Masmur 45
45
Ransyerano kiny dai no arono akari titi apa ono vauname rai
1Ransyerano ananyao susyo Kora wo ratoe. Nto irati akari po vatano matayao ukiny maugavo ransyerane rai ai. Ransyerano muiny, ukiny dai arono ono akari titi apa vauname rai. Ransyerane so ama kine mo ransyerano kaijinta ramaisy tavon, namirati ama akari mare: ‘‘Aepare ama ug.’’
2Inanuga so mbekero mo ayao ngkov dave rauguje,
sya ransyerane somamo syo veano akari titi angkakivambe.
Maisyare vatano aneme nsiridi po pena veano ayao ngkov dave ratoe amaisy,
rinaunane sopamo maweso po ayao ngkov dave raura.
3Akari titi winamune mamo ngkov daveo anya kaije makivan,
nawa mamo ntairi ayao ngkov dave rai.
Maisyare omaiti, wandaen Amisye Po kove raugaje nai,
ntoa nuge nuganui.
4Inya, akari titi baribuai winy, nyo nya omako marova ransawa no nateriri,
winyirati anaaniv kakui muno nya kovo ntiti mo namuman!
5Nyusyo irati nya vambunino anaanive rautan indamu nyo anasineko marova rai,
wirati indamu nyo marimbe vatano mayondi mai muno winteto ayao tugae rai muno moyare rai.
Syare nya nanem ngkov vambunine mo anasineko mbe anaanibe ratande nai.
6Nya ato nsasiu dave mamo, syare mo nya marova awa okami raukidi,
susye kotare nawamo nyo mataopon aje ntuna no najo ate rai.
7 # 45:7 Anemo 7-8 ratoe akato no Ibr. 1:8-9. Amisye Pi Po vambunine raugaje nai ti,
winya mbe akarive mamo indati ntoa nuge nuganui,
nya mbe akari titive mamo ana mamaisye obo mirati ndapatimugo vatane mai.
8Winyamo nanuga no irati ana ngkove obo rai, yara ana ngkakainoanive mamo nanuga mamuno rai tenambe.
Wemi mbewar Amisy, Opirati Amisy wimbeaje Ai, Po napatimu indamu Po naijaseo akari titi rai,#45:8 Ayao Ibrani mo ratoe maisyare so: ‘‘Amisye Po manino mbovove rauvaro nakari rai.’’
muno Po naveti nanayanambe rave mo akari titi kaije makivan.
9Nya ansuno manawadi mamo manino mbovove muno inyo mbovove ama ranavane ntami rai.
Wintuna no nya yavaro akari titi namirati korodowai popere#45:9 korodowai popere omamo gaja apa korodowai raugav ti raotadi indamu veano yavaro akari titi rainyave. rave rainyave rai.
Muno itari ama kine mo nanuga raveti ranayanambe.
10Akari titi kaije awa wanya arikainye inta nawamo ude
utavondi wanya wanapatambe nai mansai.
Yara nai taune nya nanem ngkove omamo wanya nyare ndaovane nteto narijat no we,
omamo rainyave emasijo kakui rai.
11Inya, wanya winy, syare ndanide muno ndaen kobe,
syare vemo ndatantona makato nya susye mai muno nya yavaruga mai jinya.
12Koveamo akari titi anuga ntento nai weye winamune ngkov dave,
weti mbeaje ai, weye opirati vatano akoe be akarive nai pije.
13Indati kawasae Tirus ude wo romane raveaje namarom,
vatano awa ananuge manui ubeker ware wo nanuga raugabe indamu nyo kove rarorono mai.
14Wanya rangkaivovambe akari titije ai rainyave ti nsamorive, raugave nsiso no apa tanoano tuna ri,
ansuno mo rave mamo ama vararauno emasije nsaawa rai.
15Raasaro ansuno nsev dave rai raugaveta akari titije ai,
ama arakovo wanya mansae utavondi udijat uta no akari titi ai.
16Onawamo mananibe muno manayanambe rave,
arono maugaveta usisa no akari titije umaso apa yavar.
17Akari titi winy, nya arikainyo anya nao indati wakaseo wo awa anene manigwan utantuna akari titi rai,
onawamo nyo maijaseo ube akari titive no mine tename so rai.
18Syo ransyerane so veano nya tame raijaseo titive,
indamu susyo mbakipambe mansaemeno nai tutir;
maisyare omaiti, susye kotare wo nangkakivambe ntoa nuge nuganui.
Currently Selected:
Masmur 45: yva
Highlight
Copy
Compare
Share
Want to have your highlights saved across all your devices? Sign up or sign in
© 2011 Yayasan Sumber Sejahtera (New Testament)
@ 2019 Yayasan Kartidaya (Psalms)