ᐅᐸᓓᑭᔅ ᒫᑎᐤ 15
15
ᐅᑭᔅᑭᓄᐊᒫᑫᐎᓂᓕᐗ ᑳ ᓂᑳᓀᓕᑖᑯᓯᒋᒃ
(ᒫᕐᒃ 7:1–13)
1ᐁᑯ ᐅᒪᓯᓇᐃᑫᐗᒃ ᓀᔥᑕ ᐸᕋᓯᔭᒃ ᒋᕉᓴᓚᒥᒃ ᑳ ᐃᑖᒋᒃ, ᐱᐁᒋ ᓈᑕᒋᒃ ᒋᓴᓴ, ᐁ ᐃᑗᒋᒃ, 2ᑖᓀᑭ ᐌᒋ ᑭ ᑭᔅᑭᓄᐊᒪᐙᑲᓇᒃ ᐋᓉᑕᒸᒋᒃ ᐅ ᑭᔅᑭᓄᐊᒫᑫᐎᓂᓕᐗ ᑳ ᓂᑳᓀᓕᑖᑯᓯᒋᒃ? ᐌᓴ ᓇᒪᐎᓚ ᑳᔑᒋᒉᐗᒃ ᐃᔅᐱ ᒥᔪᐙᑡᐎ ᐊᓚᑯᓇᐗ᙮
3ᒫᑲ ᐁ ᓇᔥᑴᐗᔑᐋᑦ ᑮ ᐃᑌᐤ, ᑖᓀᑭ ᐌᒋ ᑭᓚᐗᐤ ᓀᔥᑕ ᐋᓉᑕᒬᒃ ᑭᒋᒪᓂᑐ ᐅ ᑲᑫᔅᑴᐎᓐ ᑭ ᑮᔅᑭᓄᐊᒫᑫᐎᓂᐗᐤ ᐅᒋ? 4ᐌᓴ ᑭᒋᒪᓂᑐ ᑮ ᐃᑕᔓᐌᐤ, ᐁ ᐃᑗᑦ, ᑭᔅᑌᓕᒻ ᑯᑖᐎ ᓀᔥᑕ ᑭᑳᐎ: ᓀᔥᑕ, ᐊᓇ ᑫ ᒪᒐᑭᒫᑦ ᐅᑖᐎᔭ ᓀᔥᑕᐱᑯ ᐅᑳᐎᔭ, ᐁᑯᔑ ᑲᑕ ᓂᐸᐊᐤ᙮ 5ᒫᑲ ᑭᓚᐗᐤ ᑭᑦ ᐃᑣᓇᐗᐤ, ᐊᐌᓇ ᑫ ᐃᑖᑴ ᐅᑖᐎᔭ, ᓀᔥᑕᐱᑯ ᐅᑳᐎᔭ, ᒥᓕᐌᐎᓐ, ᐊᓂᒪ ᑫ ᐃᔑ ᑭᔅᑖᐸᒋᐃᑳᐎᔭᓐ ᓂᓚ ᐅᒋ; 6ᐁᑳ ᒫᑲ ᑫᔅᑌᓕᒫᑴ ᐅᑖᐎᔭ ᓀᔥᑕᐱᑯ ᐅᑳᐎᔭ, ᓇᒪᐎᓚ ᑲᑕ ᐋᓉᓕᑖᑯᓯᐤ᙮ ᐁᐗᑯ ᐅᒋ ᑭ ᑐᑌᓇᐗᐤ ᑭᒋᒪᓂᑐ ᐅ ᑲᑫᔅᑴᐎᓐ ᐸᑾᓐᑕᐤ ᑭᒋ ᐃᑌᓕᑖᑾᓂᓕᒃ ᑭ ᑭᔅᑭᓄᐊᒫᑫᐎᓂᐗᐤ ᐅᒋ᙮ 7ᑭᓚᐗᐤ ᐅᑖᔭᒥᐁᑳᓱᑐᒃ, ᑖᔑᑆ ᐋᐃᓭᔭ ᐁ ᑭᔅᑭᐙᐃᑫᑦ ᑮ ᐃᑎᑖᒃ, ᐁ ᐃᑗᑦ, 8ᐅᑯ ᐃᓕᓕᐗᒃ ᓂ ᐯᒋ ᓈᑎᑾᒃ ᐅᑐᓂᐗᐤ ᐅᒋ, ᓀᔥᑕ ᓂ ᑭᔅᑕᒋᒥᑾᒃ ᐅᑐᓂᐙᒃ; ᒫᑲ ᐅᑌᐃᐙᐗ ᓈ ᓚᐙᐸᒥᑯᐙᓐ᙮ 9ᒫᑲ ᐸᑾᓐᑕᐤ ᓂ ᓇᐗᑮᔅᑖᑾᒃ, ᐁ ᑭᔅᑭᓄᐊᒫᑫᒋᒃ ᐃᓕᓕᐗᒃ ᐅ ᑲᑫᔅᑴᐎᓂᐙᐗ ᒦᔅᑯᒡ ᒀᔭᔉ ᑭᔅᑭᓄᐊᒫᑫᐎᓐ᙮
ᐊᓂᒪ ᑳ ᐎᓕᐱᐃᑯᑦ ᐃᓕᓕᐤ
(ᒫᕐᒃ 7:14–23)
10ᐁ ᓇᑐᒫᑦ ᒫᑲ ᒥᔮᒪᐎᒥᒉᑎᓕᒋ ᐃᓕᓕᐗ, ᑮ ᐃᑌᐤ, ᓇᑐᑕᒧᒃ, ᓀᔥᑕ ᓂᓯᑐᑕᒧᒃ: 11ᓇᒪᐎᓚ ᐊᓂᒪ ᑳ ᐱᒋᐹᓕᓕᒃ ᐅᑐᓂᒃ ᐎᓕᐱᐃᑯ ᐃᓕᓕᐤ; ᐊᓂᒪ ᒫᑲ ᑳ ᐗᓚᐎᐸᓕᓕᒃ ᐅᑐᓂᒃ ᐅᒋ, ᐁᐗᑴᓕᐤ ᑳ ᐎᓕᐱᐃᑯᑦ ᐃᓕᓕᐤ᙮
12ᐁᑯ ᐱᐁᒋ ᐃᑐᑌᓕᒋ ᐅ ᑭᔅᑭᓄᐊᒪᐙᑭᓇ, ᐁ ᐃᑎᑯᑦ ᒫᑲ, ᑭ ᑭᔅᑫᓕᑌᓐ ᓈ ᐸᕋᓯᔭᒃ ᐁ ᑮ ᓈᔦᑕᐌᓕᑕᑭᒃ, ᑳ ᐯᑕᑭᒃ ᐊᓂᐁᓕᐤ ᐃᑗᐎᓂᓕᐤ?
13ᒫᑲ ᐁ ᓇᔥᑴᐗᔑᐋᑦ ᑮ ᐃᑌᐤ, ᒥᓯᐌ ᑕᑐ ᓂᑖᐎᑭᑖᑲᓐ ᐁᑳ ᑳ ᑮ ᐸᑭᑎᓇᒃ ᓄᑖᐎ ᑭᒋᑭᔑᑯᒃ ᑳ ᐃᑖᑦ, ᑲᑕ ᒪᓂᐱᒋᑳᑌᐤ᙮ 14ᐁᑳᐎᓚ ᐱᒣᓕᒥᒃ; ᐁᑳ ᐁ ᐙᐱᒋᒃ ᑭᔅᑭᓄᑕᐁᐗᒃ ᐁᑳ ᑳ ᐙᐱᓕᒋ᙮ ᑮᔥᐱᓐ ᒫᑲ ᐁᑳ ᑳ ᐙᐱᑦ ᑫᔅᑭᓄᑕᐋᑴ ᐁᑳ ᑳ ᐙᐱᓕᒋ, ᑖᐱᔅᑯᒡ ᑲᑕ ᐸᑭᔑᓋᒃ ᒧᓇᐃᐹᓂᒃ᙮
15ᐁᑯ ᓀᔥᑴᐗᔑᐃᐌᑦ ᐱᑕᕐ, ᐁ ᐃᑖᑦ ᒫᑲ, ᐎᑕᒪᐎᓈᓐ ᐅᒪ ᓇᔅᐱᑐᐌᐎ ᐋᑕᓗᑳᓐ?
16ᒋᓴᔅ ᒫᑲ ᑮ ᐃᑗᐤ, ᑭᓚᐗᐤ ᓀᔥᑕ ᑫᔮᐸᒡ ᓇᒪᐎᓚ ᑯᓂᓯᑐᑕᒧᐎᓂᓇᐗᐤ? 17ᓇᒪ ᓈ ᐁᔥᑾ ᑭ ᓂᓯᑐᑌᓇᐗᐤ ᑕᑐ ᑫᒀᓐ ᑳ ᓴᔅᑲᒧᓈᓂᐗᒃ ᐊᑎ ᐱᒋᐸᓕᐤ ᒥᑖᒃ, ᐁᑯ ᐁ ᐊᑎ ᐗᓚᐎᐸᓕᒃ? 18ᒫᑲ ᐊᓂᐃ ᑫᒀᓇ ᒥᑐᓂᒃ ᑳ ᐅᒋ ᐗᓚᐎᐸᓕᑭ, ᒥᑌᐃᒃ ᐅᒋᐸᓕᐗ; ᐅᐅ ᒫᑲ ᐎᓕᐱᐃᑯ ᐃᓕᓕᐤ᙮ 19ᐌᓴ ᒥᑌᐃᒃ ᐅᒋᐸᓕᐗ ᒪᒋ ᒥᑐᓀᓕᒋᑫᐎᓇ, ᓂᐹᔨᐌᐎᓇ, ᒫᒪᐎᐃᑐᐎᓇ, ᐱᔑᒀᑎᓯᐎᓇ, ᑭᒧᑎᐎᓇ, ᑭᓛᔅᑭᐎᓐ, ᐹᔅᑕᒧᐎᓇ: 20ᐅᐅ ᐁᐗᒀᓂᐃ ᑳ ᐎᓕᐱᐃᑯᑦ ᐃᓕᓕᐤ: ᒫᑲ ᑭᒋ ᒥᒋᓱᑦ ᐁᑳ ᐁ ᑳᔑᒋᒉᑦ ᓇᒪᐎᓚ ᐎᓕᐱᐃᑯ ᐃᓕᓕᐤ᙮
ᐁ ᑮ ᐃᔑ ᑖᐺᑕᒃ ᐃᔅᑴᐤ
(ᒫᕐᒃ 7:24–30)
21ᐁᑯ ᒫᑲ ᒋᓴᔅ ᐊᓐᑕ ᑳ ᐅᒋ ᑭᑐᑌᑦ, ᑮ ᐃᑐᑌᐤ ᒫᑲ ᑖᐃᕐ ᓀᔥᑕ ᓵᐃᑕᓐ ᐊᔅᑮᒃ᙮ 22ᒫᑎᑲ, ᒫᑲ, ᐯᔭᒃ ᑫᓇᓂ ᐃᔅᑴᐗ ᐁᑯᑕ ᐌᑐᑌᓕᒋ, ᑭ ᓈᓇᑐᒥᑯ, ᐁ ᐃᑎᑯᑦ ᒫᑲ, ᔕᐌᓕᒥᓐ, ᐅ ᑌᐯᓕᒋᑫᔭᓐ, ᑌᐱᑦ ᐌᑯᓯᓯᒥᔉ: ᓂᑖᓂᔅ ᓈᔅᐱᒡ ᐙᐎᓴᑭᔅᑳᑯ ᒪᒋ ᐊᒑᑾ᙮
23ᓇᒪᐎᓚ ᒫᑲ ᑮ ᐅᒋ ᓇᔥᑴᐗᔑᐁᐤ᙮ ᐁᑯ ᒫᑲ ᐱᐁᒋ ᓇᑐᑕᒫᑯᑦ ᐅ ᑭᔅᑭᓄᐊᒪᐙᑲᓇ, ᐁ ᐃᑎᑯᑦ, ᑭᒋᑎᔕᐤ; ᐌᓴ ᑭ ᓄᓴᐎ ᑌᑆᑎᑯᓇᐤ᙮
