Lûkə 9
9
Yésuwə a lúmí bawútú bá mɔ dyǔm na bábɛ̂
1Yésuwə a bəŋí bawútú bá mɔ dyǔm na bábɛ̂ á fǔm bufɔ́. A bə́kí bɔ́ ngínya na wunja álí fúl mídî mí bî na álí pwisí baʼ banyambɛ̂. 2Ti a lúmí bɔ́ álí kə̌ ɛ́ byá tɛ́ŋgɛnɛ wudya wú Dyǔ na álí pwisí baʼ na banyambɛ̂. 3A pɔŋí bɔ́ nána, “Nyí si nǔŋ ká yǔm na nyə́, ká ntfúm, ká ɛ́kpa, ká lídyá, ká ngáʼ, ká nku mpə́pə̂. 4Ká njá ndáʼ ɛyə̌ nyí kwilíní ka bá kásí nyə́, nyí dyɛ̂ á ndáʼ ɛni kə́ŋkə́ŋ ti á púndá ɛyə̌ nyí makúni nkí mû. 5Ká njá nkí ámə́ bá kásiyaní nyə́, ngə nyí makúní nkí mû nyí pápú makwi álí fúl mpupu n ndɔʼ n nkí mú á makwi má nyə, álí lúfú nána wubî wú bɔ wú timbán bɔ́. 6Bawútú bâ bá kí á míkí, bá pɔŋá ɛ́yala ɛ́ Dyǔ, bá pwísiyá pə́ baʼ wǔm másə́sə̌n.
Hɛ́rɔdə a bílí ɛ taʼ á nlə́m
7Hɛ́rɔdə, awə̌ a bílí janiya á ɛkumbu ɛ́ Gálilî, a wúkí misam ámə́ mí bwə́lání. A bílí ɛ taʼ átin á ɛ́tútú nána baʼ bafɔ́ bá bílí ɛ byá nána Jɔnə́ a Dumsɛ mɔ́ a timbí pə́. 8Baʼ bápə́pə̂ bá bílí ɛ byá nána Ɛláyíja mɔ́ amə̌ pə́ ɛ tîm á nkínshíyə, ndé bafɔ́ ka bá nlakwa-a-mudî n Dyǔ nfɔ́ a nyakə́ mɔ́ a mə̌ pə́ ɛ tǐm á luŋgɛ́. 9Hɛ́rɔdə a byábí nána, Mi mi bwə̌ bá lɛ́n nlú n Jɔnə́. Ndé njá mɔ́lə́ anín awə̌ mi nǎn wúní nána ǎ bwə mísam mín?” Ɛ́yî ɛ́ bwə́lí nána a wanání álí mín Yésuwə
Yésuwə a dísí limuti lí bâʼ
10Á púndá ɛyə̌ bawútú-bálí-lúm bá timbíní mbǐ bá pɔŋí Yésuwə misam mísə́sə̌n ámə́ bá bwə́líní. A kanání bɔ́ á fǔm ábə́ bú bílí á nsaŋ mú nkí m Bɛ́tsáyída. 11Ngə limuti lî lí wúkíní nâ, bá pɔ́ŋí mɔ́ á mbís kə́ŋkə́ŋ bá tání mɔ́. A kasí bɔ́, a pɔŋí bɔ́ tɛ́ŋgɛnɛ wudya wú Dyǔ, a pwisí pə́ baʼ ábə́ bá bílí ɛ́ sa nána a pwisí bɔ́. 12Ngə dúlu lí bútíní ɛ shul, bawútú bá pílí Yésuwə ɛ pɔ̌ŋ nána, “Lúm baʼ bâ nána bá kə́ á míkí ámə́ mí wútání ngə bá púlní ɛ wɔ́ŋ lídyá na fǔm bú lí nali. á ɛ́tútú nána lidyá lí shyǎ fán, fǔm bú lí nali pə́ wú shyǎ.”
13Ndé Yésuwə a byábí á bawútú bá mɔ nána, “Nyə́mə̌n nyí bə̂ bɔ́ yǔm ɛ́lí dyá.” Bá púshú mɔ́ nána, “Sí wɔ́ŋí wə̌ mibúŋgá mí blɛ̂t mítân na midim mí shwî ɛ́bɛ̂. Wə ɛ̌ sa nána sí kə̂ sí yân lidyá á límuti lí bâʼ lî?” 14Baʼ ábə́ bá bílí áwə́ bá bílí ká bikúlí bítân. Yésuwə a byábí á bawútú bá mɔ́ nána, “Nyí kâʼ bɔ́ bá shúman mûm mátán á ndíŋgí tɛ́.” 15Bawútú bá kábí baʼ bâ ngə Yésuwə a byábíní, bɔ́ baʼ básə́sə̌n bá shúmání áshí. 16Yésuwə a nuŋí mibúngá mí blɛ̂t mî mítân na midim mí shwî mî míbɛ̂, a kabí bɔ́, a mindí ámǐn, a bəkí Dyǔ masákan, ti a bəkí á bawútú bá mɔ nána bá káʼ á baʼ bâ. 17Bɔ́ baʼ básə́sə̌n bá dílí, bá kúʼ. Ti bawútú bá shwínjí bidfúŋ dyǔm na bíbɛ̂ bí blɛ̂t na midim mí shwî ámə́ mî m bukɛ.
