Mâkə 1
1
Ɛfə́ŋ ɛ́ Jɔnə́ a Dumsɛ
1Ndúm ɛ mbâ ɛ́ Yésuwə Krísto, Mwǎn a Dyǔ, yɔ́ ɛnín. 2Ɛ butí ngə nlakuwa-a-mudî Ayzáya, a Dyǔ, a tilíní nána,
“Dyǔ lí byábí nána,
‘N lúm nkə-a-ndúm m myə awə̌ á kɔ́lɛ́ á wusú’,
álí bunsán wə̌ nji.”
3“Mbélaku ɛ́ fí á ɛ́sínj nána, ‘Nyí búnsan lipaʼ lí Sáŋgúwə́. Nyí tyə́si mbukaʼ m mɔ, nyí bwə̂ nji m mɔ m bá tɛyí tɛyí.’”
4Áfánikə̌ Jɔnə́ a Dumsɛ, a pilí á ɛ́sínj, á dumsɛ́ baʼ, ti á byábá ɛ́yala ɛ́ Dyǔ nána, “Nyí máku wubî wú nyə, nyí kwísi dumsɛ álí bwə Dyǔ lí laksɛ́ wubî wú nyə.” 5Baʼ bá bílí ɛ fí á pɛsi ɛ mbú ɛ Judéya ɛsə́sə̌n, na á nkí m Jerúsálɛmə, bá bílí ɛ kə á Jɔnə́ álí wúkán mɔ́. Bá púlísɛ́ wúbî wú bɔ ti a dumsɛ́ bɔ́ á madí má Jódan. 6Bâ m bwə mábaʼ má Jɔnə́ na myɛ mí nyam ɛyə̌ bá bəŋní kámɛl.#1:6 Bá bílí ɛ bwəlan myɛ mí kámɛl álí bwə mabaʼ. Mabaʼ mâ má bíliyǎ mabaʼ má mbímbí. A bílí ɛ tfúl ngúli ɛ nguʼ ɛ nyam. Lidyá lí mɔ lí bílí bambalambala na wuywî. 7A bílí ɛfə́ŋ nána, “Mɔʼ a dí awə̌ ǎ pɔŋ mî á mbís, awə̌ a túmbí mî. N kúkiyǎ álí nyɔ́ŋ áshí álí kákú mikɔʼ mí bítámbí bí mɔ. 8Mi nǎn dumsɛ́ nyə́ na madí, ndé mɔ́ á dumsɛ́ nyə́ na Mudî ámə́ n Sáŋí.”
Dumsɛ lí Yésuwə na makiksɛ má mɔ
9Á mádû ámâ, ámə́ Jɔnə́ á bílíní ɛ dumsɛ́ baʼ, Yésuwə a n fí á nkí n Názarɛtə á mbú ɛ Gálilî, ti a pilí á Jɔnə́. Jɔnə́ a dúmsɛ mɔ́ á mádí má Jódan. 10Á mulimlim m púndá ámə́ Yésuwə a nyítíní á mádí átin, a míní ngə libubɛ lí púwání. Mudî n Dyǔ n fí á nkímínyə́ ngə ndulû n shúlá m bándá mɔ́ á nlú. 11Ti ŋgɔli ɛ fí ámǐn nána, “Wə ɛ dí mwǎn m myə a nlə́m awə̌ mi nəŋíní jǐta. Ɛ̌ wúkí mî munyɛŋgɛ.” 12Á mulimlim m púndá Mudî n Dyǔ mû m bwə́lí Yésuwə a kǐ á ɛ́sínj. 13A bílí á ɛ́sínj madû mûm mánîn, ti Sátan ǎ kiksɛ́ mɔ́. A bílí á wə́ na nyam ɛ́yə́ ɛ́ dí ɛ́kaŋ, ti bá áŋgɛl bá pílí mɔ́ ɛ wúnjan.
Yésuwə a pwɛsí bawútú bá wúsúsuwə bá mɔ
14Á mbís ɛ púndá bá fílí Jɔnə́ á bíbuwa. Ngə a bílíní á bíbuwa, Yésuwə a kǐ á Gálilî á byábá ndúm ɛ mbâ ɛ Dyǔ. 15Á byábá nána, “Púndá ɛ mə́ ɛ pa, Janiya lí Dyǔ lí dí bɛbɛ. Nyí máku wubî wú nyə, nyí dúbɛ ndúm ɛ mbâ.”
