Gn 28
28
1Yuj cha, xyawtn cot Isaac win Jacob, syamn 'och yaln can wach' paxti 'a yib'an̈, xyaln can jun checnb'il 'a 'ixtic: Man̈ ec' a b'a yet' junc 'ix 'aj Canaán tic. 2Ata tzach 'at 'a yol yic Padan-aram 'a yatut a mam 'ichm Betuel. Tze'n a b'a yet' junc eb' 'ix yisl win Labán, win snul'j a nun tic. 3Ax Dios tztac' yuj smasnil, a 'oj yac' syaxilal 'a eb'an̈, til wal 'oj 'aj 'el'ch sb'isl en̈til. A 'a scal eb', ata niwn nacion̈ 'oj 'eltoc. 4'Oj ya'cn smasnil yaxilal 'ayach yet' 'a smasnil eb' en̈til, atn jun yaxilal 'a 'aj xya'cn Dios sti ya'n 'a a mam 'ichm Abraham, sec wach' 'oj 'och lum lum tic eco'oc, lum 'ajtil ton̈j cajn on̈ 'ec' tic, yujto caw a Jehová, a 'ix altn lum 'a a mam 'ichm cha, xchi Isaac.
5'Ixta 'ix 'aj xchecx can 'at Jacob yuj Isaac 'a lum Padan-aram. 'Ix c'och Jacob 'a yatut Labán, win yunnal Betuel win arameo, snul'j 'ix Rebeca 'ix snun Jacob yet' Esaú.
'Ix 'och junx yistzil Esaú
6Ax yic xyiln win Esaú to wan yaln Isaac wach' paxti 'a yib'n̈ Jacob, schecn can 'at 'a Padan-aram, sec ata tz'och yistzil ta'. An̈jtona', 'ix yil paxi to a smam, a yic xyaln can swach' paxti cha, xya'n yojcoc can 'eli to matz tac' yi'n sb'a Jacob yet' eb' 'ix 'ix 'a Canaán cha. 7Ax Jacob x'atcn 'a Padan-aram, 'icha xyutj yaln smam yet' snun 'a 'a. 8'Ixta 'ix yutj Esaú yojcan 'eli, to a smam cha, matz nib'j eb' 'ix 'ix 'a Canaán cha. 9Yuj cha, 'ix 'at Esaú yil win yu'tac smam atn Ismael, win yunnal can Abraham, 'ix yi'n sb'a win yet' jun 'ix yisl win Ismael cha, Mahalat sb'i 'ix, yanb' win Nebaiot. 'Ix 'och 'ix yistloc win Esaú yet' eb' 'ix yistzil xon cha.
Sch'oxjnac sb'a Dios 'a Jacob
10A yic x'el Jacob 'a Beerseba, x'atcn 'a sb'el Harán. 11'Ix c'och 'a jun lugar, axta xcan wayc 'a jun 'ac'wl cha, yujto tox 'ix 'em c'u. Ax yic xwayi, 'ix yi'n cot jun q'uen q'uen sc'an̈jolmoc, xlajw cha xwayi. 12Ax 'a jun 'ac'wl cha, 'ix 'och swayich, ax xyilni, 'ay jun b'e 'icha c'o'och, te'n 'ejm 'a sat lu'um, masnto tzq'ue'ch 'a satcha'an̈. Ax xyilni to a eb' yángel Dios tzq'ue'i tz'emt eb' 'a jun c'och cha. 13Xyiln paxi to a Jehová lin̈n 'ec' 'a stz'ey, xyaln 'a 'ixtic: An ton tic Jehová in, sDiosal in a mam 'ichm Abraham, yet' a mam, atn Isaac. A 'ayach, yet' 'a smasnil eb' en̈til, ata 'oj wac' lum lum tic 'aj teln ach 'ec' tic. 14A eb' en̈tl cha, caw niwn 'oj 'aj eb' 'icha spoccal lum lu'um, ax spuccn 'at eb' 'a stojlal norte yet' 'a stojlal sur. 'Ay pax eb' 'oj 'atcn 'a stojlal 'aj tzq'uel c'u yet' 'a stojlal 'aj tz'em c'u, ax smasnil eb' 'anma 'a yolyib'n̈q'uinl tic, 'oj scha eb' yaxilal 'a a patctacl ach tic, yet' a eb' en̈tl b'aq'uin̈. 15'Aynn̈ej 'och et'oc, ax ach in tan̈wni pax 'a 'ajtil 'oj eq'ui, ax ach wi'n meltzjoc 'a lum lum tic jun 'ejm xo. May wal b'a'n̈ 'oj ach wactcani. 'Oj in yicl 'icha xwutj wa'n in ti 'ayach, xchi Dios 'a swaych Jacob cha.
16A yic 'ix 'el swayn̈ Jacob, snan 'ixtic: Wal yel 'ayc' Jehová 'a jun lugar tic, an xo, caw wal man̈ wojcoc, xchi. 17'Ix xiw cha'an̈, yuj cha, snan 'ixtic: Caw 'ay smay jun lugar tic. Atn am wal 'a tic 'ay yatut Dios, mto ¡spuertail satchan̈ yaji! xchi.
18Ax yic sacb' 'el 'a junx c'u cha, caw seb' q'ue wan Jacob, 'ix yi'n cot q'uen q'uen 'ix 'och sc'an̈jolmoc cha, slin̈n can chan̈ q'ue'en, yic tzcan q'uen yechloc jun lugar cha, secn can 'ejm aceite 'a yib'n̈ q'ue'en. 19A 'a jun lugar cha, ata 'ay jun chon̈b' xon 'a pecti', tzcuch Luz, palta ax Jacob xjeln can sb'i, xya'n sb'ic Bet-el.#Gn 28.19 A 'a hebreo, Bet-el tzyal 'el'chi "yatut Dios".
20Atn 'a jun lugar chi 'aj 'ix ya'cn Jacob sti', 'ix yaln can 'ixtic: Toto tz'och Dios wet'oc, tzin stan̈wni 'a 'aj tzin 'at tic, tzya'n tas 'oj in c'uxu', tzya'n pax in pichul, 21toto wach' in c'ojol, ax in meltzj pax cot 'a yatut in mam, to 'ixta', a Jehová tz'och in Diosaloc. 22A 'aj 'ix in lin̈cn chan̈ jun q'uen q'uen tic, 'icha to yatut Dios tz'ajcni. A smasnil tas 'oj yac' 'ayin, 'oj wi'l junjn 'a junjn lajn̈e', ax wa'n 'a 'a, xchi.
Currently Selected:
Gn 28: CSS
Highlight
Share
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
