Dɩtʋm 22
22
1Sɛ Pɔɔlʋ ju dʋɔ tawɩ sɛ, <<Ma juo aba na ma dɔŋa Yudatina, dɩtɩɛna n nyii ma wɩɛ ŋii maa tawɩ mʋ gara ma wʋsɛ na.>>
2Gʋ ba nyii gʋ wʋ tawɩ ba jaŋ Aramiki dɩtawɩ naŋ na, sɛ ba cha kuruŋ.
Dɩmaŋ sɛ Pɔɔlʋ tawɩ sɛ, 3<<Ma yɩɛ Yuda wʋkpa bɛ, sɛ ba lʋrʋ maŋ Taasusi gaa ga wɩɛ Kilikiya, ama ba bɩsɛ maŋ dɩɛ janɛ gana naŋ bɛ. Gamali n kalaa maŋ daa duluŋ mbara ŋii na dieli, sɛ ma mʋ jawʋ gaa ga nʋɔ wɩɛ doŋ kpaŋ Ɩsʋɔ takɩɛ ganaŋkʋ amɩɛ wʋkʋma kɩɛna jaŋ na. 4Ma nyala baa ba kpamɩna dɩmʋŋ Gbɩɛ gaa, hali ga tala ba sɩŋ sɛ ma chaŋ baala na ala ga tɔ danɛ, 5sɛ Ɩsʋɔ sei bɩnɩɛ naŋ bɩnɛ na dɩɛnaŋ bɩnɩɛ naŋ bɩnɩɛ dikpeŋ gaa kpiniŋ gba a dɩlɛ di ŋina dʋɔ seriya. Ba fa maŋ tanɩɛ sɛ ma n mʋ ju ga fa ba dɔŋa baa ba wɩɛ Damasiko dɩɛ naŋ, na maa ju dɩmaŋ ga chaŋ dɩmʋŋ bakpa bana takɩɛ danɛtʋɔra kɔŋ Yerusalem na baa fɔŋɩ ba dɩla.>>
Pɔɔlʋ tawɩ ganaŋkʋ wʋ lɩɛ Yesu di dʋɔ wɩɛ
Dɩtʋm 9:1-19; 26:12-18
6Sɛ Pɔɔlʋ ju dʋɔ tawɩ sɛ, <<Aja yɩɛ wiita keŋkeŋ gʋ ma dɔŋ gbɩɛ dʋɔ sɛ ma tirina Damasiko dɩɛ na, gabʋanaŋ sɛ ŋmaŋi lɩɩ Ɩsʋɔ adugbe gaa chɩrɩɛ logo maŋ. 7Sɛ ma lɩɩ sala tibi sɛ ma nyii lofu garɛ tawɩ maŋ sɛ Sɔɔlʋ! Sɔɔlʋ! Be n yɩɛ sɛ nyaa nyala maŋ?>>
8Sɛ ma tasɛ sɛ, <<Kpaŋjuo, nyaŋ n nyina Mmʋɔ?>>
Sɛ lofu gaa lɩsɛ ɩ nʋɔ sɛ, <<Maŋ n nyina Yesu Nasarati wʋkpa wʋŋ nyaa nyala ɩ na.>>
9Ma dɔŋa na ŋmaŋi gaa, ama ba n nyii lofu gaa gaa tawɩ gaa fa maŋ na wɩɛ ŋii tie e.
10Sɛ ma tasɛ sɛ, <<Kpaŋjuo, be sɛ maa yɩɛ?>>
Sɛ Kpaŋjuo wʋŋ tawɩ ɩ sɛ, <<Kʋlʋ na nyaa ju Damasiko dɩɛ naŋ. Dɩmaŋ sɛ baa tawɩ nyaŋ ŋii ma mʋ fa nyaŋ sɛ nya n yɩɛ na kpiniŋ.>>
11Sɛ ma dɔŋa chaŋ ma pam naŋ pala ma asanaŋ mʋ maŋ ju Damasiko, akala takɩɛ ŋmaŋi gaa ga ŋmaŋi na salɩɛ ma asa.
