Gn 19
19
Satx 'el Sodoma yet' Gomorra yuj Dios
1Ax yic wan sq'uic'b'i, 'ix c'och eb' ángel schawn̈il 'a Sodoma. Ax Lot wocn 'ejm 'a spuertail sti chon̈ab'. 'Ix yiln sb'a 'a eb', xq'ue wa'an, x'at schanc eb'. 'Ix 'em n̈ojn 'a yojltac eb' 'a sat lu'um. 2'Ix yaln 'a eb' 'ixtic:
—Ex wajlil, yuj wal dios 'ayex, coyc wet' 'a watut, 'ay a a 'oj e c'ana' yic tze b'icn eyoc. Wach' 'oj e way 'a jun 'ac'wl tic 'ayin, ax q'uic'an tzex seb' 'atxi, xchi 'a eb'.
Palta 'ix ta'w eb' 'ixtc 'a 'a:
—Yuj wal dios 'ayach, an̈ tic on̈, 'oj qui cann̈j 'a plas tic. A 'a tic 'oj qui way on̈, xchi eb'.
3Palta ax Lot, 'ix tew 'och 'a eb', c'ojnc'ojnil 'ix 'at eb' 'a yatut Lot cha. 'Ix sb'on tas wach' tzc'ux eb', xya'n pax b'o span eb' may yich; caw wach' 'ix 'aj eb' swa'i.
4A yic mantzac way eb', 'ix syamn sb'a smasnil eb' winc 'aj Sodoma cha, eb' quelem yet' eb' 'ichmtac winac, 'ix 'och oyn eb' 'a te n̈a cha. 5Syamn 'och eb' yawj 'och 'a Lot, xlaj yalnc eb' 'ixtic:
—¿'Ajtil 'ay jun tzo'n̈ winc xjaw wayc 'a atut 'a jun 'ac'wl tic? 'Ij 'elt ewin 'ayn̈ on̈, yic tzquixtn eb' on̈, xchi ewinac.
6Ax yic xyab'n Lot jun tzo'n̈ paxti cha, 'ix 'elt 'a eb'; caw wach' 'ix yutj smacn can 'elt spuerta 'a spatic. 7'Ix yaln 'a ewin 'ixtic:
—Ex wit 'anma'il, man̈ e b'o wal tas tu'. 8'Ay chawn̈ eb' 'ix wisl caw cob'es, mant 'a winc tzc'umj eb' 'ix, tztac' wi'n 'elt eb' 'ix 'ayex, yic wach' tze b'o tas tze nib'j 'a eb' 'ix. Ax 'a ewin tic, may cab' tas tu tze b'o 'a ewinac, ton̈j 'ayl ewin wul in sc'umoc, yuj cha, yowlal tzin col eb', xchi 'a ewinac.
9Palta xyaln ewin 'ixtc 'a 'a:
—'Eln̈ 'a qui sat. ¿Tom ach chuc chon̈b'alch tic tza nib'j cojxn ach tzala? A ticnec, 'ec'b'al xo 'oj ach quixtc 'a yib'n̈ ewinac, xchi eb'.
Xlajw cha, snib'n eb' yecl Lot cha, yic tznitzn 'ochch sb'a eb' 'a stz'ey te smac n̈a cha, yic tzma'n poj eb' te snani. 10Ax ewin 'ayc' yet' Lot cha, 'ix ya'n 'elt ewin sc'ab' 'a 'a, 'ix 'ijx 'och 'a yol n̈a chi yuj eb', smacn 'elt eb' te smac n̈a cha. 11Xya'n eb' ángel chi somchjc 'el snab'en ewinac, yuj cha, smasnil eb' 'ayc' 'a spatc n̈a cha, man̈xtoc stac' yiln xon eb'. Smasnil eb' quelem yet' eb' 'ichmtac winac, man̈x 'a junc mach tztac' yilni, caw 'ix c'unb' eb' sayn 'ec' smac te n̈a cha.
12Xlajw cha, xyaln eb' ángel 'a Lot chi 'ixtic:
—Toto 'ayt mach 'ayt oj a b'a yet'oc, mto onnal, mto esil, mto a n̈i', 'ij 'at eb' 'a najt et'oc, yet' smasnil tas 'ay 'ayach. 13Yujto 'oj qui satl jun chon̈b' tic on̈, caw wal niwquil xo smaysch'olnilal eb' 'anma 'a sat Jehová, yuj cha, on̈ ya'n cot Jehová wul qui satl jun tzo'n̈ 'anma tic on̈, xchi eb'.
14Xlajw cha, 'ix 'at Lot 'at yal 'a eb' sn̈i', ewin to jab'xoj yi'n sb'a yet' eb' 'ix yisl win cha, 'ix yaln 'a eb' 'ixtic:
—¡C'olc eyip, q'uen̈ec wa'an, 'elcoyec! Yujto wal satl jun chon̈b' tic yuj Jehová, xchi 'a eb'.
Palta ma'ix chaj eb' yab' tas 'ix yal Lot cha, ton̈j tzyal win snan eb'. 15A yic wan xo sacb'eli, yuj cha, xyaln eb' ángel chi 'ixtc 'a Lot:
—Toto matz a nib'j tzach cham 'a jun chon̈b' tic, ¡c'olep, 'ixc muc'uc! 'Ij 'at 'ix estzil, yet' eb' 'ix esl schawn̈il, xchi eb' 'a 'a.
16A Lot tz'inni s'ati, ax chawn̈ ángel chi 'ix quetzn 'el eb', yujto tz'o'ch sc'ojl Jehová 'a eb'. Xyi'n 'at pax eb' 'ix yistzil Lot cha, yet' eb' yisl cha. 'Ixta 'ix 'aj yel eb' 'a yol chon̈b' cha. 17Ax yic tox 'ix 'el eb' 'a sti 'el chon̈b' cha, 'ix yaln jun ángel 'a eb' 'ixtic:
—¡Yelc'ojlal tzex 'ati, colc e b'a! Man̈ ex cot q'ueln 'a e patic, man̈ ex 'och wan xon jac 'a jun 'a'lic tic, 'ixquec 'a jolmctac witz, toto matz yal e c'ojl tzex satli, xchi 'a eb'.
18'Ix yaln Lot 'ixtc 'a eb':
—Ma'ay, tzin tew 'ayx ex wajlil, yuj wal dios 'ayex. 19Caw wal niwn xo e wach'c'ojlal tze ch'ox 'ayin, 'in to in e colcn 'elta, sec matz in chami. Palta matz tac' in 'at 'a jolmctac witz cha, tecn tzin yamchj yuj jun yailal chi 'a yol b'e, ax in chami. 20A 'a sla'nil tic 'ay jun yune chon̈ab', ata tztac' in 'ati. Comnoc wal tzin e chaj 'at 'a jun chon̈b' cha, sec wach' ata tz'at in col in b'a, yujto yune chon̈b'al, xchi 'a eb'.
21'Ix yaln jun ángel chi 'ixtc 'a 'a:
—Tox 'ix wab'i, b'o cab' 'icha tzal cha, ma'oj in satl jun chon̈b' tzal cha. 22'Ixquec mu'c 'an, colc e b'a yic tzex 'atcn 'a cha, yujto mant 'a tas tztac' in b'oni yic mantzac ex c'och 'a jun lugar cha, xchi jun ángel cha.
Yuj cha, Zoar#Gn 19.22 A 'a hebreo, Zoar, lajn yab'x 'icha jun paxti "yune' ". scuchcn jun chon̈b' cha.