16Ngə Yésuwə a bílíní ɛ bambú á nsaŋ m mbô ɛ Gálilî, a míní baluwa-bá-shwî bábɛ̂, Sáyímɔnə bû mǎ nyǎ m mɔ, Ándruwə, bá bílí ɛ lú shwî na mbúnjá. 17Yɔ́ Yésuwə a pɔŋíní bɔ́ nána, “Nyí pɔ̂ŋ mi á mbís. Ngə nyí lúní shwî sɔnsɔ́nǎn, n lɛ́fú nyə́ ngə nyí pəlání baʼ milə́m álí pɔŋ mî á mbís.” 18Áfâ áshí áshí, bá mákú mbúnjá ɛ́ bɔ bá kí na Yésuwə. 19Ngə a kǐní mǎ yǔm a míní Jémsə na Jɔnə́ bǎn bá Zɛ́bɛdíyə á bwálu, bá tambúwá mbúnjá ɛ́ bɔ. 20Ngə a míníní bɔ́, a bəŋí bɔ́. Ti bá mákú sáŋ m bɔ Zɛ́bɛdíyə na babwəla bá ndutu bá mɔ á bwálu bá pɔ̂ŋ Yésuwə á mbís.
Yésuwə a fúlí mudî m mbî átin ɛ́ mɔʼ
21Ti Yésuwə na bawútú bá mɔ bá kí á nkí m Kapɛ́nahûmə. Á Bǔn bú Líkɔ́mbɛ, Yésuwə a kwilí á ndáʼ ɛ makáni ɛ́ baʼ bá Ísrɛl, ti a butí ɛ lɛ́fu. 22Baʼ básə́sə̌n bá bílí manyáká á ɛ́tútú nána a bílí bɔ́ ɛ lɛ́fu ngə mɔʼ awə̌ a wɔ́ŋí wunja wúsə́sə̌n. A bíliyǎ ɛ́ lɛ́fú ngə balɛ̂ bá mbéndá. 23Ngə a bílíní ɛ lɛ́fu, mɔʼ áwə́ mudî m bî n bílíní átin, a kándí á mǐn nána, 24“A Yésuwə, mɔ a Názarɛtə, yə̌ ɛ̌ sakání sə́? Ɛ pilí yə̌ álí búlú sə́? Mi mbí wə bwǎm. Ɛ dí Mɔ awə̌ Dyǔ lí lúmíní awə̌ a sáŋí.” 25Yésuwə a kándí mudî m bî nána, “Dyɛ̌ kpi. Nyítá á nyǔ ɛ mɔ anín!” 26Mudî m bî mû n sákí mɔ́ na ngínya, m fə́mí na ŋgɔli ɛnə̂n, ti n nyítí á nyǔ ɛ́ mɔ. 27Baʼ básə́sə̌n bá bílí manyáká, ti bá kɔ́ndɛ́ bɔ́mə̌n nána, “Njá yǔm ɛ́yín? Jókwa lí kɔ́nə́? Mɔ anín a wɔ́ŋní wunja álí janiya midî míbî, ti mí wúkání mɔ́.” 28Ti ndúm tɛ́ŋgɛnɛ Yésuwə ɛ kǐ shámshám á mábú másə́sə̌n má Gálilî.