12Sɛ wʋ ti tawɩ sɛ, <<Baalɛ wʋrʋ wʋŋ baa yagɛ ɩ sɛ Ananiyasi, wʋ a se Ɩsʋɔ sɛ wʋ a kpaŋ Mosesi mbara ŋii dʋɔ, wʋŋ Yudatina baa ba chaɩ dɩmaŋ kpiniŋ a bu ɩ na kɔŋ gaa kɩɛ maŋ. 13Sɛ wʋ gaa sɩŋ ma jaŋ tawɩ maŋ sɛ ma dʋɔ lɩɛdɩrɛ Sɔɔlʋ, ti bɔrɛ na abʋrɩ.>> Sɛ gabʋanaŋ ma na ɩ.
14Sɛ wʋ ti tawɩ sɛ, <<Daa duluŋ Ɩsʋɔ n lɩsɛ nyaŋ sɛ nya n jiŋ wʋ jawʋ na nyaa na Wʋchirigisa Wʋŋ, na nyaa nyii wʋ nʋɔ naŋ wɩɛ. 15Nyaa di wʋ wʋsɛ dʋɔ seriya lɩɩna ŋii n nyii na ŋii nya na na fa bakpa kpiniŋ. 16Dɩtɩɛna be sɛ n dana? Kʋlʋ na baa sɔ nyaŋ, na wʋ a mʋ n dɩsʋbʋ chɩɛ nyaŋ, na nyaa yagɛ wʋ yɩrɛ.>>
Ɩsʋɔ yagɛ Pɔɔlʋ sɛ wʋ n ju ga tawɩ wʋ wɩɛ fa baa ba ba yɩɛ Yudatina
17Sɛ Pɔɔlʋ ju dʋɔ tawɩ sɛ, <<Gʋ ma bɔrɛ ju Yerusalem ma wɩɛ Ɩsʋɔ tʋm danɛ gaa naŋ maa jɔ dɩga na, ma yu Ɩsʋɔ lɩsɛ kalaa 18sɛ ma nyii gʋ Kpaŋjuo a tawɩ wʋ a fa maŋ sɛ yɩɛ bileŋ na nyaa lɩɩ Yerusalem gabʋanaŋ, akala takɩɛ ba aa lɩɛ n seriya gaa nyaa di lɩɩ ma dʋɔ na dʋ ʋ.>>
19Sɛ ma lɩsɛ nʋɔ sɛ, <<Kpaŋjuo, dɩmʋŋ bakpa bana jiŋ gʋ ma pala ba tʋm danɩŋ naŋ na maa tɔ ba danɛ, sɛ ma tugu baa ba lɩɛ nyaŋ di na. 20Gʋ ba kʋ Sitifiŋ amɩɛ seriyatɛ wʋŋ na, ma sɩŋ dɩmaŋ lɩɛ wʋ sɩŋ gaa dʋ, sɛ maa kɩɛ baa ba kʋ ɩ na gagbasɛ dʋɔ.>>
21Sɛ wʋ ti tawɩ sɛ, <<Dɩmaŋ sɛ Kpaŋjuo wʋŋ tawɩ maŋ sɛ, pala, maa kpiri nyaŋ gbɩɛ taŋasɛ ju baa ba ba yɩɛ Yudatina na jaŋ.>>
22Sɛ jama baa nyii Pɔɔlʋ wɩɛ ga tala gʋ wʋ tawɩ dɩmʋŋ wɩɛ ŋina. Dɩmaŋ sɛ ba kuusi na doŋ sɛ, <<N kʋ ɩ, wʋ n daga na wʋ a cha nkpa naŋ ŋ.>>
