Mâkə 6
6
Baʼ bá Názarɛtə bá yánŋílí Yésuwə
1Yésuwə a falú á fǔm bû, ti a kǐ á nkí m mɔ. Bawútú bá mɔ bá kí na mɔ́. 2Á bǔn bú Líkɔ́mbɛ a bútí álí lɛ́fu á ndáʼ ɛ makáni ɛ baʼ bá Ísrɛl. Baʼ jǐta ábə́ bá bílí áwə́, ngə bá wúkíní yə̌ ɛ́yə́ á bílíní ɛ lɛ́fu, bá bílí manyáká. Ti bá kɔ́ndɛ́ nána, “Áfə́ a fínání misam mínán mísə́sə̌n? Njá m bú mú libyɛ́ m bə́kání mɔ́ nán? Yán ǎ bwəní Misam mí mányáká mínán? 3Nga a dí mɔʼ awə̌ ǎ bwəlan bibámbú? Nga nyǎ m mɔ Meríyə́? Nga bán-bá-nyǎ bá mɔ Jémsə, Josɛ́fə, Júdasə na Sáyímɔnə? Nga bǎn-bá-nyǎ bá mɔ bá balân, bá dyɛ fánán á nkí na sə́?” Áfánikə̌ bá kfwɛ́ mɔ́. 4Yésuwə a pushú bɔ́ nána, “Nlakuwa-a-mudî a wɔ́ŋí ɛdúbɛ́ á wǔm másə́sə̌n, ɛ́sitúm á nkí m mɔ, na á baʼ bá túmbá lí mɔ, na á baʼ bá pú ɛ ndáʼ ɛ́ mɔ.” 5A púliyǎ ɛ́ bwə mísam mí manyáká áfâ, ɛ́sitúm ngushu ɛ́ baʼ ábə́ bá sî n lɔ̂ʼ á nyǔ ábə́ a bándíní makɛ́ a pwisí bɔ́. 6A m bá manyáká jǐta á ɛ́tútú nána baʼ bâ bá sî n wɔ́ŋ dúbɛ.
Yésuwə a lúmí bawútú bá mɔ dyǔm na bábɛ̂
Ti Yésuwə a kǐ á mikí mítə́kə̂n á pəsi ɛni, á lɛ́fúwá baʼ. 7Yésuwə a bəŋí bawútú bá mɔ dyǔm na bábɛ̂, ti a lúmí bɔ́ bábɛ̂, bábɛ̂. A bəkí pə́ bɔ́ wunja álí nǎn mídî mí bî átinə́ a baʼ. 8Yésuwə a bəkí bɔ́ ndaki nána, “Ngə nyí kəní nâ, nyí si nǔŋ yǔm ká ɛ́fɔ́ na nyə́ ɛ́sitúm ntfúm. Nyí si nǔŋ lídyá, ɛkpa, tɔ̌ álí tfúl ngáʼ á milú mí sánja ɛ́ nyə. 9Nyí fá bitámbí, ndé nyí si nǔŋ nku mpə́pə̂.” 10A byábí pə́ nána, “Ká njá ndáʼ ɛyə̌ nyí kwílíní ka bá kásí nyə́, nyí dyɛ̂ á wə́ kə́ŋ ti á púndá ɛyə̌ nyí falúní á pɛsi ɛni.” 11Njí nyí pílí á nkí ka bá kásiyǎ nyə́ tɔ̌ ká álí wúkán nyə́, nyí fálu á wə́, nyí pápú mpupu ndɔʼ á mákwi má nyə. Ɛ́yî ɛ́ bá ngə mbúŋ álí lúfú nána wubî wú bɔ́ wú tátí bɔ́. 12Áfánikə̌, bawútú bá mɔ bá kǐ bá byábá ɛ́yala ɛ́ Dyǔ nána, “Baʼ bá máku wubî wú bɔ.” 13Bá fúlí midî míbî jǐta átinə́ ɛ baʼ, ti bá wɔ́kí lifû lí ólivə á baʼ bá nyambɛ̂ jǐta, bá pwisiya bɔ́.
