Gn 22
22
Xyac' prowal Jehová win Abraham
1'Ix 'ec' jun tiempoal, 'ix 'ajx prowal win Abraham yuj Dios, toto caw yel tzya'ch win sc'ojl 'a 'a, x'awtx cot win yuj Dios, 'ix ta'w win 'a 'ixtic:
—Waj 'a tic Mamin, xchi.
2'Ix yaln Dios 'a Abraham 'ixtic:
—'Ij 'at jun c'otn̈ win onnal Isaac, win caw chamc'ojlb'il o'oj, tzach 'at 'a lum Moriah. A yic tzach c'och 'a sjolm lum tzaln 'oj in ch'ox 'ayach, tza'n tz'a win xajmb'al-l 'ayin, xchi Dios 'a winac.
3Yic wal caw sq'uin̈b'ilto, 'ix q'ue wan Abraham, 'ix ya'n 'och stz'um jun no sb'uru, stzu'n win sc'atzitz yic tz'a te yet' jun xajmb'al cha. 'Ix 'at 'a jun lugar 'aj 'ix yal Dios 'a 'a. Xyi'n 'at Isaac, yet' pax chawn̈ eb' schecab'. 4Ax 'a yic schab'jial, 'ix yiln 'at win Abraham lum witz chi 'a najat. 5Xlajw cha, xyaln 'a ewin schecb' chi 'ixtic:
—Cann̈ec 'a tic yet' no b'uru tic, an xo yet' jun wunnal tic, 'oj qui 'at jacx on̈ yic tz'at qui'noc 'ejm qui b'a 'a Dios on̈. Tzlajw cha, tzon̈ japx 'ayx tic on̈, xchi 'a ewinac.
6Xlajw cha, xya'n q'ue Abraham te c'atztz 'a squelb' win Isaac cha, 'ix yi'n 'at scuchlub' yet' sc'ac', 'ix 'at eb' schawn̈il. 7Jab' nant wal x'at eb', 'ix yaln win Isaac 'a smam 'ixtic:
—Mamin, xchi winac.
—¿Tas tzal wunnal? xchi Abraham cha.
—'Ilto quet' qui c'atzitz yet' qui c'ac', ¿palta 'ajtil 'ay pax no calnelu 'oj 'och xajmb'al-l cha? xchi winac.
8'Ix yaln Abraham 'ixtic:
—A Dios 'oj 'a'nc no calnelu 'oj 'och xajmb'al-l ach wunnal, xchi 'a winac:
'Ix b'ey't to eb' 'a yojltac. 9Ax yic xc'och eb' 'a 'aj 'ix yal Dios cha, 'ix sb'on Abraham jun yet'l xajmb'al, 'ix sb'on q'ue te c'atztz 'a yib'an̈. Xlajw cha, sjaln jun yunnal cha, 'ix ya'n q'ue 'a yib'n̈ te c'atztz 'ay q'ue 'a yib'n̈ yet'l xajmb'al cha. 10Ax 'a yic jun rato cha, xya'n 'at sc'ab', xyi'n cot scuchlub' yic tzmiln jun yunnal chi xajmb'al-l snani. 11Ax jun yángel Jehová, a 'ix 'awj 'emt 'a satcha'an̈, 'ix yaln 'ixtic:
—Abraham, Abraham, xchi.
—¿Tas tzal Mamin? xchi win 'a 'a.
12'Ix yaln jun ángel chi 'ixtic:
—Man̈ a mil cham onnal, a ticnec wojcxo to tzach xiw 'ayin, 'in xa yiclj a'n jun c'otn̈ onnal chi 'ayin, xchi jun ángel cha.
13Xlajw cha, xyiln 'at Abraham to sut'n can sch'ac jun no calnelu 'a scal q'ui'ix. Yuj cha, 'ix 'at yi'nc cot win no calnelu cha, 'ix ya'n tz'a win no xajmb'al-l sjelc win Isaac. 14Xlajw cha, xya'n can Abraham sb'ic jun lugar chi 'ixtic: A Jehová, a tz'a'n tasto yowlal tznib'xi, xchi. Yuj cha, an̈ja 'ixta yaln eb' 'anma ticnec: A 'a lum witz yic' Jehová, ata tzyac' tas yowlal tznib'xi, xchi eb'.
15'Ix 'awj pax 'emt jun yángel Jehová 'a satchan̈ 'a win Abraham 'a scha'ejmal. 16'Ix yaln 'ixtic:
—An Jehová in, an tzwala: Yujto 'ix a yiclj a b'on jun tic, ma'ach xiw a'n jun c'otn̈ onnal tic 'ayin, yuj cha, an tzwac' in ti', 17to tzwalcn 'el in wach' paxti 'a eb'an̈. 'Oj wic' wal chan̈ sb'isl en̈til. 'Icha wal sb'isl c'anal 'a satcha'an̈, 'icha pax yarenail sti a mar, 'ixta 'oj 'aj eb'. Ax ya'n pax ganar eb' 'a eb' 'ajc'ojl yajch 'a 'a. 18Yujto 'ix a yiclj tas 'ix wala, yuj cha, smasnil chon̈b' 'a yolyib'n̈q'uinl tic, 'oj scha eb' in yaxilal o'oj, xchi Dios 'a winac.
19Xlajw cha, 'ix meltzj pax Abraham yet' win Isaac 'a 'aj 'aycn chawn̈ ewin schecb' cha. Junxn̈ej x'aj eb' s'ati, 'ix c'och eb' 'a yol yic Beerseba, ata 'ix cann̈j cajn eb'.
Eb' yunnal Nacor
20Ax yic tox 'ix 'ec' jaye tiempoal yuj eb' ta', 'ix yab'n win Abraham to a Nacor, win yu'tac, 'ayx yunnal win yet' 'ix Milca, atn 'ix yistzil winac. 21Uz sb'i win b'ab'l 'unin, Buz sb'i win schab'il, Kemuel sb'i win yoxil, atn win smam win Aram. 22'Ix 'alj pax Quesed, Hazo, Pildás, Jidlaf yet' Betuel. 23A Betuel cha, atn smam 'ix Rebeca; atn wajxcwan̈ yune Milca tic yet' Nacor, win yu'tac Abraham.
24'Ayt pax jun tzo'n̈xo yunnal Nacor yet' junx 'ix schab'l 'istzil Reúma sb'i, atn eb' tic: Teba, Gaham, Tahas yet' Maaca.
Currently Selected:
Gn 22: CSS
Highlight
Share
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
