Maakɩ 6
6
Nasaratitina pɩɛ Yesu
Matiyo 13:54-58
1Yesu lɩɩ dɩmaŋ bɔrɛ ju wʋ dɩɛnaŋ Nasarati sɛ wʋ kpalɛnara baa kpaŋ ɩ. 2Gʋ Fɩɛsɛ wɩɩ talɛ na, wʋ ju Yudatina tʋm danɛ gaa naŋ sɛ wʋ fara wʋ a kalaa Ɩsʋɔ wɩɛ. Sɛ wʋ wɩɛ ŋii yɩɛ bakpa fɔɩ baa ba nyii na doba. Sɛ ba tasɛ sɛ, <<Le sɛ wʋkpa wina yu wɩɛ ŋina?>> Sɛ ba ju dʋɔ tasɛ sɛ, <<Le sɛ wʋ yu kpiŋjim hali wʋ a dɩlɛ wʋ a yɩɛ adaŋgana ŋina? 3Naa kapinta wʋŋ mɩnaŋ? Naa Mariya bu wʋŋ bɛ, wʋŋ wʋ nabie yɩɛ Jamesi, Yosefu, Yudasi na Simoŋ? Naa wʋ diesina n wɩɛna daa jaŋ nna?>> Dɩmʋŋ dʋɔ ba pɩɛ ɩ.
4Sɛ Yesu tawɩ ba sɛ, <<Bakpa a mʋ jilima baa fa Ɩsʋɔ ɔja gapɩlɛkʋma, amʋɔ wʋ dɩɛ naŋ na wʋ dɩɛnaŋtina na wʋ waa dʋɔtina nyiŋeŋ jaŋ sɛ wʋ tana jilima a.>> 5Dɩmʋŋ dʋɔ, wʋ n dɩlɛ yɩɛ adaŋgana fɔɩ dɩmaŋ ŋ, amʋɔ bakpa pii barɛ sɛ wʋ mʋ wʋ pam jaga ba dʋɔ sɛ ba yu lʋm chʋɔ. 6Sɛ dɩ yɩɛ Yesu doba, akala takɩɛ bakpa baa tana lɩɛdi. Sɛ Yesu pala akpie-akpie dʋɔ kalaa Ɩsʋɔ wɩɛ.
Yesu kpiri wʋ kpalɛnara gifi bala baa
Matiyo 10:5-15; Luka 9:1-6
7Sɛ Yesu yagɛ wʋ kpalɛnara gifi bala baa kɔŋ wʋ jaŋ, sɛ wʋ kpiri ba bala-bala sɛ wʋ fa ba yikuo feliŋ sʋbʋ dʋɔ.
8Sɛ wʋ tawɩ ba sɛ, <<Ɩ ju gbɩɛ gaa na, n baa mʋ bʋrʋ amʋɔ dasɛ atugasa. N baa mʋ adiya, didiku yaa aterembie dʋ aterembie takpe naŋ. 9N dʋ asibita, ama n baa mʋ gagbasɛ chaŋ kpi.>> 10Sɛ Yesu tawɩ ba sɛ, <<Waa kʋma gaa ɩ jʋʋ ga dʋɔ na, n cha dɩmaŋ ga tala saŋa gaa ɩ lɩɩ dɩɛ gana naŋ. 11Gapɩlɛkʋma gaa ɩ ju sɛ ba n lɩɛ amɩɛ yaa ba n nyii amɩɛ wɩɛ na, ɩ lɩɩ dɩmaŋ na, n kpisi amɩɛ nafara tie dibuu wʋrʋgɩ dɩmaŋ, na ŋii di seriya chicha ba takɩɛ ba dɩsʋbʋ dʋɔ ba dʋɔ.>>
12Dɩmʋŋ dʋɔ, ba ju ga tawɩ Ɩsʋɔ wɩɛ fa bakpa sɛ ba n biliŋi lɩɩ ba dɩsʋbʋ naŋ. 13Sɛ ba geŋ feliŋ asʋbʋɛ lɩɩ bakpa tɩba sɛ ba susaa lʋmɩɛtina galaga nuŋ sɛ ba chɔ bakpa.
