Luka 19

Yecu gin kede Jakayo

1Yecu odonyo i Jeriko kun abebea iye. 2Rik tye lonnoro kuno nyiŋe Jakayo; en cen ara-ocoro adit, daŋ onwoŋo en alonyo. 3Onwoŋo en paro pi neno Yecu, ni en ŋa? Cite mom otwerre, pien lwak pol, dok en dano acek. 4Omio en oriŋo i nyim, oyito i wi olam pi nene, pien nwaŋ apello i yo-nono. 5Ka Yecu otuno i kabedo-nono, oneno malo, okobbi Jakayo ni, “Jakayo, yitto piny piopio, pien tin myero abed i odi.” 6En te yitto piny piopio, ojole kede yomcuny adwoŋ; 7omio jo luŋ ame oneno oŋuŋura kun okobo ni, “Odonyo i ot, abedo welo a dano ame abalo.” 8Jakayo oya malo, okobo baŋ Rwot ni, “Nen ba, Adwoŋ, nucu limma ducu ame atye kede doŋ amio oko baŋ ocan; dok daŋ ka ce abubuo gi-a ŋattoro, an abino cule tyen aŋwen.” 9Yecu okobbe ni, “I ot-ti tin obino iye lar, pien dano-ni daŋ obedo anywalli Iburaim. 10#Mat. 18.11Pien Wot a dano obino me yenyo kede me laro gin orwenyo.”

Carokop i kom ciliŋ tutumia apar

(Nen daŋ Matayo 25.14-30)

11Ka pwod gin otye a winyo kop man, Yecu omedde kede koppere, te kobbigi carokop; pien onwoŋo en doŋ ceggi kede Jerucalem, dok gin otamo ni loc Obaŋa kom doŋ anen oko oyotoyot. 12Omio en okobo ni, “Yam tye won kwogo moro ame oya, owoto i lobo abor me wot gamo twer me loc iye, ete dwogo. 13En olwoŋo omiro mere apar, te pokkigi ciliŋ tutumia apar, kun kobogi ni, ‘Catu kede wil ituno ka adwogo.’ 14Cite jo me lobo mere onwoŋo dage; ocwao kwena i yore kun okobo ni, ‘Danonono mom omito ni lowa.’ 15Ka odwogo a doŋ ogamo loc, te ciko ni lwoŋ omiro a nwaŋ omiogi lim, me eŋe wel agoba ame gin onwoŋo i cato wilgi. 16Dano me agege obino i nyime, okobo ni, ‘Adwoŋ, ciliŋ meri tutumia dok omedde iye ciliŋ ocele tutumia apar.’ 17Ogamo doge ni, ‘Itimo ber, yin amiro aber! Pien yam ibedo agen i jami anok, ibino bedo kede twer i boma apar.’ 18Dano me aryo te bino, okobo ni, ‘Adwoŋ, ciliŋ meri tutumia dok omedde iye ciliŋ ocele tutumia abic.’ 19Okobbe ni, ‘Yin ibino bedo kede twer i boma abic.’ 20Dano ocele daŋ te dok bino, te kobbe ni, ‘Adwoŋ, ciliŋ meri gin ene, ame agwoko aboo kede itambara; 21pien onwoŋo alwori, pien yin dano ager, itero gin a mom ikano, ikaa gin a mom icoo.’ 22En okobbe ni, ‘Abino Ŋolo kop loi kun lubo kop ame oya i dogi giri keni, yin amiro arac. Yam iŋeo ni an a dano ager, atero gin a mom akane, akao gin a mom acoo bo? 23Kara no omoni kano limma gira i beŋŋe, wek ka adwogo, agam limma kede agoba mere?’ 24Okobo baŋ jo ocuŋ i laŋete ni, ‘Gam wunu ciliŋ a tye baŋe oko, imi wunu baŋ won ciliŋ tutumia apar.’ 25Okobbe ni, ‘Adwoŋ, en doŋ tye i ciliŋ tutumia apar do! 26#Mat. 13.12; Mar. 4.25; Luk. 8.18Akobbiwu ni mano. Ŋat acel acel ame mere tye, obino miye, ento ŋat a mere mom, obino gamo oko gin a tye baŋe. 27Ento okworra a rik okwera, ni kur alogi-ni, kelgi wunu kan, inekgi wunu oko i nyima.’ ”

