Luka 3

Kop ame Lakana Abatija orabo

(Nen daŋ Matayo 3.1-12; Marako 1.1-8; Lakana 1.19-28)

1I mwaka me tomon wie kany me loc a Tiberio Kaicari, Pontio Pilato onwoŋo obedo aloc me Judaya, Kerode onwoŋo aloc me Galilaya, ominnere Pilipo onwoŋo aloc me Iturea kede Trakoniti, Lucania onwoŋo aloc me Abilene, 2aco Anna kede Kayapa onwoŋo gin olamdog adoŋo; i kare-nono kop Obaŋa obino baŋ Lakana wot a Jekeria i tim. 3En owoto i lobo ducu ame ceggi kede Jordan kun rabo kop ni, “Ŋut wunu, wek batijawu, me Obaŋa wek balwu”, 4#Ica. 40.3-5 acalo ocoo i buk me kop adwarpiny Icaya ni,

“Dwon dano a redo i tim ni,

Ger wunu yo pi Rwot,

yik wunu gudo mere cuŋ atira,

5Luŋ ducu obino toro,

kidi kede tur obino odwoko piny,

kan ame ogonne obino miyo cuŋ atira,

yo obedo popony obino piro oko;

6jo ducu bino neno lar Obaŋa.”

7 # Mat. 12.34; 23.33 Lwak ecipan obino baŋe me ebatijagi; en okobbigi ni, “Wun itino ororo, ŋa ame okwenyorowu ni mano ber iriŋ wunu akemo Obaŋa ame bino tuno? 8#Lak. 8.33Nyak wunu doŋ nyig a myero me ŋut, kur dok icak tamo wunu ni, ‘Otye kede kwarowa en Iburaim’; pien akobbiwu ni, Obaŋa tye kede te ko me miyo gweŋe magi doko ikwae Iburaim. 9#Mat. 7.19Aman doŋ otyeko keto lee oko me toŋo lwit yen; yat acel acel a mom nyako nyige abeco, otoŋo, obolo i mac.”

10Lwak openye ni, “Kara wan doŋotim ŋo?” 11En ogamo ni, “Ŋat a tye kede kanyi aryo, pok i ŋat ame mere mom; ŋat ame tye kede cam, tim amannono daŋ.” 12#Luk. 7.29Oraocoro gin daŋ obino me batakinogi; gin openye ni, “Apwony, kara wan kono otim ŋo?” 13Okobbigi ni, “Kur ira wunu ame kato wel ame ocikowu.” 14Cirikali daŋ openye ni, “Wan kono otim ŋo?” Okobbigi ni, “Kur iyak wunu ŋattoro tetek, onyo idote wunu gobagoba; myero imi ocarawu romwu.”

15Ame lwak tye ka kuro, gin openyere i cunygi pi Lakana, ka kono ce ŋit en Kricito. 16Lakana okobbigi ducu ni, “An abatijawu kede pii, ento ŋattoro tye ame abino, en tek kata oko; an mom aromo gonyo del warrere. En bino batijawu kede Cuny Acil, dok kede mac. 17Odero mere tye i ciŋe, me yiko laro mere aber; bino nyono kallere i dero, ento cuŋe en bino waŋo oko kede mac a mom to.”

18Orabo amut aber baŋ lwak, kun cuko cunygi kede kop ocele apol. 19#Mat. 14.3-4; Mar. 6.17-18Ento Kerode ame aloc ame rik en Lakana ojuko pi Kerodia ci-ominnere, kede pi gin areco ducu ame Kerode otimo, 20omedo kop man i kom kop ocele Iuŋ, otweo Lakana i buc.

Yecu obatija

(Nen daŋ Matayo 3.13-17; Marako 1.9-11)

21Ka doŋ jo obatija ducu, ame Yecu daŋ obatija, ka en tye ka kwac, polo oyabere. 22#Age. 22.2; Jab. 2.7; Ica. 42.1; Mat. 3.17; Mar. 1.11; Luk. 9.35Cuny Acil obino acalo amam i cal me kom, opoto i kome. Dwonnoro oya i polo ni, “Yin woda ame amaro, cunya yom i komi.”

Kwari a Yecu

(Nen daŋ Matayo 1.1-17)

23I kare ame Yecu cako ticcere, onwoŋo doŋ tye kede mwaka me dittere a mito romo pyeradek. Rik en wot a Yucepu, acalo otamo, ame en wot a Eli, 24wot a Mattat, wot a Levi, wot a Melki, wot a Yannai, wot a Yucepu, 25wot a Mattatia, wot Amoc, wot a Nakum, wot a Eceli, wot a Naggai, 26wot a Maat, wot a Mattatia, wot a Cemein, wot a Yocek, wot a Yoda, 27wot a Yoanan, wot a Reca, wot a Jerubabel, wot a Calatiel, wot a Neri, 28wot a Melki, wot a Addi, wot a Kocam, wot a Elmadam, wot a Er, 29wot a Yocwa, wot Eliejer, wot a Yorim, wot a Mattat, wot a Levi, 30wot a Cimeon, wot a Juda, wot a Yucepu, wot a Yonam, wot a Eliakim, 31wot a Melea, wot a Menna, wot a Mattata, wot a Natan, wot a Daudi 32wot a Yece, wot Obed, wot a Boaj, wot a Calmon, wot a Nacon, 33wot Aminadab, wot Admin, wot a Arni, wot a Kejeron, wot a Perej, wot a Juda, 34wot a Yakobo, wot Icaka, wot Iburaim, wot a Tera, wot a Nakor, 35wot a Cerug, wot a Reu, wot a Peleg, wot Eber, wot a Cela, 36wot a Kainan, wot Arpakaead, wot a Cem, wot a Nua, wot a Lamek, 37wot a Metucela, wot Enoka, wot a Jared, wot a Maalalel, wot a Kainan, 38wot Enoci, wot a Ceji, wot Adam, wot Obaŋa.

Currently Selected:

Luka 3: La79

Highlight

Copy