Gn 27
27
Yaljnac Isaac swach' paxti 'a Jacob
1'Ix 'ec' tiempo, 'ix 'och win Isaac 'ichm wincal, man̈xtzac stac' yiln winac. 'Ay jun c'ual, 'ix yawtn cot Esaú atn win sb'ab'l 'unnal xyaln 'a 'ixtic:
—¡Ach wunnal! xchi 'a winac.
—¿Tas tzal 'ayn mamin? xchi 'a smam cha.
2'Ix yaln Isaac 'ixtic:
—Tic wal tzela caw wal 'ichm inx winac, toq'ue yic q'ui'n chab'ej chamnc in xo. 3Yuj cha, tzin nib'ej to tzach 'at a say junc in chib'j 'a scal te', 'ij 'at a jul-lab' yic tza juln junc wico'. 4Tza b'on junc schib'l woch tan tz'aji, wach' tz'aj 'icha wal tzin nib'ej. A yic tzb'o 'el'ch o'oj, tze'n cot 'ayin, ax in wa yet'oc. Ya' sb'a tzin wa cha, ax waln can in wach' paxti 'a eb'an̈, yic mantzac in chami, xchi.
5Ax 'ix Rebeca, wan yab'n 'ix tas wan yaln win Isaac 'a Esaú. Yuj cha, ax yic x'at Esaú 'at say schib'j smam chi 'a caltcte', 6'ix yaln 'ix 'ixtc 'a win Jacob, win tza'n 'unin:
—A ticnec ach wune', xwab' wal yaln a mam 'a ni o'tac Esaú 'ixtic: 7'At jul junc no calte'al noc' in chi', tzlajw cha, tza b'on junc schib'l woch tan tz'aji, caw wach' tzotej. Ya' sb'a tzin wa'i, ax waln in wach' paxti 'a eb'n̈ 'a yojltac Jehová yic mantzac in chami, xchi 'a na. 8A ticnec ach wune', yiclj tas 'oj wal 'aych tic: 9'Ixc 'a 'aj 'ay scol-l no calnelu, tze'n cot chawn̈oc no cotc chiwo, no caw b'aq'uech. Ax in b'on jun schib'l yoch a mam caw wach' 'oj wutoc, 'icha wal tznib'ej. 10Ach xo 'oj 'at ac' 'a 'a, sec 'oj wa yet'oc, sec 'ixta 'oj yutc yaln can swach' paxti 'a eb'an̈, ya' sb'a mantzac chami, xchi 'ix Rebeca cha.
11Palta xyaln Jacob 'a snun 'ixtic:
—A ni wu'tac cha, caw 'ay xil ni 'a sniwnal, an xo tic may in xi'il. 12Toq'ue a 'in mam cha, 'oj in syamloc ax in yojcan 'eli, ax 'oj yutc snani ton̈j tzwixtj paxti'. Ax am wal tz'aji a catb' paxti tzyalcn 'el 'a wib'an̈, man̈oc am wach' paxti tzyalcn 'a wib'an̈, xchi winac.
13Palta xyaln snun chi 'a 'ixtic:
—May ach wune', toto tzach scatb'tzej cani, a cab' 'a wib'n̈ tzcotcn jun catb' cha, cojnto tza yiclj tas tzwala. 'At 'ij cot chawn̈oc no cotc chiwo cha, xchi 'ix.
14'Ix 'at Jacob 'at yi' cot no cotc chiwo cha, xya'n 'a snun, caw wal wach' x'aj jun schib'l wal chi sb'on 'ix, 'icha tznib'j Isaac cha. 15Xlajw cha, xyi'n 'elt 'ix ya't pichl Esaú cha, win sb'ab'l 'une 'ix, te molb'il 'a yol yet'l eb' cha, xya'n 'och 'ix 'a Jacob, win stza'n 'une 'ix. 16Xlajw cha, ax stz'umal no chiwo cha, a spichch 'ix 'a sc'ab' winac yet' 'a stel sjaj 'a 'aj may xil cha. 17Xlajw cha, xya'n 'ix wa'il yet' schib'l sb'o 'ix chi 'a winac.
18'Ix 'at ya'nc Jacob 'a 'aj 'ayc' smam cha, xyaln 'ixtc 'a 'a:
—¡Mamin! xchi winac.
—Waj 'a tic. ¿Machch ach wunnal? xchi Isaac cha.
