ᐅᐸᓓᑭᔅ ᒫᑎᐤ 12
12
ᑖᓐ ᑫ ᑮ ᑐᒋᑳᑌᑭᐸᓐ ᐁ ᐋᔭᒥᐁᑭᔑᑳᓕᒃ
(ᒫᕐᒃ 2:23–28; ᓘᒃ 6:1–5)
1ᐁᑯᔅᐱ ᒫᑲ ᐁ ᐋᔭᒥᐁᑭᔑᑳᓕᒃ ᒋᓴᔅ ᐁ ᐱᒧᑌᑦ ᑮ ᔕᐳᔥᑲᐌᐤ ᒪᑖᒥᓇ; ᐅ ᑭᔅᑭᓄᐊᒪᐙᑲᓇ ᒫᑲ ᑮ ᐎ ᒥᒋᓱᓕᐗ, ᑮ ᒫᒋ ᒪᓂᐱᑌᓕᐗ ᒫᑲ ᒪᑖᒥᓇ ᐁ ᐅᔅᑎᒀᓂᐎᓕᒋ, ᓀᔥᑕ ᑮ ᒧᐌᓕᐗ᙮ 2ᒫᑲ ᐃᔅᐱ ᐸᕋᓯᔭᒃ ᐎᐋᐸᑕᑭᒃ, ᑮ ᐃᑌᐗᒃ, ᒫᑎᑲ, ᑭ ᑭᔅᑭᓄᐊᒪᐙᑲᓇᒃ ᑐᑕᒶᒃ ᐊᓂᒪ ᐁᑳ ᑫ ᑐᒋᑳᑌᑭᐸᓐ ᐁ ᐋᔭᒥᐁᑭᔑᑳᒃ!
3ᒫᑲ ᑮ ᐃᑌᐤ, ᓇᒪ ᓈ ᑭ ᐅᒋ ᐋᔭᒥᑖᓇᐗᐤ ᑳ ᑮ ᑐᑕᒃ ᑌᐱᑦ, ᐃᔅᐱ ᐙ ᒥᒋᓱᑦ, ᐊᓂᐃ ᓀᔥᑕ ᑳ ᐎᒉᐎᑯᑦ; 4ᑳ ᐃᔑ ᐱᑐᑫᐙᑦ ᑭᒋᒪᓂᑐᐗ ᐅ ᐙᔅᑳᔨᑲᓂᒥᓕᒃ, ᐁ ᑮ ᒧᐙᑦ ᓀᔥᑕ ᐅᓚᔅᑣᑯᐎ ᐊᓚᑯᓇᐗ, ᐁᑳ ᑫ ᑮ ᒧᐙᔅᐸᓐ, ᓀᔥᑕ ᐊᓂᐃ ᑳ ᐎᒉᐎᑯᑦ, ᓵᓵᑭᐎᓕᐌᐎᓕᓕᐗᒃ ᒫᑲ ᐱᑯ? 5ᓇᒪ ᓈ ᓀᔥᑕ ᑭ ᐅᒋ ᐋᔭᒥᑖᓇᐗᐤ ᐅᓚᔓᐌᐎᓂᒃ ᐁ ᐋᔭᒥᐁᑭᔑᑳᓕᒃ ᓵᓵᑭᐎᓕᐌᐎᓕᓕᐗᒃ ᐁ ᐱᑯᓇᑭᒃ ᐋᔭᒥᐁᑭᔑᑳᓕᐤ, ᓇᒪ ᒫᑲ ᒪᒋ ᐃᑌᓕᑖᑯᓯᐗᒃ? 6ᒫᑲ ᑭᑦ ᐃᑎᓇᐗᐤ, ᐅᑕ ᐃᑖᐤ ᐯᔭᒃ ᐊᐙᓯᑌ ᑳ ᐃᔅᐯᓕᑖᑯᓯᑦ ᐃᔥᐱᔥ ᑭᒋᐋᔭᒥᐁᐎᑲᒥᒃ᙮ 7ᒫᑲ ᑮᔥᐱᓐ ᑭ ᑭᔅᑫᓕᑕᒧᐌᑭᐸᓐ ᐅᒪ ᑳ ᐃᑗᒪᑲᒃ, ᓂ ᑳ ᐋᔮᓐ ᔕᐌᓕᒋᑫᐎᓐ, ᓇᒪ ᒫᑲ ᓵᓵᑭᐎᓕᐌᐎᓐ, ᓇᒪᐎᓚ ᑭ ᑳ ᒪᒋᐃᑌᓕᒫᑕᐙᐗᒃ ᐁᑳ ᑳ ᒪᒋᑐᑕᑭᒃ᙮ 8ᐌᓴ ᐃᓕᓕᐎᑯᓯᓵᓐ ᑎᐯᓕᑕᒻ ᓀᔥᑕ ᐁ ᐋᔭᒥᐁᑭᔑᑳᓕᒃ᙮