23Gʋ baa kuusi yela baa fulu ba gagbasɛ na, yela baa lɔ tɩɛra baa dʋ feliŋ naŋ, 24sɛ yuora bɩnɛ wʋŋ dʋ sɛ ba n mʋ Pɔɔlʋ jʋʋ yuora dɩchatɩŋ gaa naŋ. Sɛ wʋ tawɩ ba sɛ ba n taɩ ɩ achʋchʋɛ na baa tasɛ ɩ jiŋ kpɩnɩdɩ dʋɔ sɛ bakpa baa a kuusi baa baŋ ɩ dɩmʋŋ. 25Gʋ ba tɩɛŋɩ ɩ na baa taɩ ɩ achʋchʋɛ na, sɛ Pɔɔlʋ tawɩ yuora gafie bɩnɛ wʋŋ wʋ sɩmɩɛɩ dɩmaŋ na sɛ, <<Mbara ŋii fa amɩɛ gbɩɛ sɛ n taɩ Roma dɩɛsɛ-bu achʋchʋɛ yela ɩŋ fu ɩ dɩpʋɛ?>>
26Gʋ yuora gafie bɩnɛ wʋŋ nyii ŋina na, wʋ ju yuora baa bɩnɛ wʋŋ jaŋ ga tawɩ ɩ. Sɛ wʋ tasɛ ɩ sɛ, <<Be sɛ nyaa yɩɛ? Dɩmʋŋ baalɛ wina yɩɛ Roma dɩɛsɛ-bu bɛ.>>
27Sɛ yuora bɩnɛ wʋŋ ju Pɔɔlʋ jaŋ ga tasɛ ɩ sɛ, <<Tawɩ maŋ, nya yɩɛ Roma dɩɛsɛ-bu bɛ?>>
Sɛ wʋ lɩsɛ ɩ nʋɔ sɛ, <<Ɛɛŋ, ma yɩɛ.>>
28Dɩmaŋ sɛ yuora bɩnɛ wʋŋ tawɩ sɛ, <<Ma tɔ aterembie fɔɩ pɔɩ sɛ ma yɩɛ Roma dɩɛsɛ-bu.>>
Ama Pɔɔlʋ lɩsɛ nʋɔ sɛ, <<Maŋ bɩrɛ ba lʋrʋ maŋ Roma dɩɛsɛbu bɛ.>>
29Gabʋanaŋ sɛ baa nafʋɔ ba ja baa tasɛ ɩ wɩɛ na bɔrɛ ba wʋrʋgbɩɛ. Gʋ yuora bɩnɛ wʋŋ jiŋ gʋ Pɔɔlʋ yɩɛ Roma dɩɛsɛ-bu sɛ wʋ mʋ agbaraŋgbaraŋ pɔgʋ ɩ na, nyɩŋtɩɛ chaŋ ɩ.
Pɔɔlʋ sɩmɩɛɩ dɩɛnaŋ bɩnɩɛ naŋ bɩnɩɛ dikpeŋ gaa asanaŋ
30Gʋ tɩɛna na, yuora bɩnɛ wʋŋ a ja wʋ a jiŋ bʋrʋ ga dʋŋdʋlʋŋ gaa ga dʋɔ sɛ Yudatina baa cha baa pʋɩ Pɔɔlʋ, sɛ wʋ yela Pɔɔlʋ sɛ wʋ dʋ Ɩsʋɔ sei bɩnɩɛ baa na dɩɛnaŋ bɩnɩɛ naŋ bɩnɩɛ dikpeŋ gaa kpiniŋ gaa jaŋi. Dɩmaŋ sɛ wʋ mʋ Pɔɔlʋ kɔŋ gaa sɩŋ ba asanaŋ.
