Masmur 59
59
Amisye anajo indamu darino wansaora
1Daud apa ransyerano Masmur po ratoe, arono Saul po apa naite matutir ude wo Daud anyanyuti no apa yavar indamu wo aubaisy.#59:1 1Sam. 19:11-17 Nto irati akari po vatano matayao ukiny maugavo ransyerane rai ai. Ransyerane so ama kine mo ransyerano kaijinta ramai tavon, namirati ama akari mare: ‘‘Vemo wapo vatane maupaisy inya.’’
2Sya Amisy, syare Nyo inapaya irati sya marova mai,
muno Nyo inayan kijani irati vatano ubesea ti umarovave rinaije mai.
3Syare Nyo inapaya irati vatano awa ana udave mamune mai,
muno Nyo inapaya irati vatano maneme nijame mai.
4Sya AMISY, risyamo sya ana dave inta ngkakai ramu muno sya ayao kakai meweno rinai.
Weramu Nyo raen! Sya marova ukaokaibe ti wo inaman, ware wo inaubaisy,
vatano usansinao wanugan ti maroyaro rinai.
5Risyamo syo ana inta ravera ngkakai ramu,
weramu onawirati wavave wanatatayaube ra wo rinaubaisy.
Mbeseo ra Nyo rinaen! Syare Nyo inapaya irati mai.
6AMISY, Winyirati Amisy Akari Titi naito munijo ntiti,
Winyirati Amisy vatano Israel ubeaje Nai.
Mbeseo ra Nyo mangke raugaje susyo wanave Nai jewene mai,
vatano mamun nanawirati wo awa arakove mansamavune nawamo vemo wimbekobe mai nora.
7Arono namandi, onawamo wakare akato,
muno wanya wo muni rakijani,
maisyare make karirimbe wemaisy.
8Nyo mansaen, onawamo wo vatane maura tantunawi obo mirati mawa mpaato rai tutir,
awa ana udatore mamo nsansinao dave maisyare omake wemaisy,
weye wo ratantona ware awa ana udatore mamo Amisye Po mansanaun dai ramu.
9Weramu AMISY, Winyamo nyugoeno mansai,
muno Nyo susyo wanave Nai jewene mansakekebe tenambe.
10Winyirati sya vambunine nsawa Nai, inanaveano namen,
weye Winyirati sya yano oram ntiti no rinaora.
11Sya Amisye Apa muinye no tawano rinai, weti indati Opamo de teto rinatavon,
sya Amisy indati Po inaveti inami ntami sya marova mai anawadive arono Po mataopon.
12Vemo Nyo mansaubaisyo usyeta kobe inya, indamu sya kawasae wo mansaeno Nyo mangke raugaje maiji,
yara Nyo mampusyeko Nya vambunine rai.
Sya Akoe, Winyirati ndarino reansaora, syare Nyo mapinde.
13Weye onawamo ayao kakai obo mirati no mawa rai,
weti koveamo umararine mamo maisyare isyeano taune wakare ti usaawa rai wemaisy.
Weye onawamo wanaamatambe vatane mai vayave muno wayarurijabe.
14Weti Amisy, syare Nya pari mangke mo maupaeta,
Nyo maupaeta ra makanive.
Indamu vatan tenambe wo raen, Winyirati mbe akarive Israel mai,
muno muni tename so rai tenambe.
15Arono namandi, onawamo wakare akato,
wo kakai ratantona, ti wanya wo muni rakijani,
maisyare make karirimbe wemaisy.
16Wanya umandayan wo anaisye rakani,
ranivara uman dainy weamo ukaririmbe.
17Yara risyamo Nya vambunine mirati rikinyo rai,
muno awatan ngkove anteteramo Nya muinyo no tawane mirati rikinyo ransyeran marinsawane raijo rai.
Weye Winyirati yano oram ntiti no rinaora,
ti inamamavube Nai arono rino irati ana nsosobe rai.
18Sya Amisy, Winyirati sya vambunine nsawa Nai,
rikiny syo nararimbe.
Weye Winyirati yano oram ntiti no rinaora,
Sya Amisy, Winyirati Nya muinye no tawan.
Currently Selected:
Masmur 59: yva
Highlight
Copy
Compare
Share
Want to have your highlights saved across all your devices? Sign up or sign in
© 2011 Yayasan Sumber Sejahtera (New Testament)
@ 2019 Yayasan Kartidaya (Psalms)