Lukas 19

Jesus naSakeus

1 Jesus we ya moJeriko, ha yatakana mo. 2Mwa li omulumentu nguu tiwa oSakeus. Wa li omunene wovathendelethi, ye wa li omuhona. 3Sakeus wa kala aa hala okumona Jesus, ye e mu iwe okutya aan̯i, atjaa mena lyowingi wovantu ke tjiivilwe oku mu mona, mena lyokutya wa li omuthupi momuthika. 4Ye wa ka dhamukila komeho yawo, ha londo komukuyu, opo e tjiiwe oku mu mona, mena lyokutya Jesus wa li ame ya okupita mpoka. 5Jesus hiee ya mpoka, wa vandamena komukuyu, he mu heele ha tyaa: “Sakeus, heluka dhiva, mena lyokutya me tha oku ka yuhala monganda yoye ndino hendi.”

6Ye wa heluka dhivadhiva, ha yakula Jesus nehuluko. 7Iya ovantu avehe mboka hive tji mono, va n̯umutula hava tyaa: “Wa ka yuhala koyomulumentu omulundhi.”

8Iya Sakeus wa kulama, ha heele Muhona ha tyaa: “Muhona, emona lyandje me li yandja pokati, limo me li yandja kovathona. Andaa ndji na ngoka ngumba kengelela ovipuka vye, me mu tjun̯ine tune.”

9Jesus we mu heela ha tyaa: “Iya ndino hendi onganda hendji ya mono ehupitho, mena lyokutya naove wo umunwaAbraham. 10Iya Omuna wOmuntu we ya okutaendha nokuhupitha mbava keka.”#Mat. 18:11

Odhombongo dhotjingoldo omulongo

(Mat. 25:14-30)

11Iya wo hiva li amava teelele ovipuka hembi, wa wedha ko uke eeli limo. Iya mena lyokutya wa li popedhi naJerusalem, ovantu va soka okutya otjilongo tjaKalunga matji ya dhiva.#Mat. 25:14-30 12Jesus we ve heela ha tyaa: “Pa li omulumentu umo omuhona ngwaa ile kotjilongo tjokokule, a ka vyaalekwe ouhamba, ye a tjune. 13Wa ithana ovapika ve omulongo, he ve pa odhombongo dhotjingoldo#19:13 odhombongo dhotjingoldo: Ombongo yotjingoldo ndjii lithike podhondenari omayovi epandu. Ondenari imo i thutwa omuundapi metango limo. omulongo, ha tyaa: ‘Dhi ndingosen̯i katee me tjuna.’ 14Iya ovantu womotjilongo tje va kala ave mu yele, have mu landulitha odhontumwa, hava tyaa: ‘Omulumentu ngoka kaatu mu hala, e tu tumine.’

15“Omuhona hiaa vyaalekwa ouhamba wa tjuna, ha ithana ovapika mbaa pele odhombongo, opo a tyee soka hiva nganyana mondingoso. 16Owolutenga we ya ha tyaa: ‘Taa, ombongo yoye ya nganyana odhombongo omulongo.’ 17Omuhona we mu heela ha tyaa: ‘Iiya, oove omupika omuwa, mena lyokutya wa takametha movipuka ovinunu mo pewa okutumina ovitungwalongo omulongo.’ 18Omutyavali we ya, ha tyaa: ‘Taa, ombongo yoye ya nganyana odhombongo ntano.’ 19Iya nahengu wo omuhona we mu yaka ha tyaa: ‘Naove wo mo pewa okutumina ovitungwalongo vitano.’

20“Nomukwawo we ya uke ha tyaa: ‘Taa, ombongo yoye hooyondji, mbe i kutila pokandjenga. 21Ame mbe ku tila, mena lyokutya ove umulumentu wotjipo. U itha po hího ungulile, u teya hího kunine.’ 22Omuhona we mu yaka ha tyaa: ‘Me ku koyo nodhondaka ndhaa dhi motjinyo tjoye, mupika ove omuvi! U ndji i okutya aame omulumentu wotjipo, ngundji itha po soka híhe ungulile, nokuteya soka híhe kunine. 23Iya omena lyatji hího yandjele ombongo yandje kovandingosi, hime tjuna ndji i vadhe aya nganyana?’

24“Iya omuhona wa heela mboka mbava li ava kulama ha tyaa: ‘Mu nyeken̯i ombongo ye, mu i pe ngoka nguu na omulongo.’ 25Wo hava tyaa: ‘Taa, hengu u na ae odhombongo omulongo.’

