Gn 32
32
Xchaj sb'a Jacob yet' Esaú
1Xlajw cha, xb'ey cot win Jacob, ax x'aji schan sb'a win yet' jun tzo'n̈ yángel Dios. 2A yic xyiln win Jacob jun cha, xyaln 'ixtic: Atn am 'a tic 'ay scamplamento eb' yángel Dios, xchi. Yuj cha, xya'n sb'ic jun lugar chi Mahanaim.#Gn 32.2 Mahanaim tzyal 'el'chi "chab' camplamento".
3Xlajw cha, xchecn 'at Jacob jun tzo'n̈ eb' schecb' 'a lum Seir, 'a yol yic Edom, yic tz'at alxoc yab'xil 'a Esaú chajtlto wan sjapx jun yu'tac chi 'a 'a. 4Xyaln schecnb'il 'a eb' 'ixtic: 'At alc 'ixtc 'a ni wu'tac Esaú: To a ni o'tac Jacob, tzya'ch sb'a ni 'a yaln̈ a checnb'il, xe chi 'a 'a. Tzeyaln paxi to a yet' win Labán in 'ec' jun tiempoal. 5A ticnec 'ay in wacax, in calnelu, in chiwo, in b'uru, ewin in checab' yet' eb' 'ix in checab'. Tzwalb't jun 'ab'x tic 'aych mamin Esaú, yujto tzin nib'j tzin 'och 'a junc'ojlal et'oc, xchi Jacob, xe chi 'a 'a, xchi 'a eb'.
6Ax yic xc'ochx eb' schecb' cha, xyaln ewin 'a win Jacob 'ixtic:
—Tox on̈ xit' 'a ni o'tac chi 'on̈, tic tzjaw ni wul ach scha', caw a 'oj wul ach chanoc, chan̈e ciente eb' winc ajun yet'oc, xchi ewin schecb' cha.
7Ax yic xyab'n Jacob jun tzo'n̈ cha, caw xiw cha'an̈, caw x'och 'a niwquil somc'ojlal. Xlajw cha, spojn 'ec' eb' 'anma ajun yet'oc, chab' monto x'aj eb' yet' no wacax, no calnelu, yet' no cameyo ajun yet'oc. 8Yujto sna 'ixtic: Toto a yic tzjaw Esaú 'a junc monto, ya' sb'a tzyac' eb' owl yet'oc, ax junc xo monto tz'at 'eloc, xchi winac. 9Yajn̈ej syamn 'och sleslwi 'ixtic: Ach in Diosal, ach sDiosal in mam 'ichm Abraham, yet' in mam atn Isaac, ach 'ix ala to tzin meltzj 'a in lu'um, yet' 'a scal eb' wican, xalni to 'aych 'och wet'oc sec wach' tzin 'aj 'el'chi. 10Caw man̈ in mojc tzac' a chamc'ojlal 'ayin, yet' a wach'c'ojlal 'aych wet'oc. 'Ix in ej 'e't 'a a Jordán yic cojn jun in c'occh wet'i, ax ticnec chab' xo camplamento tzin 'aj 'el'chi, 'ayx pax tas 'ay 'ayin. 11Tzin tew 'ayach, coln 'el 'a yol sc'ab' ni wu'tac Esaú. Caw wal tzin xiwi, toq'ue tzjaw ni wul smil cham eb' 'ix 'ix yet' eb' yune tic. 12Caw wal wach' xotj alni, to 'aych 'ochn̈ej wet'oc, ax in a tan̈wni, 'ix aln paxi chajtlto til wal 'oj 'aj sb'isl win̈til, 'icha wal yarenail sti a mar, to matz tac' sb'ischji, xchi winac.
13A 'a yic jun 'ac'wl cha, xcancn Jacob wayc 'a 'aj 'ayc' cha. Ax yic sacb'i, 'a 'a scal smasnil tas 'ay 'a yol sc'ab', 'ix si'lni tas tzsiyj 'a Esaú: 14Chab' ciente no nun chiwo, junc'l pax no smam, chab' ciente no nun calnelu, junc'l pax no smam. 15X'ajx lajn̈schawinc no nun cameyo yet' yune tot 'aljnac, chawinc no nun wacax, lajn̈wan̈ pax no cotc mam wacax; junc'l no 'axna, yet' lajn̈wan̈ no b'uru. 16Wal 'a yajn̈ej xya'n win Jacob junjn c'aj no 'a eb' schecab', b'ulctac xyutej, xyaln 'a eb' 'ixtic:
—'Ixquec 'a eyojltac, najt tz'aj scal junjn monto no noc' tic, xchi winac.
17A 'a jun win 'et'jnac jun monto no b'ab'el, ata sb'ab'l alj 'ixtic:
—A yic tza chan a b'a yet' wu'tac Esaú, toto tzc'anb'j 'ayach, mach a patron̈, 'aj tzach 'ati, mach 'ay yic no noc' tic et'i, toto xchi 'ayach, 18tzaln 'a 'ixtic: A jun tzo'n̈ tic siylab' Jacob 'ayach, tza'n sjaw 'a in patic, xa chi 'a 'a, xchi win Jacob cha.
19'Ixta pax xyutj yaln 'a win schac'ajil yet' 'a win yoxc'ajil; 'ixta xyutj yaln 'a smasnil ewin 'et'jnac junjn monto no noc' cha:
—A yic 'oj e chanc e b'a yet' Esaú cha, jun lajnn̈ej tzeyutj eyalni. 20Tzeyaln 'ixtic: A 'a checb' Jacob, tza'n sjaw 'a qui patc on̈, xe chi 'a 'a, xchi win 'a ewin schecb' cha.
Yujto sna win Jacob 'ixtic: Tecn 'oj sicb'oc 'ejm yowl sc'ojl Esaú yuj jun tzo'n̈ siylab' xwac' b'ab'ljoc wuj tic, 'ixta 'oj wutc wiln in b'a yet'oc; toto 'ixta', tecn 'oj in scha 'a tzaljc'ojlal, xchi. 21'Ixta xyutj win Jacob ya'n b'ab'ljoc siylab' 'a yojltac, palta xcan to win junx 'ac'wl 'a scamplamento.
Xyac' win Jacob owl yet' jun Ángel
22-23A 'a yic jun 'ac'wl cha, xq'ue wan win Jacob, xya'n b'ab'ljoc win eb' 'ix yistzil schawn̈il, yet' eb' 'ix ya'mal servil eb' 'ix, yet' pax eb' yunnal yuxlchwan̈il, yet' smasnil tas 'ay 'a 'a, 'ix 'e't eb' 'a a a tzcuch Jaboc. 24Ax Jacob xcan sch'ocoj, 'ay jun winc xyac' owl yet' 'a jun 'ac'wl cha masnto sacb'i. 25Palta a jun winc cha, xyila chajtlto matz 'ejm win Jacob yu'uj, yuj cha, sma'n 'el yib'xub' winac, yic xya'n eb' owal. 26Xyaln 'ixtc 'a Jacob:
—'Actj in 'eli, yujto wan sacb'i, xchi. Xyaln win Jacob 'a 'a:
—Matz ach wactj 'eli, toto matz alcn junc wach' paxti 'a wib'an̈, xchi.
27—¿Tas a b'i? xchi jun winc cha.
—Jacob in b'i, xchi.
28Xyaln win 'a Jacob 'ixtic:
—A ticnec man̈x 'oj a b'ic Jacob. Palta Israel#Gn 32.28 A 'a hebreo, a Israel lajn yab'x 'icha jun paxti "tzyac' owl yet' Dios". 'oj a b'i'oc, yujto stac' 'a'n owl yet' Dios, yet' pax 'anma', xchi winac.
29—A ticnec al a b'i 'ayin, xchi Jacob 'a winac, yuj cha, xyaln win 'a 'ixtic:
—¿Tas yuj tza c'anb'j in b'i? xchi.
Xlajw cha, xyaln can win wach' paxti 'a yib'n̈ Jacob cha. 30Xya'n can Jacob sb'ic jun lugar chi Peniel,#Gn 32.30 A 'a hebreo, Peniel tzyal 'el'chi 'icha to tz'ilchj sat Dios. yujto xyal 'ixtic: Caw wal xwil Dios yet' in sat, palta 'in pitzn in to, xchi winac.
31Wan xo wal yec' win Jacob 'a Peniel cha, yic xq'uel c'u; yujto x'el xub' winac, caw tz'em sb'eyi. 32Yuj cha, a eb' yin̈tl Israel matz chi eb' yib'xub' no noc', yujto a 'a yib'xub' win Jacob yab'jnac syail.
Currently Selected:
Gn 32: CSS
Highlight
Share
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
