Gn 26
26
'Ix 'atcn win Isaac 'a yol yic Gerar
1A 'a yic jun tiempoal cha, 'ix jaw jun niwquil wejl 'a jun lugar cha, 'icha ya'jnac 'a stiempoal win Abraham. Yuj cha, x'atcn Isaac 'a yol yic Gerar, 'a 'aj 'ayc' win Abimelec sreyl eb' filisteo. 2Ata sch'ox sb'a Jehová 'a 'a, xyaln 'a 'ixtic: Man̈ ach 'at 'a Egipto, cann̈ 'aj xwal 'ayach. 3A ticnec, wach' ajcn 'a jun lum tic. 'Aynn̈ej 'ec' et'oc, ax wa'n pax in yaxilal 'ayach. A smasnil jun lum tic, 'oj wac' 'ayach, yet' 'a smasnil en̈til, sec tz'el'ch smasnil tas waljnac can 'a a mam, atn Abraham. 4Caw 'oj wac' niwtjoc sb'isl eb' en̈tl 'icha c'anal 'a satcha'an̈, ax wa'n jun lum tic 'ayach. An̈jtona', yujn̈ej eb' en̈tl cha, ax schan smasnil nacion̈ in yaxilal. 5Yujto a Abraham syicljn̈ej smasnil tas xwala, syicljn̈ej smasnil in checnb'il, yet' in ley, yet' cuynb'il 'ix wac' 'a 'a, xchi Dios 'a Isaac.
6Yuj cha, xcancn Isaac 'a lum Gerar. 7Ax yic sc'anb'n ewin 'aj lugar cha, tas yaj 'ix Rebeca yet' Isaac. Yuj cha, xiw Isaac chi yalni chajtlto yistzil 'ix, xyalni to yanab', yujto caw wach' yilx Rebeca cha. 'Ix sna Isaac lemb'il tzmilx cham yuj ewin 'aj lugar chi yuj 'ix.
8'Ix 'ec' tiempo yuj eb' 'a jun lugar cha, 'ay jun c'ual, 'ix yiln 'elt win rey chi 'a swentnual yatut, to caw tzalj 'och Isaac chi 'a 'ix Rebeca cha. 9Yuj cha, x'at ya'nc win 'ijxoc cot Isaac, xyaln win rey chi 'a 'ixtic:
—Tox xwila, chajtlto estzil 'ix 'ix tic, ¿'ixtnta', mto ma'ay? ¿Tas yuj 'ix ala to anb' 'ix? xchi winac.
—'Ix in na'a toq'ue tzin milx cham yuj 'ix, yuj cha xwaln 'ixta', xchi Isaac cha.
10Palta xyaln win rey chi 'ixtc 'a 'a:
—¿Tas yuj 'ixta on̈ otj on̈? Jab'xoj ma'on̈ 'em 'a maysch'olnil o'oj. Q'uinloc 'ay junc winc xway yet' 'ix estzil tic, oj wali tz'och qui mul on̈, xchi winac.
11Yuj cha, 'ix ya'n win rey chi alxoc 'ixtc 'a smasnil eb' 'anma cha:
—Toto 'ay junc mach tzuntzn jun winc tic yet' yistzil, tojln̈ej cab' schami, xchi winac.
12A 'a yic jun ab'il cha, x'aww trigo win Isaac 'a jun lugar cha, caw wal wach' 'ix 'aj smunljel, niwn tas 'ix smolo, yujto a Jehová, a x'a'n syaxilal 'a yib'an̈. 13Yuj cha, caw x'och ricoal, til wal tas 'ay 'a 'a. 14Til wal scalnelu, swacax, yet' schecab'; yuj cha, caw xchichn 'och ewin filisteo chi 'a 'a. 15Yic pitznto smam Isaac cha, atn Abraham, 'ix sjoyn can eb' schecb' jun tzo'n̈ 'uc'b'il a 'aj tzyu'j no scajb'en noc' a'. Ax ewin filisteo 'ix mucn can pax yet' lu'um. 16'Ix yaln win rey chi 'a Isaac chi 'ixtic:
—'Eln̈ 'a tic, yujto yel xo rico ach 'a quib'n̈ on̈, xchi winac.
