Marako 9

1Dok okobbigi ni, “Ateni akobbiwu ni, tye jo mogo ame ocuŋ kan, ame mom bino bilo to, a mom ru oneno loc Obaŋa kun abino kede teko.”

Yecu olokere, onen apat

(Nen daŋ Matayo 17.1-13; Luka 9.28-36)

2 # 2 Pet. 1.17-18 Ame nino abicel doŋ okato, Yecu otero Petero kede Yakobo kede Lakana, oyito kedgi i wi kidi abor i muŋ, gin kengi. Kit kome te lokere oko i nyimgi, 3rukkere te doko acara kun tar meicel; mom tye dano moro i wi podo luŋ ame twero lwoko eka te lony amannono. 4Elia te nen baŋgi gin kede Muca, kun okop i Yecu. 5Petero te kobbi Yecu ni, “Rabbi, ber meicel wan ibedo kan; wek oger gonye adek, acel meri, acel mea Muca, acel me Elia.” 6Onwoŋo mom ŋeo gin a myero ekobi, pien lworo omako-gi atek. 7#Mat. 3.17; Mar. 1.11; Luk. 3.22Tipo pol te wumogi ipuk, dwon te ya i pol, ni, “Man en Woda ame amaro; winye wunu.” 8Gin te bobolo waŋgi oyotoyot, naka mom oneno dano moro, kono ka Yecu ame tye baŋgi-ni keken.

9Ame oyitto piny iya i wi kidi, ocikogi ni kur otit i ŋattoro gin ame gin oneno, ituno ka Wot a dano doŋ ocer i akina a jo oto. 10Gin ote mako koppono, doŋ gin kengi ote bedo penyere ni, “En cer i akina a jo oto ce te koppere no?” 11#Mal. 4.5; Mat. 11.14Ote penyo Yecu ni, “Piŋo opwony-cik kobo ni, Elia myero koŋ bin?” 12Okobbigi ni, “Elia koŋ bino tuno, me edwok jami ducu kakare. Ento kara dok ocoo nino i kom Wot a dano ni, myero en kany can adwoŋ, dok ni, obino caye? 13Ento an atittiwu ni, Elia doŋ otyeko bino, jo otime gin a yigi omito, acalo rik ocoo i kome.”

Yecu ocaŋo awobi won cen arac

(Nen daŋ Matayo 17.14-21; Luka 9.37-43)

14Ka doŋ gin otuno baŋ jo mere ocele a lube, oneno lwak ecipan ogurogi dyere, kun opwony-cik tye a pyem kedgi. 15Cucuttono ka lwak onene, gin luŋ owuro meicel, ote riŋo baŋe ka mote. 16Openyogi ni, “Kara ipyem wunu kedgi pi koppene?” 17Dano moro i akina lwak te gamo ni, “Apwony, onwoŋo akelo woda baŋi. En tye kede cen a mom kobo; 18i kabedo ducu ka cen ocuto i kome, dole piny, bwoo yenyo i doge, mio kao lake atek, riko kome oko. Doŋ akwao jo meri a lubi ni ryem, ryemo oloogi oko.” 19En ogamo ni, “Wun lwagi jo ame iyeewu mom, abino bedo kedwu naka awene? Abino diyo cunya i komwu ituno awene? Kele wunu baŋa.” 20Okele baŋ Yecu. Ka cen onene, oyotoyot omio awobi-nu oryeye; orette piny, onenne kun bwoo yenyo i doge. 21Yecu openyo pappere ni, “Doŋ otime kite man pi kare a rom mene?” Te gamo ni, “Kom cakere a pwod tidi. 22Tyen apol otemo neke kun rete i mac kede i pii-gu. Doŋ ka itwero timo ginnoro iye, tim ber ikonya.” 23Yecu te gamo ni, “Ka itwero! Jami luŋ twerre baŋ dano ame ye Obaŋa.” 24Papa atin te gamo oko oyot kun redo kede areda ni, “Aye; konya i kom iyeena anok-ki.” 25Yecu ka oneno ni lwak tye ka riŋo karacel, te juko cen arac kun kobo ni, “Yin cen a mom kobo, ame yiti odiŋ, aciki ni, ya oko i kom awobi, kur dok idok i kome atwal.” 26En okok, te bedo ryeye aryea atek, te ya oko; awobi te bedo bala dano oto, omio pol a jo okobo ni, “En oto oko gire.” 27Ento Yecu omako ciŋe, otiŋe, oya malo. 28Ka Yecu doŋ odonyo i ot, ame otye kengi, jo mere a lube openye ni, “Ŋo omono wan daŋ iryeme?” 29En te kobbigi ni, “Gin acalo man mom ya pi ginnoro, kono ka pi kwayo Obaŋa keken.”