Yohane Ɩsʋɔ Sɔrɛ wʋŋ sɩŋ wɩɛ
Matiyo 14:1-12; Luka 9:7-9
14Juo Hɛrɔdɩ nyii Yesu wʋsɛ dʋɔ wɩɛ, akala takɩɛ wʋ yɩrɛ nyii gapɩlɛkʋma. Sɛ barɛ tawɩ sɛ, <<Yohane Ɩsʋɔ Sɔrɛ wʋŋ n feŋ lɩɩ sɩŋ naŋ, dɩmʋŋ dʋɔ sɛ wʋ wɩɛna yikuo wʋ a yɩɛ adaŋgana ŋina.>>
15Barɛ dʋɔ a tawɩ sɛ, <<Wʋ yɩɛ Ɩsʋɔ ɔja Eliya bɛ.>> Sɛ barɛ dʋɔ a tawɩ sɛ, <<Wʋ yɩɛ Ɩsʋɔ bajana gɩbɩnɩŋtina baa tɩba wʋrʋ bɛ.>>
16Gʋ Juo Hɛrɔdɩ nyii Yesu wɩɛ ŋii ba tawɩ na, wʋ tawɩ sɛ, <<Wʋ yɩɛ Yohane Ɩsʋɔ Sɔrɛ wʋŋ ma cha yela sɛ ba kara wʋ nyi na bɛ sɛ wʋ feŋ lɩɩ sɩŋ naŋ.>>
17Hɛrɔdɩ tawɩ dɩmʋŋ akala takɩɛ wʋŋ n cha yela sɛ ba chaŋ Yohane Ɩsʋɔ Sɔrɛ wʋŋ, sɛ ba mʋ dɩgbaraŋgbaraŋ pɔgʋ ɩ sɛ ba mʋ ɩ tɔ danɛ, akala takɩɛ Yohane n kpa sɛ wʋ n lɩɛ wʋ nabu Filipo alʋ Hɛrɔdɩya saa a. 18Yohane Ɩsʋɔ Sɔrɛ wʋŋ cha tawɩ Hɛrɔdɩ sɛ, <<Mosesi mbara n fa gbɩɛ sɛ nyaŋ Hɛrɔdɩ n saa nnabu alʋ ʋ.>> 19Dɩmʋŋ dʋɔ sɛ Hɛrɔdɩya akɔla Yohane wʋ a ja wʋ a kʋ ɩ. Ama wʋ n dɩlɛ ɛ. 20Akala takɩɛ Juo Hɛrɔdɩ a fa Yohane jilima sɛ wʋ jiŋ gʋ wʋ yɩɛ wʋkpa wʋchirigisa na dɩchɩrɩchɩrɩ, dɩmʋŋ dʋɔ wʋ a gie ɩ. Wʋ aja Yohane wɩɛ nyii bɩrɛ, ama saŋa kʋma ga wʋ nyii na, wʋ digela a warɩɛwʋ.
21Gʋ Juo Hɛrɔdɩ lʋrʋ wɩɩ asadi talɛ na, wʋ yagɛ dɩɛ bɩnɩɛ, yuora bɩnɩɛ na Galaliya bɩnɩɛ sɛ ba n gaa di asadi adiya di. Dɩmaŋ sɛ gbɩɛ duo fa wʋ alʋ Hɛrɔdɩya takɩɛ wʋŋ yu gbɩɛ kʋ Yohane. 22Dɩmaŋ sɛ Hɛrɔdɩya bu galibie sʋɛ sɛ Juo Hɛrɔdɩ na baa wʋ lɔ pam yagɛ ba na asadi wʋ dʋɔ. Dɩmʋŋ dʋɔ, wʋ tawɩ galibie wʋŋ sɛ, <<Tasɛ bʋrʋkʋma gaa nyaa jawʋ na maa yɩɛ fa nyaŋ.>> 23Sɛ wʋ ka ntaŋ sɛ, <<Bʋrʋkʋma gaa nyaa jawʋ na, hali ma juori gaa salɛ gba, maa mʋ fa nyaŋ.>>
24Sɛ galibie wʋŋ ju ga tasɛ wʋnaa sɛ, <<Be sɛ maŋ tasɛ?>>
Sɛ wʋnaa tawɩ ɩ sɛ, <<Tawɩ ɩ sɛ nyaa ja Yohane Ɩsʋɔ Sɔrɛ wʋŋ nyi.>>
25Sɛ galibie wʋŋ yɩɛ bileŋ ju ga tawɩ Juo Hɛrɔdɩ sɛ, <<Maa ja Yohane Ɩsʋɔ Sɔrɛ wʋŋ nyi taŋgiraŋ dʋɔ dɩtɩɛna gana.>>
26Juo Hɛrɔdɩ asa n lɩɛ ɛ, ama ntaŋ ŋii wʋ ka na baa wʋ lɔ pam yagɛ ba na dʋɔ, wʋ n dɩlɛ pɩɛsɛ ɩ ɩ. 27Dɩmaŋ sɛ wʋ kpiri wʋ yuoyuori wʋrʋ sɛ wʋŋ ju danɛ dɩtʋɔtɩŋ ga kara Yohane nyi kɔŋ. 28Sɛ wʋ ju ga kara Yohane nyi mʋ jaga taŋgiraŋ dʋɔ mʋ kɔna galibie wʋŋ. Sɛ galibie wʋŋ mʋ ju ga fa wʋnaa. 29Gʋ Yohane kpalɛnara baa nyii wʋ sɩŋ na, ba kɔŋ gaa mʋ wʋ gɩtatɛ ga wuu.