Currently Selected:
Dɩtʋm 22: CLL
Highlight
Share
Compare
Copy
Want to have your highlights saved across all your devices? Sign up or sign in
2025 Ghana Institute of Linguistics Literacy amp Bible Translation
Dɩtʋm 22
22
1Sɛ Pɔɔlʋ ju dʋɔ tawɩ sɛ, <<Ma juo aba na ma dɔŋa Yudatina, dɩtɩɛna n nyii ma wɩɛ ŋii maa tawɩ mʋ gara ma wʋsɛ na.>>
2Gʋ ba nyii gʋ wʋ tawɩ ba jaŋ Aramiki dɩtawɩ naŋ na, sɛ ba cha kuruŋ.
Dɩmaŋ sɛ Pɔɔlʋ tawɩ sɛ, 3<<Ma yɩɛ Yuda wʋkpa bɛ, sɛ ba lʋrʋ maŋ Taasusi gaa ga wɩɛ Kilikiya, ama ba bɩsɛ maŋ dɩɛ janɛ gana naŋ bɛ. Gamali n kalaa maŋ daa duluŋ mbara ŋii na dieli, sɛ ma mʋ jawʋ gaa ga nʋɔ wɩɛ doŋ kpaŋ Ɩsʋɔ takɩɛ ganaŋkʋ amɩɛ wʋkʋma kɩɛna jaŋ na. 4Ma nyala baa ba kpamɩna dɩmʋŋ Gbɩɛ gaa, hali ga tala ba sɩŋ sɛ ma chaŋ baala na ala ga tɔ danɛ, 5sɛ Ɩsʋɔ sei bɩnɩɛ naŋ bɩnɛ na dɩɛnaŋ bɩnɩɛ naŋ bɩnɩɛ dikpeŋ gaa kpiniŋ gba a dɩlɛ di ŋina dʋɔ seriya. Ba fa maŋ tanɩɛ sɛ ma n mʋ ju ga fa ba dɔŋa baa ba wɩɛ Damasiko dɩɛ naŋ, na maa ju dɩmaŋ ga chaŋ dɩmʋŋ bakpa bana takɩɛ danɛtʋɔra kɔŋ Yerusalem na baa fɔŋɩ ba dɩla.>>
Pɔɔlʋ tawɩ ganaŋkʋ wʋ lɩɛ Yesu di dʋɔ wɩɛ
Dɩtʋm 9:1-19; 26:12-18
6Sɛ Pɔɔlʋ ju dʋɔ tawɩ sɛ, <<Aja yɩɛ wiita keŋkeŋ gʋ ma dɔŋ gbɩɛ dʋɔ sɛ ma tirina Damasiko dɩɛ na, gabʋanaŋ sɛ ŋmaŋi lɩɩ Ɩsʋɔ adugbe gaa chɩrɩɛ logo maŋ. 7Sɛ ma lɩɩ sala tibi sɛ ma nyii lofu garɛ tawɩ maŋ sɛ Sɔɔlʋ! Sɔɔlʋ! Be n yɩɛ sɛ nyaa nyala maŋ?>>
8Sɛ ma tasɛ sɛ, <<Kpaŋjuo, nyaŋ n nyina Mmʋɔ?>>
Sɛ lofu gaa lɩsɛ ɩ nʋɔ sɛ, <<Maŋ n nyina Yesu Nasarati wʋkpa wʋŋ nyaa nyala ɩ na.>>
9Ma dɔŋa na ŋmaŋi gaa, ama ba n nyii lofu gaa gaa tawɩ gaa fa maŋ na wɩɛ ŋii tie e.
10Sɛ ma tasɛ sɛ, <<Kpaŋjuo, be sɛ maa yɩɛ?>>
Sɛ Kpaŋjuo wʋŋ tawɩ ɩ sɛ, <<Kʋlʋ na nyaa ju Damasiko dɩɛ naŋ. Dɩmaŋ sɛ baa tawɩ nyaŋ ŋii ma mʋ fa nyaŋ sɛ nya n yɩɛ na kpiniŋ.>>
11Sɛ ma dɔŋa chaŋ ma pam naŋ pala ma asanaŋ mʋ maŋ ju Damasiko, akala takɩɛ ŋmaŋi gaa ga ŋmaŋi na salɩɛ ma asa.