Yecu dok otito pi to mere

(Nen daŋ Matayo 17.22-23; Luka 9.43-45)

30Gin oya i kuno, oŋolle i dye Galilaya. Yecu mom omito ni dano moro ŋee: 31pien onwoŋo tye ka pwonyo jo mere a lube, kun kobbigi ni, “Wot a dano obino miye i ciŋ jo, obino neke; a doŋ oneke, ame nino adek doŋ okato, en bino cer oko.” 32Ento gin mom oniaŋ koppono, daŋ ote lworo penye.

Ŋa ame loo kede dit?

(Nen daŋ Matayo 18.1-5; Luka 9.46-48)

33Nwaŋ otuno i Kapernaum. A doŋ otye i ot, Yecu te penyogi ni, “Kara koppene a woki ipyem wunu iye i waŋa yo?” 34#Luk. 22.24Gin ote liŋ aliŋa, pien nwaŋ obedo pyem kengi kengi i waŋa yo ni, ŋa i akinagi ame dit loogi? 35#Mat. 20.26-27; 23.11; Mar. 10.43-44; Luk. 22.26En te bedo piny, olwoŋo jo-nu apar wie aryo, te kobbigi ni, “Ka dano moro mito ebed me agege, en myero doŋ cen i ŋe owote mere ducu, bed aticgi ducu.” 36Otero atin, omio ocuŋ i akinagi, okwake kede bade kun kobbigi ni, 37#Mat. 10.40; Luk. 10.16; Lak. 13.20“Dano ame jolo atinnoro acel bala man i nyiŋa, nwoŋo ojolo an; dano ame jola, mom ojolo an, ento ojolo ŋat oora.”

Ŋat a mom akworwa tye tuŋ baŋwa

(Nen daŋ Luka 9.49-50; Matayo 10.42)

38Lakana okobbe ni, “Apwony, oneno ŋattoro ame aryemo cen kede nyiŋi, ojuke, pien onwoŋo mom lubowa.” 39Ento Yecu okobo ni, “Kur, ijuke wunu; pien mom tye dano moro ame tio ticcogo atek adoŋo i nyiŋa, ame bino twero kobo kop arac i koma oyotoyot. 40#Mat. 12.30; Luk. 11.23Pien ŋat a mom akworwa tye tuŋ baŋwa. 41#Mat. 10.42Dok ŋattoro ame bino miyowu ikopo me pii amata aŋic, ni, pien wun jo a Kricito, ateni akobbiwu ni, mot me pwoc mom bino rwenyo i baŋe kadi acelloro.

Gin ame omio dano poto i bal

(Nen daŋ Matayo 18.6-9; Luka 17.1-2)

42“Dano ame bino miyo ŋattoro acel i akina jo-ni atino-ni ame oye an opoto i bal, twara ame otweo kidi rego adwoŋ i ŋute, ote core kede nam. 43#Mat. 5.30Ka ciŋi en a mii ipoto, toŋ oko; twara idony i kwo ame ciŋi tuŋ cel mom tye, kato a kono oboli kede ciŋi ryoryo i Geena, i mac a mom to, [44Kuno kudi megi mom to, mac daŋ mom gik.] 45Ce ka tyeni en a mii ipoto, toŋ oko; twara ame idony i kwo ame tyeni tuŋ cel mom tye, kato a kono oboli kede tyeni ryoryo i Geena. [46Kuno kudi megi mom to, mac daŋ mom gik.] 47#Mat. 5.29Ce ka waŋi en a mii ipoto, kole oko; twara idony i loc Obaŋa ame itye kede waŋi acel keken, kato a kono oboli kede waŋi ryoryo i Geena. 48#Ica. 66.24Kuno kudi megi mom to, mac daŋ mom gik.

49“Pien kado ame bino lonyo dano acel acel en mac. 50#Mat. 5.13; Luk. 14.34-35Kado ber; ento kado ka odoko bot, iloko wunu doko amit iŋo? Bed wunu kede kado i yiwu kenwu, dok ibed wunu i kuc kenwu kenwu.”

Currently Selected:

Marako 9: La79

Highlight

Copy