Ɛseta 1
1
Be ketu alagyoo Waseti gbeli dɔɔ
1Kei yɛna kpene keŋ be kɔŋ debaŋ keŋ Ahasewerose ne di gyoori lee India tɛɛle dɔɔ kelii Itopiya tɛɛle dɔɔ nɛ. Ɔ dii gyoori akpiisebia sɔŋolooro na nyetooro (127) dɔɔ. 2Debaŋ kenaŋ na gyoo Ahasewerose gyoorogbeli kyaa donɔɔ dinaa keŋ bɛɛ baake ke Susa nɛ man. 3Ɔ gyoori kedi kulutooneŋ atoorote ŋon man nɛ, ɔ doo nɔɔkedi kesaa dinaa fa ɔ donɔɔ gyoorobia na ɔ kyaarabia pou. Yoonɔɔtena kegyiise baŋ bɔɔ lee Pesia na Media na gyoorobia mo kpuna balaŋ baŋ ba wose dana obuo na tɛɛlese kegyiise mɔ kɔŋawɔ botɔɔ.
4Be dii nɔɔkediwee kenaŋ weeya sɔŋonoŋ na sɔŋonaara (180). Te Ahasewerose lese ɔ gyooro abɔɔ na wa dedii ŋan pou ɔ dana nɛ na ɔ gyoorobiiri pou wola. 5Kei wɔle nɛ ɔ baake balaŋ baŋ pou be kyaa Susa donɔɔ man nɛ nyi be kaa di be nɔɔ. Ɔ baake wɔ lee balaŋ yakaa nyibaŋ dɔɔ kelii baŋ be dana ba wose nɛ dɔɔ, te ba ke kyaawɔ ɔ gyooro dekpaŋalaŋ man weeya nyetooro di be nɔɔ. 6Ba moo kanyaŋse kpookpoo desina dekpaŋalaŋ keŋ man. Ŋaale loŋ wolosɛɛ te ŋaale mɔ yɛɛ buluu. Ba moo akaralɛɛ na amɔlaloŋ ŋmeeseŋ wuluŋu te ba moo kɔba wolom kɔlase kyaŋ ŋa na pilase ŋan bɔɔ mo boya ŋan ŋe dana kyeo baŋ nɛ. Boya ŋan ŋe dana kyeo keŋ ŋaale loŋ yɛɛ kɔba yayam na kɔba wolom na bibiini nɛ te ba moowɔ desina gyooro dekpaŋalaŋ keŋ tɛɛle man, te ba moo kɔba yayam na kɔba wolom yɛɛ gbelɛɛ aneteeliŋ see botɔɔ. 7Ba moo soloŋ do kɔba yayam leenɔɔse man kpɛlɛɛ balaŋ baŋ. Leenɔɔse ŋan pou dinɔɔse yɛɛ kpookpoo. Gyoo soloŋ keŋ boe nideli te ɔ faa gbɛɛ nyi walaŋ kamasɛ waa nyɔɔ. 8Gyoo ŋon yakowɔ nyi walaŋ kamasɛ waa nyɔɔ ɔ kegyaebii, nawolo nyi ɔ te yako soloŋ kpalara baŋ nyi baa fa walaŋ kamasɛ mena keŋ ɔ ne gyae.
9Keŋte alagyoo Waseti mɔ doo kesaa fa ala baŋ mɔ gyoo Ahasewerose dekpaŋalaŋ keŋ man.
10Weeya nyetoorote keŋ gyoo Ahasewerose be nyɔɔ soloŋ baa keŋ ɔ ne dɛɛse nɛ, ɔ baake ɔ tewulɛɛ nyetooro, Mehumam na Biseta na Harebona na Bigeta na Abageta na Setare na Karekase baŋ bɔɔ lese wɔ saayɛ nɛ te ɔ yako wɔ nyi, 11baa gyu ke baake alagyoo Waseti kɔna e. Waa wuu ɔ gyooro kotɔtɔɔ na ɔ kaa lese ɔ kyeo wola balaŋ baŋ na gyoorobia baŋ nawolo nyi ɔ dana kyeo. 12Mɔna tewulɛɛ baŋ ka mo tiila keŋ gyina alagyoo Waseti ŋon nɛ ɔ bɛe ɔ te kɔŋ ya. Keŋte gyoo konɔɔ korowɔ te ɔ gyeŋa baŋ nideli.