Yesu disi bakpa kɔrʋɔsɛ sɩ nʋŋ adiya
Matiyo 14:13-21; Luka 9:10-17
30Yesu kpirida baa wʋ kpiri ba na bɔrɛ kɔŋ wʋ jaŋ. Sɛ ba gaa tawɩ ɩ ŋii ba ga yɩɛ na ŋii ba ga kalaa na kpiniŋ. 31Bakpa fɔɩ baa baa jiŋ baa tibi Yesu dʋɔ na, dɩ yela sɛ Yesu na wʋ kpirida baa n dɩlɛ yu saŋa na baa di i. Sɛ Yesu tawɩ ba sɛ, <<N yela na dɩ ju ifuli dʋɔ ga fɩɛsɛ.>>
32Sɛ ba nyiŋeŋ jʋʋ buori naŋ ju ifuli dʋɔ. 33Ama gʋ baa ju na, bakpa fɔɩ na ba jiŋ ba. Sɛ bakpa baa se lɩɩ dɩɛsɛ naŋ kpiniŋ pala asanaŋ ga daa ba diele gaa baa ju na. 34Gʋ Yesu tibi buori naŋ sɛ wʋ na bakpa fɔɩ baa na, ba wɩɛ yɩɛ ɩ gɩyɔŋ. Akala takɩɛ ba kɩɛna bɛ takɩɛ feŋ baa ba tana kparɛ na. Dɩmaŋ sɛ wʋ kalaa-kalaa ba wɩɛ fɔɩ.
35Gʋ dɩ tala bʋyanɔ na, wʋ kpalɛnara baa kɔŋ wʋ jaŋ gaa tawɩ ɩ sɛ, <<Jɩna yɩɛ ifuli dʋɔ bɛ tɩɛ dʋɔ tam. 36Lɩsɛ bakpa baa gbɩɛ na baa ju dɩɛsɛ naŋ na dɩɛsɛ bisi ŋii ŋɩ tirina daa na ba tɩŋtɩŋ baa ju ga lɩɛ adiya di.>>
37Ama Yesu tawɩ ba sɛ, <<Amɩɛ tɩŋtɩŋ n fa ba adiya na baa di.>> Sɛ ba tasɛ ɩ sɛ, <<Le sɛ dɩ yu dɩtʋm yɩɛrɛ gafɩtasɛ jiŋinara kɩmtʋɔ aterembie ga lɩɛ adiya fa ba na baa di?>>
38Sɛ Yesu tasɛ ba sɛ, <<Bodobodo aŋmaŋ sɛ ɩ wɩɛna? N ju ga kɩɛ.>> Gʋ ba ju ga kɩɛ na, ba gaa tawɩ sɛ, <<Bodobodo anʋŋ na aji bala sɛ dɩ wɩɛna.>>
39Sɛ Yesu tawɩ wʋ kpalɛnara baa sɛ ba n yela na bakpa baa a cha kasɛ alayɩɛ ŋii dʋɔ akpeŋ-akpeŋ. 40Sɛ bakpa baa cha akpeŋ-akpeŋ gafɩsɩ dʋɔ na ŋɩla na sala dʋɔ. 41Sɛ Yesu mʋ bodobodo anʋŋ ŋii na aji bala baa, sɛ wʋ kɩɛ Ɩsʋɔ adugbe sɛ wʋ yɩlɩ Ɩsʋɔ. Sɛ wʋ jaɩ mʋ fa wʋ kpalɛnara baa sɛ ba n mʋ fa bakpa baa kpiniŋ. 42Sɛ wʋkʋma wina di sɛ wʋ pawʋ. 43Sɛ wʋ kpalɛnara baa tɔɔsɩ ŋii ba di kakaa na gachaŋasɛ gifi ala. 44Baala baa ba kpi bakpa baa ba di adiya ŋii dʋɔ na nʋɔ yɩɛ kɔrʋɔsɛ sɩ nʋŋ (5,000).