Njá Yésuwə a díní
18Bǔn bufɔ́ ngə Yésuwə á bílíní ɛ káni mɔ́mə̌n nfɔ́, bawútú bá mɔ bá bílí na mɔ́. Ti a kɔ́ndɛ́ bɔ́ nána, “Njá limuti lí byání na mi ndí?”
19Bá púshú mɔ́ nána, “Baʼ bafɔ́ bá byá nána ɛ dí Jɔnə́ a Dumsɛ. Bání bá wə ɛ dí Ɛláyíja, ti bápə́pə̂ bá byá nána wə ɛ dí nlakuwa-a-mudî a Dyǔ a nyakə́ awə̌ a timbí a luŋgɛ́.” 20Ti Yésuwə a kɔndɛ́ bɔ́ nána, “Ndé á nyə́, njá nyí byání nána mi ndí?” Ti Píta a pushú mɔ́ nána, “Ɛ dí Ani Awə̌ Dyǔ lí Wɔ́kílíní.”
Yésuwə a byábí tɛ́ŋgɛnɛ mutaka na liwá lí mɔ
21Ti Yésuwə a kúwí bɔ́ ɛtwî nána bá si pɔŋ ká mɔ̂. 22A pɔŋí pə́ bɔ́ nána, “Mwǎn a Mɔnyuŋ á taʼ jǐta, bankúmə́, prísə a nə̂n, na balɛ̂ bá mbéndá bá báŋ mɔ́ á nyǔ. Bá búlú mɔ́, ndé á bǔn ábə́ bú lwínján madû málán á pumu.” 23A pɔŋí pə́ bɔ́ baʼ básə́sə̌n nána, “Ká njá mɔ́lə́ awə̌ ǎ sa mí ɛ pɔ̌ŋ á mbǐ a lɔlí ɛ makú misam mí nkínshíyə mísə́sə̌n, a pə́m mbásá ɛ mɔ bǔntɛ́, a pɔŋ mi á mbí. 24Á ɛ́tútú nána, ká njá mɔ́lə́ awə̌ ǎ sa álí shuŋgɛ́ lungɛ́ lí mɔ, á bɔ́lɔ́n lɔ́. Ndé ká njá mɔ́lə́ awə̌ á bɔ́lɔ́ní lúŋgɛ́ lí mɔ á ɛ́tútú ɛ́ myə á kwisí luŋgɛ́ álə́ lí sə̌ ɛ́ mɛ. 25Nsə́ŋ n fə́ mɔ á kwisíní njí a kwisí nkínshíyə ndé a bɔ́lɔ́n mudî m mɔ? 26Ká njá mɔ́lə́ awə̌ á wú mî wusɔ́n, na biyala bí myə, Mwǎn a Mɔnyuŋ pə́ á wú mɔ́ wusɔ́n á púndá ɛyə̌ á paʼní na wulɔ wú mɔ, náni ɛ dí, wulɔ wú Sáŋ m mɔ na wú áŋgɛl ɛ́yə́ ɛ́ sáŋí. 27Á mbálɛ nǎn pɔ́ŋ nyə́ nána, baʼ bafɔ́ bá dí fán ábə́ bá sí wáká ɛ́yə́ bá nan míníyaní wə̌ wudya wú Dyǔ.”
