Masmur 47
47
Amisy Akari Titi mine tename so
1Masmur vatano susyo Kora wo ratoe. Nto irati akari po vatano matayao ukiny maugavo ransyerane rai ai.
2Inya, vatan tenambe weap, wasaneme rapoam, wasananibe!
Wapo Amisye aovambe, wasanamote raijasea manakoeve!
3Weye AMISY Titi Rave, Opamo anaaniv,
Akari Titi panakoeve mine so rai tenambe.
4Wepirati Po susye kotaro ntuna no wama munijo Israel so rakijani mapinde.
Po vambunine raunande wansai ti
wama marova utataaje no wansanem ate rai.
5Wepi Po wama kopa no tawan ratayao wansai,
weye muinyo Yakop apa susye#47:5 Ayao Ibrani maisyare so: ‘‘Yakop apa susye,’’ ama ine mare kawasae Israel. wansai,
kopa wansanuga manakoeve rai.
6Amisye seo tuna Apa kursijo titi rai to,
ti vatane mananibe ugwain Amisye aijaseo titive.#47:6 Arono rui vatano Israel wo Kasyamo Urairi Amisye rauga siso no Yavaro Amisye rai, onawamo mananibe weye omamo raurata irati Amisye seo tuna no Apa kursijo titi rai.
AMISY seo to ti tavuna ama kine veano aovambe.
7Wakiny, wakiny, Amisy ararin,
Wakiny, wakiny, wama Akari Titi ararin!
8Weye Amisy Wepirati Akari Titi mine tename so pije.
Wakiny, wakiny ransyeran ama kine ngko dave rai.
9Amisye tuna no Apa kursijo titi ndandinite rai,
be akarive vatano susyo mine so mansai.
10Akarijo titi susyo mine so wangkuire, Amisye Apa kawasae matavon,
no Amisyo napirati Abraham panave Aije Amune rai.
Weye Amisye Opamo titi rave,
Opirati Akari Titi be akarive akari titi mine so mansai tenambe.
Currently Selected:
Masmur 47: yva
Highlight
Copy
Compare
Share
Want to have your highlights saved across all your devices? Sign up or sign in
© 2011 Yayasan Sumber Sejahtera (New Testament)
@ 2019 Yayasan Kartidaya (Psalms)