17Yuj cha, x'at Isaac, xc'och cajn 'a span̈nil yic Gerar, ata xcan cajan. 18Sjoyn pax win a 'uc'b'il a joyb'il can yuj Abraham 'a pecti', atn jun smucjnac eb' filisteo 'a yic chamnc xo Abraham cha. A sb'i a 'aycn 'och yuj smam cha, an̈ja a 'ix yac' Isaac chi sb'ioc. 19A ewin schecb' Isaac cha, a yic wan sjoyn ewin a 'uc'b'il a 'a jun 'a'lic cha, ax x'aji x'ilchj jun sjaj a yuj ewinac. 20Ax jun tzo'n̈ xo ewin 'ilm calnelu yic Gerar tz'ec' 'a jun 'a'lic cha, tzya'n eb' owl yet' ewin yilmal scalnelu Isaac cha, yujto tzyal ewinac to yic eb' jun a cha, yuj cha, xya'n Isaac sb'ic jun a chi Chacjb'ail, yujto schac sb'a ewin yuj a'. 21Xlajw cha, sjoyn ewin schecb' Isaac junx a', schacn pax sb'a ewin yuj a jun 'ejm xo, xya'n can pax win sb'ic jun a chi 'Ajc'ojlal.
22'Ix 'atx Isaac 'a junx lugar, ata 'ix c'och cajan. 'Ix sjoyn ewin junx a 'uc'b'il a cha, man̈x 'a owl yuj a'. Yuj cha, scuchn can a 'Actb'il 'Eli. 'Actb'iln̈ 'el yuj Jehová yic tzin q'ue'ch 'a jun lugar tic, xchi Isaac.
23Xlajw cha, x'atx 'a Beerseba. 24A 'a yic jun 'ac'wl cha, ata sch'ox sb'a Jehová 'a 'a, 'ix yaln 'a 'ixtic:
An ton tic sDiosal in a mam, atn Abraham, man̈ ach xiwoc, 'ayn 'och et'oc. Yujn̈ej to in checb' Abraham, yuj cha, 'oj wac' yaxilal 'a eb'an̈, til wal 'oj wutc sb'isl en̈til, xchi Dios.
25'Ixta to b'i'an, 'ix sb'on Isaac jun yet'l xajmb'al 'a jun lugar cha, 'ix yaln sb'a 'a Jehová. 'Ix can cajn 'a jun lugar cha, ax eb' schecab', 'ix sjoy eb' junx a 'uc'b'il a ta'.
A strato Isaac yet' rey Abimelec
26'Ay jun c'ual, 'ix cot win rey Abimelec 'a Gerar, xwulc' paxtinc yet' Isaac. Ajun jun swach'c'ojl tzcuch Ahuzat yet'oc, yet' win Ficol, yajl yaj 'a scal eb' soldado winac. 27'Ix yaln Isaac 'a eb' 'ixtic:
—'In to ax tic matz in e nib'ej, yuj cha, masnto in e pechl 'a sat e lu'um, ¿tasto yuj tzwul in eyila'? xchi 'a eb'.
28Yuj cha, xta'w eb' 'ixtc 'a 'a:
—Tox 'ix quil on̈ to 'aych Jehová et'oc, yuj cha, xqui nan on̈ to tzqui b'o junc qui trato et'oc. A jun trato 'oj qui b'o cha, atn tic: 29May cab' b'a'n̈ tzon̈ extj on̈, yujto an̈ tic on̈, may 'ajtil ach quixtej. A quico', to wach' tzcal 'ayach, junc'ojlal ach qui chec 'elta, ax ticnec tzquila to a Jehová tz'a'n syaxilal 'a eb'an̈, xchi eb' 'a 'a.
30Yic xlajw xpaxtin eb' cha, ax Isaac 'ix ya'n 'och jun niwquil q'uin̈, yuj cha, xwa eb' xyu'n eb' tas 'a tzaljc'ojlal. 31Ax 'a junx c'u, xq'ue wan eb' 'a sq'uin̈b'ial, 'ix laj sta'wni eb' can sti 'a jun jun, xlajw cha, xyaln can sb'a eb' 'a Isaac 'a junc'ojlal.
32A 'a jun c'u cha, ata xjaw ewin schecb' Isaac wul yal 'a 'a, to a lum jul joyb'il can yuj ewinac, 'ayx a a 'a yojol. 33Yuj cha, ax Isaac x'a'n sb'ic jun 'uc'b'il a chi Seba, ax jun chon̈b' 'ayc' 'a stz'ey cha, scuchcn pax Beerseba.
34Chawinc ab'il sq'uinl Esaú yic xyi'n sb'a yet' 'ix Judit, 'ix yisl win Beeri hitita, xyi'n pax win 'ix Basemat, yisl pax junx win hitita win Elón sb'i. 35A chawn̈ eb' 'ix tic, xyac' eb' 'ix cus sc'ojl win Isaac yet' 'ix Rebeca.
Currently Selected:
Gn 26: CSS
Highlight
Share
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