Nyǔ ɛ Yésuwə ɛ pəlání
28Ngə madû wam má túmbíní ɛ́yə́ Yésuwə a mə̌ní ɛ byá misam mínán mísə́sə̌n, a nuŋí Píta, Jɔnə́ na Jémsə bá kǐ á wúkul ámín álí káni. 29Ngə a bílíní ɛ káni, wusú wú mɔ́ wú pə́lání, ti nku m mɔ pə́ n tímbí ɛ púʼ n nwaŋá jǐta. 30Áfâ áshí áshí baʼ bábɛ̂, Mósisə na Ɛláyíja, bá pílí təlí na wulɔ wúnə̂n bá butí ɛ byá na mɔ. 31Bá bílí ɛ byá ngə Yésuwə á lwínjíní yə̌ ɛyə́ Dyǔ lí málíní nána ɛ bwəlán mɔ́ á liwá álə́ á wání á Jerúsálɛmə. 32Wuyɔ́ wú bílí Píta na basún bá mɔ á mǐ. Ndé ngə bá wúmúní, bá míní wulɔ wú nə̂n wú Yésuwə na baʼ bábɛ̂ ábə́ bá tyə́bí na mɔ́. 33Ngə baʼ bâ bábɛ̂ bá mákúní Yésuwə, Píta a byábí á mɔ́ nána, “Sísə́, ɛ́ lɔ́lí ngə sí díní áfán! Sí lúŋ bitatá bílán áfán, ɛfɔ́ á wə, ɛfɔ́ á Mósisə, ɛfɔ́ pə́ á Ɛláyíja.” Ndé a sî m bíyǎ yǔm ɛ́yə́ a bílíní ɛ byá. 34Ngə a bílíní wə̌ ɛ́ byá, libáŋ lí pílí təlí, lí kfútí bɔ́. Ɛ́yî ɛ́ bwəlí bɔ́ bá wúkí bɔŋ jǐta. 35Ti bá wúkí ngɔli ɛ byábí á libáŋ átin nána, “Mwǎn m myə mɔ́ anín, awə̌ n pwɛsíní. Nyí wúkan mɔ́.”
36Á púndá ɛyə́ ngɔli ɛni ɛ malíní álí byá bá míní nána Yésuwə mɔ́mə̌n nfɔ́ a bílí. Bawútú bá mɔ bá díbí nsu tɛ́ŋgɛnɛ misam mínán mísə́sə̌n, bá pɔ́ŋiyǎ mɔ ká nfɔ́ á púndá ɛni ká yǔm ɛ́yə́ bá míníní.
Yésuwə a pwisí mwǎn awə̌ a wɔ́ŋí mudî m mbî
37Ngə bǔn bú yílíní mushú, Yésuwə na bawútú bá mɔ bálán bá shúlí wukul, limuti lí bâʼ lí tání Yésuwə. 38Mɔ á kándí ámǐn á limuti lî átin nána, “Mulɛ̂, nǎn yɔ́m wə́, tátí mwǎn m myə, ápɔkɔ̂ a mwǎn m myə.” 39Mudî m mbî nǎn taki mɔ́. Njí n wálí mɔ́, ǎ bún ɛ́sakí, a kfún áshí, á nɔ́tiya kə́ŋkə́ŋ nkwɛn n nyítá mɔ́ á nsu. Mudî m mbî mû nán taki mɔ́ ɛtîtɛ́, nǎn bwə mɔ́ nyǔ ɛ́ mɔ ɛ bútí átin ka m mákú mɔ́. 40N yɔ́mbí bawútú bá wə́ nána, bá nân mudî m bî mû, ndé bá púliyǎ. 41Yésuwə a púshú nána, Nyə́ baʼ bá ɛ́tɛ̂n, nyí wɔ́ŋiyǎ dúbɛ, bilɛm bí nyə́ pə́ bí tyə́bíyǎ sîm. Madû mátín n lɔlíní ɛ dyɛ na nyə́ ka nyí dúbɛ́ mî? “Panán mwǎn n wə fánán.” 42Ngə mwǎn ani a bílíní ɛ paʼ, mudî m mbî mú n shwátí mɔ́ áshí, ti a butí ɛ nwa. Yésuwə a kándí mudî m mbî mû, a pwisí mwǎn awə̌, ti a bəkí mɔ́ á sáŋ m mɔ. 43Baʼ básə́sə̌n bá bílí manyáká álí mín yǔm ɛnə̂n ɛ́yə́ Dyǔ lí bwə́líní.
Yésuwə a byábí pə́ tɛ́ŋgɛnɛ liwá lí mɔ
Baʼ bá bílí wə̌ á mányáká átin á misam mísə́sə̌n ámə́ mí bwəlání, ti Yésuwə á byábí á bawútú bá mɔ nána, 44“Nyí si yasán yǔm ɛ́yə́ n kəní nyə́ ɛ pɔŋ! Bá bə́ Mwǎn a Mɔnyuŋ á mákɛ́ má bǎnyûŋ.” 45Ndé bawútú bá mɔ bá sɔ́ntaniyǎ yə̌ ɛ́yə́ a byábíní. Ɛ bílí ngə ŋganú ɛyə̌ ɛ n túm bɔ́ átin álí tfúku, bá bílí pə́ ɛ báŋ álí kɔndɛ́ mɔ́.
Njá a dí anə̂n litúm bání básə́sə̌n á wusú wú Dyǔ?