13Na ke yɛɛ ba amanberɛ ke nyi nombii daale de kɔŋ keŋ bɛɛ gyae baa naa ke man anokoare na kaboena nyi gyoo waa naa ɔ kegyiise baŋ ba gyeŋ mmaraa wose man nɛ ke fa e nyeempɔ, mena dɔɔ ɔ baake kegyiise baŋ ba gyeŋ debaŋ kenaŋ man nombia, 14te ba benaana gyoo nɛ. Baŋ yɛna Karesena na Setare na Ademata na Taresisi na Merese na Maresena na Memukane. Baŋ yɛna gyoorobia nyetooro Pesia na Media keŋ be dana gbɛɛ baa gyu gyoo gyaŋ te be dana yele gyooridedii keŋ man. 15Botɔɔ te gyoo bɔɔse wɔ nyiaa, <Amanberɛ gbɛɛ na woŋ te kaboena nyi baa yɛɛ alagyoo Waseti? Ɔ te di mmaraa keŋ gyoo tewulɛɛ saayɛse baŋ ba ke yako e nɛ dɔɔ ya.>
16Keŋte Memukane tiranɔɔ gyoo na ɔ kyaarabia baŋ siaman nyiaa, <Alagyoo Waseti te yɛɛ nombiikum. Na gyoo waageŋ te ɔ yɛɛ nombiikum tia ya, mɔna ɔ te yɛɛ nombiikum tia gyoorobia pou na balaŋ baŋ pou be kyaa gyoo Ahasewerose tɛɛle dɔɔ nɛ. 17Nawolo nyi ala baŋ pou be kyaa tɛɛle kei dɔɔ nɛ baa nyii alagyoo ayɛŋ kei mena dɔɔ bɔɔ gyae baa mo be baala yɛɛ kolo bela ya. Baa yako nyiaa, <<Gyoo Ahasewerose kpilawɔ nyi baa mo ɔ wɛɛle kɔŋ na ɔ bɛe ɔ te kɔŋ ya.>> 18Lee gyɛŋ wee kei nɛ, kegyiise baŋ be kyaa Pesia na Media nɛ wɛɛla baŋ pou bɔɔ nyii alagyoo ayɛŋ kei nɛ baa yɛɛ gyoo kyaarabia pou mena. Bɔɔ gyae baa mo obuo fa daa ya te baa do daa baŋ debaŋ kamasɛ.
19Mena dɔɔ nyi akpaa gyoo de gyae na waa fa mmaraa na baa ŋmarase ke do Pesia na Media mmaraase man keŋ ŋolo be tale kyɛɛkee ke ya nyi, Waseti be dana gbɛɛ waa kɔŋ gyoo Ahasewerose siaman bela ya. Na gyoo ka mo ɔ gyoori keŋ fa walaŋ wɔle ŋon ɔ dei kela e. 20Nyi akpaa be yaasee gyoo mmaraa kei gyu ɔ tɛɛle dinaa kei dɔɔ nɛ, ala pou baa bu be baala keŋ be famenɛ nyi ɔ yɛɛ walaŋ yakaate e yaa ɔ yɛɛ gyooro bu e ya.
21Nombii kei yɛɛ gyoo Ahasewerose na ɔ kegyiise baŋ pou gyoŋ, mena dɔɔ gyoo yɛɛ keŋ Memukane be yako e nɛ. 22Mena dɔɔ ɔ ŋmarase tɔna yelee siamantena baŋ pou be kyaa ɔ gyoorideedii man nɛ. Ɔ ŋmarase tɔna ŋan yelee debiise pou baŋ gbagba be dei keŋ bee kolosi nɛ man nyi, baale kamasɛ yɛna ɔ dekpaŋalaŋ nyee keŋ ɔ wɛɛle na ɔ bia pou doe ɔ tɛɛ.
Currently Selected:
Ɛseta 1: NTR
Highlight
Copy
Compare
Share
Want to have your highlights saved across all your devices? Sign up or sign in
2026 Ghana Institute of Linguistics Literacy and Bible Translation
Ɛseta 1
1
Be ketu alagyoo Waseti gbeli dɔɔ
1Kei yɛna kpene keŋ be kɔŋ debaŋ keŋ Ahasewerose ne di gyoori lee India tɛɛle dɔɔ kelii Itopiya tɛɛle dɔɔ nɛ. Ɔ dii gyoori akpiisebia sɔŋolooro na nyetooro (127) dɔɔ. 2Debaŋ kenaŋ na gyoo Ahasewerose gyoorogbeli kyaa donɔɔ dinaa keŋ bɛɛ baake ke Susa nɛ man. 3Ɔ gyoori kedi kulutooneŋ atoorote ŋon man nɛ, ɔ doo nɔɔkedi kesaa dinaa fa ɔ donɔɔ gyoorobia na ɔ kyaarabia pou. Yoonɔɔtena kegyiise baŋ bɔɔ lee Pesia na Media na gyoorobia mo kpuna balaŋ baŋ ba wose dana obuo na tɛɛlese kegyiise mɔ kɔŋawɔ botɔɔ.
4Be dii nɔɔkediwee kenaŋ weeya sɔŋonoŋ na sɔŋonaara (180). Te Ahasewerose lese ɔ gyooro abɔɔ na wa dedii ŋan pou ɔ dana nɛ na ɔ gyoorobiiri pou wola. 5Kei wɔle nɛ ɔ baake balaŋ baŋ pou be kyaa Susa donɔɔ man nɛ nyi be kaa di be nɔɔ. Ɔ baake wɔ lee balaŋ yakaa nyibaŋ dɔɔ kelii baŋ be dana ba wose nɛ dɔɔ, te ba ke kyaawɔ ɔ gyooro dekpaŋalaŋ man weeya nyetooro di be nɔɔ. 6Ba moo kanyaŋse kpookpoo desina dekpaŋalaŋ keŋ man. Ŋaale loŋ wolosɛɛ te ŋaale mɔ yɛɛ buluu. Ba moo akaralɛɛ na amɔlaloŋ ŋmeeseŋ wuluŋu te ba moo kɔba wolom kɔlase kyaŋ ŋa na pilase ŋan bɔɔ mo boya ŋan ŋe dana kyeo baŋ nɛ. Boya ŋan ŋe dana kyeo keŋ ŋaale loŋ yɛɛ kɔba yayam na kɔba wolom na bibiini nɛ te ba moowɔ desina gyooro dekpaŋalaŋ keŋ tɛɛle man, te ba moo kɔba yayam na kɔba wolom yɛɛ gbelɛɛ aneteeliŋ see botɔɔ. 7Ba moo soloŋ do kɔba yayam leenɔɔse man kpɛlɛɛ balaŋ baŋ. Leenɔɔse ŋan pou dinɔɔse yɛɛ kpookpoo. Gyoo soloŋ keŋ boe nideli te ɔ faa gbɛɛ nyi walaŋ kamasɛ waa nyɔɔ. 8Gyoo ŋon yakowɔ nyi walaŋ kamasɛ waa nyɔɔ ɔ kegyaebii, nawolo nyi ɔ te yako soloŋ kpalara baŋ nyi baa fa walaŋ kamasɛ mena keŋ ɔ ne gyae.
9Keŋte alagyoo Waseti mɔ doo kesaa fa ala baŋ mɔ gyoo Ahasewerose dekpaŋalaŋ keŋ man.
10Weeya nyetoorote keŋ gyoo Ahasewerose be nyɔɔ soloŋ baa keŋ ɔ ne dɛɛse nɛ, ɔ baake ɔ tewulɛɛ nyetooro, Mehumam na Biseta na Harebona na Bigeta na Abageta na Setare na Karekase baŋ bɔɔ lese wɔ saayɛ nɛ te ɔ yako wɔ nyi, 11baa gyu ke baake alagyoo Waseti kɔna e. Waa wuu ɔ gyooro kotɔtɔɔ na ɔ kaa lese ɔ kyeo wola balaŋ baŋ na gyoorobia baŋ nawolo nyi ɔ dana kyeo. 12Mɔna tewulɛɛ baŋ ka mo tiila keŋ gyina alagyoo Waseti ŋon nɛ ɔ bɛe ɔ te kɔŋ ya. Keŋte gyoo konɔɔ korowɔ te ɔ gyeŋa baŋ nideli.