Liwá lí Jɔnə́ a Dumsɛ
14Kə̂ŋ Hɛ́rɔdə a wúkí misam mísə́sə̌n ámə́ Yésuwə a bílíní ɛ bwə. Á ɛ́tútú ɛ́ mísam ámə́ Yésuwə a bílíní ɛ bwə̌, ɛ́ bwə́lí baʼ bá bí mɔ́ wǔm másə́sə̌n. Duŋgu lí bâʼ lí bílí ɛ byá nána, “Jɔnə́ a Dumsɛ a mə́ ɛ pumu. Yɔ́ ɛ́ bwə́lí mɔ́ á wɔ́ŋ ngínya ɛnín álí bwə mísam mí mányáká mín mísə́sə̌n.” 15Duŋgu líní ka pə́ lí byá nána, “Mɔ́ a dí Ɛláyíja.” Duŋgu ka pə́ bá byá nána, “A dí nlakuwa-a-mudî nfɔ́ á ndíŋgí m balakuwa-bá-mudî bá nyákə́.” 16Ndé ngə Hɛ́rɔdə a wúkíní nâ, a byábí nána, “A dí Jɔnə́ a Dumsɛ awə̌ mi mi n bwəní na bá shə́ mɔ́ nlú, ndé a timbí mbǐ á luŋgɛ́.” 17Hɛ́rɔdə a bílí ɛ byá nâ á ɛ́tútú nána mɔ́mə̌n a n lúm baʼ nána bá wáli Jɔnə́ a Dumsɛ. Bâ n wálí mɔ́, bá fá mɔ́ mgbɔ́kɔbí á mákɛ́, bá shwá mɔ́ á bíbuwa. Hɛ́rɔdə a m bwə nâ á ɛ́tútú ɛ́ Hɛrɔ́dyasə awə̌ a n wə́ní, ká ngə a bílíní mwalân mwǎn-n-nyǎ m mɔ Fílipə. 18Jɔnə́ a Dumsɛ a bílí ɛ pɔ̌ŋ Hɛ́rɔdə ɛtîtɛ́ nána mbéndá ɛ byábí nána, “Ɛ wɔ́ŋiyǎ wúnja álí wə́ mwalân m mwǎn-n-nyǎ n wə a mumân.” 19Áfánikə̌, Hɛrɔ́dyasə a m kɔŋgɔ́ Jɔnə́ á nlə́m. Ti pɛpɛ́ mɔ́ ɛ búlu, ndé Hɛ́rɔdə a bwəlí nána a púliyǎ mɔ́ ɛ búlu. 20Hɛ́rɔdə a bílí ɛ báŋ Jɔnə́. A n bí nána Jɔnə́ a bílí mɔʼ awə̌ a tyə́bí sîm á wusú wú Dyǔ na mɔʼ awə̌ a sáŋí. Áfánikə̌ a bílí ɛ mín nána yǔm ɛ́ bî ká ɛfɔ́ ɛ́ si bwəlán mɔ́. A n nəŋ álí wúkán mɔ́, ká ngə ɛtîtɛ́ ɛ́yə́ a wúlání mɔ́ nlə́m m bílí mɔ́ ɛ taʼ á líbum. 21Álí shúʼ, Hɛrɔ́dyasə a ŋ wɔ́ŋ ɛ́tə́ʼ ɛ́yə́ a bílíní ɛ sa. Ɛtə́ʼ ɛ́yî ɛ́ bílí bǔn ábə́ Hɛ́rɔdə a kakíní ŋgandu álí kaní bǔn ábə́ bá yɛ́ní mɔ́. Á ŋgandu ɛni, Hɛ́rɔdə a ləbí baʼ bánə̂n básə́sə̌n á lingɔmna lí mɔ, baʼ bánə̂n bá baʼ miku mí ngvwɛʼ na baʼ bá mbímbí á pɛsi ɛ mbû ɛ Gálilî. 22Á bǔn bû mwǎn a mwalân n Hɛrɔ́dyasə, a pilí álí sáʼ. A n lɔsí Hɛ́rɔdə na bakən bá mɔ milə́m. Ti kə̂ŋ Hɛ́rɔdə a kɔndɛ́ wukɔn bû nána, “Yə̌ ɛ nəŋíní nána m bə wə? N bə wə̂ ká njá yǔm ɛ́yə́ ɛ sakání mi.” 23Ɛ́yínán ɛ́ bwə́lí Hɛ́rɔdə álí mwá ngu ti a pɔŋí mɔ́ nána, “Nǎn mwá ngu nána m bə wə̂ ká njá yǔmə́ ɛ́yə́ ɛ sakání, ká ɛ́pɛʼ ɛ́ janiya lí myə.” 24Mwǎn a mwalân ani a nyítí, ti a kɔ́ndɛ́ nyǎ m mɔ nána, “Yə̌ n tiŋgání mɔ́ ɛ kɔndɛ?” Nyǎ a pushú mɔ́ nána, “Kɔndɛ́ mɔ́ nlú mú Jɔnə́ a Dumsɛ.” 25Mwǎn a mwalân ani a timbí shám shám á kə̂ŋ ti á pɔŋí mɔ́ nána, “Bə mî nlú mú Jɔnə́ a Dumsɛ á pán ɛ lákákâ á fánán sɔnsɔ́nǎn.” 26Ɛ́yî ɛ́ bwə́lí nlə́m n tákí kə̂ŋ Hɛ́rɔdə á líbum jǐta, ndé a púliyǎ mɔ́ ɛ kángán nlú n Jɔnə́ á ɛ́tútú ɛ́ nguʼ ɛyə̌ a mwílíní á wusú wú bákən. 27Áfánikə̌, Hɛ́rɔdə á lúmí mɔʼ a miku mí ngvwɛʼ ɛ́ mɔ nfɔ́ áfâ áshí áshí álí pánán nlú mú Jɔnə́. Mɔ miku mí ngvwɛʼ ɛ kwílí á ndáʼ ɛ bibuwa ti a shɛ́lí nlú mú Jɔnə́. 28Ti mɔ miku mi ngvwɛʼ ɛni a panání nlú mú Jɔnə́ á taplêtə, ti a bəkí mɔ́ á mwǎn a mwalân ani. Ti mwǎn a mwalân a bə́kí mɔ́ á nyǎ m mɔ. 29Ngə bawútú bá Jɔnə́ bá wúkíní yə̌ ɛ́yə́ ɛ́ bwə́lání, bá pílí, bá núŋí mbimba n Jɔnə́, ti bá kǐ mɔ́ ɛ dími.
