Luka 5

Omako lwak rec apol ata

(Nen daŋ Matayo 4.18-22; Marako 1.16-20)

1 # Mat. 13.1-2; Mar. 3.9-10; 4.1 Ka rik lwak odiye baŋ Yecu pi winyo kop Obaŋa, onwoŋo en ocuŋ i dog nam me Genecaret. 2Oneno yede aryo i dog nam; ocik rec onwoŋo oya iye oko, otye ka lwoko bwoyigi. 3En te donyo i yee acel ame onwoŋo mea Cimon, okwae ni koŋ ekwaŋ anok i nam. En obedo piny, opwonyo lwak kun en tye i yee. 4Ka doŋ otyeko kop, okobo baŋ Cimon ni, “Kwaŋ iwot kan atut, irye wunu bwoyiwu me mak rec.” 5#Lak. 21.3Cimon ogamo ni, “Adwoŋ, doŋ ocanne kwe dyewor benebene, mom omako ginnoro, doŋ pi kop ikobonono, koŋ abino ryeyo bwo.” 6#Lak. 21.6Ka gin otimo kite-nono, omako lwak rec apol ata, bwoyigi te ero cocota oko. 7Ote gweto owotegi a tye i yee ocele ni bin konygi. Gin obino, ote loko rece i yede aryo luŋ opoŋ, doŋ ote cako lwiny oko. 8Cimon Petero ka oneno man, oryebere i coŋ Yecu, okobo ni, “Rwot, ape giri okoŋ, pien an dano ame abalo.” 9Pien en kede jo ame etye kede owuro pi rec ame gin omako; 10Yakobo kede Lakana itino a Jebedayo, ame rik ribere i tic gin i Cimon, gin daŋ owuro. Yecu te kobbi Cimon ni, “Kur ilwor; ya amanni ibino coko jo akaka rec.” 11Ka doŋ gin otyeko tero yedegi oko i wi tela, oweko jamigi luŋ, ote lube.

Yecu olonyo adobo

(Nen daŋ Matayo 8.1-4; Marako 1.40-45)

12Ka Yecu tye i boma moro, ŋattoro obino ame dobo onwanne i kome. Ka oneno Yecu, oryebere piny, obako doge ni, “Adwoŋ, ka imito, itwero lonya.” 13Yecu te ryeyo bade, te gude, kun kobo ni, “Ee, amito; lonyere giri.” Cucuttono dobo te ony i kome oko. 14#Olev. 14.1-32Yecu te cike ni pe myero kobbi ŋattoro. Dok te cike ni, “Woti, inyutte keni baŋ alamdog, imi mot pi lonyere meri, acalo rik Muca ociko, me bed anyut baŋgi.” 15Ento rwoŋe te dok medde winyere atek meicel. Lwak ecipan ocokere ka winyo Yecu, dok me can toogi. 16Ento en rik pokere oko, woto i tim kakwayo Obaŋa.

Yecu ocaŋo dano ame two too me akwea kom

(Nen daŋ Matayo 9.1-8; Marako 2.1-12)

17I nino moro acel Yecu onwoŋo tye apwony, kun Oparicayo kede opwonycik, ame oya i pacci ducu me Galilaya kede Judaya kede Jerucalem, onwoŋo tye i kome. 18Cucuttono jo te kela dano ame odyelo i tanda, ame two too me akwea kom. Gin omito tere i ot me owot opyele i nyim Yecu, 19naka mom onwoŋo yo me tere i ot, pi pol a lwak. Ote lunyo yito malo i wi ot, ote cwaye piny i akina mategula kede gibuto mere i dye ot i nyim Yecu, 20Ka en oneno iyeegi, okobo ni, “Lo-ni, balli doŋ oweko oko.” 21Opwony-cik kede Oparicayo te ero penyere kengi ni, “Man kara ŋa a kobo kop me yeto Obaŋa-nie? Ŋa ame twero weko bal, kono Obaŋa keken gire?” 22Ka Yecu oniaŋ i kom penyere megi, te gamo doggi ni, “Pino ipenyere wunu i cunywu? 23Kara ayottere mene, ka okobo ni, ‘Bali doŋ oweko oko’, onyo ka okobo ni, ‘Ya iwoti?’ 24Ento man me miyowu ŋeyo ni, Wot a dano tye kede twer i lobo me weko bal,” en te kobbi lo ame two too akwea kom ni, “An akobbi ni, ya, itiŋ gi-butoni, iwot giri paco.” 25Yotoyot en te cuŋ i nyimgi, otiŋo gin a rik opyele iye, odok paco kun pako Obaŋa. 26Gin ducu owuro atek meicel, daŋ ote pako Obaŋa; gin olworo atek kun okobo ni, “Oneno gin a welo tin.”

Yecu olwoŋo Levi

(Nen daŋ Matayo 9.9-13; Marako 2.13-17)

27Icennere Yecu te wot oko, dok te neno ara-ocoro ame obedo piny i ka rayo ocoro, nyiŋe Levi; okobbe ni, “Luba.” 28En oweko jami luŋ aluŋa, te ya lubo Yecu.

29Levi otedde arama adwoŋ tuŋe; onwoŋo lwak ora-ocoro apol kede jo ocele daŋ obedo piny i dog cam karacel kedgi. 30#Luk. 15.1-2Oparicayo kede opwony-cikgi oŋuŋura i kom jo a lubo Yecu kun openyogi ni, “Piŋo icamo dok imato wunu karacel kede ora-ocoro anaka obalo-gu?” 31Yecu te gamo doggi ni, “Jo a komgi yot mom mito dakatal, kono jo ame komgi lit. 32An mom abino me cwano jo ame kitegi atir, ento obalo, me gin ŋut.”

Peny i kom kanyo kec

(Nen daŋ Matayo 9.14-17; Marako 2.18-22)

33Jo mogo te kobbi Yecu ni, “Jo a lubo Lakana maro kanyo kec, kede kwayo Obaŋa, anaka jo a lubo Oparicayo daŋ, ento jo a lubi gin cemo dok mato.” 34Yecu openyogi ni, “Itwero wunu miyo owote a ŋat a nyom kanyo kec a kun en anyom tye baŋgi? 35Kare bino tuno ame obino kwanyo anyom oko i baŋgi, en a mio gin te kanyo kec i kare-nono.” 36Dok te kobbigi carokop ni, “Mom tye dano moro ame yeco dul boŋo i kom boŋo a pwod nyen, eka te dapo dok i kom boŋo ame doŋ oti. Ka ce en otimo kite-nono, bino lunyo yeco en anyen, dok dul boŋo anyen mom bino rwatte kede en oti. 37Dok mom tye dano ame piko koŋo anyen i ocoe acon; ka ce opiko, koŋo anyen bino yeco ocoe, dok bino ony, ocoe daŋ bino baile. 38Ento kono anyen myero pik i ocoe anyen. 39Mom tye dano moro ame, ka omato kono acon, dok yie te gomo en anyennere, pien kobo ni, ‘En aconnere mit wok.’ ”

Currently Selected:

Luka 5: La79

Highlight

Copy