Gn 25
25
Eb' yunnal Abraham yet' 'ix Cetura
(1 Cr 1.32-33)
1'Ix yij Abraham junx 'ix 'ix yistziloc, atn 'ix Cetura sb'i. 2Atn eb' yunnal tic yet' 'ix, Zimram, Jocsán, Medán, Madián, Isbac yet' Súa. 3A Jocsán atn smam Seba yet' Dedán. Ax eb' yin̈tl Dedán, atn eb' asureo, eb' letuseo yet' eb' leumeo. 4A eb' yunnal Madián atn: Efa, Efer, Hanoc, Abida, yet' Elda. Smasnil jun tzo'n̈ eb' tic, yin̈tl 'ix Cetura eb'. 5Smasnil tas 'ay 'a Abraham, 'ix ya'cn smacloc win Isaac. 6Ax pax eb' yune jun tzo'n̈ xo eb' 'ix yistzil win Abraham cha, cojn siylab' xya'cn win 'a eb'. A yic pitznto winac, 'ix syamn 'och schecn can 'el ewin 'a stz'ey Isaac, 'ix checx can 'at eb' 'a lum lum 'ay 'a stojlal 'aj tzq'uel c'u.
Schamlil win Abraham
7A Abraham 175 ab'il sq'uinal yic 'ix chami. 8'Ichm wincal x'i'ni yic xchami. 9A eb' yunnal, atn Isaac yet' Ismael, 'ix 'at eb' smuc 'a yojl q'uen q'uen olb'il 'a Macpela, 'a yojltac 'at Mamre, atn 'a lum slum can win Efrón yunnal Zohar win hitita. 10Atn lum manb'il can yuj Abraham chi 'a eb' hitita. Ata junn̈j xmucx can Abraham chi yet' 'ix Sara, atn 'ix yistzil winac. 11Ax yic tox xcham win Abraham cha, ax Dios x'a'n swach'c'ojlal 'a yib'n̈ Isaac. Ata xcancn cajn 'a stz'ey a 'uc'b'il a tzcuch Dios Pitzan A Tzin 'Ilni.
Eb' yin̈tl Ismael
(1 Cr 1.28-31)
12Atn eb' yunnal win Ismael tic, win yunnal can Abraham yet' 'ix Agar, 'ix 'aj Egipto ya'mal servil Sara. 13-15Atn stzol-l x'aj yalj eb' tic: Nebaiot, atn win b'ab'l winc cha; xlajw cha, x'alj Cedar, Adbeel, Mibsam, Misma, Duma, Massa, Hadar, Tema, Jetur, Nafis yet' Cedema. 16Atn sb'i eb' lajchwan̈ yunnal Ismael tic. A sb'i ewin chi x'och sb'ic slu'um, lum 'aj xcan cajn junjn ewinac. Junjn eb', yajl x'ajcn eb' 'a junjn schon̈b' cha.
17Ax Ismael 137 ab'il sq'uinal yic 'ix chami. 18A smasnil eb' yin̈tl cha, 'ix c'ochcn cajn eb' 'a snan̈l lum Havila yet' Shur, 'a yojltac cot Egipto, 'a 'aj tz'at sb'el Asiria. Ata 'ix 'aj cajn eb', toxn̈ej matz yal sc'ojl eb' yican eb' cha, palta 'ix c'och cajn eb' ta'.
Yaljub'al Jacob yet' Esaú
19Atn eb' yin̈tl Isaac tic, yunnal can win Abraham. 20A Isaac 40 ab'il sq'uinal, yic xyi'n sb'a win yet' 'ix Rebeca yisl Betuel, yanb' Labán win arameo, cajn 'a Padan-aram. 21A 'ix Rebeca cha, may yune 'ix, ax Isaac xleslwi 'a Jehová yic tzya'n Dios yunnal eb'. Ata xyab' Jehová slesal, yuj cha, scuchn chan̈ 'ix Rebeca chi yune b'i'an. 22Ax eb' 'unn cha, tiyx eb', caw tzyac' eb' owl 'a yol sc'ojl snun cha. Yuj cha, 'ix snan 'ix 'ixtic: Toto 'ixtc jun tic tzjaw 'a wib'an̈, ¿tasto wal yuj pitzn in? xchi 'ix. Yuj cha, x'at 'ix 'at yal syailal 'a Jehová. 23'Ix ta'w 'ixtc 'a 'ix:
Chab' chon̈b'al 'aych yin̈tl 'a yol a c'ojol. A chab' chon̈b'al cha, 'oj 'och eb' 'ajc'ojlal 'a jun jun. Jun caw 'ay yip 'a yib'n̈ junx cha. A win b'ab'el 'oj can win 'a yaln̈ schecnb'il win tza'n 'unin, xchi Dios.