19—An Esaú in, a b'ab'l 'unnal in. Tox 'ix in b'o 'icha 'ix otj aln 'ayin. Q'uen̈ wa'an, 'emn̈ wocan, wa'an̈. 'Ab' wal schix no calte'al noc' x'at in jul tic, tzaln can a wach' paxti 'a wib'an̈, xchi Jacob cha.
20Xlajw cha, sc'anb'n win Isaac 'a 'ixtic:
—¿Tas wal xotj no a yamn mu'c ach wunnal? xchi.
—A Jehová qui Diosal a x'och wet'oc, yuj cha, yajn̈ej x'ilchj no wu'uj, xchi Jacob cha.
21'Ix yaln Isaac 'a Jacob chi 'ixtic:
—Nitz cot a b'a 'a in tz'ey, 'oj ach in yamloc toto yel ach wunnal Esaú ach, xchi 'a winac.
22Yuj cha, snitzn 'ochch sb'a Jacob 'a stz'ey smam cha, sec tzyamlx yu'uj. Xlajw cha, xyaln Isaac 'ixtic: Coyn wal to a yol sjaj Jacob tzwab'i, cojn b'i'an, to 'ay xil sc'ab' na, 'icha yic Esaú, xchi Isaac cha. 23Ma'ix nachj 'el xon yuj winac, yujto 'ay xil sc'ab', 'icha yic yu'tac Esaú cha. 'Ix yaln can swach' paxti 'a yib'n̈ jun yunnal cha. 24Sc'anb'n pax wal jun 'ejm xo 'a Jacob 'ixtic:
—¿Yel am wali ach wunnal Esaú ach? xchi.
—N', an ton Esaú in, xchi.
25Yuj cha, xyaln smam 'a 'ixtic:
—'Ij cot schib'l woch chi 'an ach wunnal, ya' sb'a tzin chi no c'alte'al noc' x'at e' coti, tzlajw cha, ax waln can 'el in wach' paxti 'a eb'an̈, xchi.
'Ix ya'n wa Jacob smam cha, an̈jtona', 'ix yi'n cot pax te yal uva 'a 'a. 'Ix wa Isaac xyu'n pax tas tzyuq'uej. 26Xlajw cha, xyaln pax 'a win 'ixtic:
—Nitz cot a b'a 'a in tz'ey ach wunnal, tzlajw cha, tza tz'ub'n 'elt in ti', xchi.
27'Ix snitzn 'ochch sb'a Jacob chi 'a stz'ey smam cha, yic tz'ub'n 'elt sti cha, ax Isaac su'lni spichl win yunnal cha. Xlajw cha, xyaln can jun tzo'n̈ swach' paxti tic 'a yib'n̈ win 'ixtic:
N', atn wal sjab' ni wunnal tic. Lajn wal sjab' ni 'icha te snich te', te 'ay 'a scaltcte to 'ac'b'il yaxilal 'a yib'n̈ yuj Jehová.
28Ya' cab' cot Dios n̈ab' 'a yib'n̈ a lu'um, sec wach' 'oj 'aj smasnil 'awb'en 'a sat lum lu'um, caw wach' 'oj 'aj a trigo yet' pax a uva.
29Til wal 'anma 'oj a'n servil.
Smasnil eb' nacion̈ 'oj 'em cumn eb' 'ayach. 'Oj och yajlil 'a yib'n̈ eb' o'tac. ¡'Oj laj 'em cumn eb' 'a ojltac! A eb' tzaln maysch'olnil 'a a patic, maysch'olnil yic eb', ax eb' tzach aln wach'il, wach' yic eb', xchi Isaac.
Sc'an Esaú cob' yaxilal 'a yib'an̈
30Ax yic xlajw yaln Isaac swach' paxti 'a yib'n̈ Jacob, 'ix 'elt win Jacob 'a yojltac smam cha, at wal yelt win cha, xjaw pax Esaú chi julj calte'al noc' cha. 31An̈jtona', sb'on pax win jun schib'l yoch smam caw wach'. Xlajw sb'o yu'uj, 'ix yi'n 'at 'a smam cha, xyaln 'a 'ixtic:
—Q'uen̈ wan mamin, tza chin no c'ultquil noc' tic x'at wi' cot an onnaln tic, tzlajw cha, tzaln can a wach' paxti 'a wib'an̈, xchi.
32Yuj cha, 'ix sc'anb'n Isaac 'a 'ixtic:
—¿Machch jun? xchi 'a winac.
—An Esaú in, a b'ab'l 'unnal in, xchi winac.
33Caw wal 'ix sat sc'ojl Isaac, toxn̈ej tzquecni spaxtini, xyaln 'ixtic:
—¿Mach pax ni xit' ma'j noc' chi jun, yuj cha, 'ix wul sb'ab'l 'a'nc ni no in chi'? An tic 'ix in c'ux smasnil, yic mantzac ach jaw 'ayin, yuj cha, xwaln can 'el wach' paxti 'a yib'n̈ na. A ticnec, yic xo ni yaj wach'l cha, xchi Isaac.
34Ax yic xyab'n Esaú smasnil tas 'ix yal smam cha, yuj cha, caw wal ji'jmtac yoq'ui, 'ix 'awj cha'an̈, 'ix yaln 'ixtic:
—¡Alcn pax a wach' paxti chi 'a wib'n̈ mamin! xchi winac.
35Palta xyaln Isaac 'a 'a:
—Tox 'ix wulc' ni o'tac chi 'ayin, atn ni 'in 'ixtn paxti', yuj cha, a ni 'ix 'i'n can smasnil wach'l to ec xon yaji, xchi.
36—Tom yuj chi jun sb'in can ni Jacob. Xchalal xo in yixtn ni tic, b'ab'el 'ix yijcan 'ec' ni in macl yic b'ab'l 'unnab'ilal, ax pax ticnec; tzyi'n can pax 'ec' ni wach'l to wic xon yaji. ¿Man̈x am wal junc xo wach'l c'ub'b'il can 'el 'oj 'ayn jun mamin? xchi Esaú cha.
37'Ix yaln Isaac chi 'a Esaú 'ixtic:
—'Ilto, tox xwa'ch yopiso ni Jacob 'a eb'an̈. Smasnil eb' yu'tac 'oj 'och eb' schecb'oc. An̈jtona', tox 'ix walcni, to til wal 'oj yutc ya'n trigo yet' te uva 'a na. ¿Tasto wal wach' tzach wutj ach wunnal? xchi.
38'Ix tew 'och wal to Esaú 'a smam, 'ix yaln 'ixtic:
—¿Man̈x am wal junc xo wach'l tzalcn 'a wib'n̈ jun mamin? ¡Alcn pax a wach'l 'a wib'n̈ jun xo! xchi. Xlajw cha, 'ix 'el yaw Esaú yoc' jun 'ejm xo.
39Yuj cha, xyaln can pax Isaac 'ixtc 'a 'a:
Caw wal najt tzach 'elcn 'a sat lum lum 'ay syaxil sat, yet' 'a 'aj wach' ya'n n̈ab'.
40Cojn yet' a espada 'oj stac' a coln a b'a, schecb' pax ni o'tac 'oj ajcn 'ochi. Palta ax yic 'ayx ep, 'oj a col-l a b'a 'a yol sc'ab' na, xchi Isaac cha.
X'at Jacob 'elc 'a Esaú
41At xo ta xchichn can 'och sc'ojl Esaú 'a Jacob, yuj tas 'ix alx can 'a yib'n̈ yuj smam cha. Yuj cha, 'ix snan 'ixtic: Jab'xoj wal 'oj in cus yuj schamlil in mam tic. Lajw xoj cha, ax in miln cham jun wu'tac Jacob tic, xchi.
42Palta ax 'ix Rebeca xyojquej 'el 'ix tas wan snan Esaú, yuj cha, xya'n 'ix 'awtxoc cot Jacob, xyaln 'ix 'a win 'ixtic:
—'Ilt nab'an, a ni o'tac Esaú tznib'j ni tzach smil chamoc, yuj ya'n ni spac 'ayach. 43Yuj cha, ach wune', ab' wal tas 'oj wala'. 'Eln̈ 'a tic, ata tzach c'ochcn 'a lum Harán, a yet' ni 'in nul'j Labán, ata tzach 'aji. 44Tzach can yet' ni junc tiempoal ta', masnto 'oj 'e'cn yowl sc'ojl ni o'tac tic 'a eb'an̈. 45Ax yic tox sat sc'ojl ni yuj a mul cha, ax wa'n alxoc 'ayach, sec tzach paxta. Matz in nib'j to junn̈j c'u tzex cham e chawn̈il, xchi 'ix.
46Xlajw cha, xyaln 'ix Rebeca 'a Isaac 'ixtic:
—Caw wal tzcus in c'ojl yuj eb' 'ix hitita, eb' 'ix yistzil ni Esaú tic. Yuj cha, toto tzyij sb'a ni Jacob yet' junc eb' 'ix hitita cajn 'a Canaán tic, yel xo am wach' tzin chami, xchi 'ix.
Currently Selected:
Gn 27: CSS
Highlight
Share
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