Yesu pala lɩŋ dʋɔ
Matiyo 14:22-33
45Dɩmaŋ sɛ Yesu yela sɛ wʋ kpalɛnara baa jʋʋ buori naŋ, sɛ ba pala wʋ asanaŋ ju Betisayida gaa ga wɩɛ gatɩɛsa. Sɛ wʋ dʋɔ wʋrʋgbɩɛ sɛ wʋ tii bakpa baa gbɩɛ. 46Gʋ wʋ tii ba gbɩɛ taŋ na, sɛ wʋ ju bʋrɔŋ dʋɔ ga jɔ dɩga.
47Gʋ bʋyanɔ talɛ na, dɩ kakaa Yesu nyiŋeŋ lɩɩ gaa nʋɔ, yela buori gaa tala lɩɩ gaa tɩtɩba. 48Sɛ Yesu na gʋ wʋ kpalɛnara baa wʋsɛ a chaŋ ba palaa ŋii naŋ, akala takɩɛ apaa ŋii a jaŋina ba. Aja yɩɛ tafɩlɛ karafɩɛ anara saŋa na Yesu pala lɩŋ ŋii dʋɔ wʋ a ju ba jaŋ wʋ a ja wʋ a laŋ ba dʋɔ. 49Ama gʋ ba na Yesu pala lɩŋ ŋii dʋɔ wʋ a kɔnɛ na, ba jiŋ sɛ gɩtatɩrɛ bɛ, sɛ ba kuusi. 50Akala takɩɛ ba kpiniŋ ba na ɩ na, nyɩŋtɩɛ chaŋ ba. Gabʋanaŋ sɛ Yesu tawɩ ba sɛ, <<N yu digela. Maŋ bɛ. N baa yɩɛ nyɩŋtɩɛ.>>
51Sɛ Yesu jʋʋ ba jaŋ buori gaa naŋ, sɛ feliŋ janɛ ŋii yeli. Sɛ dɩ yɩɛ ba doba, 52sɛ ba n nyii bodobodo ŋii Yesu fa bakpa kɔrʋɔsɛ sɩ nʋŋ (5,000) sɛ ba di na, tie ɩ. Akala takɩɛ ba agela wɩɛ doŋ.
Yesu chɔ lʋmɩɛtina Jenesareti tibi dʋɔ
Matiyo 14:34-36
53Sɛ Yesu na wʋ kpalɛnara baa tɩɛsɛ lɩɩ kɔŋ Jenesareti tibi dʋɔ sɛ ba mʋ ba buori gaa kpaŋ. 54Gʋ ba lɩɩ buori gaa naŋ na, gabʋanaŋ sɛ bakpa jiŋ Yesu. 55Dɩmʋŋ dʋɔ bakpa se lɩɩ tibi gaa dʋɔ kpiniŋ, sɩlɛ lʋmɩɛtina ba akalaŋ dʋɔ baa kɔŋ diele gaa ba nyii Yesu dʋɔ na. 56Gapɩlɛkʋma gaa Yesu aja ju na, dɩɛsɛ ajanɩɛ naŋ bɛ o yaa dɩɛsɛ bisi naŋ bɛ o, bakpa a mʋ ba lʋmɩɛtina baa kɔŋ gɩyɩɛ naŋ baa sʋlʋ ɩ sɛ wʋ n yela na baa mʋ ba pamɩɛ tapʋ wʋ adugbe gagba nʋɔ. Sɛ baa ba tapʋ ɩ na kpiniŋ yu lʋm chʋɔ.
Currently Selected:
Maakɩ 6: CLL
Highlight
Share
Compare
Copy
Want to have your highlights saved across all your devices? Sign up or sign in
2025 Ghana Institute of Linguistics Literacy amp Bible Translation
