Masmur 32
32
Ayao kakaije raura kakavimbe no Amisye Amun
1Daud apa ransyerano ananyao.
# 32:1-2 Ayao so ratoe akato no Roma 4:7-8. Vatano are nawirati awa ana udaveti ngkakai mamo Amisye Po rapaya mai,
muno awa ayao kakaije mamo Po raupae ti rakanive mai, onawamo manayanambe!
2Vatano are nawirati awa ana udaveti ngkakai mamo Amisye Po ratore ramu,
muno mansaunane mansake jewene nawamo manayanambe!
3Arono syo sya ayao kakaije raura kakavimbe rainy, weamo inanasine tename so mayondi,
weye masyote tename omainyamo syanonae tutir.
4Weye namane rinit winaneme mo rinatawanto mangkebe,
ti sya vambunine meweno rinai maisyare uma po rinanen ti rimayondi wemaisy.
5Weti umba risya ayao kakaije mamo syo raura kakavimbe Nai,
muno sya ana daveti ngkakai mamo syo rangkokaibe Nai ramu.
Syo rapatimu indamu sya ana daveti ngkakai mamo idaura kakavimbe no AMISY Winamun,
umba Winyo inapaya irati sya ayao kakaije so rai tenambe.
6Maisyare omaiti, koveamo vatane nanentabo matawandi ti utavondi Amisye Winai nawamo usambayambe ore Nai,
arono unanta irati ana nsosobe rai weamo wore no Winui.
Ranivara mansansowave ana nsosobe rai, maisyare manayamo akoe inta mo mansarone wemaisy,
weamo mo maugave jewen.
7Winyirati varoro syakaore kokaibe Nai,
ana nsosobe mamo Winyirati no rinaora irati rai.
Winyo inapaya rai to, ti rikiny inananibe,
weye Winyirati Nyo inakom.
8Amisy Po raura pare: ‘‘Syare Syo nanyao ana ratantona ngkove rai,
muno Syo naroron irati nya unanuijo nyo raito rai,
syare Syo ananyao raugaje nai muno Syo nayaranande.
9Mbemo maisyare kuda amai nora,
weye ana ratantona meweno ai,
weti ranivara nyo waije ransawa ai jewen,
weamo tavono nya mbekere rai ramu.’’
10Vatano mamune nawamo unanta irati siuri manui rai,
yara vatano mansanaveano AMISY amene nawamo,
Apa muinyo no tawane mo mansakom ntoa nuge nuganui.
11Inya, vatano wabeta AMISY Ai weap, wasananibe muno wasanayanambe Apa ana dave rai!
Inya, vatano watavondi Amisye Apa bekere rai weap, wagwain wasananibe!
Currently Selected:
Masmur 32: yva
Highlight
Share
Compare
Copy
Want to have your highlights saved across all your devices? Sign up or sign in
© 2011 Yayasan Sumber Sejahtera (New Testament)
@ 2019 Yayasan Kartidaya (Psalms)