Yecu odonyo i Jerucalem acalo abaka

(Nen daŋ Matayo 21.1-11; Marako 11.1-11; Lakana 12.12-19)

28Ka Yecu otyeko kobo kop man, omedde kede wottere kun kwaro tur me wot i Jerucalem. 29Ame en doŋ ceggi tuno i Betepage kede Betania, i kidi ame olwoŋo kidi me Jeituni, ooro jo aryo i akina jo a lube, 30ocikogi ni, “Wot wunu i paco i nyimwu ca. Ka idonyo wunu iye, ibino nwoŋo wunu atin kana ame otweo, ame ŋattoro mom ru oyito i wie; gonyu, ikel wunu kan. 31Ka dano moro openyowu ni, ‘Igonye wunu me ŋo?’ wun ibino wunu kobo aman ni, ‘Adwoŋwa en ame amito.’ ” 32Jo ame oorogi daŋ owoto, onwoŋo i kite acalo okobbigi kede. 33Ame gin agonyo atin kana, wegi mere openyogi ni, “Kara igonyo wunu atin kana me ŋo?” 34Gin ogamo ni, “Adwoŋwa en ame amito.” 35Ote kelo atin kana baŋ Yecu, ote peto boŋŋigi i wie, ote cibo Yecu i wie. 36A doŋ en awot, gin opeto boŋŋigi i dye yo. 37Ka en onoko ceggi kede luŋ kidi me Jeituni, lwak jo a lube luŋ ocako lelo, dok opako Obaŋa kede dwon aloŋo pi tic atek adoŋo ducu ame gin oneno, 38#Jab. 118.26kun okobo ni,

“Opwo wunu abaka ame abino nyiŋ Rwot!

Kuc obed i polo,

kwogo bed malo i wi polo!”

39Oparicayo mogo i akina lwak okobbe ni, “Apwony, juk jo meri a lubi-ni.” 40En odok iye ni, “Akobbiwu ni mano, ka kono jo man liŋ i, kiddi magi en ame bino lunyo redo gigi.”

41Ka doŋ onoko ceggi, a doŋ oneno boma-nono, okoke, 42kun kobo ni, “Ka kono tin-ni iŋeo gin a kelli kuc! Cite onyoni opono oko i waŋi. 43Pien kare moro abino i komi, ame okworri bino toro tuti me lobo guri dyere, dok obino ridi tuŋŋi i tuŋŋi. 44Obino rwaci piny, yin kede itinoni a tye baŋi; mom obino weko kidi moro acel doŋ iyii ame ododde i wi wadgi, pien rik mom iŋeo kare ame olimi iye.”

Yecu oryemo ocat-wil i ot Obaŋa

(Nen daŋ Matayo 21.12-17; Marako 11.15-19; Lakana 2.13-22)

45Odonyo i ot Obaŋa, ocako ryemo jo a cato wil iye, 46#Ica. 56.7; Jer. 7.11kun kobbigi ni, “Nwaŋ ocoo ni, ‘Oda bino bedo ot me ka kwac’; ento wun iloko wunu odoko adu oyak.”

47 # Luk. 21.37 En obedo ka pwony i ot Obaŋa nino luŋ. Olamdog adoŋo kede opwonycik kede jo adoŋo i akina lwak oyenyo yo me neke; 48cite gin mom onwoŋo ginnoro a myero otim i kome, pien jo luŋ oketo cunygi i winyo koppere.

Currently Selected:

Luka 19: La79

Highlight

Copy