ᐃᓕᓕᐤ ᐁ ᓂᐱᒫᑲᓂᓕᒃ ᐅᒋᒋ
(ᒫᕐᒃ 3:1–6; ᓘᒃ 6:6–11)
9ᐃᔅᐱ ᒫᑲ ᐊᓐᑕ ᑳ ᑮ ᐅᒋ ᑭᑐᑌᑦ, ᑮ ᐱᑐᑫᐌᐤ ᐅᑦ ᐋᔭᒥᐁᐎᑲᒥᑯᓕᒃ: 10ᒫᑎᑲ, ᒫᑲ, ᐊᓐᑕ ᑮ ᐃᑖᐤ ᐃᓕᓕᐤ ᐁ ᓂᐱᒫᑲᓂᓕᒃ ᐅᒋᒋ᙮ ᑮ ᑲᑴᒋᒣᐗᒃ ᒫᑲ, ᐁ ᐃᑗᒋᒃ, ᐅᓚᔓᐌᓕᑖᑾᓐ ᓈ ᑭᒋ ᒥᓇᐙᒋᐃᐙᓂᐗᒃ ᒣᒀᒡ ᐁ ᐋᔭᒥᐁᑭᔑᑳᒃ? ᑭᒋ ᑮ ᒫᒥᔑᒫᒋᒃ᙮
11ᑮ ᐃᑌᐤ ᒫᑲ, ᑫᑯ, ᐃᓕᓕᐤ ᐁ ᐃᑕᔑᔦᒃ ᑳ ᐋᔭᐙᑦ ᐯᔭᒃ ᒫᓂᔥᒑᓂᔕ, ᑮᔥᐱᓐ ᐸᑭᔑᓂᓕᒋ ᐙᑎᑳᓂᒃ ᐁ ᐋᔭᒥᐁᑭᔑᑳᓕᒃ, ᓇᒪ ᓈ ᑲᑕ ᒫᑯᓀᐤ, ᓀᔥᑕ ᐗᓚᐎᐱᑎᐤ? 12ᐙᐐᔅ ᐎᓚ ᒫᑲ ᐃᓕᓕᐤ ᐊᐙᓯᑌ ᐁᑌᓕᑖᑯᓯᑦ ᐃᔥᐱᔥ ᒫᓂᔥᒑᓂᔥ! ᐁᐗᑯ ᐌᒋ ᐅᓚᔓᐌᓕᑖᑾᓐ ᑭᒋ ᒥᓗ ᑐᒋᑳᑌᒃ ᐁ ᐋᔭᒥᐁᑭᔑᑳᑭ᙮ 13ᐁᑯ ᐁᑖᑦ ᐊᓂᐃ ᐃᓕᓕᐗ, ᔓᐎᓂᔅᑫᓕ᙮
ᑮ ᔓᐎᓂᔅᑫᓕᐤ ᒫᑲ; ᐁᑯ ᒫᑲ ᑖᐱᔅᑯᒡ ᑯᑕᑭᓕᐤ ᑭ ᒥᓇᐙᒋᑖᓂᐗᓂᓕᐤ᙮ 14ᐁᑯ ᐸᕋᓯᔭᒃ ᐌᓚᐎᒋᒃ, ᑮ ᐋᔭᔭᒥᐃᑐᐗᒃ ᒫᑲ, ᑖᓂ ᑫ ᐃᔑ ᓂᔑᐗᓈᒋᐋᒋᒃ᙮
ᑭᒋᒪᓂᑐ ᑎᐱᓚᐌ ᐅᑕᑐᔅᑫᓛᑲᓇ