24ᒫᑲ ᐁ ᓇᔥᑴᐗᔑᐃᐌᑦ, ᑮ ᐃᑗᐤ, ᓂ ᑮ ᐯᒋᑎᔕᐅᑳᐎᓐ ᑭᒋ ᓈᑕᑭᒃ ᑳ ᐗᓂᔑᑭᒃ ᒫᓂᔥᒑᓂᔕᒃ ᐅ ᐙᔅᑳᔨᑲᓂᒃ ᐃᔅᕃᐃᓪ ᑳ ᐅᒋᒋᒃ᙮
25ᐁᑯ ᐱᐁᒋ ᓇᐗᑭᔅᑕᐙᑦ, ᐁ ᐃᑗᑦ, ᑌᐯᓕᒋᑫᔭᓐ ᐎᒋᐃᓐ᙮
26ᒫᑲ ᐁ ᓇᔥᑴᐗᔑᐃᐌᑦ, ᑮ ᐃᑗᐤ, ᓇᒪᐎᓚ ᒥᓨᔑᓐ ᑭᒋ ᐅᑎᓂᒥᒋ ᐊᐙᔑᔕᒃ ᐅᑦ ᐊᓚᑯᓇᒥᐙᐗ, ᓀᔥᑕ ᑭᒋ ᐌᐱᓇᒫᒋᒃ ᐊᑎᒶᒃ᙮
27ᑮ ᐃᑗᐤ ᒫᑲ, ᑖᐺ, ᑌᐯᓕᒋᑫᔭᓐ: ᐁᓕᐌᒃ ᒫᑲ ᐊᑎᒶᒃ ᒥᒋᐗᒃ ᐱᐗᒋᑲᓇ ᑳ ᐸᑭᑎᓂᓕᑭ ᐅᑦ ᐅᑭᒫᒥᐗᐗ ᐅ ᒥᒋᓱᓈᑎᑯᓕᒃ ᐅᒋ᙮
28ᐁᑯ ᒋᓴᔅ ᐁ ᓇᔥᑴᐗᔑᐋᑦ ᑮ ᐃᑌᐤ, ᐅ ᐃᔅᑴᐤ, ᑭᔅᑌᓕᑖᑾᓐ ᑭ ᑖᐺᔦᓕᑕᒧᐎᓐ: ᑭ ᑳ ᐃᔑ ᐋᔮᓐ ᐁ ᐃᔑ ᓇᑕᐌᓕᑕᒪᓐ᙮ ᐅᑖᓂᓴ ᒫᑲ ᑭ ᒥᓇᐙᒋᐋᓕᐗ ᐁᐗᑯ ᑎᐹᔨᑲᓂᒃ ᐱᓯᒧᑳᓂᒃ᙮
ᒋᓴᔅ ᒥᓇᐙᒋᐁᐤ ᒥᒉᑦ ᐃᓕᓕᐗ
29ᒋᓴᔅ ᒫᑲ ᐊᓐᑕ ᑮ ᐅᒋ ᑭᑐᑌᐤ, ᐯᔓᒡ ᒫᑲ ᑳᓕᓖ ᑭᒋᑲᒦᒃ ᑭ ᐯᒋ ᐃᑐᑌᐤ, ᑮ ᑯᔅᐹᒪᒋᐌᐤ ᒫᑲ ᐗᒌᒃ, ᐁᑯᑕ ᒫᑲ ᓀᐊᐱᑦ᙮ 30ᓈᔅᐱᒡ ᒥᒉᑦ ᐃᓕᓕᐗᒃ ᒫᑲ ᑮ ᒫᒪᐎ ᐁᔑ ᓈᑌᐗᒃ, ᐁ ᐋᔭᐙᒋᒃ ᐊᓂᐃ ᐁᑳ ᑳ ᓂᑖᐅᑌᓕᒋ, ᐁᑳ ᑳ ᐙᐱᓕᒋ, ᐁᑳ ᑳ ᓂᑕᐌᓕᒋ, ᑳ ᒫᔅᑭᓯᓕᒋ, ᓀᔥᑕ ᒥᒉᑦ ᑯᑕᑭᔭ, ᑮ ᐊᓓᐗᒃ ᒫᑲ ᒋᓴᓴ ᐅᓯᑎᓕᒃ; ᑮ ᒥᓇᐙᒋᐁᐤ ᒫᑲ: 31ᒥᔮᒪᐎᒥᒉᑎᒋᒃ ᐃᓕᓕᐗᒃ ᒫᑲ ᑮ ᒫᒪᔅᑳᑕᒶᒃ, ᐁ ᐙᐸᒫᒋᒃ ᐁᑳ ᑳ ᓂᑕᐌᓕᒋ ᐁ ᐋᔭᒥᓕᒋ, ᑳ ᒫᔅᑭᓯᓕᒋ ᐁ ᒥᓗᐋᔮᓕᒋ, ᐁᑳ ᑳ ᓂᑕᐅᑌᓕᒋ ᐁ ᐱᒧᑌᓕᒋ, ᓀᔥᑕ ᐁᑳ ᑳ ᐙᐱᓕᒋ ᐁ ᐙᐱᓕᒋ: ᑫ ᒫᒥᒋᒥᒣᐗᒃ ᒫᑲ ᐃᔅᕃᐃᓪ ᐅ ᑭᒋᒪᓂᑐᒪ᙮
ᒋᓴᔅ ᐊᔕᒣᐤ ᓀᐤ ᑭᒋᒥᑖᑐᒥᑕᓇ (4000) ᓈᐯᐗᒃ
(ᒫᕐᒃ 8:1–10)
32ᐁᑯ ᒋᓴᔅ ᓀᑐᒫᑦ ᐅ ᑭᔅᑭᓄᐊᒪᐙᑲᓇ, ᑮ ᐃᑗᐤ ᒫᑲ, ᓂ ᑭᑎᒫᑫᓕᒫᐗᒃ ᐅᑯ ᒥᔮᒪᐎᒥᒉᑎᒋᒃ ᐃᓕᓕᐗᒃ, ᐌᓴ ᐋᔕᔾ ᓂᔅᑐ ᑭᔑᑳᐗ ᓂ ᑮ ᐎᒉᐎᑾᒃ, ᓇᒪ ᓀᔥᑕ ᑫᒀᓕᐤ ᐋᔮᐗᒃ ᑭᒋ ᒥᒋᒋᒃ: ᓇᒪᐎᓚ ᒫᑲ ᓂ ᑳ ᑭᒋᑎᔕᐙᐗᒃ ᐁᑳ ᐁ ᒥᒋᓱᒋᒃ, ᐌᓴ ᑭᔅᑎᓈᒡ ᑲᑕ ᓄᑌᔑᓋᒃ ᒣᒀᒡ ᐁ ᐱᒧᑌᒋᒃ᙮
33ᑮ ᐃᑎᑯ ᒫᑲ ᐅ ᑭᔅᑭᓄᐊᒪᐙᑲᓇ, ᑖᓐᑌ ᑫ ᐅᒋ ᐋᔭᐗᒃ ᐅᑕ ᐸᑾᑖᔅᑲᒥᑳᒃ ᐊᓚᑯᓇᐤ ᐃᔥᐱᔥ ᑭᒋ ᑮᔥᐳᐊᑭᒃ ᐅᑯ ᐁᔅᐱᒋ ᒥᒉᑎᒋᒃ ᐃᓕᓕᐗᒃ?