26“Omuhona wa twikila ko uke ha tyaa: ‘Ame me mu heele okutya omuntu auhe nguu na tja, ma pewa otjingi unene, iya nguhe na tja, nahiee na tjo, me tji nyekwa.#Mat. 13:12; Mark. 4:25; Luk. 8:18 27Iya odhondjedhi dhandje hemba mbahamava hala ndji ve tumine, ve eten̯i huno mu ve dhipaele hempa momeho andje.’ ”

Jesus me thiki koJerusalem

(Mat. 21:1-11; Mark. 11:1-11; Joh. 12:12-19)

28 Jesus hiaa mana okupopya ovipuka hembi, wa ya nondjila ye ndjaa vyuuka koJerusalem. 29Hiee ya popedhi poBetfage naBetania pondundu ndjii tiwa oyOmiholivi, wa tuma ovalongwa ve vavali, 30ha tyaa: “Enden̯i kokalongo hake li komeho, amwe ya mo, mamu ka mona ombulona ndjaa kutwa, ndjihaiya kavilwa komuntu nokanunu, i kutululen̯i, n̯e mu i ete huno. 31Iya andaa pe na ngume mu pula ha tyaa: ‘Mamu i kutululile tji?’ Tyen̯ii: ‘Muhona me i hepa.’ ”

32Ovalongwa mbava tumwa va ya, have tji mono ngahi va heelwa. 33Iya tainkolo va li amava kutulula ombulona, ovene vayo ve ve pula hava tyaa: “Ombulona mamu i kutululile tji?”

34Iya ve ve yaka hava tyaa: “Muhona me i hepa.” 35Ve i eta kuJesus, hava twaa ko omidhalo vyawo komongo wombulona, Jesus hako ve mu kavilitha. 36Jesus hiaa kavile, ovantu va yala omidhalo vyawo mondjila.

37Iya hiaa thiki popedhi naJerusalem, mpoka ondjila mpai heluka okudha kOndundu yomiholivi, engundwa alihe lyovalongwa lya uta okutanga Kalunga nehuluko, hava wololoka peulu mena lyovilingankono avihe mbiva mona, 38hava tyaa: “Ohamba ngume ya mena lyaMuhona nga tumbalekwe, ouwa ngau kale meulu, netumbalo kombandambanda.”#Eps. 118:26

39 Ovafarisai vamo womowingi wovantu va heela Jesus hava tyaa: “Mulongethi, tjaela ovalongwa woye.”

40Ye wa yaka ha tyaa: “Me mu heele okutya hemba andaa mava nyimi, omawe maa wololoka.”

Jesus ma lili Jerusalem

41 Jesus we ya popedhi notjitungwalongo, hiee tji mono, we tji lila, 42ha tyaa: “Ove ngaile wa tangan̯eka ovipuka mbimavi thevelwa ouwa woye! Iya atjaa napano ove we vi holekwa. 43Iya omatango mae ke ku vadha, katango odhondjedhi dhoye madhi ke ku vandela, hadhi ku twaa molunkombo, hadhi ku n̯in̯ikidha kodhontyo adhihe. 44Mo ka kombwa po, ove nodhondele dhoye. Odhondjedhi dhoye kaadhi ka thiaa po nokanunu ewe limo ndyaa tendekwa kekwawo, mena lyokutya ove ku tangan̯ekele otembu yokutaendhwa kwoye kuKalunga.”

Jesus ma ta mo ovatjingithi motempeli

(Mat. 21:12-17; Mark. 11:15-19; Joh. 2:13-22)

45 Jesus wa hita motempeli, ha utu okuta mo mboka mbava li amava landetha, 46he ve heele ha tyaa: “Kwa sonekwa okutyaa: ‘Ondjuwo yandje ondjuwo yokukumbila.’ Iya n̯e mwe i ningi eleva lyovapundi.”#Jes. 56:7; Jer. 7:11

47Ye wa li ae ve longa motempeli etango alihe, iya ovayambethi ovanene novalongiveta novanene wotjilongo ve mu taendha, ve mu dhipae,#Luk. 21:37 48atjaa kava mwene oluvedhe lwoku tji ninga, mena lyokutya ovantu avehe ve mu hopa, have mu teelele.

Currently Selected:

Lukas 19: DBNT

Highlight

Copy