15ᒫᑲ ᐃᔅᐱ ᒋᓴᔅ ᑫᔅᑫᓕᑕᒃ, ᐊᓐᑕ ᑮ ᐅᒋ ᑭᑐᑌᐤ; ᑮ ᓄᔅᐱᓈᑎᑯ ᒫᑲ ᓈᔅᐱᒡ ᒥᔮᒪᐎᒥᒉᑎᓕᒋ ᐃᓕᓕᐗ, ᒥᓯᐌ ᐁ ᐃᑕᓯᓕᒋ ᒫᑲ ᑮ ᒥᓇᐙᒋᐁᐤ᙮ 16ᑮ ᐃᑕᔓᒣᐤ ᒫᑲ, ᐁᑳ ᑭᒋ ᑭᔅᑫᓕᑖᑯᐃᑯᑦ᙮ 17ᑭᒋ ᑎᐱᐸᓕᒃ ᑳ ᑮ ᐃᑗᑦ ᐋᐃᓭᔭ ᐅᑭᔅᑭᐙᐃᑫᐤ, ᐁ ᐃᑗᑦ, 18ᒫᑎᑲ ᐊᐗ ᓂᑦ ᐊᑑᔅᑫᓛᑲᓐ, ᑳ ᑮ ᐌᐌᓛᐸᒪᒃ; ᓂ ᓵᑭᐋᑲᓐ, ᑳ ᐅᒋ ᓈᔅᐱᒡ ᒥᓜᓕᑕᒃ ᓂᑦ ᐊᒑᒃ: ᓂ ᑳ ᑭᑭᔥᑲᒧᑎᓚᐤ ᓂᑦ ᐊᒑᑾ ᑎᐹᔅᑯᓂᑫᐎᓂᓕᐤ ᒫᑲ ᑲᑕ ᐙᐸᑎᓓᐤ ᒉᓐᑖᐃᓚ᙮ 19ᓇᒪᐎᓚ ᑲᑕ ᐎ ᔖᑯᒋᒥᐌᐤ, ᓇᒪ ᓀᔥᑕ ᑲᑕ ᑖᑌᐺᐤ; ᓇᒪ ᓀᔥᑕ ᐊᐌᓇ ᑲᑕ ᐯᑕᒬᐤ ᐅ ᐯᑖᑯᓯᐎᓂᓕᐤ ᐱᒧᑌᔅᑲᓈᒃ᙮ 20ᓇᒪᐎᓚ ᑲᑕ ᓈᑣᓇᒻ ᐁ ᒫᔅᑳᓕᒃ ᐎᐹᔅᑯᓕᐤ, ᐁ ᒧᒋ ᐱᐳᑌᓕᒃ ᐙᔅᑌᓇᒫᑲᓈᐱᓕᐤ ᓀᔥᑕ ᓇᒪᐎᓚ ᑲᑕ ᐊᔅᑖᐌᐊᒻ, ᐹᑎᒫ ᐃᔑᑎᔕᐊᑫ ᑎᐹᔅᑯᓂᑫᐎᓂᓕᐤ ᑭᒋ ᔖᑯᒋᐃᐌᒪᑲᓂᓕᒃ᙮ 21ᐎᓚ ᐅᑦ ᐃᔑᓂᑳᓱᐎᓂᒃ ᒫᑲ ᑲᑕ ᐊᔅᐯᓕᒧᓕᐗ ᒉᓐᑖᐃᓚ᙮
ᒋᓴᔅ ᓀᔥᑕ ᐲᓪᓯᐸᓪ
(ᒫᕐᒃ 3:20–30; ᓘᒃ 11:14–23)
22ᐁᑯ ᐱᐁᑐᐙᑲᓂᐎᑦ ᐊᐌᓂᐗ ᑳ ᐱᒋᔅᑳᑯᓕᒋ ᒪᒋ ᐊᒑᑾ, ᐁᑳ ᐁ ᐗᐱᓕᒋ, ᐁᑳ ᓀᔥᑕ ᐁ ᓂᑕᐌᓕᒋ: ᑮ ᒥᓇᐙᒋᐁᐤ ᒫᑲ, ᐁᑯ ᒫᑳ ᐁᑳ ᑳ ᐙᐱᑦ ᓀᔥᑕ ᐁᑳ ᑳ ᓂᑕᐌᑦ ᑮ ᐋᔭᒥᐤ ᓀᔥᑕ ᑮ ᐙᐱᐤ᙮ 23ᒥᓯᐌ ᐃᓕᓕᐗᒃ ᒫᑲ ᑮ ᒫᒪᔅᑳᑕᒶᐤ, ᑮ ᐃᑗᐗᒃ ᒫᑲ, ᓇᒪ ᓈ ᐊᐗ ᑌᐱᑦ ᐅᑯᓯᓴ?
