Masmur 52
52
Amisye Po mangke raugaje irati vatano aarurijate mai
1Daud apa ransyerano ananyao, nto irati akari po vatano matayao ukiny maugavo ransyerane rai ai. 2Arono Doeg, vatano Edom, de po raura nanto Saul ai pare Daud to nanto no Abimelek apa yavar to.#52:1-2 Ayao mo Doeg aura raen no 1Sam. 21:7, 22:9-19. Daud po apa marova maura seo Amisye Ai no taiso:
3Inya, vatano mbambunine winy,
veanimaibe masyote tename opamo winararino nya ana ndaveti mamune rai,
namirati nyo rave nanto irati vatano Amisye muinyo#52:3 Ayao Ibrani hesed ama ine mare: ‘‘Amisye Apa muinyo Po raurairive no tawano Apa kawasae mai indati Po raveti mamaisy.’’ maije mai?
4Winyamo naunane maisyare vansyerere we,
weti nyo aarurijate rator tutir,
muno nyo mamune ratantona vatano kaije mai.
5Winyamo mbekero ana ngkakai rai mo nya mbekero ana ngkove rai rakivan,
muno winyamo mbekero aarurijate rai mo nya mbekero ayao tugae rai rakivan.
6Inya, vatano naunane mansake winy,
wimbekero ayao rator ti mo vatane manuga raveti njorame obo rai.
7Weramu indati Amisye Po nya vambunine muno nya tamo ntiti raupaeta ti rakanive ntoa nuge nuganui.
Po nantaun muno Po nakarimu uje no nya yavare ama uga rai,
umba Po naubaisy ti Po nakuvu asyo wene rai.
8Weti vatano ubeta Amisy Ai wo ranyanyut unantoive rai rave,
muno wanaikebe vatano mamune so ai.
9Wo raura ware: ‘‘Inya, wapo vatane so aen!
Ponae saroro Amisye Aiji.
Yara anaveano apa ananugo manui obo ramen,
muno saroro apa vambunino po rave vatane mandamisye rai.’’
10Weramu risyamo maisyare inyo saitun njayaibe ntubai no Yavaro Amisye rai,
weti risyamo rino kovo ngko dave obo rai.
Syanave Amisy Apa muinyo no tawane raija ntoa nuge nuganui.
11Risyo kove raura seo Amisye Winai tutir ntoa nuge nuganui,
weye anakotaro ngkove mamo Nyo raveti mamaisyo rinai to.
Winyamo ngkov dave, weti syo Nya tame raura tutir
no Nya kawasae nanawirati matawandi utavondi Nai mansamun.
Currently Selected:
Masmur 52: yva
Highlight
Copy
Compare
Share
Want to have your highlights saved across all your devices? Sign up or sign in
© 2011 Yayasan Sumber Sejahtera (New Testament)
@ 2019 Yayasan Kartidaya (Psalms)