Masmur 36

Vatano mamune awa ana udave muno Amisye Apa muinye

1Daud wepi vatano panapatambe AMISY Ai, po ratoe. Nto irati akari po vatano matayao ukiny maugavo ransyerane rai ai.

2Vatano mamune opamo ayao kakaije obo mirati ntubai anuga rai,

Po Amisye asyanive mamo meweno ai.#36:2 Roma 3:18

3Weye opamo po taune ararin dave,

weti aemendi apa ayao kakaije rai jewen muno ponae rai ramu.

4Awa mamo ntairijo ayao kakaije obo rai muno anapamponae rai,

ana ratantona ntiti ngkove mamo po rapaya ti ntami muno ponae po ana ngkove ravei.

5Arono naman panatantonave kakaije obo rai tutir no apa niki ri,

po anasine raugavo unanuijo kakaije raito,

apa ana dave mamune mamo po rapaya ra ntami ramu.

6Sya AMISY, Nya muinyo no tawane mamo ntitito no naume warae,

muno winteto Nya urairi rai mamo nto rave no kamure rai.

7Nya moyare ntitito rave maisyare unato titi ntindimu no tawan,

Nya ana ndapatimuge mamaisy ngkambito rave rarope kakai maisyare mayano tento ramaisy.

Sya AMISY, Winyi Nyo vatane muno maere kotare rakum tenambe.

8Wakoe, sya Amisy, Nya muinyo no tawane mamo ama ngkove manakoeyo reansai!

Vatan tenambe ugaugambe Nai maisyare mangkuere tuvane gaugambe irati akoe ama pepak ate rai.

9Anaisyo mawes Nyo ratayao ti ntuna mansamarom no Nya yavare rai mamo wenao tenambe wisyisyo rai.

Winyo mana raunande ti wo ramanam, omamo mana nori rati Nya mana ami mo anayanambe raugave rai.

10Weye Winyirati anakotar tenambe njayaisyo Nai,

Taune Nya vare wemirati reangkovo rai.

11Ribeker syare Nyo Nya muinyo no tawane raugaje vatano wo naen tugaive mai,

muno Nyo ana ngkove rave irati vatano manuga nsarokire mai.

12Syare vemo vatano mararine wo rinatakar asyo nora,

muno vatano mamune wo inawatambe syusyo inya.

13Wapo raen! Vatano maneme mamumbe utataopon to,

wenawamo Amisye Po maugaje mavari, weti usea sayae akatoe kakai.

Currently Selected:

Masmur 36: yva

Highlight

Compare

Copy

Popular Bible Verses from
Masmur 36