24ᒫᑲ ᐃᔅᐱ ᐸᕋᓯᔭᒃ ᐱᐁᑕᑭᒃ, ᑮ ᐃᑗᐗᒃ, ᐊᐗ ᓇᒪᐎᓚ ᐗᓚᐎᐌᐱᓀᐤ ᒪᒋ ᐊᒑᑾ, ᐁ ᐎᒋᐃᑯᑦ ᐱᑯ ᐲᓪᓯᐸᓚ ᒪᒋ ᐊᒑᑾ ᐅᑦ ᐅᑭᒫᒥᓕᐗ᙮
25ᒋᓴᔅ ᒫᑲ ᑮ ᑭᔅᑫᓕᑕᒬᐤ ᐅ ᒥᑐᓀᓕᒋᑫᐎᓂᓕᐗ, ᑮ ᐃᑌᐤ ᒫᑲ, ᒥᓯᐌ ᑕᑐ ᐅᑭᒫᐎᐎᓐ ᑳ ᓄᑎᓂᑎᓱᒪᑲᒃ ᐅᒋᑕᐤ ᑲᑕ ᓂᔑᐗᓈᑕᓐ; ᓀᔥᑕ ᒥᓯᐌ ᑕᑐ ᐃᑖᐎᓐ ᓀᔥᑕᐱᑯ ᐙᔅᑳᔨᑲᓐ ᑳ ᓄᑎᓂᑎᓱᒪᑲᓐ ᓇᒪᐎᓚ ᑲᑕ ᐃᑕᔅᑭᑌᐤ᙮ 26ᑮᔥᐱᓐ ᒫᑲ ᓭᑖᓐ ᐌᓚᐎᐌᐱᓈᑴ ᓭᑕᓇ, ᐎᓚ ᑫᒋᐙᒃ ᓄᑎᓂᑎᓱ; ᑖᓐᑌ ᒫᑲ ᑫ ᐅᒋ ᐃᑕᔅᑭᑌᓕᒃ ᐅᑦ ᐅᑭᒫᐎᐎᓐ? 27ᑮᔥᐱᓐ ᓀᔥᑕ ᐲᓪᓯᐸᓪ ᐅᒋ ᓂᓚ ᐗᓚᐎᐌᐱᓇᑭᒃ ᒪᒋ ᐊᒑᑾᒃ, ᐊᐌᓇ ᐊᓇ ᑳ ᐅᒋ ᐗᓚᐎᐌᐱᓈᒋᒃ ᑭᑦ ᐊᐙᔑᒥᔑᐙᐗᒃ? ᐁᐗᑯ ᐅᒋ ᐎᓚᐗᐤ ᑭ ᑳ ᑎᐹᔅᑯᓂᑯᐙᐗᒃ᙮ 28ᒫᑲ ᑮᔥᐱᓐ ᑭᒋᒪᓂᑐ ᐅᑦ ᐊᒑᑾ ᐅᒋ ᐗᓚᐎᐌᐱᓇᑭᒃ ᒪᒋ ᐊᒑᑾᒃ, ᐁᑯ ᐌᑎᑎᑯᐌᒃ ᑭᒋᒪᓂᑐ ᐅᑦ ᐅᑭᒫᐎᐎᓐ᙮
29ᓀᔥᑕᐱᑯ ᑖᓐᑌ ᑫ ᐅᒋ ᐊᐌᓇ ᐱᑐᑫᐙᑦ ᐁ ᒪᔥᑲᐎᓯᓕᒋ ᐃᓕᓕᐗ ᐅ ᐙᔅᑳᔨᑲᓂᒥᓕᒃ, ᓀᔥᑕ ᓂᔑᐗᓈᒋᑕᐙᑦ ᐅᑦ ᐋᔮᓂᓕᐗ, ᐹᑎᒫ ᓃᔥᑕᒻ ᑮ ᒫᒫᑯᐱᑖᒋ ᐁ ᒪᔥᑲᐎᓯᓕᒋ ᐃᓕᓕᐗ? ᐁᑯ ᒫᑲ ᑫ ᓂᔑᐗᓈᒋᑕᐙᑦ ᐅ ᐙᔅᑳᔨᑲᓂᒥᓕᐤ᙮