12Sɛ wʋ ti tawɩ sɛ, <<Baalɛ wʋrʋ wʋŋ baa yagɛ ɩ sɛ Ananiyasi, wʋ a se Ɩsʋɔ sɛ wʋ a kpaŋ Mosesi mbara ŋii dʋɔ, wʋŋ Yudatina baa ba chaɩ dɩmaŋ kpiniŋ a bu ɩ na kɔŋ gaa kɩɛ maŋ. 13Sɛ wʋ gaa sɩŋ ma jaŋ tawɩ maŋ sɛ ma dʋɔ lɩɛdɩrɛ Sɔɔlʋ, ti bɔrɛ na abʋrɩ.>> Sɛ gabʋanaŋ ma na ɩ.
14Sɛ wʋ ti tawɩ sɛ, <<Daa duluŋ Ɩsʋɔ n lɩsɛ nyaŋ sɛ nya n jiŋ wʋ jawʋ na nyaa na Wʋchirigisa Wʋŋ, na nyaa nyii wʋ nʋɔ naŋ wɩɛ. 15Nyaa di wʋ wʋsɛ dʋɔ seriya lɩɩna ŋii n nyii na ŋii nya na na fa bakpa kpiniŋ. 16Dɩtɩɛna be sɛ n dana? Kʋlʋ na baa sɔ nyaŋ, na wʋ a mʋ n dɩsʋbʋ chɩɛ nyaŋ, na nyaa yagɛ wʋ yɩrɛ.>>
Ɩsʋɔ yagɛ Pɔɔlʋ sɛ wʋ n ju ga tawɩ wʋ wɩɛ fa baa ba ba yɩɛ Yudatina
17Sɛ Pɔɔlʋ ju dʋɔ tawɩ sɛ, <<Gʋ ma bɔrɛ ju Yerusalem ma wɩɛ Ɩsʋɔ tʋm danɛ gaa naŋ maa jɔ dɩga na, ma yu Ɩsʋɔ lɩsɛ kalaa 18sɛ ma nyii gʋ Kpaŋjuo a tawɩ wʋ a fa maŋ sɛ yɩɛ bileŋ na nyaa lɩɩ Yerusalem gabʋanaŋ, akala takɩɛ ba aa lɩɛ n seriya gaa nyaa di lɩɩ ma dʋɔ na dʋ ʋ.>>
19Sɛ ma lɩsɛ nʋɔ sɛ, <<Kpaŋjuo, dɩmʋŋ bakpa bana jiŋ gʋ ma pala ba tʋm danɩŋ naŋ na maa tɔ ba danɛ, sɛ ma tugu baa ba lɩɛ nyaŋ di na. 20Gʋ ba kʋ Sitifiŋ amɩɛ seriyatɛ wʋŋ na, ma sɩŋ dɩmaŋ lɩɛ wʋ sɩŋ gaa dʋ, sɛ maa kɩɛ baa ba kʋ ɩ na gagbasɛ dʋɔ.>>
21Sɛ wʋ ti tawɩ sɛ, <<Dɩmaŋ sɛ Kpaŋjuo wʋŋ tawɩ maŋ sɛ, pala, maa kpiri nyaŋ gbɩɛ taŋasɛ ju baa ba ba yɩɛ Yudatina na jaŋ.>>
22Sɛ jama baa nyii Pɔɔlʋ wɩɛ ga tala gʋ wʋ tawɩ dɩmʋŋ wɩɛ ŋina. Dɩmaŋ sɛ ba kuusi na doŋ sɛ, <<N kʋ ɩ, wʋ n daga na wʋ a cha nkpa naŋ ŋ.>>
