, wakai ere kinano gudu prio! dugwa.
24Jisas ka yegl didre, ama yegl dugwa, Ene ka erme prikwa i, wakai ere kinano gudu prio! Ene siragl mere ka i kinano gudu pre yubu sigwa i, God kuno yegl mere ene nomano tedre, nomane tau ama i tebe ede tenabiwe dugwa. 25Yoba tau na kana wakai ere kinano gudu praiglkwa i, God ye nomane tau te tebe edenabiwe dugwa. Ba yoba tau na kana wakai ere kinano gudu prikraiglkwa i, ye nomane kebra ta igwa i, God i eglke edenabiwe di, yegl dugwa.
Kugl mogo wi si parukwa ka ebrie
26Ana Jisas ka ebrie ta ama yegl dugwa, God yoba kingno mogl, ye suglno morabuka ege i, siragl mere unabuka i, yegl mere pamiwe dugwa. Yagl ta kugl mogo suduglkwa mere yegl paugwa. Yagl i kugl mogo i pi makan mina suduglsre, 27ye eduer ugl pai, tagna mogl adigl, yegl ere ogo, kugl mogo i yene pare, wi si ede mitna ogwa. Kugl mogo siragl mere pare, wi si erukwa i, yagl mogo suduglkwa i ta pre pogl sikrukwa. 28Makan yene eruko, kugl i mogo keglkwa. Komno kana kugl pare wi si ede mitna pidre, okuo mogo ninie ere kogl, okuo kaima i mogo de, bogl yome dugwa. 29Ana mogo dogwa igne, yagl ikra ye si inabuka egemo yogwa pre ye oglade si yumiwe di, yegl dugwa.
Ede mastet mogomo ka ebrie
(Matyu 13.31-32, Luk 13.18-19)
30Ana Jisas ka ta ama yegl dugwa, God yoba kingno mogl, suglno morabuka i, siragl mere panabe dinamne? Mo ka ebrie siragl mere di boramne? 31I ede mastet mogomo mere yegl ta pame dinaglka. Yagl ta mastet mogo ta i pi kaya mokna ere yaglmara suna yaglkwa. Ana mastet mogo i, kebra kaima yedre, kaya mokna mogo tau togwa 32ba mastet pare ede mitna ogwa igne, ede mere yegl pai, kaya mokna mudu egre i atne ede, yogagle kade sugo, bogume yogwa pre kua tau mere u yugo bagl paimiwe dugwa.
God kamo i, Jisas ka ebrie keme di togwa
(Matyu 13.34-35)
33-34Ana Jisas ka ebrie yegl tau mere didre, yoba mudu God kamo ka ebrie keme di togwa. Ka ebrie di tomara i, yoba ye pre pogl sinaiglkwa kuno erabuka yegl mere di togwa. Yoba ka ebrie keme di togwa ba ye yene duglo beglkwa yagl i bogl akie meglkwa igne, ye ka ebrie dugwa i mabunomo di nogugl ede togwa.
Jisas ka dugo, ir waga kudu ugwa bu yogwa
(Matyu 8.23-27, Luk 8.22-25)
35 Ana ege swara i min paugo, Jisas ye duglo beglkwa yagl di tedre, Nono ede nigl nubun koglo ibo omno dugwa. 36Ye baglkugl kuglo mogl, ka yegl dugwa pre ye duglo beglkwa yagl yoba mere kide meglmara i kide kodidre, Jisas auro i ede koglo ibo enamnedi baglkugl wagle eigwa. Te, yoba tau baglkugl tau ama idre, pere eigwa. 37-38Ana ye ede nigle suna eigo, Jisas ye baglkugl mokomugl mogl, ede iko ta yei, ugl pai moglkwa. Ugl pai moglko, ir waga kudu podo ta ugo, nigl si pepigl di, u baglkugl wagle si kau sinagledi erukwa. Yegl eruko, ye duglo beglkwa yagl ye uglo yoko, yegl digwa, Neno Yagle, no goramga i, ene prikitno? di, yegl digwa. 39Yegl digo, Jisas adiglsre, ir waga kudu ikra ka tedre, nigl sugwa i di te, Kiede moglo! dugwa. Dugo, ir ugwa i dudugo, nigl ama kiede kaima moglkwa. 40Yegl eruko, Jisas ye duglo beglkwa yagl di pre, yegl dugwa, Siragl eruko, ene kudugl geglme? Ene na yobuglna pre mediglkrimo? dugwa. 41Jisas yegl dugo, ye duglo beglkwa yagl ye Jisas kuduglmo podo goglsre, yegl digwa, Aya, yagl irane? Ye ir ya nigl akie ka togo, pribriwe di, yegl digwa.
Currently Selected:
:
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission