Gn 20
20
Abraham yet' Abimelec
1'Ix 'elx win Abraham 'a lum yic Mamre, 'ix 'atcn 'a yol yic Neguev, 'a jun chon̈b' tzcuch Gerar, ata 'ay 'a snan̈l Cades yet' Shur. 2A yic 'ayc' ta', 'ix yalni to a Sara man̈ yistziloc, palta to yanb' xyutj yalni. Ax win Abimelec sreyl Gerar, 'ix 'at 'a'nc cot Sara cha, sec tz'och yistloc yalni. 3Ax 'a jun 'ac'wal, 'ix waychni Abimelec, to a Dios 'ix aln 'a 'ixtic: 'Oj a chami, yujto a 'ix 'ix x'at ac' cotoc yic tz'och 'ix estzilc alni, 'ay yichmil 'ix, xchi 'a winac.
4Palta mantzac way win yet' 'ix Sara cha, yuj cha, xyaln win 'ixtic: Ach Wajlil, ¿tom tza comn milj cham junc 'anma mant 'a smul? 5Yujto a pax Abraham 'ix aln 'ayin, to wanb' 'ix, xchi; 'ixta pax 'ix yutj 'ix yalni, in nul'j winac, xchi 'ix. Yuj cha, yet' smasnil in c'ojol, 'ixta 'ix in b'o'o, may tas tu wan in b'oni, xchi win rey cha.
6'Ix ta'w Dios 'a win rey 'ixtc 'a waychil: Wojtac to wach' xotej, yuj cha, ma'ach in chaj way yet' 'ix, sec wach' matz 'och a mul 'ayin. 7A ticnec, 'ac' meltzjoc 'ix 'a yichmil, yujto in checb' yaj winac, tztac' sleslwi win o'oj, sec matz ach chami. Palta toto ma'oj ac' meltzjoc 'ix, wal yel 'oj a chami, yet' jantcn̈ej mach 'ayc' et'oc, smasnil 'oj chamoc, xchi Dios 'a winac.
8Ax 'a junx c'u 'a yic sq'uin̈b'il to, 'ix q'ue wan win rey Abimelec, 'ix yawtn cot win eb' 'aych yopiso yet'oc, 'ix yaln 'a eb', tas xyil 'a swayich; ax yic xyab'n eb', 'ix xiw chan̈ eb' yu'uj. 9Xlajw cha, 'ix yawtn cot win Abimelec win Abraham, 'ix yaln 'a 'ixtic:
—¿Tas yuj 'ixta in otej? ¿Tas in mul 'ayach yuj cha, 'ijn tzcot jun niwquil mul tic 'a wib'n̈ o'oj, yet' 'a yib'n̈ smasnil eb' in checb' tic? Man̈ wach'c tas xa b'o'o. 10¿Tas xa na'a, yuj cha, 'ixta xotj jun tic? xchi winac. 11'Ix ta'w Abraham 'ixtc 'a winac:
—A xwutj in nani, to a 'a jun lugar tic may junc mach 'ay xiwc'ojlal 'a Dios, yuj cha, toq'ue tzin milx cham yuj 'ix wistzil tic in nani. 12Palta wal yel wanb' 'ix, yisl in mam 'ix, cojnto chuc snun 'ix, yuj cha, stac' wi'n 'ix wistziloc. 13A yic 'ix yaln Dios to tzin 'el 'a yatut in mam, yic tzin 'ec' b'eyc'oc 'a jun tzo'n̈ lugar tic, xwaln 'a 'ix, to tzann̈j lugaril 'aj tzon̈ c'ochi, tzaln wu'uj to wanb' ach, xin chi 'a 'ix, xchi Abraham cha.
14Yuj cha, xya'n meltzjoc win Abimelec 'ix Sara 'a Abraham cha, 'ix siyx pax scalnelu eb', swacx eb', x'ajx pax ewin schecb' eb', yet' eb' 'ix checab'. 15'Ix yaln Abimelec 'ixtic:
—'Ilto, yaj lum in lum tic, libre yaj lum wu'uj, yic tza si'lni 'aj 'ay lum 'aj tza nib'j tzach can cajan, xchi win rey 'a Abraham cha.
16'Ix yaln pax win rey 'ixtc 'a 'ix Sara cha:
—'Ix wac' jun mil q'uen tumn plata 'a win a nul'j cha, yic tzwa'n spacc 'ayach yet' 'a eb' 'ayc' et'oc, yuj tas 'ix 'ec' 'a qui cal tic et'oc, may junc mach 'aj tu tzach can 'a sat yuj jun tic, xchi win 'a 'ix.
17Ax Abraham 'ix leslwi 'a Dios, yuj cha, ax Dios 'ix 'a'n pax stzatzl Abimelec jun 'ejm xo yet' yistzil, yet' eb' 'ix schecb' winac, yic wach' tz'aj yalj pax yune eb' 'ix. 18Yujto a 'a yic yaln̈ cha, yujn̈ej 'ix Sara, man̈x 'ic yac' Jehová 'aljoc yune smasnil eb' 'ix 'ix 'ayc' 'a yatut Abimelec.
Currently Selected:
Gn 20: CSS
Highlight
Share
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
