Masmur 34
34
Kove raura AMISY Ai Apa kove rai
1Masmur Daud po ratoe, arono be ponaibe maisyare vatano anaivi wemaisy no Abimelek amun, weti Abimelek po awatan ti pusyo.#34:1 1Sam. 21:10-22:1, weramu mo akari titi apa tame rawainamo ‘‘Akis,’’ yara Pemasmur po apa tame rawainamo ‘‘Abimelek.’’
2 # 34:2 Masmur somamo ransyerano Ibrani akrostik inta mije, weye ntavondi urupijo Ibrani ama ntetebeaje rai. Weramu ayao Yawa ntavondi urupije so rai jewen.Syare rikangkamambe AMISY Ai masyote anteter,
rikangkamambe Aije mamo mpaya inawa rai intai ramu.
3Syo AMISY ararimbe weye apa ana dave mbewar,
koveamo vatano matawanto wo ranaun muno manayanambe.
4Syare wade, wantenambe wamo AMISY aijaseo titive,
wade tenambe wamo Apa tame raijaseo titive.
5Syo AMISY anajo, muno Po sya ana danajo raveti mamaisy,
muno Po inapaya irati anakotaro idasyanive so rai.
6Vatano usaroro AMISY obo Ai nawamo indati manayanambe,
muno usamane akatoe ramu.
7Risyamo vatano inatawanto, arono syanonae AMISY Po rinaraniv,
ti Po inapaya irati ana nsosobe inaije rai tenambe.
8Vatano wo AMISY asyanive nawamo Apa naite wo mansayan kijani, wo mansayaranande,
indamu po mapaya irati kakai rai.
9Wade ra wapo ranaun muno wapo raen tavon: AMISY Opamo kov dave!
Kove ngkov irati vatano mansamamavube Aije mai!
10Inya, vatano wasatayao terave AMISY Ai weap, syare wapo asyaniv,
weye vatano wo asyanive nawamo indati una irati ana jajewembe rai ramu.
11Make sivuinye#34:11 make sivuinye ranigwano ‘‘singa’’ rai. pamo maror weye apa anaisye meweno ai,
yara vatano ubekero AMISY Ai nawamo indati anakotaro kove meweno mai jewen.
12Inya, arikainye weap, wapo inaranide,
risyo wasanyao indamu wapo AMISY asyaniv.
13 # 34:13 Anemo 13-17a ama ayao ratoe akato no 1Petrus 3:10-12. Are nyirati mbeker nya tume nggwaravainy arono ntuna no mine so,
muno mbeker nyo ama kove raen,
14weamo syare nyo taune nawa rayaranande indamu vemo nyo ana ngkakai inta raura inya,
muno nyo aarurijate inta raker inya.
15Syare nakirive ana ngkakai rai, yara nyo ana ngkove obo rave tutir,
muno mbekero panyoambe indamu nanuga nsaumano vatan tenambe mansai.
16AMISY ami ntetero vatano ubeta Aije mai,
Po mansayaranande muno Po awa sambaya wo awaine raraniv.
17Yara vatano awa ana udave ngkakainoanive nawamo, AMISY be marovave mai,
ranivara ugwenen to, weamo Po awa tame raupaisy ti vatano mine so inta mansaemen akato mai ramu.
18Ranivara vatano ubeta AMISY Ai wo awain, weamo Po maraniv,
muno Po mapaya irati ana nsosobe maije rai tenambe.
19AMISY pararai irati vatano manuga mpatimu mai,
muno vatano siurije mo mansakupi nawamo Po mapaya rai.
20Vatano ubeto AMISY Ai nawamo, indati unanta irati siuri manui rai tavon,
weramu awa siuri wem AMISY Po rapaya tenambe mai.
21Wepi Po mansayaranande vintabo.
Tugae! Awa pae mamo inta daute ramu.#34:21 Yoh. 19:36
22Vatano mamune nao ugweneno taune awa ana udave ti ngkakai rai,
muno are nawirati manuga mamuno vatano kove mai indati mangke makare mai.
23AMISY Po Apa vatano wanapatambe Ai mapaya kakaije rai,
muno vatano mansamamavube AMISY Ai nao, Po mangke raugaje mai jewen.
Currently Selected:
Masmur 34: yva
Highlight
Share
Compare
Copy
Want to have your highlights saved across all your devices? Sign up or sign in
© 2011 Yayasan Sumber Sejahtera (New Testament)
@ 2019 Yayasan Kartidaya (Psalms)