30ᐊᓇ ᐁᑳ ᑳ ᐎᒋᐃᑦ ᓂ ᓇᔅᑯᔅᑖᒃ, ᐊᓇ ᓀᔥᑕ ᐁᑳ ᑳ ᐎᒋᐃᑦ ᐁ ᒧᔕᑭᓂᑫᐗᒃ, ᐗᓴᓶᐱᓂᑫᐤ᙮ 31ᐁᐗᑯ ᐌᒋ ᐃᑎᑖᑾᒃ, ᒥᓯᐌ ᑐᐎ ᒪᒋᑐᑕᒧᐎᓐ ᓀᔥᑕ ᐹᔅᑕᒧᐎᓐ ᑲᑕ ᐌᐯᓕᑕᒪᐋᐗᒃ ᐃᓕᓕᐗᒃ: ᒫᑲ ᐁ ᐹᐹᔅᑕᒫᑲᓂᐎᑦ ᐯᓓᑭᓯᑦ ᐊᒑᒃ, ᓇᒪᐎᓚ ᑲᑕ ᐌᐯᓕᑕᒪᐋᐗᒃ ᐃᓕᓕᐗᒃ᙮ 32ᐊᐌᓇ ᒫᑲ ᒣᒋ ᐃᑖᑴ ᐃᓕᓕᐎᑯᓯᓵᓇ, ᑲᑕ ᐌᐯᓕᑕᒪᐗᐤ; ᒫᑲ ᐊᐌᓇ ᒣᒋ ᐃᑖᑴ ᐱᓓᑭᓯᓕᒋ ᐊᒑᑾ, ᓇᒪᐎᓚ ᑲᑕ ᐌᐯᓕᑕᒪᐗᐤ, ᓇᒪᐎᓚ ᐅᑕ ᐊᔅᑮᒃ, ᓇᒪ ᓀᔥᑕ ᐊᔅᑮᒃ ᑫ ᐅᑎᒋᐸᓕᒃ᙮
ᐁ ᐃᔑ ᒥᓂᔑᐎᑦ ᒥᓈᑎᒃ
(ᓘᒃ 6:43–45)
33ᐃᔑᐃᒃ ᒥᓈᑎᒃ ᑭᒋ ᒥᓗᔑᔑᑦ, ᓀᔥᑕ ᐅ ᒥᓂᔕ ᑭᒋ ᒥᓨᔑᓂᓕᑭ; ᓀᔥᑕᐱᑯ ᐃᔑᐃᒃ ᒥᓈᑎᒃ ᑭᒋ ᒫᓛᑎᓯᑦ, ᓀᔥᑕ ᐅ ᒥᓂᔕ ᑭᒋ ᒫᓛᑕᓂᓕᑭ: ᐌᓴ ᒥᓈᑎᒃ ᑭᔅᑫᓚᑖᑯᓯᐤ ᐁ ᐃᔑ ᒥᓂᔑᐎᑦ᙮ 34ᐅ ᐋᔮᓂᔅᑫ ᑭᓀᐱᑯᐎᔦᒃ, ᑖᓐᑌ ᑫ ᑮ ᐅᒋ ᐋᔭᒥᐁᒃ ᒥᓗ ᑫᒀᓇ, ᐁ ᒪᒋᑣᔦᒃ? ᐌᓴ ᐁ ᐃᔑ ᓵᑲᔅᑭᓀᒃ ᒥᑌᐃ ᐁᑯ ᐁ ᐃᔑ ᐋᔭᒥᒪᑲᒃ ᒥᑐᓐ᙮ 35ᒥᓗ ᐃᓕᓕᐤ ᐁ ᒥᒉᑎᓂᓕᑭ ᑳ ᒥᓨᔑᓂᓕᑭ ᐅᑎᐃᒃ ᐗᓚᐎᑕᑕᐤ ᒥᓗ ᑫᒀᓇ: ᒪᒋ ᐃᓕᓕᐤ ᒫᑲ ᐁ ᒥᒉᑎᓂᓕᑭ ᑳ ᒫᓛᑕᓂᓕᑭ ᐅᑎᐃᒃ ᐗᓚᐎᑕᑕᐤ ᒪᒋ ᑫᒀᓇ᙮