23Gʋ baa kuusi yela baa fulu ba gagbasɛ na, yela baa lɔ tɩɛra baa dʋ feliŋ naŋ, 24sɛ yuora bɩnɛ wʋŋ dʋ sɛ ba n mʋ Pɔɔlʋ jʋʋ yuora dɩchatɩŋ gaa naŋ. Sɛ wʋ tawɩ ba sɛ ba n taɩ ɩ achʋchʋɛ na baa tasɛ ɩ jiŋ kpɩnɩdɩ dʋɔ sɛ bakpa baa a kuusi baa baŋ ɩ dɩmʋŋ. 25Gʋ ba tɩɛŋɩ ɩ na baa taɩ ɩ achʋchʋɛ na, sɛ Pɔɔlʋ tawɩ yuora gafie bɩnɛ wʋŋ wʋ sɩmɩɛɩ dɩmaŋ na sɛ, <<Mbara ŋii fa amɩɛ gbɩɛ sɛ n taɩ Roma dɩɛsɛ-bu achʋchʋɛ yela ɩŋ fu ɩ dɩpʋɛ?>>
26Gʋ yuora gafie bɩnɛ wʋŋ nyii ŋina na, wʋ ju yuora baa bɩnɛ wʋŋ jaŋ ga tawɩ ɩ. Sɛ wʋ tasɛ ɩ sɛ, <<Be sɛ nyaa yɩɛ? Dɩmʋŋ baalɛ wina yɩɛ Roma dɩɛsɛ-bu bɛ.>>
27Sɛ yuora bɩnɛ wʋŋ ju Pɔɔlʋ jaŋ ga tasɛ ɩ sɛ, <<Tawɩ maŋ, nya yɩɛ Roma dɩɛsɛ-bu bɛ?>>
Sɛ wʋ lɩsɛ ɩ nʋɔ sɛ, <<Ɛɛŋ, ma yɩɛ.>>
28Dɩmaŋ sɛ yuora bɩnɛ wʋŋ tawɩ sɛ, <<Ma tɔ aterembie fɔɩ pɔɩ sɛ ma yɩɛ Roma dɩɛsɛ-bu.>>
Ama Pɔɔlʋ lɩsɛ nʋɔ sɛ, <<Maŋ bɩrɛ ba lʋrʋ maŋ Roma dɩɛsɛbu bɛ.>>
29Gabʋanaŋ sɛ baa nafʋɔ ba ja baa tasɛ ɩ wɩɛ na bɔrɛ ba wʋrʋgbɩɛ. Gʋ yuora bɩnɛ wʋŋ jiŋ gʋ Pɔɔlʋ yɩɛ Roma dɩɛsɛ-bu sɛ wʋ mʋ agbaraŋgbaraŋ pɔgʋ ɩ na, nyɩŋtɩɛ chaŋ ɩ.
Pɔɔlʋ sɩmɩɛɩ dɩɛnaŋ bɩnɩɛ naŋ bɩnɩɛ dikpeŋ gaa asanaŋ
30Gʋ tɩɛna na, yuora bɩnɛ wʋŋ a ja wʋ a jiŋ bʋrʋ ga dʋŋdʋlʋŋ gaa ga dʋɔ sɛ Yudatina baa cha baa pʋɩ Pɔɔlʋ, sɛ wʋ yela Pɔɔlʋ sɛ wʋ dʋ Ɩsʋɔ sei bɩnɩɛ baa na dɩɛnaŋ bɩnɩɛ naŋ bɩnɩɛ dikpeŋ gaa kpiniŋ gaa jaŋi. Dɩmaŋ sɛ wʋ mʋ Pɔɔlʋ kɔŋ gaa sɩŋ ba asanaŋ.
Currently Selected:
:
Highlight
Share
Compare
Copy
Want to have your highlights saved across all your devices? Sign up or sign in
2025 Ghana Institute of Linguistics Literacy amp Bible Translation