23Ax yic tox sacb' 'eli, 'ix c'och Lot 'a jun chon̈b' Zoar cha. 24Ax 'a satcha'an̈, ata 'ix ya' cot Jehová c'ac' yet' azufre 'a yib'n̈ chon̈b' Sodoma yet' Gomorra. 25'Ix satl jun tzo'n̈ chon̈b' chi yet' smasnil tas 'ay 'a 'a, yet' smasnil tas 'ix q'uib' 'a sat lum pan̈n cha. 26Ax 'ix yistzil win Lot cha, najt tza'n xoj xcot 'ix, 'ix 'atcn q'ueln 'ix 'a spatic. Yuj cha, 'ix cann̈j 'ix 'a yet'ul, 'ix 'ochcn 'ix q'uenal, 'icha junc snun 'atz'am.
27Ax 'a junx c'u yic sq'uin̈b'il to, 'ix 'at Abraham chi 'a 'aj xpaxtin yet' Jehová. 28'Ix yilni to a 'a Sodoma, 'a Gomorra yet' 'a smasnil ya'lical jun lugar cha, wacqui sq'ue wan stab'il, 'icha sq'ue wan stab'l junc niwquil jorna. 29Palta a yic 'ix ya'n Dios lajwc jun tzo'n̈ chon̈b' 'a jun pan̈n 'aj 'ix 'ec' cajn win Lot cha, 'ix snan cot tas 'ix sc'an Abraham, yuj cha, xcolx can 'elt Lot yuj 'a jun niwquil yailal cha.
A yin̈tl eb' moabita yet' eb' amonita
30Xlajw cha, ax Lot xiw yaj cajn 'a chon̈b' Zoar, yuj cha, 'ix 'atcn 'a lum jolmctac witz yet' eb' 'ix yisl chi schawn̈il. 'Ix 'ec' cajn eb' 'a yoltc n̈aq'ue'en. 31'Ay jun c'ual, 'ix yal 'ix b'ab'l chi 'a 'ix tza'n 'ix chi 'ixtic:
—A qui mam tic, caw wal 'ichm xo, toc 'ayt pax junc winc 'a jun lugar tic 'oj stac' qui'ni, 'icha xon sb'eyb'al smasnil 'anma'. 32Yuj cha, cac' 'u'wc 'an̈ qui mam tic, ax qui way yet'oc, yic wach' 'oj 'aljoc yunnal quet'oc, xchi 'ix.
33A 'a yic jun 'ac'wl cha, 'ix yac' eb' 'ix 'u'wc 'an̈ smam cha. Caw 'ix q'ue te 'a sjolm winac, ax 'ix b'ab'l 'ix cha, xway 'ix yet' smam cha. Ma'ix yab' win yec' teln 'ix sway yet'oc, ma'ix yab' win sq'uex wan 'ix 'a stz'ey. 34Ax 'a yic junx c'u 'ix yaln 'ix b'ab'l 'ix chi 'a 'ix tza'n 'ix chi 'ixtic:
—A 'a 'ac'wl q'uiq'ui, in way yet' qui mam tic; ax ticnec 'oj ac' 'u'wc 'an̈ paxi, sec wach' 'oj a way pax yet' ach tic, 'ixta b'i'an, ax yalj cune yet' qui chawn̈il, xchi 'ix.
35Ax 'a yic junx 'ac'wl cha, 'ix ya'n pax eb' 'ix 'u'wc 'an̈ smam jun 'ejm xo, ax 'ix tza'n 'ix chi xway yet' winac. Ax Lot cha, ma'ix yab' win sway 'ix yet'oc, ma'ix yab' pax win sq'uex wan 'ix. 36'Ixta 'ix yutj sb'a eb' 'ix yisl win Lot chi schawn̈il, yuj cha, scuchn chan̈ eb' 'ix yune yuj smam cha. 37A 'ix b'ab'el, 'ix 'alj jun yune 'ix, winc 'unin, xya'n 'ix sb'ic Moab, atn smam 'ichm eb' moabita ticnec. 38'Ix 'alj pax yune 'ix tza'n 'ix cha, winc 'unin, xya'n 'ix sb'ic Ben-ammi, atn smam 'ichm eb' amonita ticnec.
Currently Selected:
Gn 19: CSS
Highlight
Share
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