24'Ix c'och sc'ul yalj yune 'ix Rebeca cha, tiyx eb' 'unn chi x'alji. 25Win xb'ab'l 'alji, chac yilx winac, caw patztac sniwnal yet' xi'il, xya'n eb' sb'ic Esaú.#Gn 25.25 Esaú an̈jtona tzcuch pax Seir 'a junc xo macan̈. A 'a hebreo lajn Seir 'icha jun paxti " 'ay xi'il". 26Tza'n sjapx jun yu'tac cha, t'un̈n 'och 'a yich sq'uenl yoc Esaú, xya'n eb' sb'ic Jacob.#Gn 25.26 A 'a hebreo, a jun b'i tzcuch Jacob, lajn yab'x 'icha jun paxti "yichsq'uenlyoc" mto "tzto'cc junc tas yico'oc." 'Ilt Gen. 27.36. 60 ab'il sq'uinl win Isaac yic x'alj eb' yune 'ix Rebeca cha.
Schon̈cn Esaú*r* smacl yic b'ab'l 'unnab'ilal
27'Ix q'uib' chan̈ chawn̈ eb' 'unn cha. A win Esaú schaj sc'ojl win yec' b'eyc'oc 'a calte'. Caw jeln x'aj win 'a ma'j noc'. A pax win Jacob jun, cojn ta tzmunlj 'a scamplamento eb'. 28Caw wal 'ay schamc'ojlal Isaac 'a win Esaú cha, yujto caw tznib'j win Isaac tzchi no c'ultcal noc' tzjaw yuj winac. Ax pax 'ix Rebeca cha, caw wal tzalj 'ix yet' win Jacob.
29'Ay jun c'ual, wan sb'on win Jacob tas tzc'uxu, yic xjaw win Esaú b'eyc'oc 'a b'esan, caw wal c'unb'nac winac. 30Yuj cha, xyaln win Esaú 'ixtc 'a win Jacob:
—Tzin tew 'ayach, 'ac' in c'ux jac a tan chac yilx cha, caw tzin cham yuj wejel, xchi winac.
(Yuj cha, Edom#Gn 25.30 A 'a hebreo, Edom lajn yab'x 'icha jun paxti "chacchac". x'ajx can sb'ic winac.)
31Palta xyaln Jacob 'ixtic: Toto tza ta'wj can a macl yic b'ab'l 'unnab'ilal 'ayin, toto 'ixta', tzwac' tas tza c'uxu, xchi Jacob cha.
32Yuj cha, xyaln Esaú 'ixtic:
—'Ilto, wan in cham yuj wejel, yilx jun in macl yic b'ab'l 'unnab'ilal cha ¿tas wal 'oj 'och wu'uj? xchi winac.
33'Ix yaln pax Jacob: 'Ac' a ti 'ayn 'a yic jun rato tic, xchi Jacob cha.
—Inye, xchi Esaú, 'ix ya'n sti yic tzch'oxn 'eli to tzta'wj can smacl yic sb'ab'l 'unnab'ilal 'a Jacob cha. 34Xlajw cha, xya'n Jacob wa'il, yet' jun 'uc'b' tan chi 'a Esaú, ax yic xlajw swa'i, 'ix q'ue wa'an, 'ix 'atxi, may xon jac tas tzna yuj smacl yic sb'ab'l 'unnab'ilal cha.
Currently Selected:
Gn 25: CSS
Highlight
Share
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