34ᒋᓴᔅ ᒫᑲ ᐃᑌᐤ, ᑖᓐᑕᑐ ᐊᓚᑯᓈᐗᒃ ᐁᔭᐌᑾᒃ?
ᑮ ᐃᑗᐗᒃ ᒫᑲ, ᓃᔂᔅ, ᓀᔥᑕ ᐋᑎᑦ ᓇᒣᓯᔕᒃ᙮
35ᑮ ᐃᑕᔓᐙᑌᐤ ᒫᑲ ᒥᔮᒪᐎᒥᒉᑎᓕᒋ ᐃᓕᓕᐗ ᑭᒋ ᓇᐊᐱᓕᒋ ᒧᒌᒃ᙮ 36ᑮ ᐅᑎᓀᐤ ᒫᑲ ᐊᓂᐃ ᓂᔂᔅ ᐊᓚᑯᓇᐗ ᓀᔥᑕ ᓇᒣᓴ, ᑮ ᓇᓈᔅᑯᒧ ᒫᑲ, ᑮ ᐱᑯᓀᐤ ᒫᑲ, ᐁᑯ ᒫᓛᑦ ᐅ ᑭᔅᑭᓄᐊᒪᐙᑲᓇ, ᑭᔅᑭᓄᐊᒪᐙᑲᓇᒃ ᒫᑲ ᐊᓂᐃ ᒥᔮᒪᐎᒥᒉᑎᓕᒋ ᐃᓕᓕᐗ᙮ 37ᒥᓯᐌ ᐁ ᐃᑕᓯᒋᒃ ᒫᑲ ᑮ ᒥᒋᓱᐗᒃ, ᓀᔥᑕ ᑮ ᑮᔥᐳᐗᒃ: ᑮ ᒫᐗᓴᑯᓇᒶᒃ ᒫᑲ ᐱᐗᒋᑲᓇ ᑳ ᐃᔥᑯᐸᓕᓕᑭ ᓂᔂᔅ ᐗᑕᐱᐗᑕ ᓵᑲᔅᑭᓐ᙮ 38ᐊᓂᑭ ᒫᑲ ᑳ ᑮ ᒥᒋᓱᒋᒃ ᓀᐗᐤ ᑭᒋᒥᑖᑐᒥᑕᓇᐤ ᑮ ᐃᑕᔑᐗᒃ ᓈᐯᐗᒃ, ᐊᓯᒋ ᐃᔅᑴᐗᒃ ᓀᔥᑕ ᐊᐙᔑᔕᒃ᙮
39ᑮ ᑭᒋᑎᔕᐌᐤ ᒫᑲ ᒥᔮᒪᐎᒥᒉᑎᓕᒋ ᐃᓕᓕᐗ, ᐁ ᐳᓯᑦ ᒫᑲ ᑮ ᐯᒋ ᒥᔕᑲᒃ ᒫᒃᑖᓚ ᐊᔅᑮᒃ᙮
Currently Selected:
ᐅᐸᓓᑭᔅ ᒫᑎᐤ 15: MCNT91
Highlight
Share
Copy
Want to have your highlights saved across all your devices? Sign up or sign in
The text of the Bible in Moose Cree is in the public domain.
Moose Cree New Testament © Canadian Bible Society, 1991.