46Bawútú bá Yésuwə bá bútí ɛ táŋ na bɔ́mə̌n álí bí mɔ awə̌ a dí a nə̂n litúm bání. 47Ngə Yésuwə a m bíní yǔm ɛ́yə́ bá bílíní ɛ kani, a nuŋí mwǎndəm, a bwəlí mɔ́ a tyə́ á nsaŋ nyǔ m mɔ. 48Ti a byábí á bɔ́ nána, Ká njá a kasí mwǎn ani á dǐn lí myə, á kasí mî. Mɔ awə̌ pə́ a kasí mî a kasí pə́ awə̌ a lúmí mi. Awə̌ a dí á ntə́kə̂n á ndíŋgí n nyə́ litúm bání básə́sə̌n mɔ́ a dí anə̂n.
Mɔtɛ́ awə̌ a sə sə́ ɛ tɛ́ŋgɛn a dí na sə́
49Jɔnə́ a byábí nána, Sísə́, sí míní mɔ awə̌ a bílí a fúl mídî mî bî ámə́ mí bílí a baʼ átin á dǐn lí wə, ti sí pɔ́ŋí mɔ́ nána a si bwə pə́ á ɛ́tútú nána a shyǎ á ndíŋgí nsə. 50Yɔ́ Yésuwə a pɔŋíní bɔ́ nána, “Nyí si pɔŋ mɔ́ nána a si bwə pə́. Mɔtɛ́ awə̌ a sə sə́ ɛ tɛ́ŋgɛn a dí na sə́.”
Bá báŋí álí kasí Yésuwə
51Ngə púndá ɛ bílíní ɛ́ wútan ɛ́yə́ Yésuwə á kəní á wudya wú Dyǔ, a malí á nlə́m m mɔ́ álí kə á Jerúsálɛmə. 52A lúmí bakə-bá-ndúm bá mɔ álí kə á wusú. Bá kǐ á nkí ntə́kə̂n nfɔ́ á Samáriya álí bunsán mɔ́ misam mísə́sə̌n. 53Ndé baʼ bá nkí mû bá báŋí álí kasí mɔ́ á ɛ́tútú nána bá mə̌ ɛ bî nána a bílí ɛ kə wɔ̂ á Jerúsálɛmə. 54Ngə bawútú bá mɔ Jémsə na Jɔnə́ bá míníní nâ, bá byábí á Yésuwə nána, A Sáŋgúwə́ ɛ pushú nána sí bə̂ŋ mwǐ n fî á wúdya wú Dyǔ n wɔ́ki bɔ́? 55Yésuwə a wɛ́sí nyǔ, ti a kándí bɔ́. 56Ti Yésuwə na bawútú bá mɔ bá kí á nkí mpə́pə̂.
Baʼ ábə́ bá pɛ́pɛ́ Yésuwə ɛ pɔ̌ŋ á mbǐ
57Ngə bá bílíní ɛ kə, mɔ nfɔ́ a byábí á Yésuwə nána, “Mi m pɔ̌ŋ wə̂ á mbís ká fə́ ɛ̌ kəní.” 58Yésuwə a pushú mɔ́ nána, “Mbɛ ɛ́ wɔ́ŋí mitóm, manɔn má wɔ́ŋí mandáʼ má mánɔn, ndé Mwǎn a Mɔ̌nyuŋ a wɔ́ŋiyǎ ká fǔm álí nali na álí kɔ́mbɛ.” 59Ti Yésuwə a byábí á mɔ ampə́pə̂ nána, “Pǎʼ, pɔ̌ŋ mí á mbí.” Ndé mɔ ani a púshú mɔ́ nána, “Sáŋgúwə́, wə̌ ŋ kə̂ ŋ wúshi sáŋ m myə kəkə.” 60Yésuwə a pushú mɔ́ nána, “Makú mimbimba mí wúshi bawú bá bɔ. Ndé á wə ɛ́ lɔ́lí nána, ɛ kə̂ ɛ́ pɔ̂ŋ baʼ ndúm tɛ́ŋgɛnɛ Janiya lí Dyǔ.” 61Mɔ ampə́pə̂ pə́ a byábí á Yésuwə nána, “A Sáŋgúwə́, m pɔ̌ŋ wə́ á mbǐ, ndé wə̌ n kə́ n lə́kan ndáʼ ɛ́ myə kəkə.” 62Yésuwə a pushú mɔ́ nána, “Ká njá awə̌ a butí ɛ kfwaŋ makfúl ka á tátíyá á mbí a kúkyǎ álí bwə ndutu á Janiya lí Dyǔ.”
Currently Selected:
Lûkə 9: bwt
Highlight
Copy
Compare
Share
Want to have your highlights saved across all your devices? Sign up or sign in
