Masmur 41
41
Amisye anajo ra Po saumane raude nai no arono nggwanen
1Masmur Daud po ratoe. Nto irati akari po vatano matayao ukiny maugavo ransyerane rai ai.
2Kove ngkov irati vatano are pirati aemeno vatano awa ana jajewembe mai ai,
opamo arono ana nsosobe nande ai indati AMISY Po apaya rai.
3Vatano napije pamo AMISY darino aora, muno Po ayaranande indamu jayaisy tutir.
Weti vatane wo aura ware opirati vatano no anayanambe rai no munijo Israel pijep,
muno Winyo aunanto apa marova manem uga rai jewen!
4Arono niki doyabe apa wanene rautan, AMISY Winyo ayaranande,
muno Nyo saumane raude ai.
5Yara risyamo syo raura, syare: ‘‘Sya AMISY, rigwambe ayao kakai rai no winamune rai to,
weramu syare naemeno rinai, Nyo saumane raude rinai!’’
6Sya marova wo mamune ratantona rinai,
ubeker dave indamu rikakai muno rinakaniveto.
7Vatano ude wo rinapane nawamo wayao angkarive,
ude indamu wo rinakani ayao mamaisye jewene rai,
umba wusya wo rinampami no nuge we raito.
8Vatan tenambe nanawirati manuga mamuno rinai usaamugadi wo rinaura tantunawi,
ubeker ware ana ngkakai nande rinai.
9Wo rinaura ware: ‘‘Apa wanene mangke dave kobe ai kai,
indamu opamo vemo beseove akato inya.’’
10Muno sya arakovo ingkavave muno syanave ai rave,
ririmisyisye mamai dave, sakinav akare ti po rinangkukuv.#41:10 Mat. 26:23; Mrk. 14:18; Luk. 22:21; Yoh. 13:18,26
11Weramu sya AMISY, syare naemeno rinai,
Nyo vambunine raugav akare rinai indamu syo ana ngkakaijo wo rave rinaije rasakinav akananto mansai.
12Ranivara marova wo anasineko rinai akatoe ramu,
weamo syo raen Winyamo nanayanambe rinai.
13Risyamo Winyo sopambe rinai, weye rinanuga so nsarokir,
muno Nyo rinaugav ti rituna winatavon ntoa nuge nuganui.
14AMISY ararimbe! Opirati Amisy vatano Israel wambeaje Ai pije,
no nugo pitawarowe ntoa nuge nuganui.
Tugae, syare tugae!
Currently Selected:
Masmur 41: yva
Highlight
Copy
Compare
Share
Want to have your highlights saved across all your devices? Sign up or sign in
© 2011 Yayasan Sumber Sejahtera (New Testament)
@ 2019 Yayasan Kartidaya (Psalms)