Yésuwə a pwisí baʼ jǐta
29Yésuwə na bawútú bá mɔ bá nyítí á ndáʼ ɛ makáni ɛ baʼ bá Ísrɛl. Yésuwə bû Jémsə na Jɔnə́, bá kǐ á ndáʼ ɛ́ Sáyímɔnə na Ándruwə. 30Á púndá ɛni nyǎ m mwalân mú Sáyímɔnə a bílí á wúti na ɛfi. Ngə Yésuwə a pilíní, bá pɔ́ŋíní mɔ́ tɛ́ŋgɛnɛ nkfulu m mwalân ani. 31Ti a kǐ áfə́ mwalân ani a bílíní, a wálí mɔ́ ɛkɛ́, a wúnjání mɔ́ álí falú áshí. Nkfulu m mə́ mɔ́ á nyǔ ti a kasí bɔ́. 32Nkwinkwin mû, ngə dúlu lí shúlíní, baʼ bá pánání baʼ bá nyámbɛ̂ básə́sə̌n na baʼ básə́sə̌n ábə́ bǎn wɔ́ŋ mídî míbî átinə́ m bɔ á Yésuwə. 33Baʼ bá nkí mû básə́sə̌n bá búmí á nsu n ndáʼ mú Sáyímɔnəʼ. 34Ti Yésuwə a pwisí baʼ na banyambɛ̂ nyayi na nyayi, ti a fúlí midî míbî átinə́ baʼ jǐta. A bíliyǎ ɛ́ kufú nána midî mibî mî mí byá á ɛ́tútú nána bá n bí mɔʼ awə̌ a bílíní.
Yésuwə a pɔŋí Ndúm ɛ Mbâ á Gálilî
35Mushú mushú pilílí ɛ́yə́ ɛfínjan ɛ́ bílíní wə̌, Yésuwə a falú áshí, a makú nkí, ti a kǐ á má ɛtfuŋgá álí káni. 36Sáyímɔnə na baʼ ábə́ mɔ́ na bɔ́ bá bílíní, bá bútí ɛ sa Yésuwə. 37Ngə bá míníní mɔ́, bá pɔ́ŋí mɔ́ nána, “Baʼ básə́sə̌n bá sa wə̂.” 38Ndé Yésuwə a pɔŋí bɔ́ nána, “Si kə̂ á libú lípə́pə̂. Sí kə á míkí ámə́ mí wútání, álí bwə nána n pɔ̂ŋ Ndúm ɛ Mbâ áwə́ pə́. Á ɛ́tútú nána ndúm ɛni yɔ́ ɛ bwəlí ka mi m páʼ á nkínshíyə.” 39Áfánikə̌, mɔ́ a kǐ á míkí mísə́sə̌n á ɛ́kumbu ɛ́ Gálilî, á pɔŋá Ndúm ɛ Mbâ á mandáʼ má mákáni má baʼ bá Ísrɛl, á fúlá pə́ midî míbî átinə́ a baʼ.
Yésuwə a pwisí mɔʼ a akúnyə
40Mɔ awə̌ akúnyə a nyítíní á nyǔ a, pilí á Yésuwə, a shumí mabɔ́ŋ áshí, a yɔ́m mɔ́ nána, “Njí wə ɛ nəŋí ɛ tiŋgání mi ɛ sáŋi.” 41Yésuwə na nlə́m mú likini, a sámí ɛkɛ́ a bándí yɔ́ á nyǔ ɛ́ mɔ a ni, ti á pɔŋí mɔ́ nána, “N nəŋí, sáŋ!” 42Áfâ áshí áshí akúnyə ani a mɛ̌ mɔ́ á nyǔ, ti a pwǐ. 43Yésuwə a pɔŋí mɔ́ nána a kə̂, ti a bəkí mɔ́ ndaki nána, 44“Tátí, ɛ si pɔ̌ŋ mɔʼ ká nfɔ́ yə̌ ɛ́yə́ ɛ́ mə́ ɛ bwəlan. Ndé kə̌ ɛ lúfu nyǔ ɛ́ wə á prísə a wási wə. Ɛ bə́ Dyǔ jabeya, ngə mbéndá ɛ́ Mósisə ɛ́ sakíní, álí lúfú baʼ nána ɛ mə́ ɛ pwi.” 45Ndé kánâwə̌ ngə mɔ a ni a nyítíní, a butí álí pɔŋ ndúm ɛni á wǔm másə́sə̌n. A m byá yɔ́ jǐta á nyai ɛyə̌ Yésuwə a bíliyǎ pə́ ɛ́ púl ɛ́ kwili á míki tandándâ, á dyɛ̌ wɔ̂ á bitfuŋgá ábə́ baʼ bá bíliyaní. Kánâwə̌ baʼ bá bílí ɛ fí á mábú másə́sə̌n álí tán mɔ́.
Currently Selected:
Mâkə 1: bwt
Highlight
Copy
Compare
Share
Want to have your highlights saved across all your devices? Sign up or sign in
