Hch 14

'Ayc' Pablo yet' Bernabé 'a Iconio

1Yic 'ix c'och Pablo yet' Bernabé 'a chon̈b' Iconio, yamn x'och eb' 'a yol scapiya eb' yit israelal. Caw wach' xyutj eb' yaln 'el spaxti Dios ta'. Yuj cha, til wal eb' israel x'a'n 'och 'a sc'ojol, yet' pax eb' man̈ israeloc. 2Palta 'ay eb' israel ma'ix 'a'n 'och 'a sc'ojol. 'Ix ya'n eb' sc'ojloc jun tzo'n̈ eb' man̈ israeloc, sec tzchichn 'och eb' 'a eb' creyente cha. 3Ax Pablo yet' Bernabé, niwn tiempo 'ix 'ochcn wan eb' 'a jun chon̈b' cha. Caw te'n xyutj sb'a eb' yaln 'eli, yujto xya'ch eb' Cajlil yipc sc'ojol. Yic xyaln 'el eb' yab'xil schamc'ojlal Cajlil, a x'och yet' eb', sec tzcheclj 'eli, to yel tzyal eb'. 'Ix ya'n spoder 'a eb', sec tztac' sch'oxn eb' jun tzo'n̈ milagro. 4Palta ax eb' 'anma 'a jun chon̈b' cha, chab' x'el eb'. Nan̈l eb' xcan yet' eb' israel. Ax nanl xo eb' x'och yet' eb' schecb' Jesús cha. 5Ax eb' israel cha, yet' jun tzo'n̈ eb' man̈ israeloc, 'ix slajtin sb'a eb' yet' ewin yajl chon̈ab'. 'Ix smol aln eb', chajtlto 'oj sb'aj eb' Pablo yet' Bernabé, ax sjuln cham eb' yet' q'uen q'uen snani. 6Palta xyab' eb' speclal jun xalx 'a spatc cha. Yuj cha, x'at eb' 'eloc. 'Ix c'och eb' 'a chon̈b' Listra yet' 'a Derbe, 'a yol yic Licaonia. 'Ix 'ec' eb' 'a jun tzo'n̈ chon̈b' 'a sla'nil jun lugar cha. 7Ata x'ec' yalcn 'el eb' wach' 'ab'x yic colnb'il.

Julq'uenaxnac Pablo 'a Listra

8A 'a chon̈b' Listra, ata 'ay jun winc matz tac' sb'eyi, yaljb'en xoni. May 'aj tzb'ey xon win jab'oc. Ax 'a jun 'el, wocn 'ejm winac, 9wan yab'xni win 'a Pablo. Ax Pablo cha, x'och q'ueln 'a winac. 'Ix yilni to tzya'ch win 'a sc'ojol, chajtlto 'oj stac' sb'ox win yuj Dios. 10Yuj cha, caw 'ip xyutj yaln 'a win 'ixtic:

—Q'uen̈ wa'an, tojl tzach 'aj chan̈ lin̈an, xchi.

Yajn̈j wal cha, 'ix q'ue wan lin̈njoc winac. 'Ix syamn 'och win sb'eyq'ui. 11Ax yic 'ix yiln eb' 'anma tas 'ix sb'o Pablo cha, 'ix syamn 'och eb' yaln chan̈ 'a sti eb' 'aj Licaonia 'ixtic:

—Yaj wal chawn̈ qui diosalec tic, 'ix ya'ch sb'a eb' 'anma'il, x'eml eb' 'ayn̈ec, xchi eb'.

12A Bernabé, xyac' eb' scuch Júpiter. Ax Pablo, xyac' eb' scuch Mercurio#Hch 14.12 A eb' 'aj Grecia, Júpiter sb'i syajlil smasnil sdiosal eb', Mercurio sb'i schecb' sdiosal eb' chi yala'. yujto a xpaxtin 'a eb'. 'Ixta xyutj eb' sb'i eb', yujto 'ixta sb'i chawn̈ sdiosal eb'. 13'Ay jun winac, ya'mal 'och sti eb' 'anma chi 'a sdiosal tzcuch Júpiter. Yajl yaj win 'a yatutal jun comn dios chi 'a sti chon̈ab'. 'Ix 'at yi'nc cot win jun tzo'n̈ mam wacax, yet' pax jun tzo'n̈ snich te'. Xjaw win yet' eb' 'anma chi smasnil, snib'j eb' yac' xajmb'al 'a Pablo yet' 'a Bernabé. 14Palta ax yic xyab'n Bernabé yet' Pablo, 'ix syamn 'och eb' stziln jat spichul#Hch 14.14 'Ilt nota 'a Mateo 26.65. yic tzch'oxn 'el eb', to caw tu tzyil eb'. Caw 'ip xyal chan̈ eb' 'a scal eb' 'anma chi 'ixtic:

15—Ex winac, ¿tas yuj tze b'o jun tic 'ixtic? An̈ tic on̈, caw 'anman̈n̈ej on̈, 'icha ex tic. To tzwul 'ajxc cal jun wach' 'ab'x 'ayx on̈, 'actjec eyaln e b'a 'a jun tzo'n̈ comn dios may jac yel'chi. Tzeya'n 'och e nab'en 'a Dios pitzan. A b'ojnac satcha'an̈, yet' lum lum tic. Sb'ojnac pax a mar, yet' smasnil tas 'ay 'a 'a. 16A yic pecti', yactjnac can Dios eb' 'anma', sec mun tzb'o eb' 'icha tznib'ej. 17Palta 'ix colwjn̈ej yet' eb', sch'oxn sb'a 'a eb'. Yuj cha, an̈ja ya'n cot n̈ab' 'a quib'n̈ec. Tzya'n sat smasnil tas tzcawjec. A tz'a'n jantcn̈ej tas tzqui c'uxec. Tzya'n pax qui tzaljc'ojlalec, xchi eb'.

18Palta wach'xam xyal Pablo yet' Bernabé jun tzo'n̈ cha, teb'il 'ix tenchj 'och wan eb' 'anma chi yuj eb'. Yujto tznib'j eb' tzmil no wacax, tzya'n eb' xajmb'al-l 'a eb'.

19Palta 'ay jaywn̈ eb' israel 'aj Antioquía xc'ochi, yet' jaywn̈ xo eb' 'aj Iconio. 'Ix ya'n eb' sc'ojloc eb' 'anma cha. Yuj cha, xlaj sjulq'uenan eb' Pablo cha, a snan eb' to xchami. X'at sjucn can 'el eb' 'a sti 'el schon̈ab'. 20Palta ax yic xc'och oynjoc eb' creyente 'a 'a, 'ix q'uex wa'an. 'Ix 'ochx 'a yol chon̈b' jun 'ejm xo. Ax 'a junx c'u, 'ix 'atx yet' Bernabé 'a chon̈b' Derbe.

21Ata x'ec' yalcn 'el eb' wach' 'ab'x yic colnb'il. Til wal 'anma xya'ch sc'ojl 'a Cajlil yuj eb'. Xlajw cha, x'atx eb'. 'Ix 'e'x eb' 'a chon̈b' Listra, yet' 'a Iconio, yet' 'a Antioquía jun 'ejm xo. 22X'ec' eb' sjucb'tzoc eb' creyente 'a 'oxe chon̈b' cha. X'ec' yac' eb' snab'enoc eb'. 'Ix yaln eb' 'ixtc 'a eb':

—Caw te'n tzeyutj e b'a eya'n 'och e c'ojl 'a Cajlil, yujto a yic mantzac on̈ c'ochc 'a yol sc'ab' Dios, yowlal niwn syal 'oj jawc 'a quib'n̈ec, xchi eb'. 23A yic x'ec' Pablo yet' Bernabé 'a junjn iglesia, 'ix ya'n can 'och yopiso eb' tz'och ancianoal. 'Ix leslwi eb' 'a Dios, 'ix 'och pax eb' 'a c'ajb'c'ojlal. Xlajw cha, x'ajx can 'ab'enal eb' creyente 'a yol sc'ab' Cajlil yuj eb', atn 'a 'ajtil 'aych sc'ojl eb'.

Xjapx Pablo yet' Bernabé 'a chon̈b' Antioquía 'a yol yic Siria

24Xlajw cha, x'e'x Pablo yet' Bernabé 'a yol yic Pisidia. 'Ix japx eb' 'a yol yic Panfilia. 25'Ix yaln 'el eb' spaxti Dios 'a chon̈b' Perge. Xlajw cha, x'emx wul eb' 'a chon̈b' Atalia. 26Ata x'och eb' 'a yol jun barco. 'Ix japx eb' 'a chon̈b' Antioquía jun 'ejm xo. Atn 'a jun chon̈b' chi sc'anjnac can eb' creyente swach'c'ojlal Dios 'a yib'n̈ eb', yic x'at yalnc can 'el eb' spaxti Dios. Al ticnec, 'ix lajw 'el'ch jun smunljel eb' cha. 27A yic xjapx eb' 'a chon̈b' Antioquía, 'ix 'awtx cot eb' creyente 'ayc' ta yuj eb'. 'Ix yaln eb' jantcn̈ej tas 'ix sb'o Dios yet' eb'. 'Ix yaln pax eb', chajtlto a Cajlil 'ix chan ya'ch eb' man̈ israeloc sc'ojl 'a 'a. 28Niwn tiempo 'ix 'och wan eb' yet' eb' creyente ta'.

Currently Selected:

Hch 14: CSS

Highlight

Copy