13Na ke yɛɛ ba amanberɛ ke nyi nombii daale de kɔŋ keŋ bɛɛ gyae baa naa ke man anokoare na kaboena nyi gyoo waa naa ɔ kegyiise baŋ ba gyeŋ mmaraa wose man nɛ ke fa e nyeempɔ, mena dɔɔ ɔ baake kegyiise baŋ ba gyeŋ debaŋ kenaŋ man nombia, 14te ba benaana gyoo nɛ. Baŋ yɛna Karesena na Setare na Ademata na Taresisi na Merese na Maresena na Memukane. Baŋ yɛna gyoorobia nyetooro Pesia na Media keŋ be dana gbɛɛ baa gyu gyoo gyaŋ te be dana yele gyooridedii keŋ man. 15Botɔɔ te gyoo bɔɔse wɔ nyiaa, <Amanberɛ gbɛɛ na woŋ te kaboena nyi baa yɛɛ alagyoo Waseti? Ɔ te di mmaraa keŋ gyoo tewulɛɛ saayɛse baŋ ba ke yako e nɛ dɔɔ ya.>
16Keŋte Memukane tiranɔɔ gyoo na ɔ kyaarabia baŋ siaman nyiaa, <Alagyoo Waseti te yɛɛ nombiikum. Na gyoo waageŋ te ɔ yɛɛ nombiikum tia ya, mɔna ɔ te yɛɛ nombiikum tia gyoorobia pou na balaŋ baŋ pou be kyaa gyoo Ahasewerose tɛɛle dɔɔ nɛ. 17Nawolo nyi ala baŋ pou be kyaa tɛɛle kei dɔɔ nɛ baa nyii alagyoo ayɛŋ kei mena dɔɔ bɔɔ gyae baa mo be baala yɛɛ kolo bela ya. Baa yako nyiaa, <<Gyoo Ahasewerose kpilawɔ nyi baa mo ɔ wɛɛle kɔŋ na ɔ bɛe ɔ te kɔŋ ya.>> 18Lee gyɛŋ wee kei nɛ, kegyiise baŋ be kyaa Pesia na Media nɛ wɛɛla baŋ pou bɔɔ nyii alagyoo ayɛŋ kei nɛ baa yɛɛ gyoo kyaarabia pou mena. Bɔɔ gyae baa mo obuo fa daa ya te baa do daa baŋ debaŋ kamasɛ.
19Mena dɔɔ nyi akpaa gyoo de gyae na waa fa mmaraa na baa ŋmarase ke do Pesia na Media mmaraase man keŋ ŋolo be tale kyɛɛkee ke ya nyi, Waseti be dana gbɛɛ waa kɔŋ gyoo Ahasewerose siaman bela ya. Na gyoo ka mo ɔ gyoori keŋ fa walaŋ wɔle ŋon ɔ dei kela e. 20Nyi akpaa be yaasee gyoo mmaraa kei gyu ɔ tɛɛle dinaa kei dɔɔ nɛ, ala pou baa bu be baala keŋ be famenɛ nyi ɔ yɛɛ walaŋ yakaate e yaa ɔ yɛɛ gyooro bu e ya.
21Nombii kei yɛɛ gyoo Ahasewerose na ɔ kegyiise baŋ pou gyoŋ, mena dɔɔ gyoo yɛɛ keŋ Memukane be yako e nɛ. 22Mena dɔɔ ɔ ŋmarase tɔna yelee siamantena baŋ pou be kyaa ɔ gyoorideedii man nɛ. Ɔ ŋmarase tɔna ŋan yelee debiise pou baŋ gbagba be dei keŋ bee kolosi nɛ man nyi, baale kamasɛ yɛna ɔ dekpaŋalaŋ nyee keŋ ɔ wɛɛle na ɔ bia pou doe ɔ tɛɛ.
2026 Ghana Institute of Linguistics Literacy and Bible Translation