36ᒫᑲ ᑭᑦ ᐃᑎᓇᐗᐤ, ᒥᓯᐌ ᑕᑐ ᐸᑾᓐᑕᐤ ᐋᔭᒥᐎᓂᓕᐤ ᑫ ᐃᑗᐙᑴ ᐃᓕᓕᐗᒃ, ᑲᑕ ᐎᑕᒶᒃ ᑎᐹᔅᑯᓂᑫᐎ ᑭᔑᑳᓕᑫ᙮ 37ᐌᓴ ᑭᑦ ᐋᔭᒥᐎᓇ ᐅᒋ ᑭ ᑳ ᒀᔭᔅᑭᑕᑎᓯᑫᓕᒥᑲᐎᓐ, ᓀᔥᑕ ᑭᑦ ᐋᔭᒥᐎᓇ ᑭ ᑳ ᐅᒋ ᓂᔑᐗᓈᒋᒥᑳᐎᓐ᙮
ᓇᑕᐌᓕᑕᒣᐗᒃ ᒋᓴᓴ ᑭᒋ ᑭᔅᑭᓄᐙᒋ ᐙᐸᑕᐃᐌᓕᒋ
(ᒫᕐᒃ 8:11–12; ᓘᒃ 11:29–32)
38ᐁᑯ ᐋᑎᑦ ᐅᒪᓯᓇᐃᑫᐗᒃ ᓀᔥᑕ ᐸᕋᓯᔭᒃ, ᐁ ᓇᔥᑴᐗᔑᐃᐌᒋᒃ, ᑮ ᐃᑗᐗᒃ, ᑫᔅᑭᓄᐊᒫᑭᔭᓐ, ᓂ ᐎ ᐙᐸᑌᓈᓐ ᑭᔅᑭᓄᐙᒋ ᐙᐸᑎᓕᐌᐎᓐ ᐁ ᐃᑐᑕᒪᓐ᙮
39ᒫᑲ ᐁ ᓇᔥᑴᐗᔑᐋᑦ ᑮ ᐃᑌᐤ, ᒪᒋ ᓀᔥᑕ ᐱᔑᒀᑎᓯᐎ ᐃᓕᓕᐗᒃ ᓈᓇᑕᐌᓕᑕᒶᒃ ᑭᔅᑭᓄᐙᒋ ᐙᐸᑎᓕᐌᐎᓂᓕᐤ; ᓇᒪᐎᓚ ᒫᑲ ᑭᔅᑭᓄᐙᒋ ᐙᐸᑎᓕᐌᐎᓂᓕᐤ ᑲᑕ ᒥᓛᐗᒃ, ᐱᑯ ᐊᓇ ᐅᑭᔅᑭᐙᐃᑫᐤ ᒍᓇ ᐅ ᑭᔅᑭᓄᐙᒋ ᐙᐸᑎᓕᐌᐎᓐ᙮ 40ᐌᓴ ᑖᐱᔅᑯᒡ ᒍᓇ ᑳ ᑮ ᐃᑖᑦ ᓂᔅᑐ ᑭᔑᑲᐗ ᓀᔥᑕ ᓂᔅᑐ ᑎᐱᔅᑲᐗ ᑭᒋ ᐙᐸᒣᒃ ᐗᑖᓕᒃ; ᐁᑯ ᑖᐱᔅᑯᒡ ᐃᓕᓕᐎᑯᓯᓵᓐ ᓂᔅᑐ ᑭᔑᑳᐗ ᓀᔥᑕ ᓂᔅᑐ ᑎᐱᔅᑳᐗ ᑫ ᐃᑖᑦ ᐊᔅᑭ ᐁ ᐅᑌᐃᒪᑲᓂᓕᒃ᙮ 41ᓂᓂᐱ ᐃᓕᓕᐗᒃ ᑲᑕ ᐎᒋᑳᐸᐎᔅᑕᐌᐗᒃ ᑎᐹᔅᑯᓂᑫᐎᓂᒃ ᐅᐅ ᐊᓄᒡ ᑳ ᐱᒫᑎᓯᓕᒋ, ᑲᑕ ᓂᔑᐗᓈᒋᒣᐗᑦ ᒫᑲ: ᐌᓴ ᑮ ᒥᒋᓚᐌᔦᓕᑕᒶᒃ ᐁ ᑮ ᑲᑫᔅᑭᒥᐌᓕᒋ ᒍᓇᐗ; ᒫᑎᑲ, ᒫᑲ, ᐊᐌᓇ ᐊᐙᓯᑌ ᐁ ᐃᔅᐯᓕᑖᑯᓯᑦ ᐃᔥᐱᔥ ᒍᓇ ᐅᑕ ᐃᑖᐤ! 42ᑭᒋᐅᑭᒫᔅᑴᐤ ᔖᐗᓄᑖᒃ ᑳ ᑮ ᑎᐯᓕᒋᑫᑦ ᑲᑕ ᐎᒋᑳᐸᐎᔅᑕᐌᐤ ᐅᐅ ᐊᓄᒡ ᑳ ᐱᒫᑎᓯᓕᒋ ᑎᐹᔅᑯᓂᑫᐎᓂᒃ, ᑳᑕ ᓂᔑᐗᓈᒋᒣᐤ ᒫᑲ; ᐌᓴ ᐎᓚ ᐃᔅᒀᔮᒡ ᐙᓚᐤ ᐊᔅᑮᒃ ᑮ ᐯᒋ ᐅᑐᑌᐤ ᑭᒋ ᐯᑕᒸᑦ ᓴᓚᒪᓇ ᐅ ᑲᑫᑕᐌᓕᑕᒧᐎᓂᓕᐤ; ᒫᑎᑲ, ᒫᑲ, ᐊᐙᓯᑌ ᐁ ᐃᔅᐯᓕᑖᑯᓯᑦ ᐃᔥᐱᔥ ᓴᓚᒪᓐ ᐅᑕ ᐃᑖᐤ᙮
ᐁ ᐯᒋ ᑮᐌᑦ ᒪᒋ ᐊᒑᒃ ᑳ ᑮ ᐙᓚᐎᒋ ᐃᓕᓕᒃ ᐅᒋ
(ᓘᒃ 11:24–26)
43ᐃᔅᐱ ᒪᒋ ᐊᒑᒃ ᑳ ᐗᓚᐎᒋ ᐃᓕᓕᒃ ᐅᒋ, ᐹᐱᒧᑌᐤ ᐃᑕ ᐁ ᐹᒀᓕᒃ, ᐁ ᓈᓇᑕᐙᐸᑕᒃ ᑫ ᐃᔑ ᐋᓜᐱᑦ, ᐁᑳ ᒫᑲ ᐁ ᒥᔅᑲᒃ᙮ 44ᐁᑯ ᐁᑗᑦ, ᓂ ᑳ ᑭᐙᓐ ᓂ ᐙᑳᔨᑲᓂᒥᒃ ᐃᑕ ᑳ ᑮ ᐅᒋ ᐗᓚᐎᔮᓐ; ᐃᔅᐱ ᒫᑲ ᑌᑯᔑᒃ, ᒥᔅᑲᒻ ᐁ ᐱᔑᔑᒀᓕᒃ, ᐁ ᐌᐸᐃᑳᑌᓕᒃ, ᓀᔥᑕ ᐁ ᐙᐌᔑᒋᑳᑌᓕᒃ᙮ 45ᐁᑯ ᐁᑐᑌᑦ, ᐅᑎᓇᒫᓱ ᒫᑲ ᓂᔂᔅ ᑯᑕᑭᔭ ᐊᒑᑾ ᐊᐙᓯᑌ ᒣᒋᑣᓕᒋ ᐃᔥᐱᔥ ᐎᓚ ᑫᒋᐙᒃ; ᐱᑐᑫᐗᒃ ᒫᑲ ᐁᑯᑕ ᓀᔥᑕ ᐙᑭᒋᒃ: ᒫᒋᒡ ᐅᑦ ᐃᔑᐋᔮᐎᓐ ᐊᐗ ᐃᓕᓕᐤ ᐊᐙᓯᑌ ᒫᓛᑕᓂᓕᐤ ᐃᔥᐱᔥ ᓃᔥᑕᒻ᙮ ᐁᑯ ᓀᔥᑕ ᑫ ᐃᑎᒋᒃ ᐅᑯ ᒪᒋ ᐃᓕᓕᐗᒃ ᐊᓄᒡ ᑳ ᐱᒫᑎᓯᒋᒃ᙮
ᐁ ᐯᒋ ᓈᑎᑯᑦ ᒋᓴᔅ ᐅᑳᐎᔭ ᓀᔥᑕ ᐅᐎᒋᔖᓇ
(ᒫᕐᒃ 3:31–35; ᓘᒃ 8:19–21)
46ᒣᒀᒡ ᑫᔮᐸᒡ ᐁ ᐋᔭᒥᐋᑦ ᐃᓕᓕᐗ, ᒫᑎᑲ, ᐅᑳᐎᔭ ᓀᔥᑕ ᐎᒋᔖᓇ ᐗᓚᐎᑎᒥᒃ ᑮ ᓂᐸᐎᓕᐗ ᐁ ᐎ ᐋᔭᒥᐃᑯᑦ᙮ 47ᐁᑯ ᐊᐌᓇ ᐁᑖᑦ, ᒫᑎᑲ, ᑭᑳᐎ ᓀᔥᑕ ᑭᒋᔖᓇᒃ ᐗᓚᐎᑎᒥᒃ ᓂᐸᐎᐗᒃ, ᐁ ᐎ ᐋᔭᒥᐃᔅᑭᒃ᙮
48ᒫᑲ ᐁ ᓇᔥᑴᐗᔑᐋᑦ ᑮ ᐃᑌᐤ ᐊᓂᐃ ᑳ ᐎᑕᒫᑯᑦ, ᐊᐌᓇ ᓂᑳᐎ? ᐊᐌᓂᑭ ᓀᔥᑕ ᓂᒋᔖᓇᒃ? 49ᐁᑯ ᐁᔑᒋᒉᓕᑦ ᐃᑕ ᑳ ᐃᑖᓕᒋ ᐅ ᑭᔅᑭᓄᐊᒪᐙᑲᓇ, ᑮ ᐃᑗᐤ ᒫᑲ, ᒫᑎᑲ, ᓂᑳᐎ ᓀᔥᑕ ᓂᒋᔖᓇᒃ! 50ᐌᓴ ᐊᐌᓇ ᑫ ᑐᑕᒧᑴ ᐅᑦ ᐃᑌᓕᑕᒧᐎᓂᓕᐤ ᓄᑖᐎᔭ ᑭᒋᑭᔑᑯᒃ ᑳ ᐃᑖᓕᒋ, ᐁᐗᒀᓇ ᓂᒋᔖᓐ, ᓀᔥᑕ ᓂᒋᔖᓂᔅᑴᒻ ᓀᔥᑕ ᓂᑳᐎ᙮
Currently Selected:
ᐅᐸᓓᑭᔅ ᒫᑎᐤ 12: MCNT91
Highlight
Share
Copy
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.