Yésuwə a dísí bikúlí bí baʼ bítân
30Bawútú-bálí-lúm ábə́ Yésuwə a lúmíní bá tímbí mbís, bá tání Yésuwə, bá pɔ́ŋí mɔ́ misam mísə́sə̌n ámə́ bá bwə́líní na ámə́ bá lɛ́fúní. 31Baʼ jǐta bá bílí ɛ pa bá timba á Yésuwə na bawútú bá mɔ, á nyai ɛyə̌ Yésuwə na bawútú bá mɔ bá sî n wɔ́ŋ púndá álí dyá lídyá. Ti Yésuwə á pɔŋí bawútú bá mɔ nána, “Sí kə̌ á fǔm ábə́ wú dí pǐ, ábə́ wú sɔ́mɔ́ní álí bwə nána nyí kɔ́mbɛ mǎ yǔm.” 32Áfánikə̌ bá kwílí á bwálu bá kǐ á fǔm ábə́ wú dí pǐ, ábə́ wú sɔ́mɔ́ní. 33Baʼ jǐta kánâwə̌, bá míní bɔ́ ngə bá bílíní ɛ kə, ti bá yə́mbí bɔ́. Baʼ bâ, bǎ n fí á míkí mísə́sə̌n, bá kǐ mifílí á wusú shám shám, ti bá pílí á fǔmbû ɛ́yə́ Yésuwə na bawútú bá mɔ bá sí məní ɛ paʼ á wə́. 34Ngə Yésuwə a nyítíní á bwálu átin, a míní limuti línə̂n lî, likini lí lwínjí mɔ́ á nlə́m, á ɛ́tútú nána, bá bílí ngə mílɔŋgi ámə́ mí wɔ́ŋiyǎ mɔʼ awə̌ á tátí bɔ́. Ti a butí bɔ́ ɛ lɛ́fú mísam jǐta. 35Wǔm má bútíní ɛ fínj, bawútú bá Yésuwə bá pílí á mɔ́, bá byá nána, “Fǔm bún wú fwɛ́, bǔn bú mə́ ɛ kə jǐta. 36Pɔ̌ŋ baʼ bán nána bá kə̂ á míkí ámə́ mí dí bɛbɛ ngə bá yanní lidyá” 37Ndé Yésuwə a pushú bɔ́ nána, “Nyə́mə̌n nyí bə̂ bɔ́ yǔm ɛ́lí dyá.” Bá kɔ́ndɛ́ nána, “Ɛ̌ sa nána sí yán blɛ̂t á kápa mbúki bikúlí bíbɛ̂ álí bə bɔ́ bá dyâ?” 38Ti Yésuwə a kɔndɛ́ bɔ́ nána, “Mibúŋgá mí blɛ̂t mítín nyí wɔ́ŋíní? Nyí kə̂ nyí míndi.” Ngə bá kîní ɛ mindi, bá pɔ́ŋí mɔ́ nána “Mibúŋgá mí blɛ̂t mítân na midim mí shwî míbɛ̂.” 39Ti Yésuwə a pɔŋí bawútú bá mɔ nána bá bwə̂ baʼ bâ bá ká bɔ́mə̌n á mídíŋgí, bá shúmán á bishum. 40Ti baʼ bâ bá shúmání á mídíŋgí, mifɔ́ mbúki, ámíní mûm mátân. 41Ti Yésuwə a nuŋí mibúŋgá mí blɛ̂t mî mítân na midim mí shwî mî míbɛ̂, a mindí ámǐn, ti a bəkí masákan á Dyǔ, ti a kabí mibúŋgá mî, ti a bəkí á bawútú bá mɔ nána bá kâ bɔ́ á límuti lî. A kabí pə́ midim mí shwî mî míbɛ̂. 42Bɔ́ baʼ básə́sə̌n bá dílí, bá kúʼ. 43Ti bawútú bá shwínjí bidfúŋ dyǔm na bíbɛ̂ bí blɛ̂t na midim mí shwî ámə́ mî m bukɛ. 44Nsɔŋgí m búmân ábə́ bá dílí lidyá lî lí bílí bikúlí bítân.
Yésuwə a kǐ makwi á madí á mǐn
45Áfâ áshí áshí, Yésuwə a pɔŋí bawútú bá mɔ nána bá kwíli á bwálu, bá kə̂ á wusú á nkí n Bɛ́tsáyída, á pɛsi mbû ɛníní. Ngə bawútú bá mɔ bá kîní, a bukɛ́ní á mbǐ, a pɔŋí limuti lî nána bá shwíya á mandáʼ má bɔ. 46Yésuwə a mə́ní limuti lí ɛ́ pɔ̌ŋ nána bá kə̂ bwǎm, a pulú wúkul álí kə ɛ́ káni. 47Ngə nkwin nkwin m pílíní, bawútú bá Yésuwə bá bílí á bwálu ábə́ wú bílí áwútitîn wú mbô, Yésuwə a bílí mɔ́mə̌n nfɔ́ á nsaŋ m mbô. 48A míní nána bawútú bá mɔ́ bá bílí á mutakaʼ n nə̂n álí kanan bwálu á ɛ́tútú nána ɛkful ɛ́nə̂n ɛ́ bílí bɔ́ ɛ fí á wusú. Áfánikə̌, mushú mushú pilílí Yésuwə a kǐ bɔ́ ɛtán. A bílí ɛ kə á mádí ámǐn ti á saká álí túm bɔ́. 49Ndé ngə bá míníní mɔ́ á kə á mádí á mǐn, bá kání nána a bílí ngvú. Áfâ bá bútíní ɛ bún. 50Bɔ́ baʼ básə́sə̌n bá búní ɛsakí á ɛ́tútú nána bɔŋ búnə̂n bú kúwí bɔ́. Yésuwə a pɔŋí bɔ́ á mulimlim n púndá nána, “Nyí kpúti milə́m! Mi! Nyí si báŋ.” 51Ti a kwilí á bwálu ábə́ bá bílíní átin, ti ɛkful ɛ́ túmbí. Bawútú bá bílí manyáká jǐta. 52Bá bílí manyáká á ɛ́tútú nána bá sî n sɔ́ntán yándá lí mányáká má lí dísí lí baʼ bikúlí bítân. Bá púliyǎ ɛ́ sɔ́ntan.
Yésuwə a pwisí baʼ na banyambɛ̂ á Gɛnɛ́sárɛtə
53Yésuwə na bawútú bá mɔ bá túmbí mbô ámǐn, bá pílí á pɛsi ɛ mbú ɛ Gɛnɛ́sárɛtə. Áfâ bá tfúlíní bwálu. 54Ngə bá mákúní bwálu, baʼ bá yə́mbí Yésuwə áfâ áshí áshí. 55Áfánikə̌, bá pílí na mifílí á pɛsi ɛ mbú ɛni ɛsə́sə̌n, bá pánání baʼ na banyambɛ̂ á makɛ́ má bɔ, á mabú másɛ́sə̌n áfə́ bá wúkíní nána Yésuwə a bílí á wə́. 56Ká njá fǔm ábə́ Yésuwə a kǐní, á mikí mítə́kə̂n na mikí mínə̂n, ká áfə́ bá lúŋíní mabún, baʼ bá bílí ɛ panán baʼ na banyambɛ̂ á mábú áfə́ baʼ bá shwínjání álí bwə nyúŋgá. Ngə bá pánání bɔ́, bá bílí Yésuwə ɛ yɔ́m nána, a púshú nána baʼ bá nyambɛ̂ bá nyɔ́ti ká shɛ́si ɛ libaʼ lí mɔ. Áfánikə̌ baʼ básə́sə̌n na banyambɛ̂ ábə́ bá nyɔ́tí shɛ́si ɛ libaʼ lí mɔ bá pwí.
Currently Selected:
Mâkə 6: bwt
Highlight
Copy
Compare
Share
Want to have your highlights saved across all your devices? Sign up or sign in
